കരുനാഗപ്പള്ളി: കരുനാഗപ്പള്ളിക്കാരുടെ സി.ആർ. മഹേഷ് അവരുടെ എംഎൽഎ മാത്രമല്ല, മേഖലയിലെ തന്നെ മികച്ച കലാകാരൻ കൂടിയാണ്. ആസുരവാദ്യമായ ചെണ്ടയിൽ വൈദഗ്ധ്യം തെളിയിച്ചിട്ടുള്ള മഹേഷ് അവസരം കിട്ടുമ്പോഴൊക്കെ തോളിൽ ചെണ്ട തൂക്കും.
ആലപ്പാട് പഞ്ചായത്തിലെ പൂക്കോട്ട് ക്ഷേത്രത്തിലെ കൊടിയേറ്റുത്സവ ദിവസം വൈകുന്നേരം പഞ്ചാരിമേളത്തിൽ പങ്കെടുത്തപ്പോഴാണ് തെരഞ്ഞെടുപ്പ് പ്രചാരണത്തിന്റെ ഭാഗമാണോയെന്ന് പലരും സംശയിച്ചത്.
എന്നാൽ ഇതു പ്രചാര വേലയല്ലെന്നും ദേശത്തിന്റെ ഉത്സവാഘോഷങ്ങളിൽ ആവേശം ജ്വലിപ്പിക്കുകയാണു ലക്ഷ്യമെന്നും മഹേഷ് പറഞ്ഞു.
കണ്ടല്ലൂർ ഉണ്ണികൃഷ്ണന്റെ ശിക്ഷണത്തിൽ കഴിഞ്ഞ രണ്ടു വർഷമായി പരിശീലനം നടത്തിയ ശേഷമായിരുന്നു അരങ്ങേറ്റം. ഒരു വർഷം മുൻപ് ഓച്ചിറ പരബ്രഹ്മക്ഷേത്ര സന്നിധിയിലാണ് ചെണ്ട വാദ്യ കലാകാരനായി അരങ്ങേറ്റം കുറിച്ചത്.
പിന്നീട് പല ക്ഷേത്രങ്ങളിലും പഞ്ചാരി മേളം നടത്തിയിട്ടുണ്ട്. കെപിസിസി കലാസാഹിതിയുടെ നേതൃത്വത്തിലുള്ള സാഹിതീ തീയറ്റേഴ്സിന്റെ സാരഥിയാണ് അദ്ദേഹം.
Tags : nattu vishesham C.R. Mahesh