ചെമ്പന്തൊട്ടി: കേരള വ്യാപാരി വ്യവസായി സമിതി ചെമ്പന്തൊട്ടി യൂണിറ്റിന്റെ ആഭിമുഖ്യത്തിൽ ബിഷപ്പ് വള്ളോപ്പള്ളി സ്മാരക കുടിയേറ്റ മ്യൂസിയം വളപ്പിൽ തണൽമരത്തൈകൾ നട്ടുപിടിപ്പിച്ചു. മ്യൂസിയം കവാടത്തിൽ സ്ഥാപിക്കാൻ നിശ്ചയിച്ചിട്ടുള്ള ബിഷപ്പ് മാർ സെബാസ്റ്റ്യൻ വള്ളോപ്പിള്ളിയുടെ പ്രതിമ കാലതാമസമില്ലാതെ സ്ഥാപിക്കണമെന്നും ചുറ്റമതിലിന്റെയും മ്യൂസിയത്തിന്റെയും നിർമാണ പ്രവൃത്തികൾ വേഗത്തിലാക്കണമെന്നും തുടർന്നു നടന്ന സമിതി എക്സിക്യൂട്ടീവ് യോഗം അധികൃതരോടാവശ്യപ്പെട്ടു.
ചെമ്പന്തൊട്ടി സെന്റ് ജോർജ് പള്ളി കോടികൾ വിലമതിക്കുന്ന സ്ഥലം മ്യൂസിയത്തിനായി വിട്ടുനൽകിയത് നാടിന്റെ വികസനത്തിന് വേണ്ടിയാണ്. അതു കൊണ്ടു തന്നെ മ്യൂസിയത്തിന്റെ പ്രവർത്തനം വഴി നാടിന്റെ വികസനം യാഥാർഥ്യമാക്കണമെന്നും യോഗം അഭിപ്രായപ്പെട്ടു.
തണൽമരങ്ങൾ നട്ടുപിടിപ്പിക്കുന്ന ചടങ്ങിലും യോഗത്തിലും വ്യാപാരി വ്യവസായി സമിതി യൂണിറ്റ് പ്രസിഡന്റ് മാത്യു പടിയറ, സെക്രട്ടറി ആന്റണി കടുപ്പിൽ, എക്സിക്യൂട്ടീവ് അംഗങ്ങളായ ഷിന്റു വർഗീസ്, വിനോദ് വെട്ടുകല്ലിങ്കൽ, ബെന്നറ്റ് ഫ്രാൻസിസ്, ഷിജു ചിറ്റാട്ട് എന്നിവർ പങ്കെടുത്തു.