മേപ്പയ്യൂർ: ബജറ്റിൽ മേപ്പയ്യൂർ പഞ്ചായത്തിന് നല്ല പരിഗണന ലഭിച്ചുവെന്ന് ഫാത്തിമ തഹ്ലിയ എംഎൽഎ പറഞ്ഞു. മേപ്പയ്യൂർ ബസ് സ്റ്റാൻഡ് നിർമാണം, മേപ്പയ്യൂർ ടൗൺ നവീകരണം ഉൾപ്പെടെ കോടിക്കണക്കിന് രൂപയുടെ പദ്ധതികളാണ് ബജറ്റിൽ വകയിരുത്തിയതെന്ന് എംഎൽഎ ചൂണ്ടിക്കാട്ടി. 50 വർഷത്തിലധികം പേരാമ്പ്രയിൽ സിപിഎം എംഎൽഎ ഉണ്ടായിട്ടും മേപ്പയ്യൂർ ഉൾപ്പെടെ വികസനമെത്തിക്കുവാൻ എൽഡിഎഫിന് കഴിഞ്ഞില്ലെന്ന് അവർ കൂട്ടിച്ചേർത്തു.
മേപ്പയ്യൂർ പഞ്ചായത്തിലെ വിവിധ കേന്ദ്രങ്ങളിൽ യുഡിഎഫിന്റെ നേതൃത്വത്തിൽ എംഎൽഎക്ക് നൽകിയ സ്വീകരണത്തിൽ സംസാരിക്കുകയായിരുന്നു ഫാത്തിമ തഹ്ലിയ. ചങ്ങരം വള്ളിയിൽ നിന്ന് ആരംഭിച്ച് 17 സ്വീകരണ കേന്ദ്രങ്ങളിലെ പര്യടനം മൈത്രീനഗറിൽ സമാപിച്ചു. കെ.പി. രാമചന്ദ്രൻ, ടി.കെ.എ. ലത്തീഫ്, എം.കെ. അബ്ദുറഹിമാൻ, എം.എം. അഷറഫ്, കീപ്പോട്ട് അമ്മത്, സി.എം. ബാബു പ്രസംഗിച്ചു.
Tags : Local News Nattuvishesham Kozhikode