തൃക്കരിപ്പൂർ: തൃക്കരിപ്പൂർ നിയോജക മണ്ഡലത്തിൽ കേരള കോൺഗ്രസ് മത്സരിക്കാനുള്ള തീരുമാനത്തിനെതിരേ പ്രതിഷേധവുമായി മുസ്ലിംലീഗ്. 2021 ലെ തെരഞ്ഞെടുപ്പിൽ യുഡിഎഫ് മുന്നണി കാൽലക്ഷത്തിലധികം വോട്ടിന് പരാജയപ്പെടാൻ കാരണം യുഡിഎഫിന്റെ പ്രതിഷേധ വോട്ടാണെന്ന സൂചന നേതൃത്വം മനസിലാക്കണമെന്ന് മുസ്ലിം ലീഗ് തൃക്കരിപ്പൂർ നിയോജക മണ്ഡലം കമ്മിറ്റി യോഗം അംഗീകരിച്ച പ്രമേയത്തിൽ പറഞ്ഞു.
കഴിഞ്ഞതവണ കേരള കോൺഗ്രസ് നേതാവ് എം.പി. ജോസഫായിരുന്നു തൃക്കരിപ്പൂർ മണ്ഡലത്തിൽ മത്സരിച്ചത്. ഇത്തവണയും കേരള കോൺഗ്രസ് മത്സരിക്കുമെന്ന ജോസഫ് വിഭാഗം കേരള കോൺഗ്രസ് ജില്ലാ കമ്മിറ്റിയുടെ പ്രഖ്യാപനമാണ് മുസ്ലിംലീഗ് മണ്ഡലം അടിയന്തിര യോഗ പ്രമേയത്തിന് ആധാരമായത്. കോൺഗ്രസോ ലീഗോ തൃക്കരിപ്പൂർ സീറ്റ് ഏറ്റെടുക്കാതെ മറ്റേതെങ്കിലും പാർട്ടിക്ക് നൽകിയാൽ പാർട്ടി അണികൾ പ്രവർത്തനരംഗത്ത് നിന്ന് വിട്ടുനിൽക്കാൻ വരെ സാധ്യതയുണ്ടെന്ന് മുസ്ലിം ലീഗ് യോഗത്തിൽ അഭിപ്രായമുയർന്നിരുന്നതായി ലീഗ് മണ്ഡലം ജനറൽ സെക്രട്ടറി സത്താർ വടക്കുമ്പാട് പറഞ്ഞു. കാസർഗോഡ് ലോക് സഭ മണ്ഡലം പിടിച്ചെടുത്തതു പോലെ തൃക്കരിപ്പൂരിൽ കോൺഗ്രസോ ലീഗോ മത്സരിച്ചാൽ യുഡിഎഫ് അട്ടിമറി വിജയം നേടുമെന്നും മുസ്ലിം ലീഗ് യോഗം വിലയിരുത്തി.