Home   | Editorial   | Latest News   | Local News   | Kerala   | National   | International   | Business   | Sports   | Obituary   | NRI News   | Movies   | Health
May 20, 2018
 
 
    
 
Print this page
 

എല്‍ കാര്‍മെനില്‍ കോര്‍ടെസിനു മരണമില്ല

ഗ്രിഗോറിയോസ് കോര്‍ടെസ്. അധികാരികളുടെ കണ്ണില്‍ ഒരു കൊലയാളിയായിരുന്നു ഈ ചെറുപ്പക്കാരന്‍. എന്നാല്‍, സ്വന്തം ജനങ്ങളുടെ മുന്നിലാകട്ടെ അയാള്‍ ഒരു ധീരപോരാളിയും. അമേരിക്കയുടെ തെക്കുപടിഞ്ഞാറന്‍ അതിര്‍ത്തിപ്രദേശത്ത് ഇപ്പോഴും കോര്‍ടെസിന്റെ നാമം വീരാരാധനയോടെ സ്മരിക്കപ്പെടുന്നു.

കോര്‍ടെസിന് ഒരു സഹോദരനുണ്ടായിരുന്നു-റോമന്‍. അവര്‍ ഇരുവരും ഒരുമിച്ചു താമസിച്ചു; ഒന്നിച്ചു കൃഷിയിറക്കി; ഒറ്റക്കെട്ടായി നിലകൊണ്ടു. വേട്ടയ്ക്ക് ഇരുവരും സമര്‍ഥരായിരുന്നു. എങ്കിലും ഉന്നംപിഴയ്ക്കാതെ വെടിവയ്ക്കുന്നതില്‍ കോര്‍ടെസായിരുന്നു കേമന്‍. തോക്കുകള്‍ കൈകാര്യം ചെയ്യുന്നതില്‍ കോര്‍ടെസിനുണ്ടായിരുന്ന സാമര്‍ഥ്യത്തെക്കുറിച്ച് ആളുകളുടെ ഇടയില്‍ വലിയ മതിപ്പായിരുന്നു.

റോമന്റെ പ്രത്യേകത അയാള്‍ ഒരു രസികന്‍ ആണെന്നുള്ളതായിരുന്നു. ആരോടും തമാശ പറയും. അവരെ കളിയാക്കും. ചിലപ്പോള്‍ അവരെ വിഡ്ഢികളുമാക്കും. ഒരിക്കല്‍ ഒരാള്‍ റോമനോടു തങ്ങളുടെ ഓരോ കുതിരയെ പരസ്പരം വച്ചുമാറാന്‍ അഭ്യര്‍ഥിച്ചു. അയാള്‍ ആവശ്യപ്പെട്ടതുപോലെ റോമന്‍ ചെയ്തു. പക്ഷേ, റോമന്‍ നല്കിയത് ഒരു മുടന്തന്‍ കുതിരയെയായിരുന്നു. അതു പിന്നീടു കേസായി. കേസന്വേഷിക്കുവാന്‍ ഒരു പൊലീസ് ഓഫീസര്‍ എത്തി.

റോമന്‍ ആ ഓഫീസറെയും കളിയാക്കാന്‍ ശ്രമിച്ചു. അപ്പോള്‍ അയാള്‍ കുപിതനായി റോമനു നേരെ നിറയൊഴിച്ചു. ഉടനെ കോര്‍ടെസും തോക്കെടുത്തു. അപ്പോള്‍ ഓഫീസര്‍ കോര്‍ടെസിന്റെ നേരെയും നിറയൊഴിച്ചു. പക്ഷേ, അതു ലക്ഷ്യംകൊണ്ടില്ല.

എന്നാല്‍, സ്വന്തം സഹോദരന്റെ ജീവന്‍ രക്ഷിക്കുവാന്‍വേണ്ടി കോര്‍ടെസ് നിറയൊഴിച്ചപ്പോള്‍ അതു ലക്ഷ്യംകൊണ്ടു. ആ ഓഫീസര്‍ അവിടെ മരിച്ചുവീണു. കോര്‍ടെസ് കൊലയാളിയായി പെട്ടെന്നു മുദ്രയടിക്കപ്പെട്ടു. പോലീസ് അയാളെ തേടിയിറങ്ങി. എന്നാല്‍ കോര്‍ടെസ് അതിവേഗം അവിടെനിന്നു രക്ഷപ്പെട്ടു. കോര്‍ടെസ് രക്ഷപ്പെട്ടപ്പോള്‍ അധികാരികള്‍ റോമനെ ജയിലിലടച്ചു. വെടിയേറ്റിരുന്നെങ്കിലും റോമന്റെ മുറിവു മാരകമല്ലായിരുന്നു. അയാള്‍ ജയിലില്‍ നരകിച്ചു കഴിഞ്ഞുകൂടി.

കോര്‍ടെസിനെ കണ്ടുപിടിക്കുന്നതില്‍ പോലീസ് പരാജയപ്പെട്ടപ്പോള്‍ അയാളുടെ തലയ്ക്ക് ആയിരം ഡോളര്‍ പോലീസ് പ്രഖ്യാപിച്ചു. പക്ഷേ കോര്‍ടെസിനേക്കുറിച്ചുള്ള വിവരം നല്കാന്‍ ആരും മുന്നോട്ടു വന്നില്ല. ഇതിനിടയില്‍ കോര്‍ടെസിന്റെ അമ്മയേയും ഭാര്യയേയും കുട്ടികളെയും പോലീസ് അറസ്റ്റു ചെയ്തിരുന്നു.

കോര്‍ടെസ് ഒളിച്ചുതാമസിക്കുന്ന അവസരത്തില്‍ സ്വന്തം പട്ടണത്തില്‍നിന്നുള്ള ഒരാളെ വഴിയില്‍വച്ചു കണ്ടു. അയാള്‍ കോര്‍ടെസിനോടു പറഞ്ഞു: ''നീ രക്ഷപ്പെട്ടു, അല്ലേ?'' കോര്‍ടെസ് പുഞ്ചിരിച്ചു. ഉടനേ നാട്ടുകാരന്‍ പറഞ്ഞു. ''എന്നാല്‍ നിന്റെ സഹോദരന്‍ രക്ഷപ്പെട്ടില്ല. അയാള്‍ ജയിലില്‍വച്ചു മരിച്ചു.'' കുറെക്കഴിഞ്ഞപ്പോള്‍ കോര്‍ടെസ് വേറൊരു പരിചയക്കാരനെ കണ്ടു. അയാള്‍ കോര്‍ടെസിനോടു പറഞ്ഞു: ''നിന്റെ അമ്മയും ഭാര്യയുമൊക്കെ ജയിലിലാണിപ്പോള്‍.''

''അവരെ അറസ്റ്റു ചെയ്യുവാന്‍ അവര്‍ എന്തു തെറ്റുചെയ്തു.'' കോര്‍ടെസ് ഹൃദയവേദനയോടെ ചോദിച്ചു. പരിചയക്കാരന്‍ പറഞ്ഞു: ''അവര്‍ നിന്റെ സ്വന്തക്കാരായതുകൊണ്ട്.'' കോര്‍ടെസ് അവിടെനിന്നു നടന്നു. അപ്പോള്‍ വേറൊരാള്‍ അയാളോടു പറഞ്ഞു: ''നീ ഒളിച്ചോടിയതിനുശേഷം നാട്ടുകാരെ മുഴുവന്‍ പോലീസ് പീഡിപ്പിക്കുകയാണ്. നിന്റെ പേരില്‍ പോലീസ് എല്ലാവരെയും ദ്രോഹിക്കുന്നു.''

''ഇക്കാര്യം ഞാന്‍ അറിഞ്ഞിരുന്നില്ല.'' കോര്‍ടെസ് കണ്ണീരോടെ പറഞ്ഞു. കോര്‍ടെസ് പിന്നെ അവിടെ നിന്നില്ല. അയാള്‍ സ്വന്തം പട്ടണത്തിലേക്കു തിരിച്ചുനടന്നു. വഴിയില്‍ കുറെപ്പേര്‍ ഒരുമിച്ചു നില്ക്കുന്നതു കോര്‍ടെസ് കണ്ടു. അവരിലൊരാള്‍ പഴയ സുഹൃത്തായ എല്‍ ടെക്കോ ആയിരുന്നു. അയാള്‍ കോര്‍ടെസിനെ കണ്ടപ്പോള്‍ കോര്‍ടെസിന്റെ തലയ്ക്കു വാഗ്ദാനം ചെയ്തിരുന്ന ആയിരം ഡോളറിനെക്കുറിച്ചോര്‍ത്തു. അയാള്‍ അനുനയപൂര്‍വം കോര്‍ടെസിനെ സമീപിച്ചു. കുശലപ്രശ്‌നം നടത്തി. എന്നിട്ട്, വെറുതെ പരിശോധിക്കാന്‍ എന്ന മട്ടില്‍ കോര്‍ടെസിന്റെ തോക്കു കൈക്കലാക്കി.

കോര്‍ടെസിനു തന്റെ പഴയ സുഹൃത്തിന്റെ ഗൂഢലക്ഷ്യം എന്താണെന്നു മനസിലായിരുന്നു. പക്ഷേ, കോര്‍ടെസ് എതിര്‍ത്തില്ല. തന്നെ ചൂണ്ടിക്കാണിച്ചുകൊടുത്ത് പോലീസിന്റെ പക്കല്‍നിന്ന് അയാള്‍ പണം വാങ്ങിക്കൊള്ളട്ടെ എന്ന് കോര്‍ടെസ് കരുതി. കോര്‍ടെസിന്റെ തോക്കു കൈക്കലാക്കിയ ഉടനെ ടെക്കോ പോലീസിനെ വിളിച്ചു. പോലീസ് ഓടിയെത്തി കോര്‍ടെസിനെ കസ്റ്റഡിയിലെടുക്കുകയും ചെയ്തു.

താന്‍ കുറ്റം ചെയ്തതിന്റെ പേരില്‍ മറ്റു നിരപരാധികള്‍ എന്തിനു ശിക്ഷിക്കപ്പെടണം? കോര്‍ടെസ് പോലീസിനു കീഴടങ്ങിയതിന്റെ കാരണം അതായിരുന്നു. പോലീസിനു കീഴടങ്ങിയ കോര്‍ടെസ് ജയിലിലടയ്ക്കപ്പെട്ടു. അവിടെവച്ച് സാവധാനം മരിക്കുവാനുള്ള വിഷം പോലീസ് നല്‍കി. അങ്ങനെ രോഗിയായി കോര്‍ടെസ് അന്ത്യശ്വാസം വലിച്ചു.

കോര്‍ടെസ് മരിച്ചു മണ്ണടിഞ്ഞ് നൂറ്റാണ്ടുകള്‍ കഴിഞ്ഞിട്ടും അമേരിക്കയിലെ എല്‍കാര്‍മെന്‍ എന്ന പ്രദേശത്തെ ആളുകള്‍ കോര്‍ടെസിനെ അനുസ്മരിക്കുവാന്‍ അയാളെക്കുറിച്ചുള്ള ഗാനങ്ങള്‍ പാടുന്നു. അയാളുടെ കഥകള്‍ അവര്‍ അയവിറക്കുന്നു. എന്താണതിനു കാരണം? താന്‍ മൂലം മറ്റുള്ളവര്‍ ഒരിക്കലും കഷ്ടപ്പെടരുതെന്നു കോര്‍ടെസ് ആഗ്രഹിച്ചു. തന്റെ തടി രക്ഷപ്പെടുത്തുവാന്‍ മറ്റുള്ളവരെ ഒരിക്കലും അയാള്‍ ബലിയാടാക്കിയില്ല. താന്‍ തിരികെച്ചെന്നാല്‍ അറസ്റ്റു ചെയ്യപ്പെടുമെന്നും കൊല്ലപ്പെടുമെന്നും അയാള്‍ക്കറിയാമായിരുന്നു. എന്നാല്‍, സ്വന്തം ജീവന്‍ നഷ്ടപ്പെടുന്നതിനെക്കുറിച്ച് അയാള്‍ വേവലാതിപ്പെട്ടില്ല. തന്റെ പേരില്‍ മറ്റുള്ളവര്‍ പീഡിപ്പിക്കപ്പെടുന്നതിനെക്കുറിച്ചായിരുന്നു അയാളുടെ ആകുലത മുഴുവനും.

തന്റെ പേരില്‍ മറ്റാരും ശിക്ഷിക്കപ്പെടാനും വേദനിപ്പിക്കപ്പെടാനും ഇടയാകരുതെന്നാഗ്രഹിച്ച കോര്‍ടെസ് എവിടെ? സ്വന്തം സുഖത്തിനും സൗകര്യത്തിനും വേണ്ടി പലപ്പോഴും മറ്റുള്ളവരെ ബലിയാടാക്കുന്ന നമ്മള്‍ എവിടെ? കോര്‍ടെസിനു സ്വന്തം ജീവനേക്കാള്‍ പ്രധാനം മറ്റുള്ളവരുടെ ജീവനായിരുന്നു; സ്വന്തം സുഖത്തേക്കാള്‍ പ്രധാനം മറ്റുള്ളവരുടെ സുഖവും.

എന്നാല്‍, നമ്മുടെ കാര്യം എങ്ങനെയാണ്? സ്വന്തം ജീവനേക്കാളും സുഖത്തേക്കാളും പ്രാധാന്യം മറ്റുള്ളവരുടെ ജീവനും സുഖത്തിനും നാം നല്‍കുന്നുവെങ്കില്‍ മറ്റുള്ളവരെ നമ്മള്‍ ഏതെങ്കിലും രീതിയില്‍ ദുഃഖിപ്പിക്കുമോ? അവരെ വഞ്ചിക്കുമോ? അവരോട് കൈക്കൂലി വാങ്ങുമോ? അവര്‍ക്കെതിരെ ദൂഷണം പറയുമോ? അവര്‍ക്കെതിരായി ഗൂഢാലോചന ചെയ്യുമോ? അവരെ ചവിട്ടിത്താഴ്ത്താന്‍ ശ്രമിക്കുമോ?

എല്ലാവരോടും സ്‌നേഹമാണെന്നു പറയാനും ലോഹ്യം കാണിക്കാനും നമുക്കു സാധിക്കുന്നുണ്ടായിരിക്കാം. എന്നാല്‍ ഉള്ളിന്റെയുള്ളില്‍ എത്രപേരോട് നമുക്ക് യഥാര്‍ഥ സ്‌നേഹം കാണും. എത്രപേര്‍ക്കുവേണ്ടി എന്തു ത്യാഗം ചെയ്യാനും നാം തയാറാകും? എത്രപേരെ നാം സ്വന്തമായി കരുതും? മിക്കവരെയും സംബന്ധിച്ചിടത്തോളം സ്വന്തം സുഖത്തിനും നന്മയ്ക്കും മാത്രമേ ജീവിതത്തില്‍ പ്രാധാന്യമുള്ളൂ.

നമ്മുടെ സുഖത്തിനും നന്മയ്ക്കും ആരെങ്കിലും വിഘ്‌നമായി വന്നാല്‍ അവരെ നാം ബാക്കിവച്ചേക്കുമോ? നിസാരകാര്യത്തിന്റെ പേരില്‍ പോലും മറ്റുള്ളവരെ അടിച്ചിരുത്തുവാന്‍ നാം മനസു കാണിക്കാറില്ലേ? ഒരു പക്ഷേ, നമ്മുടെയൊക്കെ ജീവിതത്തില്‍ യഥാര്‍ത്ഥ സുഖവും നന്മയും ഉണ്ടാകാതെ പോകുന്നുവെങ്കില്‍ അതിന്റെ പ്രധാന കാരണം സ്വാര്‍ഥതയില്‍ അടിയുറച്ച നമ്മുടെ സ്വഭാവരീതികളല്ലേ?

മറ്റുള്ളവര്‍ക്കുവേണ്ടി ഒത്തിരി നന്മചെയ്യുവാന്‍ നമുക്ക് എപ്പോഴും സാധിച്ചെന്നുവരില്ല. എന്നാല്‍, അവരെ വേദനിപ്പിക്കാതിരിക്കാനും കഷ്ടപ്പെടുത്താതിരിക്കാനും നമുക്ക് സാധിക്കില്ലേ? നാംവഴി മറ്റുള്ളവര്‍ക്ക് ലഭിക്കേണ്ടത് സുഖവും സന്തോഷവുമാണ്. ദുഃഖവും ദുരിതവുമല്ല എന്നത് നമുക്ക് മറക്കാതിരിക്കാം.

 


 
    
 
To send your comments, please click here
 
 
Rashtra Deepika LTD
Copyright @ 2018 , Rashtra Deepika Ltd.