വെല്ലൂർ ക്രിസ്ത്യൻ മെഡിക്കൽ കോളജിൽ എംബിബിഎസ്, നഴ്സിംഗ്, പാരാമെഡിക്കൽ കോഴ്സ് പ്രവേശനത്തിന് അപേക്ഷിക്കാം. അഖിലേന്ത്യാ മെഡിക്കൽ പ്രവേശന പരീക്ഷയായ നീറ്റ് പട്ടികയിൽ ഉൾപ്പെടുന്നവരിൽ നിന്നായായിരിക്കും എംബിബിഎസ് പ്രവേശനം. മറ്റു കോഴ്സുകൾക്കു പ്രവേശന പരീക്ഷയുടെ അടിസ്ഥാനത്തിലാണ് അഡ്മിഷൻ. മാർച്ച് 26നകം ഓണ്ലൈനായി അപേക്ഷിക്കണം. അപേക്ഷയുടെ പ്രിന്റൗട്ട് അനുബന്ധ രേഖ സഹിതം ഏപ്രിൽ രണ്ടിനകം അയച്ചു കൊടുക്കണം.എംബിബിഎസിന് അപേക്ഷിക്കുന്നവർ നീറ്റ് യുജി സ്കോർ ഫലം പ്രഖ്യാപിച്ചു രണ്ടാഴ്ചയ്ക്കകം ഓൺ ലൈനായി സമർപ്പിക്കണം.
ആകെയുള്ള കോഴ്സുകളെ ഗ്രൂപ് എ, ഗ്രൂപ് ബി എന്ന് രണ്ടായി തിരിച്ചിട്ടുണ്ട്. എംബിബിഎസ്, ബിഎസ്സി നഴ്സിംഗ്, മെഡിക്കൽ അനുബന്ധ കോഴ്സുകളാണ് ഗ്രൂപ് എയിൽ ഉൾപ്പെടുത്തിയിരിക്കുന്നത്. നഴ്സിംഗ് ഡിപ്ലോമ, അനുബന്ധ മെഡിക്കൽ ഡിപ്ലോമ കോഴ്സുകൾ, മാസ്റ്റർ ഓഫ് പബ്ലിക് ഹെൽത്ത്, എംഎസ്സി കോഴ്സുകളാണ് ഗ്രൂപ് ബിയിൽ.
ബിഎസ്സി നഴ്സിംഗ് ടെസ്റ്റും ഇന്റർവ്യുവും ജൂലൈ 20, 22 തീയതികളിൽ. ഓഗസ്റ്റ് നാലിന് ഫലം പ്രഖ്യാപിക്കും. പാരാമെഡിക്കൽ ബിരുദ കോഴ്സുകളുടെ പ്രവേശന പരീക്ഷ ജൂലൈ 23,24 തീയതികളിൽ. ഫലം ജൂലൈ 25ന്. നഴ്സിംഗ് ഡിപ്ലോമ കോഴ്സ് പ്രവേശന പരീക്ഷ ജൂലൈ 28,30. ഫലം ഓഗസ്റ്റ് ആറിന്. പാരാമെഡിക്കൽ പിജി ഡിപ്ലോമ, എംഎച്ച്എ, എംഎസ്സി പ്രവേശന പരീക്ഷ ഓഗസ്റ്റ് 4,5. ഫലം ഓഗസ്റ്റ് ആറിന്. എംപിഎച്ച് പ്രവേശന പരീക്ഷയും ഇന്റർവ്യുവും മേയ് 25, 26 തീയതകളിൽ നടത്തി മേയ് 27ന് ഫലം പ്രഖ്യാപിക്കും.
2020 ഡിസംബർ 31ന് 17 വയസ് പൂർത്തിയാകണം. നഴ്സിംഗ് കോഴ്സിനുള്ള ഉയർന്ന പ്രായപരിധി 30 വയസ്. പ്ലസ്ടു പാസായവർക്കും അവസാന വർഷ വിദ്യാർഥികൾക്കും അപേക്ഷിക്കാം. ഫിസിക്സ്, കെമിസ്ട്രി, ബയോളജി, ഇംഗ്ലീഷ് വിഷയങ്ങൾ പഠിച്ചിരിക്കണം. എംബിബിഎസ് പ്രവേശനത്തിനു ഹയർ സെക്കൻഡറി (അക്കാഡമിക്) പരീക്ഷയിൽ എല്ലാ വിഷയങ്ങളിലും ഒറ്റത്തവണയായി 60 ശതമാനം മാർക്കു നേടി പാസാകണം. ബിഎസ്സി നഴ്സിംഗ് പ്രവേശനം ആഗ്രഹിക്കുന്നവർ 45 ശതമാനം മാർക്കോടെ പ്ലസ് ടു പാസായവരും അവിവാഹിതരായ പെണ്കുട്ടികളുമായിരിക്കണം. വെല്ലൂർ ചിറ്റൂർ കാമ്പസിലേക്കും നഴ്സിംഗ് പ്രവേശനം നൽകുന്നുണ്ട്.
മറ്റു കോഴ്സുകളിലേക്കുള്ള നിബന്ധനകൾക്കു പ്രോസ്പെക്ടസ് കാണുക.
എംബിബിഎസ്: 16 ജനറൽ സീറ്റുകളും 84 സ്പോണ്സേർഡ് സീറ്റുകളുമാണുള്ളത്. അഡ്മിഷൻ ഫീസ് ആദ്യ വർഷം 39,930 രൂപയും തുടർന്നുള്ള വർഷങ്ങളിൽ 23,000 രൂപയുമാണ്. ബിഎസ്സി നഴ്സിംഗ്: ജനറൽ സീറ്റ് 15, സ്പോണ്സേഡ് സീറ്റ് 85. യൂണിഫോമിനുൾപ്പെടെ ഫീസ് ആദ്യ വർഷം 39,000 രൂപ. തുടർന്നുള്ള വർഷങ്ങളിൽ 14,000 രൂപ. ചിറ്റൂർ കാമ്പസിൽ ജനറൽ ഏഴ്, സ്പോൺസേർഡ് 43 സീറ്റുകൾ.
ബിഒടി, ബിപിടി, ബിഎസ്സി എംഎൽടി, ബിഎസ്സി ഒപ്ടോമെട്രി ടെക്നോളജി, ബിഎസ്സി മെഡിക്കൽ റിക്കാർഡ്സ് സയൻസ്, ബാച്ചിലർ ഓഫ് ഓഡിയോളജി ആൻഡ് സ്പീച്ച് ലാംഗ്വേജ് പത്തോളജി, ബിഎസ്സി ക്രിട്ടിക്കൽ കെയർ ടെക്നോളജി, ബിഎസ്സി ഡയാലസിസ് ടെക്നോളജി, ബിഎസ്സി ന്യൂക്ലിയർ മെഡിസിൻ ടെക്നോളജി, ബിഎസ്സി പ്രോസ്തെറ്റിക്സ് ആൻഡ് ഓർത്തോഡോണ്ടിക്സ്, ബിഎസ്സി റേഡിയോളജി ആൻഡ് ഇമേജിംഗ് ടെക്നോളജി, ബിഎസ്സി റേഡിയോ തെറാപ്പി ടെക്നോളജി, ബിഎസ്സി മെഡിക്കൽ സോഷ്യോളജി, ബിഎസ്സി കാർഡിയോ പൾമനറി പെർഫ്യൂഷൻ കെയർ ടെക്നോളജി, ബിഎസ്സി ഓപ്പറേഷൻ തിയറ്റർ ആൻഡ് അനസ്തേഷ്യാ ടെക്നോളജി, ബിഎസ്സി ന്യൂറോ ഇലക്ട്രോസൈക്കോളജി, ബിഎസ്സി ആക്സിഡന്റ് ആൻഡ് എമർജൻസി കെയർ ടെക്നോളജി, ബിഎസ്സി കാർഡിയാക് ടെക്നോളജി എന്നിവയാണു പാരാമെഡിക്കൽ വിഭാഗത്തിൽപ്പെട്ട ബിരുദ കോഴ്സുകൾ. ഒരാൾക്ക് ഏഴു കോഴ്സുകൾക്കു വരെ അപേക്ഷിക്കാം.
ഡിപ്ലോമ, ബിരുദാനന്തര ബിരുദ ഡിഗ്രി, ബിരുദാനന്തര ബിരുദ ഡിപ്ലോമ കോഴ്സുകളാണു ഗ്രൂപ്പ് ബി വിഭാഗത്തിലുള്ളത്. ഒരാൾക്ക് അഞ്ചു കോഴ്സുകൾക്കുവരെ അപേക്ഷിക്കാം.
എപ്പിഡിമിയോളജി, ബയോസ്റ്റാറ്റിസ്റ്റിക്സ്, മെഡിക്കൽ ഫിസിക്സ്, പബ്ലിക് ഹെൽത്ത് എന്നിവയിലാണു മാസ്റ്റേഴ്സ് കോഴ്സുകൾ. മെഡിക്കൽ അനുബന്ധ മേഖലകളിൽ ബിരുദം നേടിയവർക്കും എംഎസ്സി നഴ്സിംഗ് പാസായവർക്കും എപ്പിഡിമിയോളജിയിൽ എംഎസ്സി കോഴ്സിന് അപേക്ഷിക്കാം. സ്റ്റാറ്റിസ്റ്റിക്സ് ഒരു വിഷയമായി പഠിച്ച് ബിരുദം നേടിയവർക്ക് എംഎസ്സി ബയോസ്റ്റാറ്റിസ്റ്റിക്സിനും ബിരുദതലത്തിൽ ഫിസിക്സ് പഠിച്ചവർക്കു മെഡിക്കൽ ഫിസിക്സ് കോഴ്സിനും അപേക്ഷിക്കാം. എംബിബിഎസ്,ബിഡിഎസ്, ബിഎസ്സി നഴ്സിംഗ്, ബിപിടി.ബിഒടി, ബിഎഎംഎസ്, ബിഫാം, ബിടെക്, മാനേജ്മെന്റ്, നിയമം തുടങ്ങിയ വിഷയങ്ങളിൽ ബിരുദം നേടിയവർക്ക് മാസ്റ്റർ ഓഫ് പബ്ലിക് ഹെൽത്ത് കോഴ്സിന് അപേക്ഷിക്കാം.
അപേക്ഷാ ഫീസ്: ഗ്രൂപ്പ് എ വിഭാഗത്തിൽ അപേക്ഷിക്കുന്നവർക്ക് 500 രൂപ. ഡിപ്ലോമ കോഴ്സുകൾക്കു കോഴ്സ് ഒന്നിന് 100 രൂപ. എംഎസ്സി കോഴ്സുകൾക്ക് കോഴ്സ് ഒന്നിന് 500 രൂപ. കൂടാതെ അഡ്മിനിസ്ട്രേറ്റീവ് ചാർജായി 800 രൂപയും നൽകണം.
തിരുവനന്തപുരം, കോട്ടയം, കൊച്ചി, കോഴിക്കോട് എന്നിവയ്ക്കു പുറമേ ബംഗളൂരു, ഭുവനേശ്വർ, ചെന്നൈ, ഡൽഹി, ഗോഹട്ടി, ഹൈദരാബാദ്, കോൽക്കത്ത, ലക്നോ, മധുര, മുംബൈ, പോണ്ടിച്ചേരി, സേലം, വെല്ലൂർ, വിജവാഡ, പെനാംഗ് (മലേഷ്യ) പ്രവേശന പരീക്ഷാ കേന്ദ്രങ്ങളാണ്.
120 മിനിറ്റ് ദൈർഘ്യമുള്ള കംപ്യൂട്ടർ അധിഷ്ഠിത പരീക്ഷയാണു നടത്തുന്നത്. ഫിസിക്സ്, കെമിസ്ട്രി, ബയോളജി എന്നിവയിൽനിന്നുള്ള ചോദ്യങ്ങൾക്കു പുറമേ ജനറൽ എബിലിറ്റി, ആനുകാലിക വിഷയങ്ങൾ എന്നിവയിൽനിന്നു ചോദ്യങ്ങൾ ഉണ്ടായിരിക്കും.
മതന്യൂനപക്ഷ വിഭാഗത്തിൽ പ്രവേശനം നേടുന്ന ക്രിസ്ത്യൻ വിദ്യാർഥികൾ വേദപുസ്തകത്തെ അടിസ്ഥാനമാക്കിയുള്ള ഒരു പരീക്ഷകൂടി എഴുതണം. മൾട്ടിപ്പിൾ ചോയ്സ് ക്വസ്റ്റ്യൻസ് മാതൃകയിലായിരിക്കും ഈ പരീക്ഷ നടത്തുക.
ഓണ്ലൈനായി അപേക്ഷ സമർപ്പിക്കാൻ തുടങ്ങുന്നതിനു മുമ്പു നിർദിഷ്ട അളവിലുള്ള ഫോട്ടോഗ്രാഫും ( 80 കെബി. വീതി 150 പിക്സെൽ, ഉയരം 150 പിക്സെൽ) കൈയൊപ്പിന്റെ സ്കാൻ ചെയ്ത കോപ്പിയും (50 കെബി, ഉയരം 50 പിക്സെൽ വീതി 150 പിക്സെൽ) തയാറാക്കി വയ്ക്കണം.
സ്പോണ്സർഷിപ് സംബന്ധിച്ച കൂടുതൽ വിവരങ്ങൾക്കും അപേക്ഷാഫോം, മാതൃകാ ചോദ്യപേപ്പർ എന്നിവയ്ക്കും വെബ്സൈറ്റ് സന്ദർശിക്കുക. വെബ്സൈറ്റ്: http:admission s.cmcvellore.ac.in ഫോണ്:(0416)2284255 /22 84495. വിലാസം: രജിസ്ട്രാർ, ക്രിസ്ത്യൻ മെഡിക്കൽ കോളജ്. വെല്ലൂർ, തമിഴ്നാട് 632 002.
വെല്ലൂർ ക്രിസ്ത്യൻ മെഡിക്കൽ കോളജ് അസോസിയേഷനിൽ അംഗത്വമുള്ള ക്രിസ്ത്യൻ സംഘടനകൾക്കും അഗങ്ങൾക്കും വിദ്യാർഥികളെ സ്പോണ്സർ ചെയ്യാം.
(ഉദാ: സിഎസ്ഐയുടെ ഉത്തര, മധ്യ, ദക്ഷിണ കേരള മഹാഇടവകകൾ, മാർത്തോമാ സിറിയൻ ചർച്ച്, മലങ്കര യാക്കോബായ സിറിയൻ ഓർത്തഡോക്സ് ചർച്ച്, മലങ്കര ഓർത്തഡോക്സ് സിറിയൻ ചർച്ച് എന്നിവ).