ആലപ്പുഴ: ജില്ലാ കോടതിപ്പാലം പുനർനിർമാണത്തിന്റെ ഭാഗമായി ഡ്രെയിനേജ് നിർമാണം ആരംഭിക്കുന്നതിനാൽ നാളെ മുതൽ ആലുക്കാസിനു മുന്നിലുള്ള റോഡിന്റെ ഔട്ട് പോസ്റ്റ് മുതൽ മഞ്ജുള ബേക്കറി വരെയുള്ള ഗതാഗതം പൂർണമായി നിരോധിച്ചു.
ആലപ്പുഴ-തണ്ണീർമുക്കം റോഡിൽ തണ്ണീർമുക്കം ഭാഗത്തുനിന്നു വരുന്ന കെഎസ്ആർടിസി ബസുകളും പ്രൈവറ്റ് ബസുകളും കൈചൂണ്ടി മുക്കിൽ നിന്നു വലതു തിരിഞ്ഞ് കൊമ്മാടി പാലത്തിന്റെ കിഴക്കേക്കരയിൽ എഎസ് കനാൽ-ഈസ്റ്റ് ബാങ്ക് റോഡിൽകൂടി വഴിച്ചേരി പാലം കയറി വഴിച്ചേരി മാർക്കറ്റ് ജംഗ്ഷനിൽനിന്ന് ഇടതു തിരിഞ്ഞ് പിച്ചുഅയ്യർ, എവിജെ ജംഗ്ഷൻ വഴി പഴവങ്ങാടി ജംഗ്ഷനിൽനിന്ന് ഇടതു തിരിഞ്ഞ് ഔട്ട പോസ്റ്റ് വഴി കെഎസ്ആർടിസി ബസ് സ്റ്റാൻഡിലേക്ക് പോകണം.
ആലപ്പുഴയിൽനിന്നു തണ്ണീർമുക്കം ഭാഗത്തേക്ക് പോകുന്ന കെഎസ്ആർടിസി, പ്രൈവറ്റ് ബസുകൾ ചുങ്കം-കല്ലുപാലം റോഡിന്റെ വടക്കേ അപ്രോച്ച് വഴി കൊമേഴ്സ്യൽ കനാൽ-നോർത്ത് ബാങ്ക് റോഡിൽകൂടി ഇരുമ്പു പാലത്തിൽനിന്നും വലതു തിരിഞ്ഞ് വൈഎംസിഎ പാലം വഴി എഎസ് കനാൽ-ഈസ്റ്റ് ബാങ്ക് റോഡ് വഴി കൈചൂണ്ടിമുക്കിലെത്തി ഇടതുതിരിഞ്ഞു പോകണം.
തെക്കുനിന്നു വരുന്ന പ്രൈവറ്റ് ബസുകൾ ഇരുമ്പു പാലം, വൈഎംസിഎ വഴി പ്രൈവറ്റ് ബസ് സ്റ്റാൻഡിൽ എത്തി പോകണം.
എറണാകുളം ഭാഗത്തുനിന്നു വരുന്ന കെഎസ്ആർടിസി, പ്രൈവറ്റ് ബസുകൾ ടൗണിൽ പ്രവേശിക്കുന്നതിന് വഴിച്ചേരി പാലം കയറി വഴിച്ചേരി മാർക്കറ്റ് ജംഗ്ഷനിൽനിന്ന് ഇടതു തിരിഞ്ഞ് പിച്ചുഅയ്യർ-എവിജെ ജംഗ്ഷൻ വഴി പഴവങ്ങാടി ജംഗ്ഷനിൽനിന്ന് ഇടതു തിരിഞ്ഞ് ഔട്ട് പോസ്റ്റ് വഴി കെഎസ്ആർടിസി ബസ് സ്റ്റാൻഡിലേക്ക് പോകണം.
ആലപ്പുഴയിൽനിന്ന് എറണാകുളം ഭാഗത്തേക്കു പോകുന്ന വാഹനങ്ങൾ ചുങ്കം-കല്ലുപാലം റോഡിന്റെ വടക്കേ അപ്രോച്ച് വഴി കൊമേഴ്സ്യൽ കനാൽ-നോർത്ത് ബാങ്ക് റോഡിലൂടെ ഇരുമ്പു പാലത്തിൽനിന്നു വലതു തിരിഞ്ഞ് വൈഎംസിഎ ജംഗ്ഷനിൽനിന്ന് ഇടതുതിരിഞ്ഞ് പോകണം.
പുന്നമട ഭാഗത്തേക്കു പോകുന്നതും വരുന്നതുമായ വാഹനങ്ങൾ പോലീസ് ഔട്ട്പോസ്റ്റിനു കിഴക്കു ഭാഗത്തുള്ള ഡീവിയേഷൻ റോഡുവഴി പുന്നമട ഭാഗത്തേക്കും പുന്നമടയിൽ നിന്നു തിരിച്ചു വരുന്ന വാഹനങ്ങൾ ഡീവിയേഷൻ റോഡ് വഴി കെഎസ്ആർടിസി സ്റ്റാൻഡ് വഴി ചുങ്കം-കല്ലുപാലം റോഡിന്റെ വടക്കേ അപ്രോച്ചിലൂടെ കല്ലുപാലം വഴി പോകണം.