അപകടമൊഴിയാതെ പുളിന്തറ വളവ് : Deepika.com Nattu Visesham

KOTTAYAM

അപകടമൊഴിയാതെ പുളിന്തറ വളവ്

Monday, April 29, 2024 7:13 AM IST

കടുത്തുരുത്തി: വാഹനത്തിരക്കേറിയ കോട്ടയം - എറണാകുളം റോഡിലെ കുറുപ്പന്തറ പുളിന്തറ വളവില്‍ അപകടങ്ങള്‍ തുടര്‍ക്കഥയാകുന്നു. പ്രശ്‌നപരിഹാരത്തിനു യാതൊരു നടപടികളുമില്ലാതെ ഇതൊന്നും തങ്ങളെ ബാധിക്കുന്നതല്ലെന്ന ഭാവത്തില്‍ പൊതുമരാമത്ത് വകുപ്പ് അധികൃതരും ജനപ്രതിനിധികളും. പുളിന്തറ വളവില്‍ അടുത്തടുത്ത ദിവസങ്ങളിലായി തുടര്‍ച്ചയായി മൂന്ന് അപകടങ്ങളാണ് ഉണ്ടായത്.

ശനിയാഴ്ച രാവിലെ കാറും സ്‌കൂട്ടറും കൂട്ടിയിടിച്ചുണ്ടായ അപകടത്തില്‍ സ്‌കൂട്ടര്‍ യാത്രികരായ യുവതിക്കും രണ്ടു കുട്ടികള്‍ക്കും പരിക്കേറ്റിരുന്നു. തലയോലപ്പറമ്പ് തൈക്കൂട്ടത്തില്‍ സനിത രാജേഷ് (41), ഒപ്പമുണ്ടായിരുന്ന മകള്‍ അളകനന്ദ (ഒമ്പത്), സഹോദരിയുടെ മകള്‍ കോതനല്ലൂര്‍ തോട്ടുപ്പറമ്പില്‍ ഗായത്രി (എട്ട്) എന്നിവര്‍ക്കാണ് പരിക്കേറ്റത്. ഇവരെ മുട്ടുചിറ എച്ച്ജിഎം ആശുപത്രിയില്‍ പ്രവേശിപ്പിച്ചിരുന്നു.

കഴിഞ്ഞദിവസം നിയന്ത്രണംവിട്ട പാഴ്സല്‍ ലോറി റോഡരികിലെ മതിലില്‍ ഇടിച്ചാണ് മറ്റൊരു അപകടമുണ്ടായത്. ഞായറാഴ്ച രാത്രിയിലാണ് അപകടമുണ്ടായത്. നിയന്ത്രണംവിട്ട പാഴ്സല്‍ ലോറി റോഡരികിലെ ഓടയിലേക്ക് ഇടിച്ചിറങ്ങിയശേഷം വീടിന്‍റെ മതിലില്‍ ഇടിച്ചു നില്‍ക്കുകയായിരുന്നു.

ട്രാന്‍സ്‌ഫോർമറിന് സമീപത്താണ് ലോറിയിടിച്ചു കയറിയത്. ഈ അപകടത്തിന് മൂന്നുദിവസം മുമ്പ് നിയന്ത്രണംവിട്ട കാര്‍ വൈദ്യുതി പോസ്റ്റിലിടിച്ചും അപകടമുണ്ടായിരുന്നു. അപകടത്തില്‍ വൈദ്യുതി തൂണ്‍ ഒടിഞ്ഞു.

കുറുപ്പന്തറ പുളിന്തറ വളവില്‍ അപകടങ്ങള്‍ പതിവായി മാറിയിട്ടും കോട്ടയം - എറണാകുളം റോഡിലെ അപകട വളവുകള്‍ നിവര്‍ത്തുന്നതിനുള്ള നടപടിക്രമങ്ങള്‍ കടലാസിലുറങ്ങുകയാണ്. ഏറ്റുമാനൂര്‍ - വൈക്കം റോഡില്‍ യാത്രക്കാര്‍ക്ക് ഭീഷണി ഉയര്‍ത്തുന്ന കൊടും വളവുകള്‍ നിവര്‍ത്തണമെന്നുള്ള ആവശ്യത്തിന് പതിറ്റാണ്ടുകളുടെ പഴക്കമുണ്ട്.

കുറുപ്പന്തറ പുളിന്തറ വളവിലുണ്ടായ വ്യത്യസ്തമായ വാഹനാപകടങ്ങളില്‍ നിരവധിയാളുകള്‍ക്കാണ് ജീവന്‍ നഷ്ടപ്പെട്ടത്. അതിലേറേയാളുകള്‍ക്ക് ചെറുതും വലുതുമായ പരിക്കേറ്റു. എതിരേ വരുന്ന വാഹനങ്ങള്‍ ശ്രദ്ധയില്‍പ്പെടാതെ പോകുന്നതും അമിതവേഗവുമാണ് പലപ്പോഴും ഇവിടെ അപകടകാരണമാകുന്നത്.

കോട്ടയം - എറണാകുളം റോഡ് ആധുനിക നിലവാരത്തില്‍ നിര്‍മിച്ചതിനുശേഷം ഇവിടെ അപകടങ്ങള്‍ വര്‍ധിച്ചതായാണ് പോലീസിന്‍റെ കണക്കുകളും വ്യക്തമാക്കുന്നത്.

വളവുകളില്‍ അപകടം വര്‍ധിച്ചതോടെ മോന്‍സ് ജോസഫ് എംഎല്‍എ പൊതുമരാമത്തുവകുപ്പ് മന്ത്രിയായിരുന്നപ്പോള്‍ പട്ടിത്താനം - കടുത്തുരുത്തി - വൈക്കം റോഡിലെ വളവുകള്‍ നിവര്‍ക്കുന്നതിനായി പദ്ധതി തയാറാക്കുകയും അനുമതി നല്‍കുകയും ചെയ്തിരുന്നു. പട്ടിത്താനം മുതല്‍ തലയോലപ്പറമ്പ് വരെയുള്ള അപകടവളവുകള്‍ നിവര്‍ക്കുന്നതിനായി അധികൃതര്‍ ആറ് വില്ലേജുകളില്‍ സര്‍വേ നടത്തുകയും നടപടികളുമായി മുന്നോട്ടു നീങ്ങുകയും ചെയ്തിരുന്നു.

കാണക്കാരി, കുറുപ്പന്തറ, കോതനല്ലൂര്‍, മാഞ്ഞൂര്‍, മുട്ടുചിറ, കടുത്തുരുത്തി, വടയാര്‍ വില്ലേജുകളില്‍ റോഡില്‍ 41 ഇടങ്ങളിലെ വളവുകള്‍ നിവര്‍ക്കാന്‍ ഹൈലെവല്‍ കമ്മിറ്റിയുടെ അനുമതിയും ലഭിച്ചിരുന്നു.

തുടര്‍ന്ന് സര്‍വേ നടപടികള്‍ തുടങ്ങിയെങ്കിലും സ്ഥലം ഏറ്റെടുക്കല്‍ സംബന്ധിച്ചുള്ള കാര്യങ്ങള്‍ നാളിതുവരെയായിട്ടും എങ്ങുമെത്തിയില്ല.

സമരത്തിനൊരുങ്ങി നാട്ടുകാര്‍

കുറുപ്പന്തറ: രണ്ടു വര്‍ഷത്തിനിടയില്‍ 60 ഓളം വലിയ അപകടങ്ങള്‍ നടന്നിട്ടും ഒരു സ്പീഡ് ബ്രേക്കര്‍ സ്ഥാപിക്കാനോ പുളിന്തറ വളവ് നിവര്‍ത്താനുള്ള ശ്രമങ്ങളോ, ഇടപെടലുകളോ അധികൃതരുടെ ഭാഗത്തുനിന്ന് ഉണ്ടാകുന്നില്ലെന്ന് കോണ്‍ഗ്രസ് - എസ് ബ്ലോക്ക് പ്രസിഡന്‍റ് ജോണ്‍സണ്‍ പാളിയില്‍ പറഞ്ഞു. അശാസ്ത്രീയമായ റോഡ് നിര്‍മാണവും ബാങ്കിംഗ് ഓഫ് കര്‍വിലെ അപര്യാപ്തതയുമാണ് ഇവിടെ അപകടങ്ങള്‍ തുടര്‍ക്കഥയാകാനുള്ള കാരണം.

പൊതുജന പ്രതിഷേധം ശക്തമാകുമ്പോള്‍ വളവ് ഉടന്‍ നിവര്‍ത്തുമെന്ന രീതിയില്‍ ജനങ്ങളെ കബളിപ്പിക്കുന്ന അധികൃതരുടെ പതിവ് തന്ത്രം ഇനിയും അംഗീകരിക്കാന്‍ കഴിയില്ലെന്നും പ്രദേശവാസികൂടിയായ ജോണ്‍സണ്‍ പാളിയില്‍ പറഞ്ഞു.