പത്തനംതിട്ടയിൽ നടന്ന അബിൻ വർക്കി എംഎൽഎ ഏർപ്പെടുത്തിയ മെറിറ്റ് അവാർഡ് സമ്മേളനം ഡെപ്യൂട്ടി സ്പീക്കർ ഷാനിമോൾ ഉസ്മാൻ ഉദ്ഘാടനം ചെയ്യുന്നു.
പത്തനംതിട്ട: രാജ്യത്തിന്റെ ഭരണഘടന ഏൽപ്പിച്ചിരിക്കുന്ന ഉത്തരവാദിത്വം പുതു തലമുറ തിരിച്ചറിയണമെന്ന് ഡെപ്യൂട്ടി സ്പീക്കർ ഷാനിമോൾ ഉസ്മാൻ. എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയ വിദ്യാർഥികൾക്ക് അബിൻ വർക്കി എംഎൽഎ ഏർപ്പെടുത്തിയ മെറിറ്റ് അവാർഡ് അനുമോദന പരിപാടി ഉദ്ഘാടനം ചെയ്തു പ്രസംഗിക്കുകയായിരുന്നു ഡെപ്യൂട്ടി സ്പീക്കർ. ജെൻസി വിഭാഗത്തെ അഡ്രസ് ചെയ്യുന്ന സർക്കാരാണ് കേരളം ഭരിക്കുന്നതെന്നും, അന്തർദേശീയ നിലവാരമുള്ള വിദ്യാഭ്യാസം സർക്കാർ ഉറപ്പുവരുത്തുമെന്നും ഷാനിമോൾ പറഞ്ഞു.
കേരളം നേരിടുന്ന ഏറ്റവും വലിയ പ്രതിസന്ധി ലഹരി ഉപയോഗമാണെന്നും ആഭ്യന്തരവകുപ്പ് മന്ത്രി രമേശ് ചെന്നിത്തലയുടെ നേതൃത്വത്തിൽ നടത്തുന്ന ഒപ്പറേഷൻ തൂഫാൻ മാതൃകാപരമായ പദ്ധതിയാണെന്നും ഡപ്യൂട്ടി സ്പീക്കർ പറഞ്ഞു. സാമൂഹ്യ പ്രതിബദ്ധതയോടെ യുവാക്കൾക്കിടയിൽ പ്രവർത്തിക്കുന്ന ജനപ്രതിനിധിയാണ് അബിൻ വർക്കി എംഎൽഎയെന്നും നിയമസഭയിൽ നടത്തുന്ന ഇടപെടലുകൾ അഭിനന്ദനം അർഹിക്കുന്നതായും ഡെപ്യൂട്ടി സ്പീക്കർ ഷാനിമോൾ ഉസ്മാൻ കൂട്ടിച്ചേർത്തു.
അബിൻ വർക്കി കോടിയാട്ട് എംഎൽഎ അദ്ധ്യക്ഷത വഹിച്ചു. ഗായകൻ കെ.എസ്. ഹരിശങ്കർ മുഖ്യാതിഥിയായിരുന്നു. എംഎൽഎയുടെ സേവനം ഓൺലൈനായി ലഭ്യമാക്കുന്നതിനായി പ്ലസ്ടു വിദ്യാർഥിനിയായ ഏബൽ റെനി തയാറാക്കിയ ഓൺലൈൻ പോർട്ടൽ ചടങ്ങിൽവച്ച് അബിൻ വർക്കി എംഎൽഎ പരിചയപ്പെടുത്തി.
ആന്റോ ആന്റണി എംപി, ജവഹർ ബാൽ മഞ്ച് ദേശീയ ചെയർമാൻ ഡോ. ജി.വി. ഹരി,നഗരസഭാധ്യക്ഷ സിന്ധു അനിൽ, പി. മോഹൻരാജ്, അമ്പിളി ഭാസ്കർ, ഡോ. മോഹൻ റോയ്, നീതു മാമൻ കൊണ്ടൂർ, റോജി പോൾ ഡാനിയേൽ എന്നിവർ പ്രസംഗിച്ചു.
കൈയടി നേടി ഹരിശങ്കറും ശ്രാവണും
ജീവാംശമായ് താനേ നീയെന്നിൽ കാലങ്ങൾ മുന്നേ വന്നൂ... എന്നു തുടങ്ങുന്ന ഹിറ്റ് ഗാനം ഗായകനൊപ്പം പാടാൻ സാധിച്ചതിലുള്ള സന്തോഷത്തിലാണ് ലൈറ്റ് മ്യൂസിക്കിൽ സംസ്ഥാന സ്കൂൾ കലോത്സവത്തിൽ ഒന്നാം സ്ഥാനം നേടിയ ശ്രാവൺ. പ്ലസ്ടു പരീക്ഷയിൽ എല്ലാ വിഷയങ്ങൾക്കും എ പ്ലസ് നേടിയ ശ്രാവൺ എംഎൽഎ മെറിറ്റ് അവാർഡിൽ പങ്കെടുക്കാൻ എത്തവേയാണ് അവിചാരിതമായി അബിൻ വർക്കി എംഎൽഎ ഹരിശങ്കറിനൊപ്പം ഗാനം ആലപിക്കാനായി ക്ഷണിച്ചത്.
തുടർന്ന് ഇരുവരും ചേർന്ന് ഗാനം ആലപിക്കുകയായിരുന്നു. ഗായകൻ കെ.എസ്. ഹരിശങ്കർ പ്ലസ് ടു പരീക്ഷയിൽ 1200ൽ 1200 നേടിയ ഗായകനാണെന്ന് അബിൻ വർക്കി എംഎൽഎ അറിയിച്ചതോടെ വലിയ കരഘോഷമാണ് ലഭിച്ചത്.