ചണ്ഡിഗഡ്: പഞ്ചാബിലെ ലൗലി സർവകലാശാലയുടെ നിയന്ത്രണം ഏറ്റെടുത്ത് പൊലിസ്. ക്യാമ്പസിൽ 2000 ലധികം പൊലിസുകാരെ വിന്യസിച്ച സർവകലാശാലയിൽ പൊലിസ് ഫ്ലാഗ് മാർച്ച് നടത്തി. സർവകലാശാല 10 ദിവസത്തേക്ക് അടച്ചിരിക്കുകയാണ്. ഹോസ്റ്റലിൽ സുരക്ഷിതമായി തുടരാനും പുറത്ത് ഇറങ്ങരുതെന്നും വിദ്യാർഥികൾക്ക് നിർദേശം നൽകി.
ഹോസ്റ്റലിൽ വിദ്യാർഥിനി പീഡിപ്പിക്കപ്പെട്ടെന്ന ശബ്ദ സന്ദേശം പ്രചരിച്ചതിന് പിന്നാലെയാണ് പഞ്ചാബിലെ ലൗലി സർവകലാശാല ക്യാമ്പസിൽ സംഘർഷമുണ്ടായത്. സർവകലാശാലയുടെ ഹോസ്റ്റലിൽ വച്ച് വിദ്യാർഥിനിയെ അവിടെ ജോലിക്കെത്തിയ ഇലക്ട്രീഷ്യൻ പീഡിപ്പിച്ചെന്നായിരുന്നു പ്രചാരണം. സംഭവം പുറത്തു വരാതിരിക്കാൻ സർവകലാശാല പെൺകുട്ടിയെ നിർബന്ധിച്ച് വീട്ടിലേക്ക് അയച്ചുവെന്ന് സന്ദേശങ്ങൾ പ്രചരിച്ചു.
ശബ്ദസന്ദേശം വ്യാപകമായി പ്രചരിച്ചതോടെ ക്യാമ്പസിൽ കഴിഞ്ഞ ദിവസം പുലർച്ചെ മുതൽ വലിയ സംഘർഷമുണ്ടായി. പ്രധാന കെട്ടിടങ്ങളിലെ ജനൽ ചില്ലുകളും മറ്റും വിദ്യാർഥികൾ അടിച്ച് തകർത്തു. തുടർന്ന് സ്ഥലത്തെത്തിയ പൊലിസുമായി വിദ്യാർഥികൽ ഏറ്റുമുട്ടി. പൊലിസ് വാഹനങ്ങൾ സംഘർഷത്തില് തകർന്നു. നിരവധി പോലീസ് ഉദ്യോഗസ്ഥർക്ക് പരിക്കേറ്റിട്ടുണ്ടെന്നാണ് വിവരം.
സംഭവത്തിൽ നിരവധി വിദ്യാർഥികളെ പൊലിസ് കസ്റ്റഡിയിലെടുത്തു. പെണ്കുട്ടി പീഡിപ്പിക്കപ്പെട്ടു എന്ന പ്രചാരണം വ്യാജമാണെന്നും ഒരു വിദ്യാർഥിക്ക് പോലും മോശം അനുഭവം ഉണ്ടായിട്ടില്ലെന്നും സർവകലാശാല പ്രസ്താവനയിൽ അറിയിച്ചു. അതിനിടെ ശബ്ദ സന്ദേശത്തിന്റെ ഉറവിടത്തെക്കുറിച്ച് പൊലിസ് അന്വേഷണം തുടങ്ങി. വിദ്യാർഥികൾക്ക് പുറമെ പുറത്ത് നിന്നുള്ളവരും സംഘർഷത്തിൽ ഉൾപ്പെട്ടിട്ടുണ്ടെന്ന സംശയം പൊലിസിനുണ്ട്. സംഭവത്തിൽ ഗൂഢാലോചനയുണ്ടോ എന്നും പരിശോധിക്കുകയാണ്.
സ്ഥിതിഗതികൾ നിയന്ത്രണ വിധേയമാണെന്ന് ജലന്തർ ഡിഐജി നവീൻ സിങ്കള അറിയിച്ചു. സംഘർഷത്തെതുടർന്ന് അടച്ചിട്ട ദേശീയപാത-44 ഉടൻ തുറക്കും.
Tags : Tension Lovely University Police Deepika DeepikaNewspaper BreakingNews NewsUpdate Headlines CurrentAffairs DailyNews InDepth NewsFlash