ബംഗ്ലാദേശ് കോക്സ് ബസാറിലെ അഭയാർഥി ക്യാന്പിൽ കഴിയുന്ന രോഹിംഗ്യകൾ ഹേഗിലെ കോടതിവിധി സ്ക്രീനിൽ വീക്ഷിക്കുന്നു.
ഹേഗ്: മ്യാൻമറിലെ രോഹിംഗ്യൻ കൂട്ടക്കൊല സർക്കാരിന്റെ പിന്തുണയോടെ നടന്ന വംശീയ ഉന്മൂലനമാണെന്ന് ഐക്യരാഷ്ട്രസഭയുടെ അന്താരാഷ്ട്ര നീതിന്യായ കോടതി (ഐസിജെ) വിധിച്ചു. ബുദ്ധമത ഭൂരിപക്ഷ മ്യാൻമറിലെ പട്ടാളം 2017ൽ ന്യൂനപക്ഷ രോഹിംഗ്യൻ മുസ്ലിംകൾക്കു നേരേ അഴിച്ചിവിട്ട നിഷ്ഠുര പീഡനങ്ങളിൽ 10,000 പേരെങ്കിലും കൊല്ലപ്പെടുകയും ലക്ഷക്കണക്കിനു പേർ അയൽരാജ്യമായ ബംഗ്ലാദേശിലേക്കു പലായനം ചെയ്യുകയുമുണ്ടായി.
ഒരു രാജ്യം വംശീയ ഉന്മൂലനം നടത്തിയെന്ന് അന്താരാഷ്ട്ര കോടതി വിധിക്കുന്ന ആദ്യ കേസാണിത്. നെതർലൻഡ്സിലെ ഹേഗിലുള്ള പീസ് പാലസിൽ ചേർന്ന 15 അംഗ ജഡ്ജിമാരുടെ പാനലാണു വിധി പ്രസ്താവിച്ചത്.
രോഹിംഗ്യൻ മുസ്ലിംകളെ കൊന്നൊടുക്കാൻ ലക്ഷ്യമിട്ടായിരുന്നു മ്യാൻമർ ഭരണകൂടത്തിന്റെ പ്രവർത്തനങ്ങളെന്ന് വിധി വായിച്ച ജഡ്ജിമാരുടെ അധ്യക്ഷൻ യുജി ഇവസമ വ്യക്തമാക്കി. പട്ടാളത്തിന്റെ ക്രൂരകൃത്യങ്ങളിൽ അന്വേഷണം നടത്താതിരുന്നതിനു പുറമേ തെളിവു നശിപ്പിക്കാന് ഭരണകൂടം കൂട്ടുനിന്നുവെന്നും ജഡ്ജി കൂട്ടിച്ചേർത്തു.
പടിഞ്ഞാറൻ ആഫ്രിക്കൻ രാജ്യമായ ഗാംബിയ ആണ് മ്യാൻമർ ഭരണകൂടത്തിനെതിരേ 2019ൽ ഹർജി നല്കിയത്. ബ്രിട്ടൻ, ഫ്രാൻസ്, കാനഡ, ജർമനി തുടങ്ങി 11 രാജ്യങ്ങൾ ഗാംബിയയെ പിന്തുണച്ച് കേസിൽ കക്ഷിചേർന്നിരുന്നു. ബംഗ്ലാദേശിലുള്ള രോഹിംഗ്യൻ അഭയാർഥികൾ വിധിയെ സ്വാഗതം ചെയ്തു. ഏതാണ്ട് 12 ലക്ഷം രോഹിംഗ്യൻ അഭയാർഥികൾ ബംഗ്ലാദേശിലുണ്ട്.
മ്യാൻമർ പട്ടാളം വ്യാപകമായി ലൈംഗിക അതിക്രമങ്ങൾ നടത്തിയതായും കുട്ടികളോടു ക്രൂരത കാണിച്ചതായും കോടതി കണ്ടെത്തി. രോഹിംഗ്യൻ അഭയാർഥികളെ തിരിച്ചെത്തിക്കാനും കുടുംബാംഗങ്ങളുമായി ഒത്തുചേരാനും മ്യാൻമർ സർക്കാർ സൗകര്യമൊരുക്കണമെന്ന് കോടതി നിർദേശിച്ചു. ഇരകൾക്കു നഷ്ടപരിഹാരം നല്കണം.
നഷ്ടപരിഹാരത്തുക പിന്നീടു നിശ്ചയിക്കും. ക്രൂരകൃത്യങ്ങൾ നടത്തിയ പട്ടാളക്കാർക്കെതിരേ ഉടനടി അന്വേഷണം ആരംഭിക്കണം. വംശഹത്യ തടയാനുള്ള നിയമങ്ങൾ മ്യാൻമറിൽ നടപ്പാക്കണമെന്നും കോടതി ഉത്തരവിൽ പറയുന്നു.
1995ലെ ബോസ്നിയൻ വംശഹത്യ തടയുന്നതിൽ സെർബ് ഭരണകൂടം പരാജയപ്പെട്ടുവെന്ന് അന്താരാഷ്ട്ര നീതിന്യായ കോടതി 2007ൽ വിധിച്ചെങ്കിലും രാജ്യം വംശീയ ഉന്മൂലം ചെയ്തുവെന്ന് പറഞ്ഞില്ല. അന്താരാഷ്ട്ര നീതിന്യായ കോടതി അന്തിമമാണ്; അപ്പീൽ നല്കാനാവില്ല.
Tags : Rohingya Massacre Genocide Myanmar Deepika DeepikaNewspaper BreakingNews NewsUpdate Headlines CurrentAffairs GlobalNews DailyNews InDepth NewsFlash