19

ഇന്തോനേഷ്യയിലെ ബാലിയിൽ പച്ചപ്പണിഞ്ഞ നെൽപ്പാടങ്ങൾക്കിടയിൽ പണിയെടുത്തു കൊണ്ടിരുന്ന കർഷകർക്ക് ഇടയിലേക്ക് അപ്രതീക്ഷിതമായി ഒരു ലോകപ്രശസ്ത പോപ്പ് ഗായിക എത്തിയാൽ എങ്ങനെയുണ്ടാകും? കേൾക്കുമ്പോൾ അതിശയം തോന്നാമെങ്കിലും ഇത്തരമൊരു കാഴ്ചയാണ് ഇപ്പോൾ ആഗോളതലത്തിൽ തരംഗമായിക്കൊണ്ടിരിക്കുന്നത്.

പക്ഷികളെ തുരത്താൻ സാധാരണയായി ഉപയോഗിക്കുന്ന വൈക്കോൽ രൂപങ്ങൾക്കും പ്ലാസ്റ്റിക് കവറുകൾക്കും പകരം അമേരിക്കൻ ഗായിക ബിയോൺസെയുടെ കൂറ്റൻ കട്ടൗട്ടുകളാണ് ബാലിയിലെ കർഷകർ തങ്ങളുടെ കൃഷിയിടങ്ങളിൽ കാവലിനായി നിർത്തിയിരിക്കുന്നത്.

വിനോദസഞ്ചാരികളിൽ ഒരാൾ പകർത്തിയ ഈ ദൃശ്യങ്ങൾ പബിറ്റി എന്ന പ്രശസ്തമായ ഇൻസ്റ്റാഗ്രാം പേജ് പങ്കുവെച്ചതോടെയാണ് ലോകം ഈ അപൂർവ്വമായ 'പേടിപ്പിക്കൽ' വിദ്യയെക്കുറിച്ച് അറിഞ്ഞത്. വെള്ളയും കറുപ്പും നിറത്തിലുള്ള വസ്ത്രമണിഞ്ഞ് ഗാംഭീര്യത്തോടെ നിൽക്കുന്ന ബിയോൺസെയുടെ ഈ രൂപം കണ്ടാൽ ഒരു നിമിഷം ആരും വിശ്വസിച്ചു പോകും.

ആധുനിക പോപ്പ് സംസ്കാരത്തെ കർഷകർ തങ്ങളുടെ ഉപജീവനമാർഗമായ കൃഷിയുമായി എങ്ങനെ ക്രിയാത്മകമായി ബന്ധിപ്പിച്ചു എന്നതിന്‍റെ ഉത്തമ ഉദാഹരണമായി ഈ സംഭവം മാറിക്കഴിഞ്ഞു. സോഷ്യൽ മീഡിയയിൽ ഈ ദൃശ്യങ്ങൾ എത്തിയതോടെ രസകരമായ പ്രതികരണങ്ങളുടെ പ്രവാഹമാണ് ഉണ്ടായത്.

ബിയോൺസെയുടെ വലിപ്പവും പ്രഭാവവും കണ്ടാൽ പക്ഷികൾ പേടിച്ചു പോകുന്നതിന് പകരം അവരുടെ ഷോ കാണാനായി കാത്തുനിൽക്കുമെന്നും ചിലർ പരിഹസിക്കുന്നു. കൃഷിയിടത്തിൽ ബ്ലൂടൂത്ത് സ്പീക്കർ കൂടി വെച്ച് ഗായികയുടെ പ്രശസ്തമായ ഗാനങ്ങൾ പ്ലേ ചെയ്താൽ സംഗതി കൂടുതൽ ഗംഭീരമാകുമെന്ന് മറ്റു ചിലർ അഭിപ്രായപ്പെടുന്നു.

വരിതെറ്റാതെ പാടുന്ന ഗായികയെ കാണുമ്പോൾ പക്ഷികൾ ബഹുമാനപൂർവ്വം അവിടെ നിന്ന് സ്ഥലം വിടുമെന്നാണ് പലരും തമാശരൂപേണ കുറിക്കുന്നത്. സാധാരണയായി കൃഷിയിടങ്ങളിൽ ഉപയോഗിക്കുന്ന വിരസമായ രീതികൾക്ക് പകരം ഇത്തരമൊരു കൗതുകകരമായ മാറ്റം കൊണ്ടുവന്ന ബാലിയിലെ കർഷകരുടെ ബുദ്ധിക്ക് ഇപ്പോൾ കയ്യടിക്കുകയാണ് ലോകം.

Tags : Beyonce ViralVideo BaliDiaries QueenBey TrendingNews