4

കോട്ടയം: ജില്ലയില്‍ രാവിലെ ഏഴിന് ആരംഭിച്ച വോട്ടെടുപ്പ് ഒരു മണിക്കൂര്‍ പിന്നിട്ടതോടെ നല്ല തിരക്കനുഭവപ്പെട്ടു. രാവിലെ ജോലിക്കു പോകുന്നവരുടെ നീണ്ടനിരയാണ് പല ബൂത്തിലും കാണാനായത്. ജില്ലയില്‍ രാവിലെ 9.05 വരെ 14.11 ശതമാനം വോട്ട് രേഖപ്പെടുത്തി.
ഒറ്റപ്പെട്ട സ്ഥലങ്ങളില്‍ രാവിലെ ഇലക്ട്രോണിക്‌ വോട്ടിംഗ് മെഷീന്‍ കേടായതു മൂലം വോട്ടെടുപ്പ് ആരംഭിക്കാന്‍ വൈകി. പുതിയ വോട്ടിംഗ് മെഷീന്‍ എത്തിച്ചു വോട്ടെടുപ്പ് തുടര്‍ന്നു. പാമ്പാടി പഞ്ചായത്തിലെ കയത്തുങ്കല്‍ 12-ാം വാര്‍ഡ് കുറ്റിക്കല്‍ സെന്‍റ് തോമസ് ഹൈസ്‌കൂളിലെ ഒന്നാം നമ്പര്‍ ബൂത്തില്‍ വോട്ടിംഗ് മെഷീന്‍ തകരാറിലായി.
മുണ്ടക്കയം പഞ്ചായത്ത് പതിനെട്ടാം വാര്‍ഡ് തന്നിക്കപതാലില്‍ വോട്ടെടുപ്പ് മെഷീന്‍ തകരാറിനെ തുടര്‍ന്ന് മുക്കാല്‍ മണിക്കൂര്‍ വോട്ടെടുപ്പ് തടസപ്പെട്ടു. തുടര്‍ന്ന് ഉദ്യോഗസ്ഥര്‍ വോട്ടിംഗ് മെഷീന്‍റെ തകരാര്‍ പരിഹരിച്ചു തെരഞ്ഞെടുപ്പ് പ്രക്രിയകള്‍ പുനഃരാരംഭിച്ചു.
മുണ്ടക്കയം പഞ്ചായത്ത് 13-ാം നമ്പര്‍ പുഞ്ചയവയല്‍ സെന്‍റ്മേരീസ് എല്‍പി സ്‌കൂള്‍ ബൂത്തിലും വോട്ടിംഗ് യന്ത്രം പണിമുടക്കി വോട്ടിംഗ് തടസപ്പെട്ടു.
പാറത്തോട് പഞ്ചായത്ത് മൂന്നാം വാര്‍ഡ് ബൂത്തായ ഗ്രേസി മെമ്മോറിയല്‍ സ്‌കൂളിലെ വോട്ടിംഗ് മെഷീന്‍ തകരാറിലായി. 78 പേര്‍ വോട്ട് ചെയ്ത ചെയ്ത ശേഷമാണു തകരാറിലായത്.
പാറത്തോട് പഞ്ചായത്ത് 17 വാര്‍ഡിലെ ഒന്നാം നമ്പര്‍ ബൂത്തില്‍ വോട്ടിംഗ് യന്ത്രം തകരാറിലായതിനെതുടര്‍ന്ന് അരമണിക്കൂര്‍ വൈകിയാണ് വോട്ടിംഗ് ആരംഭിച്ചത്.

Tags : voting delayed Kerala Election