കുപ്പിയിലാക്കിയ പാമ്പ്
അടൂർ: വീട്ടുമുറ്റത്ത് വച്ച് കടിച്ച മൂർഖൻ പാമ്പിനെ കുപ്പിയിലാക്കി ആശുപത്രിയിലെത്തിച്ച് വയോധികൻ. ചൊവ്വാഴ്ച വൈകിട്ട് അഞ്ചോടെ ആയിരുന്നു സംഭവം. 14ാം മൈൽ ഭാഗത്തുള്ള 75കാരനെ വീട്ടിലെ അലക്കുകല്ലിന് സമീപത്തുണ്ടായിരുന്ന തുണികൾക്കിടയിലുണ്ടായിരുന്ന പാമ്പ് കടിക്കുകയായിരുന്നു.
ചൂണ്ടുവിരലിലാണ് പാമ്പ് കടിയേറ്റത്. തുടർന്ന് കടിച്ച പാമ്പിനെ കുപ്പിയിലാക്കി ഇദ്ദേഹം അടൂർ ലൈഫ് ലൈൻ ആശുപത്രിയിലെത്തി ചികിത്സ തേടുകയായിരുന്നു. ആശുപത്രിയിലെ ക്രിട്ടിക്കൽ കെയർ മെഡിസിൻ വിഭാഗം മേധാവി ഡോക്ടർ ബെൻജു ഷാജി വർഗീസ്, കൺസൾട്ടന്റ് ഇന്റൻസിവിസ്റ്റ് ഡോ.എഫ്. ജമീൽ എന്നിവർ ചികിത്സയ്ക്ക് നേതൃത്വം നൽകി.
കൃത്യസമയത്ത് ചികിത്സ ലഭിച്ചതിനാൽ വയോധികന്റെ ആരോഗ്യനിലയിൽ ആശങ്കപ്പെടേണ്ടതില്ലെന്നാണ് വിവരം. അപകടനില തരണംചെയ്തു.
Tags : Adoor Cobra SnakeBite NewsUpdate Headlines