സംസ്ഥാന സ്കൂൾ ശാസ്ത്രോത്സവം ലോഗോ
മണ്ണാർക്കാട്: സംസ്ഥാന സ്കൂൾ ശാസ്ത്രോത്സവത്തിൽ ഓവറോൾ ചാന്പ്യൻഷിപ്പിനായി മലപ്പുറവും കണ്ണൂരും ഇഞ്ചോടിഞ്ച് പോരാട്ടത്തിൽ. മലപ്പുറം 374 പോയിന്റ് നേടി ഒന്നാംസ്ഥാനത്ത് തുടരുന്പോൾ 368 പോയിന്റുമായി കണ്ണൂർ തൊട്ടുപിന്നിലുണ്ട്.
വയനാട് 363, തൃശൂർ 362, കോഴിക്കോട് 360 എന്നിങ്ങനെയാണ് യഥാക്രമം മൂന്നുമുതൽ അഞ്ചുവരെ സ്ഥാനങ്ങളിൽ.
സ്കൂളുകളിൽ മാനന്തവാടി ജിവിഎച്ച്എസ്എസ്, ആലപ്പുഴ പുങ്കാവ് എംഐഎച്ച്എസ് എന്നിവ 43 പോയിന്റ് വീതം നേടി ഒന്നാംസ്ഥാനം പങ്കിടുകയാണ്. 39 പോയിന്റുള്ള ഇടുക്കി ഇരട്ടയാർ എസ്ടിഎച്ച്എസ്എസ് ആണ് മൂന്നാംസ്ഥാനത്ത്. കേൾവിപരിമിതരുടെ വിഭാഗത്തിൽ മാണിക്യമംഗലം സെന്റ് കെയർ ഓറൽ സ്കൂൾ ഒന്നാം സ്ഥാനത്താണ്.
കോഴിക്കോട് എരഞ്ഞിപ്പാലം കരുണ സ്പീച്ച് ആൻഡ് ഹിയറിംഗ് സ്കൂളാണു രണ്ടാമത്. കാഴ്ചപരിമിതരുടെ വിഭാഗത്തിൽ കോട്ടയം ഒളശ ഗവ. സ്കൂളിന് ഒന്നാംസ്ഥാനവും പാലക്കാട് കോട്ടപ്പുറം എച്ച്കെസിഎംഎം സ്കൂളിനു രണ്ടാം സ്ഥാനവും ലഭിച്ചു.
പ്രകൃതിയെ കാക്കാൻ മാമോ ഗ്രീൻ റെയിൽ
ഇടുക്കി, വയനാട് ജില്ലകളിൽ ഗതാഗതത്തിനു മാമോ ഗ്രീൻ റെയിൽ സംവിധാനം നിർദേശിച്ച് സംസ്ഥാന ശാസ്ത്രോത്സവത്തിൽ ഇടുക്കി തൊടുപുഴ കാളിയാർ സെന്റ് മേരീസ് ഹയർ സെക്കൻഡറി സ്കൂളിലെ എട്ടാംക്ലാസ് വിദ്യാർഥിനികൾ. പ്രകൃതിക്കു കോട്ടംതട്ടാത്ത ഗതാഗതസംവിധാനമാണിത്.
ഇന്ത്യക്കു പുറമേ ജർമനി, ചൈന, യുഎസ്, ജപ്പാൻ തുടങ്ങിയ രാജ്യങ്ങളിലും നിലവിൽ ഈ സംവിധാനമുണ്ടെന്ന് എട്ടാംക്ലാസ് വിദ്യാർഥികളായ മാർഗരറ്റ് റോയ്, അമയ ബിബു എന്നിവർ പറഞ്ഞു.
ഹൈഡ്രജൻ ഇന്ധനമായി ഉപയോഗിക്കുന്ന ഇന്ത്യയിൽ കണ്ടുവരുന്ന ട്രെയിനിന്റെ മാതൃകയാണ് മണ്ണാർക്കാട് എംഇഎസ് ഹയർ സെക്കൻഡറി സ്കൂളിൽ നടക്കുന്ന ശാസ്ത്ര-ഐടി മേളയിൽ ഇവർ പ്രദർശിപ്പിച്ചത്.

സ്പെഷൽ സ്കൂളിലെ കുട്ടിശാസ്ത്രജ്ഞൻമാർ
മണ്ണാർക്കാട്: പരാധീനതകളെ മത്സരവേദികൾക്കു പുറത്തുനിർത്തി മനക്കണ്ണിൽ കാഴ്ചകളുടെയും ആശയങ്ങളുടെയും കരസ്പർശമൊരുക്കി സ്പെഷൽ സ്കൂൾ മൽസരാർഥികൾ, മാറുന്ന കാലത്തിനൊപ്പം പുത്തൻ ആശയങ്ങൾ പങ്കുവച്ചും വിശദീകരിച്ചും ഹൈസ്കൂൾ വിഭാഗം കുട്ടിശാസ്ത്രജ്ഞൻമാർ, കണ്ടും പ്രോത്സാഹിപ്പിച്ചും എത്തുന്നവരെ തങ്ങളുടെ ആശയങ്ങൾ പറഞ്ഞു മനസിലാക്കിക്കൊടുക്കുന്ന മത്സരാർഥികൾ...
സംസ്ഥാന സ്കൂൾ ശാസ്ത്രോൽസവത്തിൽ കാഴ്ചകൾക്കു പഞ്ഞമില്ല. റോബോട്ട് മുതൽ വലിയ ടവറുകൾ വരെ, പ്രകൃതിക്ക് അനുയോജ്യമായ റെയിലുകൾ, സ്റ്റൂളുകളും കസേരകളുമെല്ലാം ഇത്ര പെട്ടെന്നു നിർമിക്കാൻ കഴിയുമോ എന്നു ചിന്തിപ്പിച്ചുപോകുന്ന തത്സമയപ്രവൃത്തികൾ. ശാസ്ത്രമേളയെ വേഗതകൊണ്ടും ആശയം കൊണ്ടും സന്പന്നമാക്കുകയാണു മത്സരാർഥികൾ.
ഹൈസ്കൂൾ വിഭാഗം മത്സരാർഥികളാണ് ഇന്നലെ തങ്ങളുടെ കണ്ടുപിടിത്തങ്ങൾ അവതരിപ്പിച്ചതെങ്കിൽ തുടർദിവസങ്ങളിൽ ചേട്ടൻമാരുടെ ഉൗഴമാണ്. ഇന്ന് ഹയർ സെക്കൻഡറി വിഭാഗം തത്സമയമത്സരങ്ങൾ കല്ലടി എച്ച്എസ്എസിലും എംഇടിഎച്ച്എസിൽ ഹയർ സെക്കൻഡറി വിഭാഗം സ്റ്റിൽ മോഡൽ, വർക്കിംഗ് മോഡലുകളുടെ മത്സരവും പ്രദർശനവും നടക്കും.
ഇന്ന് ഐടിമേളയിൽ വെബ് പേജ് ഡിസൈനിംഗ്, സ്ക്രാച്ച് പോഗ്രാമിംഗ്, ഇൻവെസ്റ്റിഗേറ്ററി പ്രൊജക്ട്, റോബോട്ടിക് വർക്കിംഗ് മോഡലുകൾ, ഇലക്ട്രിക് വർക്കിംഗ് മോഡലുകൾ എന്നിവ നടക്കും. സമാപനദിവസമായ നാളെ തത്സമയ പ്രവൃത്തിപരിചയമേള, അനിമേഷൻ, ക്വിസ് മത്സരങ്ങളാണു പ്രധാനമായും നടക്കുക.

കളിമണ്ണിൽ കണ്ടത് കർഷകന്റെ ജീവിതക്കാഴ്ച
കർഷകന്റെ ജീവിതക്കാഴ്ച കളിമണ്ണുകൊണ്ടുനിർമിച്ച് ശ്രദ്ധനേടി കോഴിക്കോട് എരഞ്ഞിപ്പാലം കരുണ സ്പീച്ച് ആൻഡ് ഹിയറിംഗ് സ്കൂളിലെ പത്താംക്ലാസുകാരി എ.എം. ദേവിക.
കഴിഞ്ഞതവണ ഒന്നാം സ്ഥാനം നേടിയ ദേവിക ഇത്തവണയും പതിവു തെറ്റിച്ചില്ല. സ്കൂൾ അധ്യാപകൻ സതീഷ് കുമാറിന്റെ ശിക്ഷണത്തിലായിരുന്നു പരിശീലനം.
കൊല്ലം കൂടല്ലൂർ കടയ്ക്കൽ ക്ഷേത്രത്തിലെ പൂജാരിയായ അനിൽകുമാർ-എസ്. മറീന ദന്പതികളുടെ മകളായ ദേവിക കളിമണ് നിർമാണത്തിലാണു ശ്രദ്ധ കേന്ദ്രീകരിക്കുന്നത്. എരഞ്ഞിപ്പാലത്തെ സ്കൂൾ ഹോസ്റ്റലിലാണു താമസം. എ.എം. മാളവിക ഏക സഹാദരിയാണ്. സ്കൂളിൽനിന്ന് 66 വിദ്യാർഥികളാണ് വിവിധ മത്സരങ്ങളിൽ പങ്കെടുക്കാനെത്തിയത്.
സാമൂഹ്യപ്രതിബദ്ധത വിളിച്ചോതി എൻഎസ്എസ് സ്റ്റാളുകൾ
സംസ്ഥാന ശാസ്ത്രമേളയോടും സ്റ്റേറ്റ് സ്കിൽ എക്സ്പോയോടും അനുബന്ധിച്ച് നാഷണൽ സർവീസ് സ്കീമിന്റെ ആഭിമുഖ്യത്തിൽ ഒരുക്കിയ രണ്ട് വിശാലമായ സ്റ്റാളുകൾ ശ്രദ്ധേയമാകുന്നു.
ലഹരിവിരുദ്ധബോധവൽക്കരണം, അവയവദാനപ്രചാരണം, ആരോഗ്യസംരക്ഷണം, ജീവിതശൈലീരോഗപ്രതിരോധം തുടങ്ങിയ സാമൂഹ്യപ്രസക്തിയുള്ള വിഷയങ്ങൾക്കാണ് സ്റ്റാളുകളിൽ പ്രാധാന്യം നൽകിയിരിക്കുന്നത്. ലഹരിക്കെതിരേ ശക്തമായ സന്ദേശമുയർത്തുന്ന തൂഫാൻ ഗോൾ പോസ്റ്റർ പ്രധാന ആകർഷണമാണ്.
സ്റ്റാളുകളുടെ ഉദ്ഘാടനം വിദ്യാഭ്യാസമന്ത്രി എൻ. ഷംസുദ്ദീൻ നിർവഹിച്ചു. കുറ്റിപ്പുറം റീജിയണൽ അസിസ്റ്റന്റ് ഡയറക്ടർ എ. അബൂബക്കർ അധ്യക്ഷത വഹിച്ചു.

"മുളയിലേ’ വിസ്മയം
ഞാൻ ഇത്രയും പെട്ടെന്നു ചെയ്തുതീർക്കുമെന്ന് ടീച്ചർ കരുതിയോ... അഞ്ചുവയസുകാരി അനുഗ്രഹ തോമസിന്റെ ചോദ്യംകേട്ട് അധ്യാപിക സിസ്റ്റർ പ്രിൻസി മേരിയുടെ മുഖത്തു ചിരി പടർന്നു. മത്സരസമയം തീരാൻ ഒരു മണിക്കൂറോളം ബാക്കിയുള്ളപ്പോൾ മുള കൊണ്ടുള്ള ആറ് ഐറ്റങ്ങളാണ് അനുഗ്രഹ തോമസ് എന്ന കൊച്ചുമിടുക്കി നിർമിച്ചത്.
കാഞ്ഞിരപ്പള്ളി കാളകെട്ടി അസീസി ബ്ലൈൻഡ് സ്കൂളിലെ ഒന്നാംക്ലാസുകാരിയുടെ കരവിരുതിലും വേഗതയിലും അതിശയിക്കുകയാണ് വിധികർത്താക്കളും. ഒന്നാം സ്ഥാനവുമായാണ് അനുഗ്രഹ കളംവിട്ടത്.
ശാസ്ത്രോത്സവത്തിന്റെ ഭാഗമായുള്ള സ്പെഷൽ സ്കൂൾ പ്രവൃത്തിപരിചയമേളയിലാണ് അനുഗ്രഹ തോമസ് കഴിവുതെളിയിച്ചത്. രണ്ടുദിവസത്തെ പരിശീലനത്തിലൂടെയാണ് ഈ അഞ്ചുവയസുകാരി കപ്പും സ്റ്റൂളും മുളപ്പായയും പെൻ ബോക്സുകളും നിർമിക്കാൻ പഠിച്ചത്.
തുടക്കംമുതലേ അനുഗ്രഹ ഉത്പന്നനിർമാണത്തിൽ ഏറെ താൽപര്യം പ്രകടിപ്പിച്ചിരുന്നതായി സിസ്റ്റർ പറയുന്നു. അടുത്തതവണ കൂടുതൽ വൈവിധ്യമാർന്ന ഉത്പന്നങ്ങൾ നിർമിക്കാൻ കഴിയുമെന്ന ആത്മവിശ്വാസമാണ് അനുഗ്രഹ പങ്കുവയ്ക്കുന്നത്. സ്കൂളിൽ നിന്നു 12 വിദ്യാർഥികളാണ് വിവിധ വിഭാഗങ്ങളിലായി പ്രവൃത്തിപരിചയമേളയിൽ പങ്കെടുക്കാനെത്തിയത്.
വിഎച്ച്എസ്ഇ സ്കിൽ ഫെസ്റ്റിനു തുടക്കം
പൊതുവിദ്യാഭ്യാസവകുപ്പ് വിഎച്ച്എസ്ഇ വിഭാഗത്തിന്റെ നേതൃത്വത്തിൽ സംഘടിപ്പിക്കുന്ന സ്കിൽ ഫെസ്റ്റിവലിനു തുടക്കം. വിദ്യാർഥികളുടെ തൊഴിൽനൈപുണ്യം, സാങ്കേതികപരിജ്ഞാനം, സംരംഭകത്വശേഷി, സർഗാത്മകത എന്നിവ പ്രോത്സാഹിപ്പിക്കുകയും പഠനത്തോടൊപ്പം പ്രായോഗികകഴിവുകൾ വികസിപ്പിക്കുകയും ചെയ്യുക എന്ന ലക്ഷ്യത്തോടെയാണ് സ്കിൽ ഫെസ്റ്റിവൽ സംഘടിപ്പിക്കുന്നത്.
പൊതുവിദ്യാഭ്യാസമന്ത്രി എൻ. ഷംസുദ്ദീൻ ഉദ്ഘാടനം ചെയ്തു. പൊതുവിദ്യാഭ്യാസവകുപ്പ് ഡെപ്യൂട്ടി ഡയറക്ടർ ജനറൽ കെ.വി. മനോജ് അധ്യക്ഷത വഹിച്ചു.
മണ്ണാർക്കാട് നഗരസഭ ചെയർപേഴ്സണ് കെ. സജ്ന മുഖ്യാതിഥിയായി. വിഎച്ച്എസ്ഇ കരിക്കുലം ഡെപ്യൂട്ടി ഡയറക്ടർ എം.എ. അസ്ഹർ മുഖ്യപ്രഭാഷണം നടത്തി. പൊതുവിദ്യാഭ്യാസ ജോയിന്റ് ഡയറക്ടർ എ. അബൂബക്കർ, ഹയർ സെക്കൻഡറി ജോയിന്റ് ഡയറക്ടർ കെ.കെ. അഷ്റഫ്, വിഎച്ച്എസ്ഇ എക്സാം ഡെപ്യൂട്ടി ഡയറക്ടർ ലിസി ജോസഫ് എന്നിവർ പ്രസംഗിച്ചു.

പ്രകൃതിക്ഷോഭത്തിന് "കവചം’ തയാർ
സംസ്ഥാന ശാസ്ത്രമേളയിൽ നൂതന കണ്ടുപിടിത്തങ്ങളുമായി സോഷ്യൽ സയൻസ് പ്രവർത്തനമാതൃകകൾ. പുത്തൂർ ഗവ. ഹൈസ്കൂളിലെ കൃഷ്ണതീർഥയും ദേവികയും അവതരിപ്പിച്ച കവചം പ്രോജക്റ്റ് അവയിൽ വേറിട്ടുനിന്നു.
പ്രകൃതിക്ഷോഭങ്ങളിൽനിന്നു കൃത്യമായ മുന്നറിയിപ്പ് നൽകുന്ന ന്ധകവചം’ ജീവനും സുരക്ഷയും ഉറപ്പുവരുത്തുന്നു. തിരുവനന്തപുരത്തെ അമർദേവും ആദിൽ റഹ്മാനും ചേർന്ന് ഉൗർജത്തിന്റെ പ്രാധാന്യത്തെക്കുറിച്ച് അവതരിപ്പിച്ച മാതൃകയും ശ്രദ്ധേയമായി. പ്രപഞ്ചത്തിലുള്ള എല്ലാത്തിനെയും ഉൗർജമാക്കി മാറ്റാൻ കഴിയുന്ന സാങ്കേതികവിദ്യയാണത്.
പങ്കാളിത്തംകൊണ്ട് ശ്രദ്ധേയമായി സിജിസിസി കരിയർ ഫെസ്റ്റ്
മണ്ണാർക്കാട്: കേരള സ്കൂൾ ശാസ്ത്രോത്സവത്തോടനുബന്ധിച്ചുള്ള വിഎച്ച്എസ്ഇ സ്കൂൾ സ്കിൽ ഫെസ്റ്റിവലിന്റെ ഭാഗമായി കരിയർ ഗൈഡൻസ് ആൻഡ് കൗണ്സിലിംഗ് സെൽ (സിജിസിസി) സംഘടിപ്പിച്ച കരിയർ ഫെസ്റ്റ് ശ്രദ്ധേയമായി.
പൊതുവിദ്യാഭ്യാസമന്ത്രി എൻ. ഷംസുദ്ദീൻ ഉദ്ഘാടനം ചെയ്തു.വിഎച്ച്എസ്ഇ ഡെപ്യൂട്ടി ഡയറക്ടർ (ജനറൽ) കെ.വി. മനോജ്, ഡെപ്യൂട്ടി ഡയറക്ടർ (കരിക്കുലം) എം.എ. അസ്ഹർ, സിജിസിസി സംസ്ഥാന കോഓർഡിനേറ്റർ മുഹമ്മദ് ഇക്ബാൽ, ജില്ലാ കോഓർഡിനേറ്റർമാരായ സക്കറിയ എളേറ്റിൽ, സി. അബ്ദുൽ അസീസ്, സോണിയ രാജ് എന്നിവർ പങ്കെടുത്തു.
സൗജന്യ വൈഫൈ
മീഡിയ റൂമിൽ എംസിവിയുമായി സഹകരിച്ച് ഏർപ്പെടുത്തിയ ബിഎസ്എൻഎൽ സൗജന്യ വൈഫൈയുടെ ഉദ്ഘാടനം മന്ത്രി ഷംസുദ്ദീൻ നിർവഹിച്ചു. മീഡിയ റൂമിലെ ക്യു ആർ കോഡ് സ്കാൻ ചെയ്താൽ സൗജന്യമായി വൈഫൈ ലഭിക്കും.