19

മഹാരാഷ്ട്രയിലെ ഒരു കുടുംബം തങ്ങളുടെ കുഞ്ഞിന്‍റെ പേരിടൽ ചടങ്ങ് ക്രിക്കറ്റ് ആവേശത്താൽ അവിസ്മരണീയമാക്കിയ വാർത്തയാണിപ്പോൾ സമൂഹമാധ്യമങ്ങളിൽ ശ്രദ്ധ നേടുന്നത്.

പരമ്പരാഗതമായ ചടങ്ങുകളെ ആധുനിക കാലത്തെ സ്പോർട്സ് ആരാധനയുമായി കോർത്തിണക്കിയ ഈ വേറിട്ട ആഘോഷം ഗൗരി മഹാദിക് എന്ന യുവതി ഇൻസ്റ്റാഗ്രാമിലൂടെ പങ്കുവെച്ചതോടെയാണ് പുറംലോകം അറിഞ്ഞത്.

ബന്ധുക്കളും സുഹൃത്തുക്കളും നിറഞ്ഞാഘോഷിച്ച ചടങ്ങിൽ, പൂക്കളാൽ അലങ്കരിച്ച വേദിയിൽ വെച്ചായിരുന്നു ആ വെളിപ്പെടുത്തൽ. കുഞ്ഞിനെ അമ്മ ചേർത്തുപിടിച്ചപ്പോൾ, പിതാവ് കൈയ്യിലുണ്ടായിരുന്ന റോയൽ ചലഞ്ചേഴ്സ് ബംഗളൂരുവിന്‍റെ ജേഴ്സി സദസിന് മുന്നിൽ നിവർത്തിക്കാണിച്ചു.

അതിൽ തുന്നിച്ചേർത്ത 'വിരാട്' എന്ന പേര് കണ്ടതോടെ സദസിൽ കരഘോഷങ്ങളും ആവേശവും ഉയർന്നു. ഇന്ത്യൻ ക്രിക്കറ്റ് ഇതിഹാസം വിരാട് കോലിയോടുള്ള കടുത്ത ആരാധനയാണ് തങ്ങളുടെ മകന് ഈ പേര് നൽകാൻ മാതാപിതാക്കളെ പ്രേരിപ്പിച്ചത്.

ഭാരതീയ സംസ്കാരത്തിൽ പേരിടൽ ചടങ്ങുകൾ മതപരമായ ചട്ടക്കൂടുകളിൽ ഒതുങ്ങാറാണ് പതിവെങ്കിലും, പുതിയ കാലത്തെ മാതാപിതാക്കൾ തങ്ങളുടെ ഇഷ്ടങ്ങളും സ്വപ്നങ്ങളും കൂടി ഇത്തരം ആഘോഷങ്ങളിൽ ഉൾപ്പെടുത്തുന്നു എന്നതിന്‍റെ മനോഹരമായ കാഴ്ചയായിരുന്നു ഇത്.

പരമ്പരാഗത വസ്ത്രമണിഞ്ഞു മാതാപിതാക്കളുടെ കൈകളിൽ ശാന്തനായിരുന്ന കുഞ്ഞ് വിരാട് ഇതിനോടകം തന്നെ സോഷ്യൽ മീഡിയയിലെ താരമായി മാറി.

ക്രിക്കറ്റിനെ ഒരു കായിക വിനോദത്തിനപ്പുറം വികാരമായി കാണുന്ന ഇന്ത്യയിലെ ലക്ഷക്കണക്കിന് ആരാധകർക്ക് ഈ വീഡിയോ വലിയൊരു ആവേശമായി മാറി.

Tags : ViratKohli RCB CricketFandom NamingCeremony TrendingNews