വിഴിഞ്ഞം: വിഴിഞ്ഞം മുല്ലൂർ തുറമുഖ കവാടത്തിനു സമീപത്തുവച്ചു രണ്ടുപേരെ തെരുവുനായകൾ കടിച്ചു. പത്തനംതിട്ട സ്വദേശി അരവിന്ദ് (34), വിഴിഞ്ഞം മുല്ലൂർ സുരേഷ് (53) എന്നിവരെയാണ് തെരുവു നായകൾ ആക്രമിച്ചു പരിക്കേൽപ്പിച്ചത്.
അരവിന്ദിന്റെ ഇടതുകാലിന്റെ മുട്ടിനു മുകളിലും സുരേഷിന്റെ വലതുകാലിലെ മുട്ടിലുമാണ് തെരുവുനായയുടെ കടിയേറ്റത്. ഇന്നലെ ഉച്ചയ്ക്ക്ശേഷമായിരുന്നു സംഭവം. ഇരുവരെയും വിഴിഞ്ഞം ആശുപത്രിയിലെത്തിച്ചു ചികിത്സ നൽകിയശേഷം ജനറൽ ആശുപത്രിയിലേക്ക് മാറ്റി. മുല്ലൂർ മേഖലയിൽ തെരുവുനായകളുടെ ശല്യം വർധിക്കുന്നതായി നാട്ടുകാർ നേരത്തെ പരാതിപ്പെട്ടിരുന്നു.
സമീപത്തെ വീടുകളിലെ കോഴികൾ, വളർത്തുമൃഗങ്ങൾ എന്നിവയെ ആക്രമിക്കുന്നതും പതിവാണെന്നു നാട്ടുകാർ പറയുന്നു. അലഞ്ഞുതിരിഞ്ഞു നടക്കുന്ന ആക്രമണകാരികളായ തെരുവ്ു നായകളെ ഇവിടെനിന്നു മാറ്റണമെന്നു നാട്ടുകാർ ആവശ്യപ്പെട്ടു.
Tags : nattu vishesham dog Street attack