കൊച്ചി: എറണാകുളം മാര്‍ക്കറ്റിലെ കടവുംഭാഗം സിനഗോഗിന് മുന്നിലെ തീവയ്പ് കേസില്‍ പ്രതി എബിന്‍ പോളിനെ നിയന്ത്രിച്ചിരുന്ന ബോസിനെ കേന്ദ്രീകരിച്ച് വിശദമായ അന്വേഷണം. മൊബൈല്‍ ഫോണില്‍ നിന്നും ലഭിച്ച മിറര്‍ ഇമേജിന്‍റെ അടിസ്ഥാനത്തിലാണ് പ്രതിയെ ചോദ്യം ചെയ്യുന്നത്. പ്രതിയുടെ കസ്റ്റഡി കാലാവധി ഇന്ന് അവസാനിക്കും. ഞായറാഴ്ച എബിന്‍ പോളുമായി പൊലിസ് തെളിവെടുപ്പ് നടത്തിയിരുന്നു.

സിനഗോഗിന് പുറമെ ഇയാള്‍ മാസങ്ങള്‍ക്കു മുമ്പ് തീവച്ച മൂവാറ്റുപുഴയിലെ യൂസ്ഡ് കാര്‍ ഷോ റൂമിലും പടക്കം വാങ്ങിയ തൃപ്പൂണിത്തുറയിലും തീ കൊടുക്കാനുള്ള ലൈറ്റര്‍ വാങ്ങിയ പുത്തന്‍കുരിശിലെ കടയിലും പെട്രോള്‍ വാങ്ങിയ പെട്രോള്‍ പമ്പുകളിലും വാളകം അമ്പലംപടിയില്‍ തീയിട്ട വീട്ടിലും എത്തിച്ച് പൊലിസ് തെളിവെടുപ്പ് നടത്തി.

ഞായറാഴ്ച വൈകുന്നേരം അഞ്ചരയോടെ വന്‍ പൊലിസ് സംഘത്തിന്‍റെ അകമ്പടിയോടെയായിരുന്നു തെളിവെടുപ്പ്. സിനഗോഗിലും തൃപ്പൂണിത്തുറയിലും പുത്തന്‍കുരിശിലും തെളിവെടുപ്പു നടത്തിയ ശേഷമാണ് മൂവാറ്റുപുഴ വാളകത്തുള്ള രണ്ടു കേന്ദ്രങ്ങളിലും തെളിവെടുപ്പ് നടത്തിയത്.

ബോസ് എന്നയാളുടെ നിര്‍ദേശ പ്രകാരമാണ് എബിന്‍ പ്രവര്‍ത്തിച്ചിരുന്നതെന്നു കണ്ടെത്തിയെങ്കിലും ഇതാരാണെന്നു സ്ഥിരീകരിക്കാന്‍ പൊലിസിനായിട്ടില്ല. ബോസിനെ കുറിച്ചുള്ള ചോദ്യങ്ങള്‍ക്ക് വ്യക്തമായ ഉത്തരം ന ല്‍കാതെയാണ് പ്രതി ഒഴിഞ്ഞു മാറുന്നത്. ചോദ്യങ്ങള്‍ക്കെല്ലാം അറിയില്ല എന്ന മറുപടിയാണ് ഇയാള്‍ നല്‍കുന്നത്.

ബോസിനോട് എകെ 47 ഉള്‍പ്പടെ ആയുധങ്ങള്‍ ആവശ്യപ്പെടുന്ന ചാറ്റുകള്‍ പൊലിസ് കണ്ടെത്തിയിരുന്നു. ഇയാളുടെ അജ്ഞാത ടെലിഗ്രാം ചാറ്റുകളെ കുറിച്ച് വിവരം ശേഖരിക്കുന്നതിന്‍റെ ഭാഗമായി ടെലിഗ്രാം കമ്പനിക്ക് പൊലിസ് കത്തയച്ചിട്ടുണ്ട്.

മൂവാറ്റുപുഴയിലെ യൂസ്ഡ് കാര്‍ ഷോറൂമില്‍ തീയിട്ടതിന് 5,000 രൂപയും സിനഗോഗിനു മുന്നില്‍ തീയിട്ടതിന് രണ്ടുലക്ഷം രൂപ മൂല്യമുള്ള ക്രിപ്‌റ്റോ കറന്‍സിയും സ്വീകരിച്ചതായി പ്രതി മൊഴി നല്‍കിയിട്ടുണ്ട്.

കസ്റ്റഡി കാലാവധി അവസാനിക്കുന്ന ഇന്ന് പ്രതിയെ വീണ്ടും കോടതിയില്‍ ഹാജരാക്കും. പ്രതി അന്വേഷണവുമായി സഹകരിക്കാത്തതിനാല്‍ വീണ്ടും കസ്റ്റഡിയില്‍ വാങ്ങി ചോദ്യം ചെയ്യാനാണ് പൊലിസിന്‍റെ നീക്കം.

Tags : Kochi Synagogue Attack Investigation Police Crime Arrest