കണ്ണൂർ: വമ്പിച്ച നിലയിൽ നുണ പ്രചാരണങ്ങൾ നടക്കുന്ന കാലമാണിതെന്നും വസ്തുതകൾ ആളുകളിലേക്ക് എത്തിക്കാൻ ശ്രദ്ധ വേണമെന്നും മുഖ്യമന്ത്രി പിണറായി വിജയൻ. സംസ്ഥാനം വികസന കുതിപ്പിന്റെ പാതയിലാണ്. പൊതു വികസനത്തോടൊപ്പം നീങ്ങാൻ ഓരോ നാടിനും കഴിയണമെന്നും മുഖ്യമന്ത്രി പറഞ്ഞു.
ധർമ്മടം മണ്ഡലത്തിലെ തെരഞ്ഞെടുപ്പ് പ്രചാരണ പരിപാടിയിൽ സംസാരിക്കുകയായിരുന്നു അദ്ദേഹം. സ്ഥാനാർഥി എന്ന നിലയിൽ പരിമിതി ഉണ്ടായിട്ടുണ്ട്. പരമാവധി വോട്ടർമാരോട് സംവദിക്കാൻ കഴിഞ്ഞിട്ടില്ല. മറ്റുള്ള മണ്ഡലങ്ങളിൽ കൂടി പോകേണ്ടിയിരുന്നു. അത് മനസിലാക്കിയവരാണ് നിങ്ങൾ.
നാടിന്റെ എല്ലാ മേഖലകളിലും വികസന പ്രവർത്തനങ്ങൾ നടന്നു കഴിഞ്ഞു. ആധുനിക ലോകത്തിനൊപ്പം മുന്നേറാനുള്ള ശേഷി നമ്മുടെ നാടിനുണ്ടെന്ന് നാം തെളിയിച്ചു. ജനങ്ങൾ ഈ വികസന തുടർച്ചയ്ക്കൊപ്പമാണ്. ഈ തെരഞ്ഞെടുപ്പിൽ വീണ്ടും സ്ഥാനാർഥിയായി മത്സരിക്കണമെന്ന് എൽഡിഎഫ് തന്നോട് ആവശ്യപ്പെട്ടെന്നും മുഖ്യമന്ത്രി പറഞ്ഞു.
Tags : election pinarayi vijayan dharmadam ldf