പൾസ് പോളിയോ ഇമ്യൂണൈസേഷൻ പരിപാടിയുടെ ജില്ലാതല ഉദ്ഘാടനം കെ.എം. അഭിജിത്ത് എംഎൽഎ നിർവഹിക്കുന്നു.
കോഴിക്കോട്: പൾസ് പോളിയോ ഇമ്യൂണൈസേഷന്റെ ആദ്യദിനമായ ഇന്നലെ 1,63,495 കുട്ടികൾക്ക് തുള്ളിമരുന്ന് നൽകി. ഇതിൽ ഇതര സംസ്ഥാന തൊഴിലാളികളുടെ 857 കുട്ടികളും ഉൾപ്പെടുന്നു. ജില്ലയിൽ അഞ്ച് വയസിൽ താഴെയുള്ള 1,89,345 കുട്ടികളാണ് ഉള്ളത്. അതിൽ 86.35 ശതമാനം പേർക്കാണ് ആദ്യദിനം പോളിയോ തുള്ളിമരുന്ന് നൽകിയത്.
ഞായറാഴ്ച തുള്ളിമരുന്ന് കൊടുക്കാൻ സാധിച്ചിട്ടില്ലാത്ത കുട്ടികൾക്ക് ഇന്നും നാളെയുമായി ആരോഗ്യപ്രവർത്തകർ വീടുകളിൽ എത്തി വാക്സിൻ നൽകും. 2187 സാധാരണ ബൂത്തുകളും 54 മൊബൈൽ ബൂത്തുകളും റെയിൽവേ സ്റ്റേഷൻ, ബസ്സ്റ്റാൻഡ് എന്നിവിടങ്ങളിൽ 50 ട്രാൻസിറ്റ് ബൂത്തുകളും ആദ്യദിനം പ്രവർത്തിച്ചു.
പൾസ് പോളിയോ ഇമ്യൂണൈസേഷൻ പരിപാടിയുടെ ജില്ലാതല ഉദ്ഘാടനം ചീറോത്ത് കല്ലാച്ചീമ്മൽ എംഎൽപി സ്കൂളിൽ കെ.എം. അഭിജിത്ത് എംഎൽഎ നിർവഹിച്ചു. ജില്ലാ പഞ്ചായത്ത് വൈസ് പ്രസിഡന്റ് കെ.കെ. നവാസ് അധ്യക്ഷനായി. തൂണേരി ബ്ലോക്ക് പഞ്ചായത്ത് പ്രസിഡന്റ് കെ.പി. പ്രതീഷ് മുഖ്യാതിഥിയായി. ജില്ലാ മെഡിക്കൽ ഓഫീസർ ഡോ. വി.പി. രാജേഷ് വിഷയാവതരണം നടത്തി.
തിരുവമ്പാടി: തിരുവമ്പാടിയിൽ ദേശീയ പൾസ് പോളിയോ ഇമ്മ്യൂണൈസേഷൻ പരിപാടി നടത്തി.
പോളിയോ തുള്ളിമരുന്ന് വിതരണത്തിന്റെ പഞ്ചായത്ത് തല ഉദ്ഘാടനം തിരുവമ്പാടി ബസ് സ്റ്റാൻഡ് ഓപ്പൺ സ്റ്റേജിൽ പഞ്ചായത്ത് പ്രസിഡന്റ് ജിതിൻ പല്ലാട്ട് നിർവഹിച്ചു. പഞ്ചായത്ത് വൈസ് പ്രസിഡന്റ് പി.ആർ. അജിത അധ്യക്ഷത വഹിച്ചു.
തിരുവമ്പാടി കുടുംബാരോഗ്യ കേന്ദ്രം മെഡിക്കൽ ഓഫീസർ ഡോ. കെ.വി. പ്രിയ പൾസ് പോളിയോ ദിനാചാരണ സന്ദേശം നൽകി.
ആരോഗ്യ വിദ്യാഭ്യാസ സ്ഥിരം സമിതി അധ്യക്ഷൻ പി.എ. ഫിറോസ് ഖാൻ, വാർഡ് അംഗങ്ങളായ ബിജു എണ്ണാറ മണ്ണിൽ, മറിയാമ്മ ബാബു, പഞ്ചായത്ത് സെക്രട്ടറി എസ്. ശരത് ലാൽ, തിരുവമ്പാടി സർവീസ് സഹകരണ ബാങ്ക് സെക്രട്ടറി ജോസ് മാത്യു, ഹെൽത്ത് ഇൻസ്പെക്ടർ എം. സുനീർ എന്നിവർ പ്രസംഗിച്ചു.
Tags : Local News Nattuvishesham Kozhikode