പ്രതീകാത്മക ചിത്രം
ശ്രീനഗര്: ജമ്മു കാഷ്മീരിലെ കുല്ഗാമില് സുരക്ഷാ സേനയുമായുണ്ടായ ഏറ്റുമുട്ടലില് 15 ലക്ഷം രൂപ പാരിതോഷികം പ്രഖ്യാപിച്ചിരുന്ന ലഷ്കർ -ഇ-ത്വയ്ബ ഭീകരനെ വധിച്ചു. കുല്ഗാം ജില്ലയിലെ ദേവ്സര് മേഖലയിലുള്ള ജംഗല്പോറയില് ബുധനാഴ്ച രാവിലെയാണ് ഏറ്റുമുട്ടലുണ്ടായത്. ഖ്രേവന് ചഡര് സ്വദേശിയായ മുഹമ്മദ് ലത്തീഫ് ഭട്ട് (22)നെയാണ് വധിച്ചതെന്ന് ഔദ്യോഗിക വൃത്തങ്ങള് അറിയിച്ചു.
പ്രദേശത്ത് ഭീകരരുടെ സാന്നിധ്യമുണ്ടെന്ന കൃത്യമായ രഹസ്യവിവരത്തിന്റെ അടിസ്ഥാനത്തിലാണ് സുരക്ഷാ സേന ഇവിടെ പരിശോധന നടത്തിയത്. തുടര്ന്ന് ജംഗല്പോറയിലെ ഒരു മോസ്കിൽ ലത്തീഫ് ഒളിച്ചിരിക്കുന്നതായി കണ്ടെത്തുകയായിരുന്നു.
കീഴടങ്ങാന് സേന നിരന്തരം ആവശ്യപ്പെട്ടെങ്കിലും ഇയാള് ഇത് നിരസിക്കുകയും സുരക്ഷാ സേനയ്ക്ക് നേരെ വെടിയുതിര്ക്കുകയുമായിരുന്നു. തുടര്ന്നുണ്ടായ ശക്തമായ തിരിച്ചടിയിലാണ് ഇയാളെ വധിച്ചത്.
നിരവധി ഭീകരപ്രവര്ത്തനങ്ങളില് പങ്കാളിയായ ലത്തീഫിനെക്കുറിച്ച് വിവരം നല്കുന്നവര്ക്ക് ജമ്മു കാഷ്മീര് പൊലീസ് 15 ലക്ഷം രൂപ പാരിതോഷികം പ്രഖ്യാപിച്ചിരുന്നു. നവംബര് 11-ന് കുല്ഗാമില് സി.ആര്.പി.എഫ് ജവാന്മാര്ക്ക് നേരെ നടന്ന ആക്രമണത്തില് മൂന്ന് പേര്ക്ക് പരിക്കേറ്റിരുന്നു. ഈ ആക്രമണത്തിന് പിന്നില് ലത്തീഫാണെന്ന് ഉദ്യോഗസ്ഥര് വ്യക്തമാക്കി.
നവംബര് 16-ന് കുല്ഗാമിലെ ലര്നൂ ബൈപാസിനു സമീപം സുരക്ഷാ സേനയുമായുണ്ടായ ഏറ്റുമുട്ടലില് ലത്തീഫിന്റെ സഹായിയായ ഉമര് നിസാര് ഭട്ടും കൊല്ലപ്പെട്ടിരുന്നു. ഭീകരരുടെ സാന്നിധ്യം ഉറപ്പുവരുത്തിയതിനെ തുടര്ന്ന് ജംഗല്പോറയില് പ്രദേശം വളഞ്ഞുപിടിച്ചാണ് സുരക്ഷാ സേന ഓപ്പറേഷന് നടത്തിയത്. ഏറ്റുമുട്ടലിന് ശേഷം പ്രദേശത്ത് സുരക്ഷാ പരിശോധന തുടരുകയാണ്.
Tags : Encounter Kulgam Lashkar terrorist killed