ഇൻഡോർ: ഇൻഡോറിലെ സംഗീത പരിപാടിയിൽ വിലക്കുകൾ ഏർപ്പെടുത്തിയ സംഭവത്തിൽ രൂക്ഷ പ്രതികരണവുമായി ഗായകൻ ദിൽജിത്ത് ദോസഞ്ജ്. പരിപാടി തടയാൻ പലവിധ ശ്രമങ്ങളും നടന്നുവെന്ന് വ്യക്തമാക്കിയ അദ്ദേഹം, ആരുടെയും ഭീഷണികൾക്ക് മുന്നിൽ പതറില്ലെന്ന് വേദിയിൽ തുറന്നടിച്ചു.
‘ഇന്ത്യ ആരുടെയും അച്ഛന്റെ വകയല്ല' എന്നർഥം വരുന്ന അന്തരിച്ച പ്രശസ്ത കവി റാഹത്ത് ഇൻഡോറിയുടെ ഉർദു ഗസൽ ആലപിച്ചുകൊണ്ടായിരുന്നു ഗായകന്റെ മറുപടി. ദിൽജിത്തിന്റെ ‘ഓറ ഇന്ത്യ ടൂർ 2026’-ന്റെ ഭാഗമായി ഇൻഡോറിലെ ബൈപ്പാസ് ‘ഡിലൈറ്റ് ദസ്തൂർ’ ഗ്രൗണ്ടിലായിരുന്നു പരിപാടി നിശ്ചയിച്ചിരുന്നത്.
എന്നാൽ ലഹരിയും അക്രമവും പ്രോത്സാഹിപ്പിക്കുന്ന വരികളുണ്ടെന്ന് ചൂണ്ടിക്കാട്ടി ‘പട്യാല പെഗ്’, ‘5 താര’, ‘ജീബ് വിച്ചോ അഫീം’, ‘ജാട്ട് ഉത്തെ ഫയർ കർദ’ എന്നീ നാല് പാട്ടുകൾക്ക് വനിതാ-ശിശു വികസന വകുപ്പ് വിലക്കേർപ്പെടുത്തിയിരുന്നു. ഇതിനുപുറമേ, പരിപാടി അട്ടിമറിക്കാൻ ലക്ഷ്യമിട്ട് മേയറുടെ ഓഫിസിലേക്കും മറ്റ് സ്ഥാപനങ്ങളിലേക്കും വ്യാജ ബോംബ് ഭീഷണി സന്ദേശങ്ങളും എത്തിയിരുന്നു.
പ്രതിസന്ധികൾക്കും കനത്ത നിയന്ത്രണങ്ങൾക്കുമൊടുവിൽ മണിക്കൂറുകൾക്ക് മുന്പ് ലഭിച്ച പ്രത്യേകാനുമതിയോടെയാണ് പരിപാടി വിജയകരമായി പൂർത്തിയായത്. മുന്നൂറിലധികം പോലീസുകാരവിന്യസിച്ചുകൊണ്ട് പരിപാടിക്ക് കനത്ത സുരക്ഷയൊരുക്കിയിരുന്നു. ഡിസംബർ 20 വരെ രാജ്യത്തിന്റെ വിവിധ ഭാഗങ്ങളിൽ നിശ്ചയിച്ചിട്ടുള്ള തന്റെ എല്ലാ സംഗീത പരിപാടികളും യാതൊരു തടസവുമില്ലാതെ നടക്കുമെന്നും ദിൽജിത്ത് പ്രതികരിച്ചു.
Tags : Singer Diljit Dosanjh ban Diljit Dosanjh Concert Reaction