തൃശൂർ പൂരം(ഫയൽ ചിത്രം)
തൃശൂർ: തൃശൂർ പൂരത്തിന്റെ നടത്തിപ്പുമായി ബന്ധപ്പെട്ട വിവാദങ്ങളിൽ പുതിയ വഴിതിരിവ്. പൂരം കലക്കലിൽ അന്വേഷണം നടത്താൻ പുതിയ സമിതിയെ നിയോഗിക്കേണ്ടതില്ലെന്ന് തീരുമാനമായി. നിലവിൽ ക്രൈംബ്രാഞ്ച് മേധാവി എച്ച്. വെങ്കിടേഷിന്റെ നേതൃത്വത്തിലുള്ള സംഘം തന്നെ കേസിൽ ആവശ്യമായ തുടർപരിശോധനകൾ പൂർത്തിയാക്കും. സംസ്ഥാന പോലീസ് മേധാവി റവാഡ ചന്ദ്രശേഖർ നേരിട്ട് ഇവർക്ക് ആവശ്യമായ മാർഗനിർദേശങ്ങൾ നൽകും.
പൂരച്ചടങ്ങുകൾ അട്ടിമറിച്ചതിന് പിന്നിൽ തിരുവമ്പാടി വിഭാഗത്തിന് പങ്കുണ്ടെന്നായിരുന്നു പ്രാരംഭ അന്വേഷണ റിപ്പോർട്ടിലെ പ്രധാന കണ്ടെത്തൽ. എന്നാൽ, ഈ ഗുരുതര ആരോപണങ്ങളെ പിന്തുണയ്ക്കുന്ന ശക്തമായ തെളിവുകളോ രേഖകളോ റിപ്പോർട്ടിൽ വ്യക്തമല്ലെന്ന് ചൂണ്ടിക്കാട്ടി ആഭ്യന്തര വകുപ്പ് ഫയൽ തിരിച്ചയച്ചിരുന്നു. ഇതിന്റെ അടിസ്ഥാനത്തിലാണ് നിലവിലുള്ള ഉദ്യോഗസ്ഥരെക്കൊണ്ട് തന്നെ കൂടുതൽ പരിശോധനകൾ നടത്താൻ തീരുമാനിച്ചത്.
പൂരത്തിന്റെ സുരക്ഷാക്രമീകരണങ്ങളിലും നിയന്ത്രണങ്ങളിലും ഉള്ള അതൃപ്തിയാണ് തിരുവമ്പാടി ദേവസ്വം ഭാരവാഹികളെ ഇതിലേക്ക് നയിച്ചതെന്നായിരുന്നു അന്വേഷണ സംഘത്തിന്റെ നിഗമനം. ഇതിന്റെ അടിസ്ഥാനത്തിൽ കലാപാഹ്വാനവും ഇരു വിഭാഗങ്ങൾക്കിടയിൽ ഭിന്നത ഉണ്ടാക്കാൻ ശ്രമിച്ചുവെന്നും ആരോപിച്ച് എട്ട് ഭാരവാഹികൾക്കെതിരെ കുറ്റം ചുമത്താൻ ശിപാർശ ചെയ്തിരുന്നു.
എന്നാൽ, റിപ്പോർട്ട് സമർപ്പിച്ച് മാസങ്ങൾ കഴിഞ്ഞിട്ടും നടപടികൾ വൈകിയതും ഇതിനു പിന്നിൽ ഉന്നതതല രാഷ്ട്രീയ ഇടപെടലുകൾ ഉണ്ടെന്ന ആക്ഷേപവും ഏറെ ചർച്ചയായിരുന്നു. മുൻ എഡിജിപി എം.ആർ അജിത് കുമാറിന്റെ ഭാഗത്തുനിന്നുണ്ടായ വീഴ്ചകളെക്കുറിച്ചും വിവിധ കോണുകളിൽ നിന്ന് വിമർശനങ്ങൾ ഉയർന്നിരുന്നു. ആഭ്യന്തര വകുപ്പിന്റെ പുതിയ ഇടപെടലിന്റെ പശ്ചാത്തലത്തിൽ കേസിന്റെ വരും ദിവസങ്ങളിലെ പുരോഗതി അതീവ നിർണായകമാകും.
Tags : Thrissur Pooram Pooram Disruption Investigation MR Ajith Kumar