മങ്കട: മലപ്പുറം പാർലമെന്‍റ് മണ്ഡലം യുഡിഎഫ് സ്ഥാനാർഥി ഇ.ടി. മുഹമ്മദ് ബഷീർ മങ്കട അസംബ്ലി മണ്ഡലത്തിൽ പൊതുജനങ്ങളെ നേരിട്ട് കണ്ട്, ആവേശത്തിരയിളക്കി വോട്ട് അഭ്യർഥിച്ചു കൊണ്ടുള്ള തെരഞ്ഞെടുപ്പ് പര്യടനം നടത്തി.
മോട്ടോർ ബൈക്കുകളിലും കാറുകളിലുമായി പ്രവർത്തകരുടെ അകമ്പടിയിൽ പ്രത്യേകം സജ്ജമാക്കിയ തുറന്ന വാഹനത്തിലാണ് സ്ഥാനാർഥി സഞ്ചരിച്ചത്. വള്ളിക്കാപറ്റ കാഞ്ഞമണ്ണയിലെ ക്രൗൺ ഓഡിറ്റോറിയത്തിൽ നാട്ടൊരുമയുടെ ഭാഗമായി സംഘടിപ്പിക്കപ്പെട്ട അയൽപ്പക്ക സംഗമത്തിൽ വച്ചാണ് പര്യടനത്തിന്‍റെ ഉദ്ഘാടനം നടന്നത്. കെ.പി. എ മജീദ് എംഎൽഎ പരിപാടി ഉദ്ഘാടനം ചെയ്തു. കെ വാസുദേവൻ നമ്പൂതിരിപ്പാട് അധ്യക്ഷത വഹിച്ചു.
വെണ്ണക്കോട്, പള്ളിപ്പുറം, കടുപ്പുറം, മക്കരപ്പറമ്പ് , അമ്പലപ്പറമ്പ് , കുഴിയേങ്ങൽപടി/വടക്കാങ്ങര, കിഴക്കേ കുളമ്പ്,മണ്ണാറമ്പ് , തുടങ്ങിയ സ്ഥലങ്ങളിൽ സ്ത്രീകളും കുട്ടികളും വയോജനങ്ങളും ധാരാളമായി പങ്കെടുത്ത വലിയ കുടുംബ സദസുകളിലൂടെയാണ് സ്ഥാനാർഥി സഞ്ചരിച്ചത്. പടിഞ്ഞാറ്റുമുറി, കാച്ചിനിക്കാട്, തിരൂർക്കാട്, വലമ്പൂർ, കൂട്ടിൽ-ചേരിയo ചോഴിപ്പടി, മങ്കട, കടന്നമണ്ണ, വേലുമ്പുലാക്കൽ, എന്നിവിടങ്ങളിൽ തെരുവ് യോഗങ്ങളിൽ സ്ഥാനാർഥി പ്രസംഗിച്ചു. സമകാലിക രാഷ്‌ട്രീയവിഷയങ്ങളും സാമൂഹ്യ പ്രശ്നങ്ങളും ഹാസ്യാത്മകമായി അവതരിപ്പിച്ച് കൊണ്ടുള്ള ഓട്ടം തുള്ളലും സ്ഥാനാർഥി ഇ.ടി. മുഹമ്മദ് ബഷീറിന്‍റെ നിയമസഭയിലെയും ലോകസഭയിലെയും പാർലമെന്‍ററി പ്രവർത്തനങ്ങൾ വരച്ചുകാട്ടുന്ന ഡോക്യുമെന്‍ററിയും പര്യടനത്തോടനുബന്ധിച്ച് പ്രദർശിപ്പിക്കപ്പെട്ടു.
മഞ്ഞളാംകുഴി അലി എംഎൽഎ, കെപിസിസി സെക്രട്ടറി കെ.പി. അബ്ദുൽ മജീദ്, മുസ്‌ലിം ലീഗ് സംസ്ഥാന വൈസ് പ്രസിഡന്‍റ് സി.പി. സൈതലവി, ജില്ലാ വൈസ് പ്രസിഡന്‍റ് ഉമ്മർ അറക്കൽ, എം. മൊയ്തു മാസ്റ്റർ, അഡ്വ. ടി. കുഞ്ഞാലി- കുന്നത്ത് മുഹമ്മദ്, പി. രാധാകൃഷ്ണൻ മാസ്റ്റർ, മാത്യു വർഗീസ്, ശശി മങ്കട, കുഞ്ഞിമോൻ കാക്കിയ, ഹനീഫ പെരിഞ്ചേരി , കെ. എസ് ഹനീഷ്, അമീർ പാതാരി, അഡ്വ. നജ്മ തബ്ഷീറ, എം. ഷാക്കിർ, സഫാനഷംന തുടങ്ങിയവർ പ്രസംഗിച്ചു. കോഴിക്കോട്ടു പറമ്പിൽ നടന്ന സമാപന പൊതുസമ്മേളനത്തിൽ സ്ഥാനാർഥി ഇ.ടി. മുഹമ്മദ് ബഷീർ, മഞ്ഞളാംകുഴി അലി എംഎൽഎ, കെ.എം. ഷാജി, ഉമ്മർ അറക്കൽ, ശശി മങ്കട, അഡ്വ. ടി. കുഞ്ഞാലി, അഡ്വ. കെ അസ്കർ അലി, അനീസ് വെള്ളില, അമീർ പാതാരി പ്രസംഗിച്ചു