പ്രതീകാത്മക ചിത്രം
ബംഗളൂരു: കർണാടകയിലെ ചിക്കബെല്ലാപൂരിൽ കാറും ലോറിയും കൂട്ടിയിടിച്ച് നാലുപേർ മരിച്ചു, ഒരാൾക്ക് പരിക്കേറ്റു. ബംഗളൂരുവിൽ നിന്ന് ഹൈദരാബാദിലേക്ക് പോവുകയായിരുന്ന കാറാണ് അപകടത്തിൽപ്പെട്ടത്. കാറിലുണ്ടായിരുന്ന അഞ്ച് പേരും ബംഗളൂരു ഓൾഡ് യെലഹങ്ക സ്വദേശികളാണ്.
മുന്നിലുണ്ടായിരുന്ന വാഹനത്തെ മറികടക്കാൻ ശ്രമിക്കുന്നതിനിടെ കാർ ഡ്രൈവർക്ക് നിയന്ത്രണം നഷ്ടപ്പെടുകയും ഡിവൈഡർ കടന്ന് എതിർദിശയിൽ വന്ന ചരക്കു കയറ്റി വന്ന ലോറിയിൽ ഇടിക്കുകയുമായിരുന്നു എന്നാണ് പ്രാഥമിക അന്വേഷണത്തിൽ പൊലിസ് കണ്ടെത്തിയത്.
മൂന്ന് പേർ സംഭവസ്ഥലത്ത് വച്ചും ഒരാൾ ചികിത്സയിലിരിക്കെയുമാണ് മരിച്ചത്. സംഭവത്തിൽ പൊലിസ് മേൽനടപടികൾ സ്വീകരിച്ചിട്ടുണ്ട്.