23

ഇന്ത്യയിലെ സാഹസിക ടൂറിസത്തിന്‍റെ സുരക്ഷാ വീഴ്ചകളിലേക്ക് വിരൽചൂണ്ടി സമൂഹമാധ്യമങ്ങളിൽ പ്രചരിക്കുന്ന പാരാഗ്ലൈഡിംഗ് വീഡിയോ വലിയ ചർച്ചയാകുന്നു.

ആകാശത്ത് ആസ്വദിച്ച് പറക്കുന്ന യുവതിയുടെ ദൃശ്യങ്ങളുമായി ആരംഭിക്കുന്ന വീഡിയോ, പെട്ടെന്നുതന്നെ നിയന്ത്രണം നഷ്ടപ്പെട്ട് പാരാഗ്ലൈഡർ മരങ്ങളിലേക്ക് ഇടിച്ചുകയറുന്ന ഭയാനകമായ നിമിഷങ്ങളിലാണ് അവസാനിക്കുന്നത്.

ഈ വീഡിയോ സമൂഹമാധ്യമങ്ങളിൽ പങ്കുവെച്ചുകൊണ്ട് ഇന്ത്യയിലെ സാഹസിക വിനോദങ്ങളിലെ സുരക്ഷാ പോരായ്മകളെക്കുറിച്ച് കടുത്ത മുന്നറിയിപ്പാണ് ഉയരുന്നത്.

യാതൊരു വിധത്തിലുള്ള നിയന്ത്രണങ്ങളുമില്ലാതെയാണ് പലയിടത്തും ഇത്തരം സാഹസിക പ്രവർത്തനങ്ങൾ നടക്കുന്നതെന്നും, പണം മാത്രം ലക്ഷ്യമാക്കി പ്രവർത്തിക്കുന്ന സംഘാടകർ സുരക്ഷാ മാനദണ്ഡങ്ങളോ ഇൻഷുറൻസോ ഉപകരണങ്ങളുടെ ഗുണനിലവാരമോ ഉറപ്പാക്കാറില്ലെന്നും വിമർശകർ ചൂണ്ടിക്കാട്ടുന്നു.

ഇത്തരം അപകടങ്ങൾ സംഭവിക്കുമ്പോൾ പലരും അത്ഭുതകരമായാണ് രക്ഷപ്പെടാറുള്ളതെങ്കിലും എല്ലാവർക്കും അത്രയും ഭാഗ്യം ലഭിക്കണമെന്നില്ല. സാഹസിക യാത്രകളിൽ ഏർപ്പെടുന്നവർ സംഘാടകരുടെ പരിചയസമ്പത്തും കൃത്യതയും മുൻകൂട്ടി പരിശോധിച്ച് ഉറപ്പുവരുത്തേണ്ടത് അത്യാവശ്യമാണെന്നും ഈ വീഡിയോ മുന്നറിയിപ്പ് നൽകുന്നു.

മികച്ച അടിസ്ഥാന സൗകര്യങ്ങൾ ലഭിക്കാത്ത ഇടങ്ങളിൽ അമിതാവേശം കാണിച്ച് ജീവൻ പണയം വെക്കുന്നതിനെതിരെയുള്ള ശക്തമായ താക്കീതാണ് ഇപ്പോൾ നടക്കുന്ന ചർച്ചകൾ.

Tags : AdventureTourism Paragliding TravelSafety IndiaTravel AdventureSports