'ഗോൾഡൻ റിക്കാർഡു'മായി നാസയിലെ ശാസ്ത്രജ്ഞർ.
2600 കോടിയിലേറെ കിലോമീറ്റർ അകലെ 'വോയേജർ 1' - യാത്ര തുടരുകയാണ്, മനുഷ്യന്റെ മായാത്ത മുദ്രകളുമായി! സൗരയൂഥത്തിന്റെ അതിരുകൾ കടന്നു സഞ്ചാരം തുടരുന്ന, മനുഷ്യനിർമിതകളിൽ ഭൂമിയിൽനിന്ന് ഏറ്റവും അകലെയുള്ള ബഹിരാകാശ പേടകം വോയേജറിനു നിരവധി പ്രത്യേകതകളുണ്ട്. ഇന്നലെയാണ്, ഒരു പ്രകാശദിനം (വൺ ലൈറ്റ് ഡേ) അകലം പിന്നിട്ടത്. ഇത്രയും ദൂരം പിന്നിടാൻ, നാസയുടെ പേടകത്തിന് 49 വർഷവും രണ്ടു മാസവും 11 ദിവസവും വേണ്ടിവന്നു.
പ്രകാശത്തിനു സെക്കൻഡിൽ മൂന്നു ലക്ഷം കിലോമീറ്റർ വേഗത്തിൽ സഞ്ചരിക്കാൻ കഴിയും. ഇരുപത്തിനാല് മണിക്കൂറുകൊണ്ട് പ്രകാശം സഞ്ചരിക്കുന്ന ദൂരമാണ് ഒരു പ്രകാശദിനം. മണിക്കൂറിൽ 61,000 കിലോമീറ്റർ വേഗത്തിൽ സൗരയൂഥത്തിനു പുറത്തേക്കു കുതിക്കുന്ന വോയേജർ 1 - ഇപ്പോഴും നാസയുമായി ആശയവിനിമയം നടത്തുന്നുണ്ട്. ആ പേടകത്തിൽ അന്യഗ്രഹജീവികൾക്കായി സന്ദേശങ്ങളുടെ ഡിസ്കും നാസ ഘടിപ്പിച്ചിട്ടുണ്ട്. 'ഗോൾഡൻ റിക്കാർഡ്' എന്നാണ് അതിന്റെ പേര്!
ലോകത്തിലെ വിവിധ ഭാഷകളിലുള്ള സന്ദേശം ഡിസ്കിൽ ഉൾപ്പെടുത്തിയിട്ടുണ്ട്. ഹിന്ദി, ബംഗാളി, ഗുജറാത്തി, കന്നഡ, മറാഠി, പഞ്ചാബി, രാജസ്ഥാനി, തെലുങ്ക് എന്നീ ഭാഷകളിലുള്ള സന്ദേശവും ഉൾക്കൊള്ളിച്ചിട്ടുണ്ട്. മാത്രമല്ല, ഇന്ത്യയുടെ സാംസ്കാരിക സാന്നിധ്യവും അതിലുണ്ട്. ജയ്പുർ-അത്രൗലി ഖരാനയിലെ പ്രശസ്ത ഹിന്ദുസ്ഥാനി ഗായിക കേസർബായി കേർക്കർ ആലപിച്ച 'ജാത് കഹാൻ ഹോ' എന്ന ഗാനം ഇതിലെ സംഗീതശേഖരത്തിലുണ്ട്.

എന്താണ് 'ഗോൾഡൻ റിക്കാർഡ്?'
1977-ൽ വിക്ഷേപിച്ച വോയേജർ 1, വോയേജർ 2 പേടകങ്ങളിലാണ് 'ഗോൾഡൻ റിക്കാർഡ്' സ്ഥാപിച്ചത്. പേടകങ്ങളിലെ ശാസ്ത്രീയ ഉപകരണങ്ങൾക്കൊപ്പമാണു സവിശേഷമായ 'ഗോൾഡൻ റിക്കാർഡ്' ഘടിപ്പിച്ചിട്ടുള്ളത്. പന്ത്രണ്ട് ഇഞ്ച് വലിപ്പമുള്ള സ്വർണം പൂശിയ ഡിസ്ക് ആണിത്. ലോകത്തിലെ വിവിധ ഭാഷകളിലുള്ള ആശംസകൾ, സംഗീതം, ചിത്രങ്ങൾ, ശബ്ദങ്ങൾ എന്നിവ ഉൾക്കൊള്ളിച്ചിരിക്കുന്നു. ഏതെങ്കിലും അന്യഗ്രഹ ജീവികൾ പേടകം കണ്ടെത്തിയാൽ, ഭൂമിയെയും മനുഷ്യർ ഉൾപ്പെടെയുള്ള ജീവജാലങ്ങളെയും പരിചയപ്പെടുത്തുക എന്നതാണ് നാസയുടെ ലക്ഷ്യം.
100 കോടി വർഷം ആയുസ്
ബഹിരാകാശത്തെ കഠിനമായ സാഹചര്യങ്ങളെ തരണം ചെയ്യാൻ കഴിയുന്ന രീതിയിലാണ് 'ഗോൾഡൻ റിക്കാർഡി'ന്റെ നിർമാണം. ഏകദേശം 100 കോടി വർഷത്തോളം 'മനുഷ്യമുദ്ര' തകരാറുകൾ സംഭവിക്കാതെ നിലനിൽക്കുമത്രെ! 115 ചിത്രങ്ങൾ, പ്രകൃതിദത്ത ശബ്ദങ്ങൾ, വിവിധ ദേശങ്ങളിൽനിന്നും സംസ്കാരങ്ങളിൽനിന്നുമുള്ള സംഗീതം, 55 ഭാഷകളിലുള്ള ആശംസ എന്നിവയാണ് ഡിസ്കിലുള്ളത്. മനുഷ്യരുടെ ശരീരഘടന, ഡിഎൻഎ, ജനനം, കുടുംബങ്ങൾ, മൃഗങ്ങൾ, ഭൂപ്രകൃതി, കെട്ടിടങ്ങൾ, ഭക്ഷണം, ദൈനംദിന പ്രവർത്തനങ്ങൾ എന്നിവ വ്യക്തമാക്കുന്ന ചിത്രങ്ങളും ഇതിലുണ്ട്. ഇന്ത്യയുടെ അഭിമാനമായ താജ്മഹൽ, ചൈനയിലെ വൻമതിൽ, സിഡ്നി ഓപ്പറ ഹൗസ്, ഗോൾഡൻ ഗേറ്റ് ബ്രിഡ്ജ് എന്നിവയുടെ ചിത്രങ്ങളും ഡിസ്കിൽ ആലേഖനം ചെയ്തിട്ടുണ്ട്.

ബീഥോവൻ, തിരമാലകൾ, പക്ഷികൾ
സംഗീത ശേഖരത്തിൽ ബീഥോവൻ, മൊസാർട്ട്, ജോഹാൻ സെബാസ്റ്റ്യൻ ബാക് എന്നിവരുടെ പ്രശസ്തമായ രചനകളുണ്ട്. കൂടാതെ, ആഫ്രിക്ക, ഏഷ്യ തുടങ്ങിയ ഭൂഖണ്ഡങ്ങളിലെ പരമ്പരാഗത സംഗീതവും അമേരിക്കൻ സംഗീതജ്ഞൻ ചക്ക് ബെറിയുടെ 'ജോണി ബി. ഗുഡ്' എന്ന ഗാനവുമുണ്ട്. കൂടാതെ, തിരമാലകളുടെ ഇരമ്പൽ, കാറ്റ്, ഇടിമിന്നൽ, പക്ഷികളുടെയും തിമിംഗലങ്ങളുടെയും മറ്റു മൃഗങ്ങളുടെയും ശബ്ദങ്ങളും ഡിസ്കിലുണ്ട്.

അന്യഗ്രഹജീവികൾ എങ്ങനെ മനസിലാക്കും
അന്യഗ്രഹജീവികൾ കണ്ടെത്തിയാൽ 'ഗോൾഡൻ റിക്കാർഡ്' പ്രവർത്തിക്കേണ്ട രീതികൾ, ചിത്രരൂപങ്ങളായി ഡിസ്കിന്റെ സംരക്ഷണകവചത്തിൽ രേഖപ്പെടുത്തിയിട്ടുണ്ട്. മാത്രമല്ല, നമ്മുടെ സൗരയൂഥം എവിടെയാണെന്ന് കാണിക്കുന്ന ഭൂപടവും ആവരണത്തിലുണ്ട്. വോയേജറിനു പ്രത്യേക ലക്ഷ്യസ്ഥാനമില്ല. 40,000-ലേറെ വർഷം വേണ്ടിവരും മറ്റൊരു നക്ഷത്രസമൂഹത്തിനു സമീപമെത്താൻ. അക്കാലത്ത്, മനുഷ്യസംസ്കാരം വലിയ മാറ്റങ്ങൾക്കു വിധേയമായിട്ടുണ്ടായിരിക്കും. എങ്കിലും മനുഷ്യകുലത്തിന്റെ 'സുവർണരേഖ' ബഹിരാകാശത്തു യാത്ര തുടർന്നുകൊണ്ടേയിരിക്കും... തുടർന്നുകൊണ്ടേയിരിക്കും..!
Tags : VoyagerGoldenRecord NASA SpaceNews TajMahal KesarbaiKerkar AlienLife