ADVERTISEMENT
കോട്ടയം: അധ്യയന വര്ഷം ആരംഭിച്ചതിനു പിന്നാലെ ഉച്ചക്കഞ്ഞിക്കായി കണക്കു കൂട്ടിയും കിഴിച്ചും പ്രഥമാധ്യാപകര്. പച്ചക്കറിയുടെയും പലചരക്കിന്റെയും വിലവര്ധനയ്ക്കൊപ്പം പാചകവാതക വിലവര്ധനയും ക്ഷാമവും കൂടിയായതോടെ വല്ലാതെ വിഷമിക്കുകയാണു സ്കൂള് പ്രഥമാധ്യാപകര്. സ്ഥാനക്കയറ്റം ലഭിച്ചു പ്രഥമാധ്യാപകരായി എത്തിയവര് എന്തു ചെയ്യണമെന്നറിയാതെ വലയുമ്പോള്, നിരവധി സര്ക്കാര് സ്കൂളുകളില് പ്രഥമാധ്യാപക തസ്തികകള് ഒഴിഞ്ഞുകിടക്കുന്നതു പ്രതിസന്ധി രൂക്ഷമാക്കുന്നു.
സൗജന്യമായി കേന്ദ്രം നല്കുന്ന അരി സ്കൂള് തുറക്കും മുമ്പേ സ്കൂളുകളില് എത്തിയിരുന്നു. പാചക ചെലവിനും കറികള് തയാറാക്കുന്നതിനുമായി അഞ്ചാം ക്ലാസ് വരെ ഒരു കുട്ടിക്ക് 6.78 രൂപയും എട്ടാം ക്ലാസ് വരെ 10.17 രൂപയുമാണ് നിശ്ചയിച്ചിരിക്കുന്നത്. ഉച്ചഭക്ഷണത്തിനു പുറമേ ആഴ്ചയില് രണ്ടു ദിവസം മുട്ടയും പാലും നല്കണം. കഴിഞ്ഞ വര്ഷം മെനു പുതുക്കുകകൂടി ചെയ്തതോടെ ചെലവേറിയതായി അധ്യാപകര് പറയുന്നു.
പച്ചക്കറികള്ക്കു തീ വിലയാണ്. സാമ്പാര് തയാറാക്കിയാല് പോലും ബജറ്റ് വിഹിതം മറികടക്കുന്ന അവസ്ഥയിലാണു പല സ്കൂളുകളും. അധ്യാപകര് പണം സ്വരൂപിച്ചും വീടുകളില്നിന്നു പച്ചക്കറികള് കൊണ്ടുവന്നും വാങ്ങിയുമൊക്കെയാണു പല സ്കൂളുകളും പദ്ധതി മുന്നോട്ടു കൊണ്ടുപോകുന്നത്. പാചകവാതകത്തിനും പാലിനും വില വര്ധിച്ചത് പ്രതിസന്ധി രൂക്ഷമാക്കി.
100 കുട്ടികള്ക്കു ഭക്ഷണം തയാറാക്കാന് മാസം കുറഞ്ഞതു രണ്ടു വാണിജ്യ സിലിണ്ടറുകള് വേണമെന്നാണു കണക്ക്. പാലു കാച്ചാനും മുട്ട പുഴുങ്ങാനും പാചക വാതകം ഉപയോഗിക്കേണ്ടി വരുന്നതോടെ ചെലവേറും. യഥാസമയം, പദ്ധതിയുടെ തുക കിട്ടാറില്ലെന്നതും അധ്യാപകരുടെ ആശങ്ക വര്ധിപ്പിക്കുന്നു.
പദ്ധതിയുടെ പണച്ചെലവിനു പുറമേ രജിസ്റ്റര് തയാറാക്കുന്നതുള്പ്പെടെയുള്ള ജോലികള് കൂടിയാകുമ്പോള് പ്രഥമാധ്യാപകര്ക്കു മറ്റൊന്നിനും സമയമില്ലാത്ത അവസ്ഥയാണ്. പുതുതായി ചാര്ജെടുത്തവര് കണക്ക് തയാറാക്കാനും മറ്റും ഏറെ ബുദ്ധിമുട്ടുകയാണ്. ഇതിനൊപ്പം വിലവര്ധന പ്രതിസന്ധികൂടി വന്നതോടെ പ്രഥമാധ്യാപകരില് പലരുടെയും ഉറക്കം നഷ്ടപ്പെട്ട അവസ്ഥയാണ്.
വിറകടുപ്പ് വീണ്ടും വരുന്നു
വിവിധ കാരണങ്ങളാല് സ്കൂള് പാചകശാലയില്നിന്ന് ഒഴിവാക്കിയ വിറകടുപ്പുകള് വീണ്ടും വരുന്നു. പാചക വാതക ലഭ്യതയില് കുറവു വരാന് സാധ്യതയുള്ളതിനാല് വിറകടുപ്പ് ഉപയോഗിക്കാന് വിദ്യാഭ്യാസ വകുപ്പ് അനുമതി നല്കിയിരുന്നു. പാചക വാതക ലഭ്യത പഴയ നിലയിലായാല് വിറകടുപ്പ് ഒഴിവാക്കണമെന്നു നിര്ദേശമുണ്ടെങ്കിലും ലഭ്യതക്കുറവ് നീളുമെന്നാണ് അധ്യാപകരുടെ ആശങ്ക. കുമരകത്തെ സ്കൂളുകള്ക്ക് പഞ്ചായത്ത് ഇന്ഡക്ഷന് കുക്കര് വാങ്ങി നല്കിയിരിക്കുകയാണ്.
എല്ലാ സ്കൂളുകളിലും പാചക വാതകം ഉപയോഗിക്കണമെന്നു മൂന്നു വര്ഷം മുമ്പ് കേന്ദ്രം നിര്ദേശിച്ചിരുന്നു. അടുപ്പും കേന്ദ്രം നല്കിയിരുന്നു. ഇതോടെ മിക്ക സ്കൂളുകളുടെയും അടുക്കള നവീകരിച്ച് വിറകടുപ്പ് ഒഴിവാക്കിയിരുന്നു. സ്ഥലസൗകര്യം കുറവായ മിക്ക സ്കൂളുകളിലും നിലവില് വിറകടുപ്പ് ഉപയോഗിക്കാനേ കഴിയാത്ത അവസ്ഥയാണ്. മുറ്റത്ത് അടുപ്പുകള് കൂട്ടാമെങ്കിലും മഴ വില്ലനാകും.
വിറകടുപ്പുകള് ഉപയോഗിക്കുമ്പോള് പ്രായോഗിക ബുദ്ധിമുട്ടുകള് ഏറെയുണ്ടെന്നും അധ്യാപകരും പാചക തൊഴിലാളികളും പറയുന്നു.
ADVERTISEMENT
ADVERTISEMENT
ADVERTISEMENT
ADVERTISEMENT
Contact Numbers :
+91 481 2566706, 2566707, 2566708
About Us Feedback Privacy Policy Terms and Conditions for Online Payment
E-paper LOGIN
LOGIN
Email
Facebook
Whatsapp
Linked In
Telegram