ചങ്ങരോത്ത് ഡെങ്കിപ്പനി പ്രതിരോധ പ്രവർത്തനങ്ങൾക്കായി ആരോഗ്യ പ്രവർത്തകർ അണി നിരന്നപ്പോൾ.
കടിയങ്ങാട്: ചങ്ങരോത്ത് ഗ്രാമപഞ്ചായത്തിലെ വിവിധ വാർഡുകളിൽ ഡെങ്കിപ്പനി കേസുകൾ റിപ്പോർട്ട് ചെയ്ത സാഹചര്യത്തിൽ ആരോഗ്യവകുപ്പ് പ്രതിരോധ പ്രവർത്തനങ്ങൾ ഊർജിതമാക്കി.
വാർഡിൽ ഒരു ദിനം കാന്പയിന്റെയും ഉറവിട നശീകരണ പരിപാടിയുടെയും ഭാഗമായി വാർഡുകൾ കേന്ദ്രീകരിച്ച് വ്യാപക ശുചീകരണ പ്രവർത്തനങ്ങൾ ആരംഭിച്ചു. ഡെങ്കിപ്പനി ബാധിത പ്രദേശങ്ങളിൽ ഫോഗിംഗ് ഉൾപ്പെടെയുള്ള പ്രതിരോധ പ്രവർത്തനങ്ങൾ നടത്തി. പൊതുജനാരോഗ്യ നിയമം 2023 പ്രകാരം കൊതുക് വളരുന്നതിനുള്ള സാഹചര്യങ്ങൾ സൃഷ്ടിക്കുന്നവർക്കെതിരേ കർശന നിയമനടപടികൾ സ്വീകരിക്കുമെന്ന് ഹെൽത്ത് ഇൻസ്പെക്ടർ കെ. രാജേഷ് അറിയിച്ചു.
നാലാം വാർഡിൽ നടന്ന "വാർഡിൽ ഒരു ദിനം – ഉറവിടം തേടി' പരിപാടി വാർഡ് മെമ്പർ പുഷ്പ ഉദ്ഘാടനം ചെയ്തു. പ്രതിരോധ പ്രവർത്തനങ്ങളുടെ ഭാഗമായി ആരോഗ്യ ബോധവത്കരണ നോട്ടീസുകൾ വിതരണം ചെയ്തു. ജെഎച്ച്ഐ മഹേഷ് കുട്ടമ്പത്ത്, സ്വപ്ന എന്നിവർ പരിപാടിക്ക് നേതൃത്വം നൽകി. ആശാ പ്രവർത്തകർ, കുടുംബശ്രീ അംഗങ്ങൾ, സന്നദ്ധ പ്രവർത്തകർ എന്നിവർ പങ്കെടുത്തു.
Tags : Local News Nattuvishesham Kozhikode