ബാബർ അസം
റാവൽപിണ്ടി: ശ്രീലങ്കയ്ക്കെതിരായ രണ്ടാം ക്രിക്കറ്റ് ടെസ്റ്റിലെ ആദ്യ ഇന്നിംഗ്സിൽ പാക്കിസ്ഥാൻ സൂപ്പർ താരം ബാബർ അസം പുറത്തായ രീതി ക്രിക്കറ്റ് ലോകത്തെ അമ്പരപ്പിച്ചിരിക്കുകയാണ്. സ്റ്റംപിലേക്ക് നീങ്ങിയ പന്ത് ബാബർ ലീവ് ചെയ്തതോടെയാണ് വിക്കറ്റ് നഷ്ടമായത്.
ലങ്കൻ പേസർ ലഹിരു കുമാരയുടെ പന്തിലാണ് പാക്കിസ്ഥാൻ നായകന്റെ വിക്കറ്റ് തെറിച്ചത്. ഒരു മുൻനിര ബാറ്ററിൽനിന്ന് ഒരിക്കലും പ്രതീക്ഷിക്കാത്ത പിഴവാണ് താരത്തിൽ നിന്ന് സംഭവിച്ചത്.
എന്തായാലും ബാബറിന്റെ വിക്കറ്റാണ് ഇപ്പോൾ ക്രിക്കറ്റ് ലോകത്തെ പ്രധാന വിഷയം. നൂറ്റാണ്ടിന്റെ ലീവ് എന്നാണ് ക്രിക്കറ്റ് പേജുകൾ സംഭവത്തെ വിശേഷിപ്പിക്കുന്നത്.
തൊട്ടതെല്ലാം പിഴയ്ക്കുന്നു
ബാബർ അസമിന്റെ നിലവിലെ ഫോമാണ് പുറത്താക്കലിന് കാരണമായതെന്നാണ് ക്രിക്കറ്റ് വിദഗ്ധർ പറയുന്നത്. മോശം ഫോം കാരണമാണ് ബാബറിന് സ്വന്തം നാട്ടിലെ പിച്ചിൽപ്പോലും പന്തിനെ റീഡ് ചെയ്യാൻ കഴിയാത്തതിന് കാരണമെന്നാണ് വിലയിരുത്തൽ.
സാക്ഷാൽ വിരാട് കോഹ്ലിയുടെ പാക്കിസ്ഥാൻ പതിപ്പെന്ന് വിശേഷിപ്പിച്ചിരുന്നു ബാബറിന്റെ പ്രകടനത്തിൽ ആരാധകർ ഒന്നടങ്കം നിരാശയിലാണ്. ഒരുക്കാലത്ത് സെഞ്ച്വറി അടിച്ചുകൂട്ടിയിരുന്ന ബാബറിന്റെ ബാറ്റിൽ നിന്ന് ഒരു ടെസ്റ്റ് സെഞ്ച്വറി പിറന്നിട്ട് നാലുവർഷമായി.
നിശ്ചിത ഓവർ മത്സരങ്ങളുടെ കണക്കെടുത്താലും കാര്യങ്ങൾ വ്യത്യസ്തമല്ല. ഒരു സെഞ്ച്വറി മാത്രമാണ് താരത്തിന് മൂന്ന് വർഷത്തിനിടയിൽ നേടാനായത്.
മോശം ശരാശരിയും പ്രഹരശേഷിയും
ട്വന്റി - 20 ടീമിൽ നിന്ന് സ്ഥാനം നഷ്ടപ്പെട്ട ബാബറിന്റെ ഏകദിനത്തിലെ ഈ വർഷത്തെ പ്രഹരശേഷി 68.80 മാത്രമാണ്. താരത്തിന്റെ ബാറ്റിംഗ് ശരാശരിയിലും കടുത്ത ഇടിവാണ് ഉണ്ടായിരിക്കുന്നത്.
2019 - 22 കാലയളവിൽ 70ന് മുകളിൽ ശരാശരിയുണ്ടായിരുന്ന താരത്തിന്റെ 2026ലെ ശരാശരി 30 മാത്രമാണ്.
ഫോം വീണ്ടെടുക്കാൻ ?
താരത്തിന് ഫോം വീണ്ടെടുക്കണമെങ്കിൽ വിദേശത്ത് പോയി പരിശീലനം നേടണമെന്ന് പാക്കിസ്ഥാൻ മുൻ നായകൻ മുഹമ്മദ് യൂസഫ് പറഞ്ഞു.
വിദേശത്തെ വെല്ലുവിളി നിറഞ്ഞ പിച്ചുകളിലും സാഹചര്യങ്ങളിലും പരിശീലിക്കുന്നതിലൂടെ ബാബറിന്റെ ആത്മവിശ്വാസം വർധിക്കുമെന്നും റൺസ് കണ്ടെത്താൻ സാധിക്കുമെന്നും മുഹമ്മദ് യൂസഫ് പറഞ്ഞു.
ബാബർ ക്രിക്കറ്റിൽ നിന്ന് ചെറിയ ഒരു ഇടവേളയെടുത്ത് മനസിനെ ശാന്തമാക്കി കളത്തിലേക്ക് തിരിച്ചുവരണമെന്നാണ് ഓസീസ് ഇതിഹാസം റിക്കി പോണ്ടിംഗിന്റെ നിർദേശം.
ഏകദിന ലോകകപ്പും പാക്കിസ്ഥാന്റെ ഭാവിയും
അടുത്ത വർഷം നടക്കുന്ന ഏകദിന ലോകകപ്പിൽ പാക്കിസ്ഥാന്റെ സാധ്യതകൾ നിർണയിക്കുന്നതിൽ ബാബർ അസമിന്റെ ഫോം നിർണായകമാകും.
എന്തായാലും ലോകകപ്പിന് മുമ്പായി താരം ഫോമിലേക്ക് തിരിച്ചെത്തണമെന്നാണ് പാക്കിസ്ഥാൻ ആരാധകർ പ്രതീക്ഷിക്കുന്നത്.
Tags : BabarAzam PakistanCricket FormOut ViratKohli Century