ഇപിഎഫ്ഒ
ന്യൂഡൽഹി: വിരമിക്കുമ്പോൾ പ്രോവിഡന്റ് ഫണ്ട് (പിഎഫ്) സമ്പാദ്യം മുഴുവനായി ഒറ്റത്തവണ പിൻവലിക്കുന്നതിനുപകരം തവണകളായി കൈപ്പറ്റാൻ അനുവദിക്കുന്ന സിസ്റ്റമാറ്റിക് വിത്ഡ്രോവൽ പ്ലാനിന് (എസ്ഡബ്ല്യുപി) എംപ്ലോയീസ് പ്രോവിഡന്റ് ഫണ്ട് ഓർഗനൈസേഷൻ (ഇപിഎഫ്ഒ) അനുമതി നൽകി.
വിരമിച്ചശേഷം പിഎഫ് നിക്ഷേപം സ്ഥിരവരുമാനമായി പ്രയോജനപ്പെടുത്താൻ സഹായിക്കുന്നതാണ് പുതിയ സംവിധാനം. കേന്ദ്ര തൊഴിൽമന്ത്രി മൻസുഖ് മാണ്ഡവ്യയുടെ അധ്യക്ഷതയിൽ ചേർന്ന സെൻട്രൽ ബോർഡ് ഓഫ് ട്രസ്റ്റീസിന്റെ യോഗത്തിലാണ് തീരുമാനം.
55 വയസിന് മുകളിലുള്ളവരും പിഎഫ് അക്കൗണ്ടിൽ അഞ്ചു ലക്ഷത്തിലധികം രൂപ നിക്ഷേപമുള്ളവരുമായ ഏകദേശം 6.32 ലക്ഷം പേർക്കാണ് ആദ്യഘട്ടത്തിൽ ഇതിന്റെ പ്രയോജനം ലഭിക്കുക. പിൻവലിക്കാതെ അക്കൗണ്ടിൽ നിലനിർത്തുന്ന തുകയ്ക്ക് നിലവിലെ നിരക്കിൽ പലിശ തുടർന്നും ലഭിക്കും.
പുതിയ പദ്ധതിപ്രകാരം മൂന്നു രീതികളിൽ പിഎഫ് തുക കൈപ്പറ്റാം. നിശ്ചിത ഇടവേളകളിൽ തവണകളായി തുക പിൻവലിക്കാം. അല്ലെങ്കിൽ ഒരു ഭാഗം ആദ്യം ഒറ്റത്തവണയായി പിൻവലിച്ചശേഷം ബാക്കി തുക തവണകളായി സ്വീകരിക്കാം. മൂന്നാമത്തെ രീതിയിൽ നിക്ഷേപത്തിന്റെ പലിശ മാത്രം പിൻവലിച്ച് മൂലധനം അക്കൗണ്ടിൽ നിലനിർത്താം.
ആവശ്യമെങ്കിൽ പദ്ധതി ഇടയ്ക്കുവച്ച് അവസാനിപ്പിച്ച് ശേഷിക്കുന്ന മുഴുവൻ തുകയും പിൻവലിക്കാനും അവസരമുണ്ടാകും. അക്കൗണ്ടുടമ തവണകൾ ലഭിക്കുന്നതിനിടെ മരിച്ചാൽ ബാക്കിയുള്ള തുക നോമിനിക്കോ ആശ്രിതർക്കോ ഒറ്റത്തവണയായോ തവണകളായോ കൈപ്പറ്റാം. പിൻവലിക്കലിന്റെ ഇടവേള, മിനിമം ബാലൻസ്, അപേക്ഷാ നടപടികൾ തുടങ്ങിയവ സംബന്ധിച്ച വിശദമായ മാർഗനിർദേശങ്ങൾ വൈകാതെ ഇപിഎഫ്ഒ പുറത്തിറക്കും.
വിരമിക്കുമ്പോൾ ലഭിക്കുന്ന വലിയൊരു തുക എവിടെ നിക്ഷേപിക്കണമെന്ന ആശങ്ക ഒഴിവാക്കാമെന്നതാണ് പദ്ധതിയുടെ പ്രധാന നേട്ടം. ഉദാഹരണത്തിന്, പിഎഫ് അക്കൗണ്ടിൽ 30 ലക്ഷം രൂപയുള്ള ഒരാൾക്ക് തുക തവണകളായി പിൻവലിച്ച് പ്രതിമാസ ചെലവുകൾക്കായി ഉപയോഗിക്കാം. അതേസമയം, അക്കൗണ്ടിൽ അവശേഷിക്കുന്ന തുകയ്ക്കു പലിശ ലഭിക്കുകയും ചെയ്യും. 2025-26 സാമ്പത്തികവർഷത്തേക്ക് 8.25 ശതമാനം പലിശനിരക്കാണ് സെൻട്രൽ ബോർഡ് ശിപാർശ ചെയ്തിരിക്കുന്നത്.
മുൻകൂറായി 90 ശതമാനം വരെ പിൻവലിക്കാം
സിസ്റ്റമാറ്റിക് വിത്ഡ്രോവൽ പ്ലാനിന് അനുമതി നൽകിയതിനൊപ്പം വിരമിക്കുന്നതിനുമുമ്പുള്ള ഭാഗിക പിൻവലിക്കൽ ചട്ടങ്ങളിലും ഇപിഎഫ്ഒ ഇളവുകൾ വരുത്തിയിട്ടുണ്ട്. 55 വയസിന് താഴെയുള്ളവർക്ക് അർഹമായ പിഎഫ് ബാലൻസിന്റെ 90 ശതമാനം വരെ പിൻവലിക്കാം. നേരത്തേ ഇത് 75 ശതമാനമായിരുന്നു.
ജോലി നഷ്ടപ്പെട്ടാൽ പിഎഫ് തുക പിൻവലിക്കുന്നതിനു കാത്തിരിക്കേണ്ട കാലാവധി 12 മാസത്തിൽനിന്ന് രണ്ടുമാസമായി കുറച്ചിട്ടുണ്ട്. ചികിത്സ, വിദ്യാഭ്യാസം, വിവാഹം, വീട് വാങ്ങൽ, നിർമാണം, ഭവനവായ്പ തിരിച്ചടവ്, വീട് നവീകരണം തുടങ്ങിയ ആവശ്യങ്ങൾക്കും നിബന്ധനകൾക്കു വിധേയമായി പണം പിൻവലിക്കാം.
എന്നാൽ, പുതിയ പിൻവലിക്കൽ സംവിധാനം ഇപിഎഫ്ഒയുടെ ഔദ്യോഗിക വിജ്ഞാപനവും വിശദമായ മാർഗനിർദേശങ്ങളും പുറത്തിറങ്ങിയശേഷമേ പ്രാബല്യത്തിൽ വരൂ. ആദ്യഘട്ടത്തിൽ ഇപിഎഫ്ഒ നേരിട്ടു കൈകാര്യം ചെയ്യുന്ന അക്കൗണ്ടുകൾക്കായിരിക്കും ആനുകൂല്യം ലഭിക്കുക. സ്വന്തം ട്രസ്റ്റുകൾ വഴി പിഎഫ് കൈകാര്യം ചെയ്യുന്ന സ്ഥാപനങ്ങളിലെ ജീവനക്കാർക്ക് നിലവിൽ ഈ സൗകര്യം ലഭിച്ചേക്കില്ല.
പുതിയ പദ്ധതി പിഎഫ് നിക്ഷേപത്തിനു മാത്രമാണ് ബാധകം. എംപ്ലോയീസ് പെൻഷൻ സ്കീം (ഇപിഎസ്) പ്രകാരമുള്ള പ്രതിമാസ പെൻഷൻ ഇതിൽനിന്നു വ്യത്യസ്തമായ ആനുകൂല്യമായി തുടരും.
Tags : EPFO withdrawal Rules PF