ADVERTISEMENT

ADVERTISEMENT

അനുസ്മരണസമ്മേളനവും പുരസ്കാര വിതരണവും

നെടുമങ്ങാട്: കേരളത്തിന്‍റെ വിദ്യാഭ്യാസ മേഖലയിൽനിന്നും വിദ്യാർഥികളുടെ കൊഴിഞ്ഞുപോക്ക് ഏറെ വേദനയുണ്ടാക്കുന്നതായി മുൻ പ്രതിപക്ഷ നേതാവും കോൺഗ്രസ് വർക്കിംഗ് കമ്മിറ്റി അംഗവുമായ രമേശ് ചെന്നിത്തല പറഞ്ഞു.

കോൺഗ്രസ് മൂഴി മണ്ഡലം കമ്മിറ്റിയുടെ നേതൃത്വത്തിൽ വേങ്കവിള എൻ. രാജശേഖരൻ നായർ നാലാമത് അനുസ്മരണ സമ്മേളനവും എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയ വിദ്യാർഥികളെ ആദരിക്കലും നാലാമത് എൻ. രാജശേഖരൻ നായർ സ്മാരക പുരസ്കാരസമർപ്പണവും നിർവഹിക്കുകയായിരുന്നു രമേശ് ചെന്നിത്തല.

മൂഴി മണ്ഡലം കോൺഗ്രസ് കമ്മിറ്റി പ്രസിഡന്‍റ് വേട്ടന്പള്ളി സനൽ അധ്യക്ഷത വഹിച്ചു. നാലാമത് എൻ. രാജശേഖരൻ നായർ പുരസ്കാരം ആനാട് ജയൻ ഏറ്റുവാങ്ങി. ജില്ലാ കോൺഗ്രസ് കമ്മിറ്റിയുടെ വൈസ് പ്രസിഡന്‍റ് സുധീർ ഷാ പാലോട്, ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് ബിനു എസ്. നായർ,

ബ്ലോക്ക് കോൺഗ്രസ് കമ്മിറ്റി മുൻ പ്രസിഡന്‍റുമാരായ ജി. പുരുഷോത്തമൻ നായർ, എസ്. അരുൺകുമാർ, കെപിസിസി ന്യൂനപക്ഷ സെൽ സംസ്ഥാന കോ-ഓർഡിനേറ്റർ എസ്. മുജീബ്, തുടങ്ങിയവർ സംസാരിച്ചു.

ADVERTISEMENT

ബൈക്കപകടത്തില്‍ പരിക്കേറ്റ യുവാവ് മരിച്ചു

മെഡിക്കല്‍കോളജ്: ബൈക്കപകടത്തില്‍ ഗുരുതരമായി പരിക്കേറ്റ യുവാവ് മരിച്ചു. ആറ്റുകാല്‍ ഐരാണിമുട്ടം ടിസി 22/999-ല്‍ ഡി. ദീപക് (21) ആണ് മരിച്ചത്. ഇന്നലെ പുലര്‍ച്ചെ 2.30ന് ചാക്ക ഫയര്‍ഫോഴ്‌സ് ഓഫീസിനു സമീപം എയര്‍പോര്‍ട്ട് റോഡിൽവച്ചായിരുന്നു അപകടം. ദീപക് സഞ്ചരിച്ചിരുന്ന ബൈക്ക് എതിരേവന്ന കാറുമായി കൂട്ടിയിടിക്കുകയായിരുന്നു. ഉടന്‍തന്നെ സമീപത്തെ സ്വകാര്യാശുപത്രിയിലെത്തിച്ചുവെങ്കിലും രക്ഷിക്കാനായില്ല. മൃതദേഹം തിരുവനന്തപുരം മെഡിക്കല്‍കോളജ് ആശുപത്രിയില്‍ പോസ്റ്റുമോര്‍ട്ടത്തിനുശേഷം ബന്ധുക്കള്‍ക്കു വിട്ടുനല്‍കി. ദിലീപ്-സ്വപ്‌ന ദമ്പതികളുടെ മകനാണ്. സഹോദി: ദീപിക.

ചുമട്ടു തൊഴിലാളി കുഴഞ്ഞുവീണു മരിച്ചു

നെടുമങ്ങാട്: ലോറിയിൽ തടി കയറ്റുന്നനിടെ തൊഴിലാളി കുഴഞ്ഞുവീണു മരിച്ചു. നെടുമങ്ങാട് നെട്ടിറച്ചിറ പുളിയറത്തല അഞ്ജു ഭവനിൽ ടി.അനിൽകുമാറാ (62) ണ് മരിച്ചത്. ഇന്നലെ ഉച്ചയോടെ സ്വകാര്യ വ്യക്തിയുടെ പുരയിടത്തിലെ മുറിച്ചു നീക്കിയ റബർ മരങ്ങൾ ലോറിയിൽ കയറ്റുന്നതിനിടയിലാണ് അനിൽകുമാർ കുഴഞ്ഞുവീണത്. ഉടനെ ആശുപത്രിയിൽ എത്തിച്ചെങ്കിലും രക്ഷിക്കാനായില്ല.സംസ്‌കാരം ഇന്ന് ഒൻപതിന് നെടുമങ്ങാട് ശാന്തിതീരത്ത്. ഭാര്യ : വിജയലക്ഷ്മി. മക്കൾ: അഞ്ജിത,അഞ്ജന. മരുമക്കൾ : വിശാഖ്, വിനീത്.

ബൈക്ക് ഇടിച്ചു പരിക്കേറ്റയാൾ മരിച്ചു

നെടുമങ്ങാട് : ബൈക്ക് ഇടിച്ചു പരിക്കേറ്റ് ചികിത്സയിലായിരുന്ന നെടുമങ്ങാട് മുക്കോലയ്ക്കൽ പറണ്ടോട് കോണത്തുവീട്ടിൽ ബാബു (73) മരിച്ചു. കഴിഞ്ഞ 11ന് രാത്രി 8.30-ഓടെ കുറിഞ്ചിലം കോടിനുസമീപത്ത് വച്ച് റോഡരികിൽ നിൽക്കുകയായിരുന്ന ബാബുവിനെ ബൈക്ക് ഇടിച്ചുതെറിപ്പിക്കുകയായിരുന്നു. മെഡിക്കൽ കോളേജ് ആശുപത്രിയിൽ ചികിത്സയിലിരിക്കെ മരിച്ചു. ഭാര്യ: പരേതയായ അംബികാമ്മ. മക്കൾ: ആശ,ആനന്ദ്. മരുമക്കൾ : കെ.എസ്.സജികുമാർ, പി.ദിവ്യാമോഹൻ. സഞ്ചയനം ശനി ഒൻപത്.

മലയോര ഗ്രാമങ്ങളില്‍ വന്യമൃഗ ശല്യം രൂക്ഷം

വെള്ളറട: അതിര്‍ത്തി മലയോരഗ്രാമങ്ങളില്‍ വന്യമൃഗശല്യം കാരണം കര്‍ഷകരും നാട്ടുകാരും വലയുന്നു. അമ്പൂരി, വെള്ളറട, കള്ളിക്കാട് പഞ്ചായത്ത് പ്രദേശങ്ങളെയാണ് കൂടുതലായി ബുദ്ധിമുട്ടിക്കുന്നത്. പതിറ്റാണ്ട് മുമ്പ് തമിഴ്‌നാടിലെ സര്‍ക്കാര്‍, നാഗര്‍കോവില്‍, കന്യാകുമാരി എന്നിവിടങ്ങളിലെ ചേരികളിലും, ചാലുകളിലും വളര്‍ത്തുന്ന പന്നികളെയും അമ്പലങ്ങളില്‍ തമ്പടിച്ചിരുന്ന കുരങ്ങുകളെയും പിടികൂടി അതിര്‍ത്തി വനത്തില്‍കൊണ്ട് വിട്ടതാണു പിന്നീട് മലയോര ഗ്രാമീണര്‍ക്ക് വിനയായത്. നാട്ടില്‍ കഴിഞ്ഞിരുന്ന പന്നികള്‍ക്കും, കുരങ്ങന്മാര്‍ക്കും കാട്ടില്‍ തീറ്റ തേടി പരിചയമില്ല, വിശക്കുമ്പോള്‍ ഇവ കൂട്ടത്തോടെ ജനവാസ മേഖലയിലേക്ക് എത്തുകയാണ്. മനുഷ്യരെ ഭയമില്ലാത്തതു കാരണം വിരട്ടി ഓടിച്ചാലും കുരങ്ങന്മാര്‍ പോകാറില്ല. അംഗബലം കൂട്ടി എത്തി അക്രമാസക്തരാവുകയാണ് പതിവ്. സഹ്യപര്‍വ്വത നിരകളില്‍ ഉള്‍പ്പെട്ട കൂനിച്ചി, കൊണ്ടകെട്ടി, കുരിശുമലകളുടെ അടിവാരങ്ങളിലെ കൃഷിത്തോട്ടങ്ങളിലാണ് ഇവയുടെ വാസം. പെറ്റു പെരുകുന്നതുമൂലം മാസങ്ങള്‍ പിന്നിടും തോറും അംഗസംഖ്യ ഇരട്ടിയാവുകയാണ്. ഉണങ്ങാന്‍ ഇട്ടിരിക്കുന്ന വസ്ത്രങ്ങളും, വീട്ടുപകരണങ്ങളും എടുത്തുകൊണ്ടു പോവുക, കാര്‍ഷിക വിളകള്‍ നശിപ്പിക്കുക, സ്ത്രീകളെയും കുട്ടികളെയും ആക്രമിക്കുക, റബര്‍ തോട്ടങ്ങളില്‍ പാല്‍ നിറഞ്ഞിരിക്കുന്ന ചിരട്ടകള്‍ തട്ടി കമഴ്ത്തുക, വീട്ടിനുള്ളില്‍ കയറി ആഹാരസാധനങ്ങള്‍ മോഷ്ടിക്കുക, മേല്‍ക്കൂരയിലെ ഓടുകളും ഷീറ്റുകളും നശിപ്പിക്കുക എന്നിവയാണ് വാനരന്മാരുടെ വിനോദങ്ങള്‍. വിരട്ടി ഓടിക്കാന്‍ ശ്രമിച്ചാല്‍ കൂടുതല്‍ അംഗബലത്തോടെ തിരിച്ചെത്തും. രാത്രികളിലാണ് പന്നിക്കൂട്ടങ്ങള്‍ എത്തുന്നത്. മുന്നില്‍ കാണുന്നതെല്ലാം നശിപ്പിച്ചശേഷമാണ് ഇവയുടെ മടക്കം. പുലര്‍ച്ചെ ടാപ്പിങ്ങിനു പോകുന്ന തൊഴിലാളികളെ ആക്രമിച്ച സംഭവങ്ങളും ഏറെയുണ്ട്. വാഴ, മരിച്ചീനി, ചേമ്പ്, ചേനകൃഷികളെല്ലാം പന്നികള്‍ കാരണം നശിച്ചു. പ്രകൃതിക്ഷോഭത്തിലും വന്യമൃഗശല്യത്തിലും നശിക്കുന്ന കര്‍ഷക വിളകള്‍ക്ക് നഷ്ടപരിഹാരം യഥാസമയം ലഭിക്കുന്നില്ലെന്ന കര്‍ഷകരുടെ പരാതിയും വന്‍തോതില്‍ കൃഷികള്‍ നശിച്ചു കര്‍ഷകര്‍ കടക്കെ ണിയിലായി ബാങ്ക് വായ്പകളുടെ അടവുകള്‍ മുടങ്ങി നല്ലൊരു ശതമാനം കര്‍ഷകരും കടക്കെണിയിലാണ്. ഗ്രാമങ്ങളില്‍ മഴക്കെടുതിയില്‍ കൃഷിനശിച്ചവര്‍ക്കും ധനസഹായം യഥാസമയം കിട്ടുന്നില്ല. കാട്ടിനുള്ളില്‍ ആഹാരവും വെള്ളവും കിട്ടാത്തതു കൊണ്ടാണ് വന്യമൃഗങ്ങള്‍ എല്ലാം നാട്ടിലേക്കിറങ്ങുന്നത്. ആയിരക്കണക്കിനു കുരങ്ങന്മാര്‍ ഗ്രാമീണ മേഖലകളില്‍ വിഹരിക്കുന്നു. പ്രദേശത്തു നിന്നു കുറച്ചു പിടികൂടി മാറ്റിയാലും പ്രശ്‌നം തീരില്ല. ഈ ശ്രമം പലവട്ടം പരാജയപ്പെട്ടതാണ്. കുരങ്ങന്മാരുടെയും പന്നികളുടെയും ശല്യം കാരണം ഒരു കൃഷിയും ചെയ്യാനാകാത്ത സ്ഥിതിയാണ്. പ്രമുഖ രാഷ്ട്രീയ പാര്‍ട്ടികള്‍ക്കെല്ലാം കര്‍ഷക സംഘടനകള്‍ ഉണ്ടെങ്കിലും മലയോര പ്രദേശത്തെ കര്‍ഷകര്‍ നേരിടുന്ന ഈ ക്രൂരമായ പ്രശ്‌നത്തിന് ആരും കൃത്യമായി പ്രതികരിക്കുകയോ, സമരം നടത്തുകയോ ചെയ്യുന്നില്ല . വന്യമൃഗങ്ങള്‍ ഗ്രാമീണ മേഖലയില്‍ കാട്ടിക്കൂട്ടുന്ന വിക്രിയകള്‍ കാരണം കര്‍ഷകര്‍ പലരും ആത്മഹത്യയുടെ വക്കിലാണ്. ഫല വൃക്ഷങ്ങള്‍ വച്ചു പിടിപ്പിക്കാനും തടയണകള്‍ നിര്‍മിച്ചും വെള്ളം തടഞ്ഞ് നിര്‍ത്താനും കെ. ബി. ഗണേഷ് കുമാര്‍ മന്ത്രിയായിരുന്നപ്പോള്‍ പദ്ധതി ഇട്ടെങ്കിലും നടന്നില്ല. ഇപ്പോഴെങ്കിലും കാട്ടിനുള്ളില്‍ ആവാസ വ്യവസ്ഥ ഒരുക്കി വന്യമൃഗങ്ങള്‍ നാട്ടിലേക്കെത്തുന്നത തടയുന്നത് വരെ മലയോര നിവാസികള്‍ ദുരിതത്തിലാവും. കൃഷി നശിപ്പിക്കുന്ന വന്യമൃഗങ്ങള്‍ കൂട്ടംചേര്‍ന്നാണ് എത്തുന്നത്. പക്ഷേ കാലങ്ങളായി കൃഷിനാശം സംഭവിക്കുന്ന കര്‍ഷകര്‍ സംഘടിക്കുന്നുമില്ല. കര്‍ഷകര്‍ പലരും ആത്മഹത്യയുടെ വക്കിലുമാണ്.

മേല്‍പാലത്തിന്‍റെ ഒന്നാം ഘട്ട നിര്‍മാണ ജോലികള്‍ പൂര്‍ത്തിയാകുന്നു.

നേമം: കാക്കാമൂലയെയും കാര്‍ഷിക കോളജിനെയും ബന്ധിപ്പിച്ചു വെള്ളായണി കായലിന്‍റെ കുറുകെ നിര്‍മിക്കുന്ന മേല്‍പാലത്തിന്‍റെ ഒന്നാം ഘട്ട നിര്‍മാണ ജോലികള്‍ പൂര്‍ത്തിയാകുന്നു. നിലവില്‍ കായലിനെയും റോഡിനെയും രണ്ടായി തിരിക്കുന്ന ബണ്ടു റോഡിനു പകരമാണ് 30.25 കോടിരൂപ മുടക്കി മേല്‍പാലത്തിന്‍റെ പണി നടക്കുന്നത്. എം. വിന്‍സന്‍റ് എംഎല്‍എയുടെ കോവളം നിയോജകമണ്ഡലത്തിലെ കല്ലിയൂര്‍ പഞ്ചായത്തിലാണു പാലം വരുന്നത്. അടുത്ത ആറു മാസത്തിനുള്ളില്‍ പണികള്‍ പൂര്‍ത്തിയാക്കി ഗതാഗതത്തിനു തുറന്നു കൊടുക്കാന്‍ കഴിയുമെന്ന പ്രതീക്ഷയിലാണ് അധികൃതര്‍. 173.2 മീറ്റര്‍ നീളമുള്ള പാലത്തിന് അഞ്ചു സ്പാനുകളാണ് ഉണ്ടായിരിക്കുക. 7.5 മീറ്റര്‍ നടപ്പാതയും ഉണ്ടാകും. ഇതിനു പുറമേ കേബിള്‍ ഡക്ട് എന്നിവയും നിര്‍മിക്കുന്നുണ്ട്. കാക്കാമൂല ഭാഗത്ത് 228 മീറ്ററും കാര്‍ഷികകോളജിന്‍റെ ഭാഗത്ത് 213 മീറ്ററും നീളത്തിലാണ് അപ്രോച്ച് റോഡിന്‍റെ നിര്‍മാണം പുരോഗമിക്കുന്നത്. ഈ റോഡിനു പത്തു മീറ്റര്‍ വീതിയുണ്ടാകും. ഇതിനു സമീപത്തായി വാട്ടര്‍ അഥോറിറ്റിയുടെ കുടിവെള്ള പമ്പ് ഹൗസ് സ്ഥിതി ചെയ്യുന്നതുകൊണ്ടാണു സര്‍വീസ് റോഡ് നിര്‍മിക്കുന്നത്. ടൂറിസം സാധ്യതകള്‍കൂടി പരിഗണിച്ചു പാലത്തിന്‍റെ രൂപകല്പനയില്‍ മാറ്റങ്ങള്‍ വരുത്തിയിട്ടുണ്ട്. പാലത്തിന്‍റെ നിര്‍മാണത്തിനൊപ്പം ആര്‍ച്ചുകളും ലൈറ്റുകളും സ്ഥാപിക്കും. മഴക്കാലങ്ങളില്‍ ബണ്ടു റോഡില്‍ വെള്ളം കയറി ഗതാഗതം തടസപെടാതിരിക്കാനും കായലിന്‍റെ ആവാസ വ്യവസ്ഥയില്‍ തടസം നേരിടുന്ന രീതിയില്‍ വരാതിരിക്കാനും കായലിലെ മത്സ്യസമ്പത്തിനു കോട്ടം തട്ടാതിരിക്കാനും വേണ്ട മുന്‍ കൈരുതലുകളാണ് ഈ നിര്‍മാണത്തിലൂടെ നടപ്പിലാക്കുന്നത്. മഴ പെയ്തു കഴിഞ്ഞാല്‍ കാക്കാമൂല - കാര്‍ഷിക കോളജ് റോഡില്‍ രൂക്ഷമായി കായല്‍ വെള്ളം കയറുകയും റോഡേത് കായലേതെന്ന സ്ഥിതിയില്‍ തിരിച്ചറിയാന്‍ പറ്റാത്ത അവസ്ഥയുണ്ടായിരുന്നു. മന്ത്രി മുഹമദ് റിയാസാണ് നിര്‍മാണ ഉദ്ഘാടനം നിര്‍വഹിച്ചത്. രണ്ടു വര്‍ഷംകൊണ്ടു പണി പൂര്‍ത്തിയാക്കാനാണ് കരാര്‍. കിഫ്ബി വഴിയാണ് പാലം നിര്‍മാണത്തിനു ഫണ്ട് അനുവദിച്ചത്. 2018-ല്‍ ഭരണാനുമതി ലഭിച്ചെങ്കിലും ടെണ്ടര്‍ നടപടികള്‍ നീണ്ടുപോയതിനാല്‍ കഴിഞ്ഞ വര്‍ഷമാണു പണി തുടങ്ങാന്‍ കഴിഞ്ഞത്.

നെടുമങ്ങാട് സർക്കാർ കോളജിൽ അലുമിനി കൂട്ടായ്മ

നെടുമങ്ങാട്: സർക്കാർ കോളജിൽ നിന്നും നാല്പത്തിനാല് വർഷമായി പുറത്തിറങ്ങിയ എല്ലാ ബാച്ചുകളുടെയും വിപുലമായ ഒത്തുകൂടലിനു പൂർവ വിദ്യാർഥി സംഘടന നെഡ്കോസ വേദിയൊരുക്കി. മന്ത്രി ജി.ആർ. അനിൽ സംഗമം ഉദ്ഘാടനം ചെയ്തു. അലുമിനി പ്രസിഡന്‍റ് അഡ്വ. കെ വിനോദ് അധ്യക്ഷത വഹിച്ചു. പൂർവ വിദ്യാർഥികളായ എഴുത്തുകാരൻ വി. ഷിനിലാൽ, കേരള സർവകലാശാല സിൻഡിക്കറ്റംഗം ജെ.എസ്. ഷിജുഖാൻ, എച്ച്.ആർ. സന്ധ്യ, കെഎഎസ് കോളജ് പ്രിൻസിപ്പൽ ഡോ. എൽ. ഷീലാകുമാരി എന്നിവർ പ്രസംഗിച്ചു. പൂർവ അധ്യാപകരായിരുന്നവരെ ച‌ടങ്ങിൽ ആദിരച്ചു. അലുമിനി സെക്രട്ടറി കെ.സി. സാനുമോഹൻ സ്വാഗതവും ജോയിന്‍റ് സെക്രട്ടറി ഹരികൃഷ്ണൻ നന്ദിയും പറഞ്ഞു. കോളജ് ദിനങ്ങളുടെ ഓർമകൾ നല്കുന്ന മാതൃകയിലാണ് കാര്യപരിപാടികൾ സംഘടിപ്പിച്ചത്. അസംബ്ലി, ക്ലാസ്റൂം, ആർട്സ് ക്ലബ്, വർത്തമാനം, പാഥേയം, ബെല്ലടിക്കുമ്പോൾ എന്നിങ്ങനെയാണ് പരിപാടികൾ ക്രമീകരിച്ചിരുന്നത്. ആർട്സ് ക്ലബിന്‍റെ ഭാഗമായി ഗായകൻ രാജേഷ് വിജയ് നയിക്കുന്ന സംഗീത പരിപാടിയും ഉണ്ടായിരുന്നു.

മാലിന്യം വാരി വലഞ്ഞ് തൊഴിലാളികൾ; കുലുക്കമില്ലാതെ അധികൃതർ

വിഴിഞ്ഞം: തീരത്ത് അടിച്ച് കയറുന്ന പ്ലാസ്റ്റിക് മാലിന്യങ്ങൾ ശേഖരിക്കാൻ ദിനംപ്രതി ആയിരത്തോളം തൊഴിലാളികൾ, ശമ്പളം 900 രൂപയും ചെലവും. അവസാനമില്ലാതെ മാലിന്യ വരവ്. ഇൻഷ്വറൻസ് ഉള്ളതിനാൽ കപ്പൽ കമ്പനിക്കും മാലീന്യനീക്കത്തിനു ചുമതലയുള്ള ഏജൻസിക്കും ചാകരയെന്ന് ആക്ഷേപം. മത്സ്യത്തൊഴിലാളികളും, പൊതുജനവും ആശങ്കയുടെ പടുകുഴിയിലായെങ്കിലും തിരിഞ്ഞു നോക്കാൻ ആരുമില്ലാതായി. അറബിക്കടലിന്‍റെ ആഴങ്ങളിൽ മുങ്ങിത്താണ കണ്ടെയ്നർ കപ്പൽ എംഎസ്‌സിയുടെ എൽസ-3 യെ പൊതുസമൂഹം മറന്നെങ്കിലും തീരദേശ വാസികൾക്ക് ഇനിയും മറക്കാനാകില്ല. കണ്ടെയ്നറുകളിൽനിന്ന് കടലിൽ കലർന്നു തീരത്തേക്ക് അടിച്ചു കയറുന്ന പ്ലാസ്റ്റിക് തരികൾ നീക്കുന്ന ജോലികൾ തുടങ്ങിയിട്ട് രണ്ടു മാസം കഴിഞ്ഞു. ദിനംപ്രതിനൂറു കണക്കിനു കുടുംബശ്രീ പ്രവർത്തകരും ഫയർ ഫോഴ്സ്, സിവിൽ ഡിഫൻസ് പ്രവർത്തകരും നടത്തുന്ന മാലിന്യനീക്കവും എങ്ങുമെത്താതെ തുടരുകയാണ്. കണ്ടെയ്നർ ആഴങ്ങളിൽ കിടക്കുന്ന കാലമത്രയും കടൽ മലിനമാകുമെന്നാണു മത്സ്യത്തൊഴിലാളികളുടെ വാദം. വിഴിഞ്ഞം തുറമുഖത്തുനിന്ന് 643 കണ്ടെയ്നറുകളുമായി കൊച്ചിയിലേക്കുള്ള യാത്രാമധ്യേ ലൈബീരിയൻ രജിസ്ട്രേഷനുള്ള എംഎസ്‌സിയുടെ എൽസാ - 3 ആലപ്പുഴ തോട്ടപ്പള്ളിക്കും പതിനഞ്ച് നോട്ടിക്കൽഉൾക്കടലിൽ അപകടത്തിൽപ്പെട്ട് താഴ്ന്നിട്ട് ഇന്ന് 67 ദിവസം പിന്നിടുകയാണ്. മേയ് 24 നു നടന്ന അപകടത്തെക്കുറിച്ചുള്ള കോലാഹലങ്ങൾ കെട്ടടങ്ങിയതോടെ അധികൃതർ എല്ലാം മറന്നു. എന്നാൽ അപകടം നടന്നു ദിവസങ്ങൾ കഴിയുമ്പോഴും കരയിലേക്ക് ഒഴുകി വരുന്ന പ്ലാസ്റ്റിക് തരികൾക്ക് കുറവ് വന്നില്ല. തീരത്തെ മണലിൽ അടിഞ്ഞു കൂടിയ മാലിന്യങ്ങളെ നീക്കാൻ തുടക്കത്തിൽ പോലീസും, ഫയർ ഫോഴ്സും, സന്നദ്ധ സംഘടനാ പ്രവർത്തകരും ഹരിതകർമസേനയും രംഗത്തിറങ്ങിയെങ്കിലും ഒന്നിനും അവസാനമുണ്ടായില്ല. ഒടുവിൽ അഞ്ചുതെങ്ങ് മുതൽ പൊഴിയൂർ വരെയുള്ള കടൽക്കര ശുദ്ധമാക്കാൻ കുടുംബശ്രീ പ്രവർത്തകരെയും കളത്തിലിറക്കി. ഒരു പഞ്ചായത്തിൽനിന്ന് 30 കുടുംബശ്രീ അംഗങ്ങളെ വീതം തെരഞ്ഞെടുത്തു. ഇതിനുപരി സിവിൽ ഡിഫൻസ് പ്രവർത്തകരും ഉൾപ്പെടെ എംഎസ്‌സി കമ്പനി വകയായി ദിനംപ്രതി 900 ത്തോളം പേർക്കു തൊഴിൽ ലഭിക്കുന്നുണ്ടെങ്കിലും കടലിൽ വരാനിരിക്കുന്ന ഗുരുതര പാരിസ്ഥിതിക പ്രശ്നത്തെക്കുറിച്ച് ആർക്കും മിണ്ടാട്ടമില്ല. 643 കണ്ടെയ്നറുകളിൽ പതിനഞ്ചോളം എണ്ണം വെള്ളം നിഞ്ഞാൽ രാസപ്രവർത്തനം നടക്കുന്ന രാസപദാർഥങ്ങൾ നിറച്ചവയാണെന്ന് അധികൃതർ സമ്മതിക്കുമ്പോഴും അവ എങ്ങനെ നീക്കം ചെയ്യുന്നതിനെക്കുറിച്ചും തീരുമാനമായില്ല. പൊട്ടിത്തകർന്ന കണ്ടെയ്നറുകളിൽനിന്ന് പുറത്തായ പ്ലാസ്റ്റിക് തരികൾ നിറച്ച ചാക്കുകെട്ടുകൾ ഇപ്പോഴും ഉൾക്കടലിലൂടെ ഒഴുകി നടക്കുന്നതായി മത്സ്യത്തൊഴിലാളികൾ പറയുന്നു. ഇവ പാറക്കെട്ടുകളിൽ ഇടിച്ച് തകർന്ന് ഒഴുക്കിന്‍റെ ദിശയനുസരിച്ച് കേരള -തമിഴ്നാട് തീരങ്ങളിൽ അടിച്ചു കയറുകയാണ്. മണൽപ്പരപ്പിൽ അടിയുന്ന മാലിന്യങ്ങൾ നീക്കാൻ ശ്രമിക്കുന്ന ബന്ധപ്പെട്ട ഏജൻസികൾ കടലിനെ തിരിഞ്ഞു നോക്കാത്തതിലും ദുരൂഹതയുള്ളതായി മത്സ്യത്തൊഴിലാളികൾ പറയുന്നു. നിലവിൽ അരിച്ചു വാരുന്ന പ്ലാസ്റ്റിക് മാലിന്യങ്ങൾ ദിവസവും ശേഖരിക്കുന്ന സ്വകാര്യ ഏജൻസി അധികൃതർ വിഴിഞ്ഞം മാരിടൈം ബോർഡ് തുറമുഖത്തിന്‍റെ ഗോഡൗണിൽ സൂക്ഷിക്കുകയാണ്. ഉറവിടം കണ്ടെത്തി പരിഹാരം കാണാത്ത അധികൃതരുടെ ഇപ്പോഴത്തെ നടപടി എത്ര കാലമുണ്ടാകുമെന്ന ചോദ്യത്തിനും ആർക്കും മറുപടിയില്ല.

വീട്ടമ്മയില്‍നിന്നും ആറുലക്ഷം രൂപ തട്ടിയെടുത്ത കേസില്‍ വ്യാജ ജഡ്ജിയും സഹായിയും അറസ്റ്റില്‍

വെഞ്ഞാറമൂട്: വീട്ടമ്മയില്‍ നിന്നും ആറു ലക്ഷം രൂപ തട്ടിയെടുത്ത കേസിലും മറ്റു നിരവധി തട്ടിപ്പു കേസുകളിലും പ്രതികളായ രണ്ടു പേര്‍ അറസ്റ്റില്‍. വായ്പാ കുടിശിക എഴിത്തള്ളാന്‍ സഹായിക്കാമെന്നു പറഞ്ഞായിരുന്നു വീട്ടമ്മയില്‍ നിന്നും പണം തട്ടിയത്. കണ്ണൂര്‍ ചിറയ്ക്കല്‍ കവിതാലയത്തില്‍ കെ.എം. ജിഗേഷ് (40), മാന്നാര്‍ ഇരുമന്തൂര്‍ അച്ചത്തറ വടക്കതില്‍ വീട്ടില്‍ സുമേഷ് (36) എന്നിവരാണ് അറസ്റ്റിലായത്. ഒരു ആഡംബര കാര്‍, 91,000 രൂപ, ലാപ്‌ടോപ്, പ്രിന്‍റർ, ഏഴ് മൊബൈല്‍ ഫോണുകള്‍, യുപിഎസ്സിയുടേതു ഉൾപ്പെടെ വിവിധ സ്ഥാപനങ്ങളിലേക്കു പലര്‍ക്കായി തയാറാക്കി വച്ചിരുന്നു വ്യാജ നിയമന ഉത്തരവുകള്‍ എന്നിവയും പോലീസ് പിടിച്ചെടുത്തിട്ടുണ്ട്. വെഞ്ഞാറമൂട് സ്വദേശിയായ വീട്ടമ്മയുടെ പരാതിയിലാണ് നടപടി. 2022 ജൂണിലാണ് കേസിനാസ്പദമായ സംഭവങ്ങള്‍ക്കു തുടക്കം. പരാതിക്കാരി കേരളാ ബാങ്കില്‍ നിന്നും 10 ലക്ഷം രൂപ വായ്പയെടുത്തിരുന്നു. ഇതു തിരിച്ചടവു മുടങ്ങുകയും ബാങ്ക് ജപ്തി നടപടികളിലേക്കു കടക്കുകയും ചെയ്തു. വീട്ടമ്മയുടെ ഒമാനില്‍ ജോലിചെയ്യുന്ന ഭര്‍ത്താവ് ഇക്കാര്യം കൂടെ നോലിചെയ്യുന്ന മൂവാറ്റുപുഴ പൈങ്ങോട്ടുകര സ്വദേശിയായ ഷിജുവിനോടും പറഞ്ഞിരുന്നു. പ്രശ്‌ന പരിഹാരമെന്ന നിലയില്‍ തന്‍റെ പരിചയത്തില്‍ കേരളാ ബാങ്കിന്‍റെ കാര്യങ്ങള്‍ നോക്കുന്ന ജഡ്ജിയുണ്ടന്നും താല്പര്യമുണ്ടങ്കില്‍ അയാളെ ഏര്‍പ്പാടാക്കാമെന്നും ഷിജു പറയുകയുണ്ടായി. ഇതിന്‍ പ്രകാരം വീട്ടമ്മയെ ഭര്‍ത്താവു വിളിച്ച് കാര്യങ്ങള്‍ ഏര്‍പ്പാടാക്കുകയും 2022ല്‍ വെമ്പായത്തെ ആഡംബര ഹോട്ടലിനു മുന്നില്‍വച്ച് വീട്ടമ്മ അന്നേ ദിവസം ഒന്നര ലക്ഷം രൂപയും അടുത്ത മാസത്തില്‍ മൂന്നു തവണകളായി നാലര ലക്ഷം രൂപയും കൂടി കൊടുക്കുകയുമുണ്ടായി. ഇതൊക്കെയായിട്ടും ബാങ്ക് ജപ്തി നടപടികളുമായി മുന്നോട്ട് പോയതോടെ സംശയം തോന്നിയ വീട്ടമ്മ പ്രതികളെ ബന്ധപ്പെടാന്‍ ശ്രമിച്ചെങ്കിലും നടില്ല. തുടര്‍ന്നാണ് പോലീസില്‍ പരാതി നല്കിയത്. പോലീസും പ്രതികളെ ബന്ധപ്പെടാന്‍ ശ്രമിച്ചങ്കിലും ഫോണുകള്‍ മാറിമാറി ഉപയോഗിക്കുതിനാല്‍ വിജയിച്ചില്ല. ഒടുവില്‍ നിരന്തര ശ്രമത്തിനൊടുവില്‍ ഫോണില്‍ കിട്ടിയെങ്കിലും പോലീസാണെന്നു മനസിലാക്കി പ്രതികള്‍ ഫോണ്‍കട്ട് ചെയ്തു. ഇതോടെ പോലീസ് മൊബൈല്‍ ടവര്‍ ലൊക്കേഷന്‍ കേന്ദ്രീകരിച്ചു നടത്തിയ പരിശോധനയിൽ പ്രതികൾ ആലപ്പുഴ ഭാഗത്തുണ്ടെന്നു മനസിലാക്കി നടത്തിയ അന്വേഷണത്തില്‍ ആലപ്പുഴ മണ്ണഞ്ചേരിയില്‍ നിന്നും പ്രതികളെ പിടികൂടുകയായിരുന്നു. തുടര്‍ന്നുള്ള ചോദ്യം ചെയ്യലില്‍ വ്യാജ ജഡ്ജി എസ്എസ്എല്‍സി തോറ്റയാളാണെന്നു കണ്ടെത്തി. പല സ്ഥലങ്ങളില്‍ മാറിമാറി താമസിച്ച് ഫോണ്‍ നമ്പരുകള്‍ മാറ്റി പത്രങ്ങളില്‍ പരസ്യം നല്കിയാണ് ആളുകളെ വീഴ്ത്തുന്നത്. പിടികൂടിയ 91,000 രൂപ ദേവസ്വം ബോര്‍ഡില്‍ വ്യാജ നിയമന ഉത്തരവ് നല്കി തട്ടിയെടുത്തതാണെന്നും കണ്ടെത്തി. പ്രതികള്‍ക്കെതിരെ 2014 ല്‍ കണ്ണൂരിലും 2018 ല്‍ പെരുമ്പാവൂരിലും, വയനാട്, ആലപ്പുഴ എന്നിവിടങ്ങളിലും സമാനമായ രീതിയുള്ള തട്ടിപ്പുകള്‍കള്‍ക്കു കേസുകളുണ്ടന്നും മനസിലാക്കാനായെന്നും പോലീസ് പറഞ്ഞു. വെഞ്ഞാറമൂട് എസ്എച്ച്ഒ ആ സാദ് അബ്ദുല്‍ കലാമിന്‍റെ നേതൃത്വത്തില്‍ എസ്ഐ സജിത്ത്, എം.എ. ഷാജി, വി. ഷാജി, സിപിഒമാരായ സന്തോഷ്, ഷാനവാസ്, എന്നിവടങ്ങിയ സംഘമാണ് പ്രതികളെ പിടികൂടിയത്. പ്രതികളെ കോടതിയില്‍ ഹാജരാക്കി.

മൂന്നുനില കെട്ടിടത്തിൽനിന്നും പരസ്യബോർഡ് നിലംപതിച്ച് അപകടം

കാട്ടാക്കട: മൂന്നുനില കെട്ടിടത്തിനു മുകളിൽനിന്നും കൂറ്റൻ പരസ്യബോർഡ് നിലത്തേക്ക് പതിച്ച് അപകടം. എസ്ബിഐ ബാങ്ക് പ്രവർത്തിക്കുന്ന കെട്ടിടത്തിലെ തന്നെ പരിശീലന കേന്ദ്രത്തിലെ ബോർഡ് ആണ് നിലത്തേക്കു പതിച്ചത്. വഴിയാത്രക്കാർ ഉൾപ്പെടെയുള്ളവർ രക്ഷപ്പെട്ടതു തലനാരിഴയ്ക്ക്. ശബ്ദംകേട്ട് ഇവർ ഓടി മാറുകയായിരുന്നു. സ്കൂൾ കുട്ടികൾ ഇതുവഴി വരുന്നതിനു മിനിറ്റുകൾക്ക് മുൻപാണ് പരസ്യ ബോർഡ് താഴേക്കു പതിച്ചത്. ഇന്നലെ ഉച്ചകഴിഞ്ഞു 3.15 ഓടെയായിരുന്നു സംഭവം. കെട്ടിടത്തിന് സമീപത്തുകൂടി കെഎസ്ഇബി വയറുകൾ പോയതിൽ തടഞ്ഞു നിന്നാണ് അപകടം ഒഴിവായത്. അതേസമയം ബാങ്കിനു താഴെയായി പാർക്ക് ചെയ്തിരുന്ന ട്രഷറി വകുപ്പിന്‍റെ വാഹനത്തിനു മുകളിലാണ് ഫ്ലക്സ് വീണത്. ഇതിന്‍റെ പൈപ്പുകൾ വീണു വാഹനത്തിന്‍റെ ഡ്രൈവർക്കു പരിക്കുള്ളതായും വിവരമുണ്ട്. പരസ്യബോർഡിന്‍റെ ഇരുമ്പ് പൈപ്പുകളുടെ ബല ക്കുറവാണ് നിലത്തേക്ക് പതിക്കാൻ കാരണം എന്നാണ് നിഗമനം. കാട്ടാക്കട അഗ്നിഷ സേന സ്ഥലത്തെത്തിയാണ് ബോർഡ് നീക്കം ചെയ്തത്. കാട്ടാക്കട നെയ്യാർ ഡാം റോഡിൽ പോലീസ് സ്റ്റേഷനും കെഎസ്ഇബി ഓഫീസിനും സമീപം എസ്ബിഐ ബാങ്കിന് മുകളിൽനിന്ന കൂറ്റൻ പരസ്യ ബോർഡ് ആണ് അപകടമുണ്ടാക്കിയത്. കാട്ടാക്കട പട്ടണത്തിൽ പ്രധാന റോഡിന്‍റെ ഇരുവശത്തും നിരവധി കെട്ടിടങ്ങൾക്കു മുകളിൽ ഇത്തരത്തിൽ പരസ്യബോർഡുകളുണ്ട്. കാറ്റിൽ ഇവ നിലംപതിക്കുമോ എന്നുള്ള ആശങ്കയിലാണ് പലപ്പോഴും ആളുകൾ സഞ്ചരിക്കുന്നത്. നിരവധി പേർ ഇതു സംബന്ധിച്ച് പഞ്ചായത്തിൽ ഉൾപ്പെടെ പരാതി പറഞ്ഞെങ്കിലും ഫലമുണ്ടായില്ല. ‌ലീഡിംഗ് ഫയർമാൻ ക്ലമെന്‍റ, ഫയർ ആൻഡ് റെസ്ക്യൂ ഓഫീസർ അനീഷ്, ഹോം ഗാർഡ് വിനോദ്, ഡ്രൈവർ രതീഷ് കുമാർ എന്നിവരാണു സ്ഥലത്തെത്തി അപകടകരമായ ബോർഡ് നീക്കം ചെയ്തത്.

തരൂരിന്‍റെ പൊക്കക്കൂടുതൽ അംഗീകരിക്കാൻ മലയാളികൾക്ക് വിമുഖത: അടൂർ

തിരുവനന്തപുരം: ശശി തരൂരിന്‍റെ ഉയരക്കൂടുതൽ കാരണമാണ് മലയാളികൾ അദ്ദേഹത്തെ ഉൾക്കൊള്ളാനാകാത്തതെന്നു ചലച്ചിത്ര സംവിധായകൻ അടൂർ ഗോപാലകൃഷ്ണൻ. ശരാശരിക്കാരെ മാത്രം അംഗീകരിക്കുന്ന ഒരു രീതി മലയാളികൾക്കുണ്ടെന്നും അടൂർ പറഞ്ഞു. വെട്ടി നിരത്തുക എന്നതാണ് മലയാളികളുടെ പൊതുസ്വഭാവം. താൻ ഉൾപ്പെടെയുള്ളവരെ ചേർത്താണ് ഇതു പറയുന്നത് എന്ന ആമുഖത്തോടെ അടൂർ വ്യക്തമാക്കി. പി. കേശവദേവ് ട്രസ്റ്റിന്‍റെ ഈ വർഷത്തെ പി. കേശവദേവ് സാഹിത്യ പുരസ്കാരം ശശി തരൂർ എംപിക്ക് സമ്മാനിച്ച് പ്രസംഗിക്കുകയായിരുന്നു അടൂർ. ഹോട്ടൽ ഹിൽടണ്‍ ഗാർഡനിൽ നടന്ന ചടങ്ങിൽ 2025-ലെ പി. കേശവദേവ് ഡയാബ് സ്ക്രീൻ കേരള അവാർഡ് പ്രശസ്ത പ്രമേഹ രോഗവിദഗ്ധൻ ഡോ. ബൻഷി സാബുവിനു അടൂർ ഗോപാലകൃഷ്ണൻ സമ്മാനിച്ചു. പ്രശസ്ത നോവലിസ്റ്റും പി. കേശവദേവ് സാഹിത്യ അവാർഡ് കമ്മിറ്റി ചെയർമാനുമായ ഡോ. ജോർജ് ഓണക്കൂർ അധ്യക്ഷത വഹിച്ചു. സാമൂഹ്യ മാറ്റങ്ങൾക്കു വേണ്ടി തൂലിക പടവാളാക്കിയ എഴുത്തുകാരനാണ് പി. കേശവദേവ് എന്ന് ജോർജ് ഓണക്കൂർ പറഞ്ഞു. ചലച്ചിത്ര താരം മണിയൻ പിള്ള രാജു മുഖ്യപ്രഭാഷണം നടത്തി. ചലച്ചിത്ര നിരൂപകനും അവാർഡ് കമ്മിറ്റി അംഗവുമായ വിജയകൃഷ്ണൻ ആശംസ നേർന്ന് പ്രസംഗിച്ചു. പി. കേശവദേവിന്‍റെ മകനും ട്രസ്റ്റ് മാനേജിംഗ് ട്രസ്റ്റിയുമായ ഡോ. ജ്യോതിദേവ് കേശവദേവ് സ്വാഗതം ആശംസിച്ചു. പി. കേശവദേവിന്‍റെ മരുമകളും ട്രസ്റ്റ് സെക്രട്ടറിയുമായ സുനിത ജ്യോതിദേവ് കൃതജ്ഞത പറഞ്ഞു. തുടർന്ന് ശശി തരൂരുമായുള്ള സംവാദം നടന്നു. ഡോ. തോമസ് മാത്യു സംവിധാനം ചെയ്ത നർമകൈരളി അവതരിപ്പിച്ച ഓടയിൽ നിന്ന് ഹാസ്യനാടകവും അരങ്ങേറി.

തിരുവല്ലത്ത് വീട്ടിൽ പാര്‍ക്ക് ചെയ്തിരുന്ന ബൈക്ക് കത്തി നശിച്ചു

തിരുവല്ലം: വീടിനോടു ചേര്‍ന്നു പാര്‍ക്ക് ചെയ്തിരുന്ന യുവാവിന്‍റെ ബൈക്ക് പൂര്‍ണമായും കത്തി നശിച്ചു. തിരുവല്ലം പുഞ്ചക്കരി പാപ്പാന്‍ചാണി സ്വദേശി ശരത്തിന്‍റെ (26) ഉടമസ്ഥതയിലുളള ബജാജ് എന്‍എസ് ബൈക്കാണ് കത്തിനശിച്ചത്. ഞായറാഴ്ച രാത്രി 9.30 ഓടെ സവാരി കഴിഞ്ഞശേഷം വീടിനോടു ചേര്‍ന്നുള്ള പാര്‍ക്കിംഗ് ഏരിയായില്‍ വെച്ചിരുന്ന ബൈക്കാണ് കത്തി നശിച്ചത്. ശരത്ത് നല്‍കിയ പരാതിയില്‍ തിരുവല്ലം പോലീസ് സ്ഥലത്തെത്തി പരിശോധന നടത്തുകയുണ്ടായി. സംഭവത്തില്‍ അസ്വാഭാവികത യാതൊന്നും തന്നെയില്ലെന്നു തിരുവല്ലം എസ്എച്ച്ഒ പ്രദീപ് പറഞ്ഞു. ബൈക്ക് കത്തുന്ന സമയം പെട്രോള്‍ കുറവായിരുന്നതായി ശരത് പോലീസിനോട് പറഞ്ഞു. ഇലക്ട്രിക്ക് ഷോര്‍ട്ട് സര്‍ക്യൂട്ടിനെത്തുടര്‍ന്നുണ്ടായ സ്പാർക്കാണ് ബൈക്ക് കത്തി നശിക്കാന്‍ ഇടയായതെന്നാണ് പരിശോധനയില്‍ നിന്നും വ്യക്തമായതെന്നാണ് പോലീസ് പറയുന്നത്.

അന്വേഷണം തകൃതി; മണികണ്ഠന്‍ തിരുവനന്തപുരം വിട്ടിട്ടില്ലെന്നു സൂചന

പേരൂര്‍ക്കട: ജവഹര്‍ നഗറിലെ വസ്തുതട്ടിപ്പുമായി ബന്ധപ്പെട്ട പ്രധാന പ്രതി അനന്തപുരി മണികണ്ഠനെ കണ്ടെത്തുന്നതിനായുള്ള പോലീസിന്‍റെ അന്വേഷണം തുടരുന്നു. ഒരുമാസത്തിലേറെയായി മണികണ്ഠനെ കണ്ടെത്താനുള്ള ശ്രമത്തിലാണ് മ്യൂസിയം പോലീസ്. അതേസമയം ഇയാള്‍ തിരുവനന്തപുരം വിട്ടുപോയിട്ടില്ലെന്നു സൂചന നല്‍കി അധികൃതര്‍. കിള്ളിപ്പാലത്തെ ആധാരമെഴുത്ത് ഓഫീസ് പ്രവര്‍ത്തിക്കുന്നുണ്ടെങ്കിലും മണികണ്ഠന്‍ ഇവിടെ വരാതായിട്ട് ആഴ്ചകള്‍ കഴിഞ്ഞു. വീട്ടിലും ബന്ധുവീടുകളിലും മണികണ്ഠനായി പോലീസ് അന്വേഷണം നടത്തിയെങ്കിലും കണ്ടെത്താനായിട്ടില്ല. ഇയാള്‍ തിരുവനന്തപുരത്തുതന്നെയുണ്ടെന്നും ഒരു മുന്‍ മന്ത്രി ഇയാള്‍ക്കു സംരക്ഷണം ഒരുക്കുന്നുണ്ടെന്നുമുള്ള ആരോപണം ശക്തമായിട്ടുണ്ട്. ജവഹര്‍ നഗറില്‍ ഡോറ അസറിയ ക്രിപ്‌സിന്‍റെ വസ്തുവും വീടുമാണ് മണികണ്ഠന്‍റെ സഹായത്തോടെ കൊല്ലം സ്വദേശിനിയായ മെറിന്‍ ജേക്കബ് തന്‍റെ പേരിലാക്കുകയും പിന്നീട് അതു വിലയാധാരമായി ചന്ദ്രസേനനു വില്‍പ്പന നടത്തുകയും ചെയ്തത്. എന്നാല്‍ തന്നെക്കൊണ്ട് പ്രമാണത്തില്‍ ഒപ്പുവയ്ക്കുകയാണ് ചെയ്തതെന്നും തന്റെ മരുമകന്‍ അനില്‍ തമ്പിക്കാണ് എല്ലാ വിവരങ്ങളും അറിയാവുന്നതെന്നുമായിരുന്നു ചന്ദ്രസേനന്റെ മൊഴി. ചന്ദ്രസേനനു കോടതി ജാമ്യം അനുവദിച്ചപ്പോള്‍ മണികണ്ഠന്‍റെ ജാമ്യാപേക്ഷ കോടതി തള്ളുകയായിരുന്നു. ഇയാള്‍ ഹൈക്കോടതിയില്‍ ജാമ്യത്തിനു ശ്രമിക്കുന്നുണ്ടെന്നാണ് വിവരം. അതേസമയം അനില്‍ തമ്പിയോട് അസ്സല്‍ പ്രമാണം ഹാജരാക്കാന്‍ വീണ്ടും ആവശ്യപ്പെട്ടിട്ടുണ്ടെന്നും അല്ലാത്തപക്ഷം നടപടികളിലേക്കു നീങ്ങുമെന്നും മ്യൂസിയം സിഐ അറിയിച്ചു.

കന്യാസ്ത്രീകളെ അറസ്റ്റു ചെയ്ത സംഭവം : ഛത്തീസ്‌ഗഡിൽ അപ്രഖ്യാപിത അടിയന്തരാവസ്ഥ- കെഎൽസിഎ

നെയ്യാറ്റിൻകര : ഛത്തീസ്‌ഗഡിൽ മലയാളി കന്യാസ്ത്രീകളെ അറസ്റ്റ് ചെയ്തത് ഇന്ത്യൻ ഭരണഘടനയോടുള്ള വെല്ലുവിളിയാണെന്നും പൊതുജന സുരക്ഷ ഉറപ്പു വരുത്തേണ്ട പ്രാദേശിക ഭരണസംവിധാനങ്ങൾ തന്നെ വർഗീയ ഫാസിസ്റ്റ് സംഘടനകൾക്ക് ഒത്താശ ചെയ്യുന്ന അവസ്ഥ സ്വൈര ജീവിതത്തിനു ഗുരുതരമായ പ്രതിസന്ധി സൃഷ്ടിക്കുകയാണെന്നും രാജ്യത്ത് അപ്രഖ്യാപിത അടിയന്തരാവസ്‌ഥ മത ന്യൂനപക്ഷങ്ങൾക്കെതിരെ സംഘപരിവാർ അടിച്ചേൽപ്പിക്കുകയാണെന്നും കേരളാ ലാറ്റിൻ കാത്തൊലിക് അസോസിയഷൻ അഭിപ്രായപ്പെട്ടു. അനാവശ്യതടവിൽനിന്നു കന്യാസ്ത്രീകളെ വിമോചിപ്പിച്ചില്ലെങ്കിൽ രാജ്യവ്യാപകമായി പ്രക്ഷോഭത്തിന് തയാറാകേണ്ടി വരു. രാഷ്‌ട്രപതിയും പ്രധാനമന്ത്രിയും ഈ മനുഷ്യത്വരഹിതപ്രവൃത്തിയെ അപലപിക്കണമെന്നും അടിയന്തിരമായി ഛത്തീസ്‌ഗഡ് സർക്കാരിനോടു വിശദീകരണം ചോദിക്കണമെന്നും രാജ്യത്ത് അധഃസ്ഥിതവർഗത്തെ മനുഷ്യത്വത്തോടെ പരിഗണിച്ചു വിദ്യാഭ്യാസ രംഗത്തും ആതുര ശുഷ്രൂഷാ രംഗത്തും നിസ്തുലമായ സംഭാവനകൾ ചെയ്ത ക്രൈസ്തവ സന്യാസ സമൂഹങ്ങൾക്ക് സുരക്ഷ ഉറപ്പു വരുത്തണമെന്നും കെ എൽ സിഎ നെയ്യാറ്റിൻകര രൂപത പ്രസിഡന്‍റ് ഡി. ജി. അനിൽജോസിന്‍റെ അധ്യക്ഷതയിൽ കൂടിയ യോഗത്തിൽ ആവശ്യപ്പെട്ടു. അൽമായ ഡയറക്ടർ ഫാ. എസ്.എം. അനിൽകുമാർ, ജനറൽ സെക്രട്ടറി പി.ജോൺ സുന്ദർരാജ്, ട്രഷറർ ജെ.രാജേന്ദ്രൻ, രൂപത നേതാക്കളായ ജെ. അഗസ്റ്റിൻ,എഫ്.ഫെലിക്സ്, ടി.രാജൻ, സി.ടി.അനിത, തിരുപുറം ഷാജികുമാർ, സുരേഷ് ജോസഫ്, ആർ.സുനിൽരാജ്, വി.എൻ.സൗമ്യ എന്നിവർ സംസാരിച്ചു. ഛത്തീസ്ഗഡ് മുഖ്യമന്ത്രി നടപടി സ്വീകരിക്കണം: കത്തോലിക്ക കോണ്‍ഗ്രസ് തിരുവനന്തപുരം: സിസ്റ്റര്‍ വന്ദന ഫ്രാന്‍സിസ്, സിസ്റ്റര്‍ പ്രീതി മേരി എന്നീ എഎസ്എംഐ സന്യാസിനി സഭാംഗങ്ങളെ അകാരണമായി ജയിലില്‍ അടച്ച ഛത്തീസ്ഗഡ് പോലീസിന്‍റെ നടപടിയില്‍ കത്തോലിക്കാ കോണ്‍ഗ്രസ് തിരുവനന്തപുരത്തുചേര്‍ന്ന നേതൃയോഗം പ്രതിഷേധം രേഖപ്പെടുത്തി. ക്രൈസ്തവ പുരോഹിതന്മാര്‍ക്കും സന്യാസിനിമാര്‍ക്കുമെതിരേ മുന്‍പും ഇത്തരം അതിക്രമങ്ങള്‍ നടത്തിയപ്പോള്‍ ഛത്തീസ്ഗഡ് സര്‍ക്കാര്‍ നോക്കുകുത്തിയായിരുന്നതേയുള്ളൂ. ഇപ്പോള്‍ നടന്ന സംഭവത്തില്‍ ഛത്തീസ്ഗഡ് മുഖ്യമന്ത്രി അടിയന്തരമായി ഇടപെട്ട് സന്യാസിനികള്‍ക്ക് സംരക്ഷണം നല്‍കുകയും ഇത്തരം സംഭവങ്ങള്‍ ആവര്‍ത്തിക്കുകയില്ലെന്ന് ഉറപ്പ് നല്‍കുകയും ചെയ്യണമെന്ന് യോഗം ആവശ്യപ്പെട്ടു. ഇന്ത്യന്‍ പൗരനു ഭരണഘടനാനുശ്രതമായി നല്‍കിയിട്ടുള്ള സഞ്ചാര സ്വാതന്ത്ര്യം പോലും ഈ രണ്ടു സിസ്റ്റര്‍മാര്‍ക്കൊപ്പം ഛത്തീസ്ഗഡില്‍ നിന്നും ജോലിക്കു പോയ നാലു പെണ്‍കുട്ടികള്‍ക്കു നിഷേധിച്ച ബംജ്‌റംഗദളിന്‍റെ പ്രവൃത്തി അത്യന്തം നിന്ദ്യവും അപലപനീയവുമാണെന്നും യോഗം വിലയിരുത്തി. വി.സി. വില്‍സണ്‍ അധ്യക്ഷത വഹിച്ചു. ചങ്ങനാശേരി അതിരൂപത വികാരി ജനറാള്‍ റവ. ഡോ. ജോണ്‍ തെക്കേക്കര, ഫാ. ബിബിന്‍ കാക്ക പറമ്പില്‍, ഗ്ലോബല്‍ സെക്രട്ടറി ജേക്കബ് നിക്കോളാസ്, എന്‍.എ. ഔസേപ്പ്, ജനറല്‍ സെക്രട്ടറി ജിനോദ് എന്നിവര്‍ പ്രസംഗിച്ചു.

ആര്യനാട് പാലൈകോണത്ത് പുലി ഇറങ്ങിയതായി അഭ്യൂഹം

നെടുമങ്ങാട്: ആര്യനാട് പഞ്ചായത്തിലെ പാലൈകോണം വാർഡിൽ പുലി ഇറങ്ങിയതായി അഭ്യൂഹം. ഗണപതിയാംകുഴി, കുര്യാണിക്കര ഭാഗങ്ങളിലെ ആളുകളാണ് പുലിയെന്നു സംശയുക്കുന്ന മൃഗത്തെ കണ്ടതായി പറയുന്നത്. രണ്ടു ദിവസങ്ങൾക്ക് മുൻപ് അർധരാത്രിയിൽ പിഎസ്‌സി പഠനം കഴിഞ്ഞു രാത്രി വീട്ടിലേയ്ക്ക് മടങ്ങിയ മൂന്നു യുവാക്കൾ ഗണപതി ക്ഷേത്രത്തിനു സമീപത്ത് പുലിയെപ്പോലെ വലിയ മൃഗത്തെ കണ്ടെതായി അറിയിച്ചു. തുടർന്നു യുവാക്കൾ അറിയിച്ചതനുസരിച്ച് ആര്യനാട് പോലീസ് സ്ഥലത്തെത്തി വനം വകുപ്പിനെ വിവരം അറിയിക്കുകയും ചെയ്തിരുന്നു. ഇതിനു ശേഷം രണ്ടു ദിവസങ്ങൾക്കു ശേഷമാണ് കുര്യാണിക്കര സ്വദേശി സന്തോഷ് ഞായറാഴ്ച വൈകുന്നേരം വീടിനു പിന്നിൽ പുലിയെ കണ്ടതായി വിവരം അറിയിച്ചതെന്നു പഞ്ചായത്തംഗം ഇ.രാധാകൃഷ്ണൻ പറഞ്ഞു. ഇതിനു ശേഷം പുലി സമീപത്തെ ആറ്റിലേക്കു പോയി. നാട്ടുകാരും പോലീസും വിവരം അരിയിച്ചിട്ടും വനംവകുപ്പ് അധികൃതർ യഥാസമയം സ്ഥലത്ത് എത്തിയില്ലെന്നും പരാതിയുണ്ട്. ഇന്നലെ വൈകുന്നേരത്തോടെ വനം വകുപ്പിലെ ആർആർടി അംഗങ്ങൾ സ്ഥലത്തെത്തി പരിശോധന നടത്തി. എന്നാൽ കൂടുതലായി ഒന്നും കണ്ടെത്താനായില്ല.

കരൾ രോഗ മുക്തയായ യുവതി ജീവിതത്തിലേക്ക്

തിരുവനന്തപുരം: കരള്‍ പ്രവര്‍ത്തന രഹിതമാകുന്ന അക്യൂട്ട് ലിവര്‍ ഫെയിലിയര്‍ (എഎല്‍എഫ്) ബാധിച്ച് അതീവ ഗുരുതരാവസ്ഥയിലായിരുന്ന 40 വയസുകാരി തിരികെ ജീവിതത്തിലേക്ക്. തിരുവനന്തപുരം കിംസ്‌ഹെല്‍ത്തില്‍ ഒന്നിലധികം ക്ലിനിക്കൽ വിഭാഗങ്ങളുടെ ഏകോപനത്തിലൂടെ നടത്തിയ ചികിത്സയ്ക്കൊടുവിലാണ് കൊല്ലം സ്വദേശിനിയുടെ കരളിന്‍റെ പ്രവര്‍ത്തനം സാധാരണനിലയിലാക്കിയത്. ഗ്യാസ്‌ട്രോഎന്‍ട്രോളജി വിഭാഗം സീനിയര്‍ കണ്‍സള്‍ട്ടന്‍റുമാരായ ഡോ. അജിത് കെ നായര്‍, ഡോ. ഹാരിഷ് കരീം, കണ്‍സള്‍ട്ടന്‍റ് ഡോ. സിമ്‌ന എല്‍, അസോസിയേറ്റ് കണ്‍സള്‍ട്ടന്‍റുമാരായ ഡോ. അരുണ്‍ പി, ഡോ. ദേവിക മധു, ട്രാന്‍സ്പ്ലാന്‍റ് സര്‍വീസസ് സീനിയര്‍ കണ്‍സള്‍ട്ടന്‍റ് ആൻഡ് ആൻഡ് ക്ലിനിക്കല്‍ ചെയര്‍ ഡോ. ഷിറാസ് അഹമ്മദ് റാത്തര്‍, ഡോ. ‌‌ടി.യു. ഷബീറലി, കണ്‍സള്‍ട്ടന്‍റ് ഡോ. വര്‍ഗീസ് യെല്‍ദോ, അനസ്‌തേഷ്യ വിഭാഗം കണ്‍സള്‍ട്ടന്‍റുമാരായ ഡോ. പ്രിജിത് ആര്‍.എസ്, ഡോ. അഭിജിത് ഉത്തമന്‍ എന്നിവരും ചികിത്സയില്‍ പങ്കു വഹിച്ചു.

ലഹരി വസ്തു: യുവാവ് പിടിയിൽ

പാറശാല: ബംഗളൂരുവിൽനിന്നു തിരുവനന്തപുരത്തേക്കുവോള്‍വോ ബസില്‍ കടത്തിക്കൊണ്ടു വരികയായിരുന്ന ലഹരി വസ്തുക്കളുമായി ഒരാള്‍ പിടിയില്‍. തിരുവനന്തപുരം വര്‍ക്കല സ്വദേശിയായ എസ്. അല്‍ അമീന്‍ (31) ആണു പിടിയിലായത്. യുവാവ് പാന്‍റ്സിന്‍റെ പോക്കറ്റിലാക്കിയാണ് ഹാഷിഷ് ഓയിലും മെത്താംഫിറ്റാമിനും സൂക്ഷിച്ചിരുന്നത്. ചെക്ക് പോസ്റ്റില്‍ സാധാരണ നടത്തുന്ന പരിശോധനയിലാണ് 1.904 ഗ്രാം ഹാഷിഷ് ഓയിലും 1.779 ഗ്രാം മെത്താംഫിറ്റാമിനും പിടികൂടിയത്. എക്‌സൈസ് ഇന്‍സ്‌പെക്ടര്‍ എസ്.ആർ. അനില്‍ കുമാറിന്‍റെ നേതൃത്വത്തില്‍ അസിസ്റ്റന്‍റ് എക്‌സൈസ് ഇന്‍സ്‌പെക്ടര്‍ രാജേഷ് കുമാര്‍, പ്രിവന്‍റീവ് ഓഫീസര്‍ ബി.സി. സുധീഷ്, സിവില്‍ എക്‌സൈസ് ഓഫീസര്‍ ജി. അമല്‍ എന്നിവരടങ്ങിയ സംഘമാണ് ലഹരി ഉല്‍പ്പന്നങ്ങള്‍ പിടികൂടിയത്.

അയ്ങ്കാമം ഗവ. എല്‍പി സ്‌കൂളില്‍ ബഹുനില മന്ദിരം

പാറശാല: പാറശാല അയ്ങ്കാമം ഗവ. എല്‍പി സ്‌കൂളില്‍ പുതുതായി പണികഴിപ്പിച്ച മന്ദിരം സി.കെ. ഹരീന്ദ്രന്‍ എംഎല്‍എ ഉദ്ഘാടനം ചെയ്തു. സ്‌കൂളില്‍ നിലവിലുള്ള പഴയ കെട്ടിടം പൊളിച്ചുമാറ്റി സമഗ്ര ശിക്ഷാ കേരളയുടെ ഫണ്ട് ഉപയോഗിച്ച് പുതിയ മന്ദിരം പണിയാനുള്ള കരാറില്‍ ഏര്‍പ്പെട്ടതായും വര്‍ണക്കൂടാരം പദ്ധതി നടപ്പിലാക്കാനുള്ള തീരുമാനമായതായും അദ്ദേഹം അറിയിച്ചു. പൊതു വിദ്യാഭ്യാസ വകുപ്പിന്‍റെ 2024-25 വര്‍ഷത്തെ പദ്ധതി വിഹിതത്തില്‍നിന്ന് 50 ലക്ഷം രൂപ ചെലവഴിച്ചാണ് 2,335 ചതുരശ്ര അടി വിസ്തീര്‍ണമുള്ള ബഹുനില മന്ദിരം പണികഴിപ്പിച്ചത്. മൂന്നു ക്ലാസ് മുറികളും ഗോവണിയും അടങ്ങിയതാണ് പുതിയ മന്ദിരം. പാറശാല പഞ്ചായത്ത് പ്രസിഡന്‍റ് എല്‍. മഞ്ജുസ്മിത അധ്യക്ഷതവഹിച്ചു. പിഡബ്ല്യൂഡി എഇ പ്രിമി റിപ്പോര്‍ട്ട് അവതരിപ്പിച്ചു. പാറശാല ബ്ലോക്ക് പഞ്ചായത്ത് പ്രസിഡന്‍റ് എസ്.കെ. ബെന്‍ഡാര്‍വിന്‍, പഞ്ചായത്ത് വൈസ് പ്രസിഡന്‍റ് ആര്‍. ബിജു, ബ്ലോക്ക് പഞ്ചായത്ത് ക്ഷേമകാര്യ സ്ഥിരം സമിതി അധ്യക്ഷ വിനിതകുമാരി, ഗ്രാമപഞ്ചായത്ത് ആരോഗ്യ വിദ്യാഭ്യാസകാര്യ സ്ഥിരംസമിതി അധ്യക്ഷ വീണ, പഞ്ചായത്ത് അംഗങ്ങളായ ഓമന, മഹിളകുമാരി, സുനില്‍, സെയ്ദാലി, അനിത, പ്രധാനാധ്യാപിക ഷെറീന, പിടിഎ പ്രസിഡന്‍റ് ലിജു, സുന്ദര്‍രാജ്, നളിനകുമാരന്‍, രാജന്‍, എഡ്വിന്‍ ജയരാജ്, അശോക് കുമാര്‍, മഞ്ജു അനി, പഞ്ചായത്ത് സെക്രട്ടറി പി. സിജു തുടങ്ങിയവര്‍ പ്രസംഗിച്ചു.

പൊറ്റയിൽക്കട ഹോളിക്രോസ് എൽപി സ്കൂളിൽ ഗാന്ധിദർശൻ ക്ലബ്

നെയ്യാറ്റിൻകര: പൊറ്റയിൽക്കട ഹോളി ക്രോസ് എൽപി സ്കൂളിൽ ഗാന്ധിദർശൻ പ്രവർത്തനങ്ങളുടെ ഉദ്ഘാടനം ഗാന്ധിദർശൻ തിരുവനന്തപുരം ജില്ല കോ- ഓർഡിനേറ്റർ ജോസ് വിക്ടർ ഞാറക്കാല നിർവഹിച്ചു. സ്കൂൾ മാനേജർ സിസ്റ്റർ മിനു ജോസ് അധ്യക്ഷയായി. ഹെഡ്മിസ്ട്രസ് സിസ്റ്റർ ആൻ തോമസ്, ഗാന്ധിദർശൻ സ്കൂൾതല കൺവീനർ എസ്. സിന്ധു, അൽഫോൻസ എന്നിവർ പ്രസംഗിച്ചു. സ്വദേശി ഉത്പന്ന നിർമണം, പൂന്തോട്ട നിർമാണം, ശാന്തി സേന എന്നിവയ്ക്ക് കുട്ടികൾക്ക് പ്രത്യേക ചുമതല നൽകി. വിദ്യാർഥികൾ ലഹരി വിരുദ്ധ പ്രതിജ്ഞ എടുത്തു.

അമൃത കൈരളി വിദ്യാഭവനിൽ കാർഗിൽ വിജയ് ദിവസ്

നെടുമങ്ങാട്: കാർഗിൽ വിജയ് ദിവസ് അമൃത കൈരളി വിദ്യാഭവനിൽ സമുചിതമായി ആചരിച്ചു. സ്കൂളിലെ ഫിസിക്കൽ എഡ്യൂക്കേഷൻ ട്രൈനറും, സൈന്യത്തിൽ 22വർഷം സേവനമനുഷ്ടിച്ച രെജു കുമാറിനെയും, സൈന്യത്തിൽ ഇപ്പോൾ സേവനമനുഷ്ടിക്കുന്ന സ്കൂളിലെ പൂർവ വിദ്യാർത്ഥി യുമായ എസ്. പ്രിയേഷിനെയും പൊന്നാട നൽകി ആദരിച്ചു. കാർഗിൽ വിജയദിവസിനെക്കുറിച്ച് ഹെഡ് ഗേൾ കുമാരി അങ്കിത, വിദ്യാർഥിനി ഗൗരി നന്ദ എന്നിവർ പ്രസംഗിച്ചു. തുടർന്ന് രാജ്യസേവനത്തിനിടെ വീരമൃത്യു വരിച്ച ധീര ജവാൻ അഭിലാഷ് നായിഡുവിന്‍റെ സ്മൃതി മണ്ഡപത്തിൽ വിദ്യാർഥികൾ പുഷ്പാർച്ചന നടത്തി. സ്കൂളിലെ സോഷ്യൽ സയൻസ് വകുപ്പിന്‍റെ ആഭിമുഖ്യത്തിൽ സംഘടിപ്പിച്ച ചടങ്ങിൽ സ്കൂൾ മാനേജർ ജി.എസ്. സജികുമാർ, പ്രിൻസിപ്പൽ എസ്. സിന്ധു എന്നിവർ നേതൃത്വം നൽകി.

വോട്ടർ പട്ടികയിലെ ക്രമക്കേട് പരിഹരിക്കണം: ആവശ്യവുമായി ബിജെപി

വെമ്പായം: വോട്ടർ പട്ടികയിലെ ക്രമക്കേട് പരിഹരിക്കണമെന്നു ബിജെപി. മാണിക്കൽ പഞ്ചായത്തിലെ പുതുക്കിയ വോട്ടർ പട്ടികയിൽ കോലിയക്കോട്, കുന്നിട, മൂളയം വാർഡുകളിലെ വോട്ടർമാരെ വെട്ടി മാറ്റിയും നിലവിലെ വാർഡിൽനിന്നു മറ്റൊരു വാർഡിലേക്കു മാറ്റിയും ഇരട്ടിപ്പുകൊണ്ടു നിറഞ്ഞതുമായ പട്ടിക പുതുക്കി പ്രസിദ്ധീകരിക്കണമെന്നാണു ബിജെപി നോർത്ത് ജില്ലാ വൈസ് പ്രസിഡന്‍റ് കോലിയക്കോട് മുരളീകൃഷ്ണൻ അവശ്യപ്പെട്ടത്. കൂടാതെ അശാസ്ത്രീയമായി കോലിയക്കോട് വാർഡ് വെട്ടിമുറിച്ചതിലൂടെ ജംഗ്ഷനു തൊട്ടടുത്തുള്ള സ്ഥലം പുതിയ മറ്റൊരു വാർഡിലേക്കുമാറി. ഈ പരാതി പൂലൻതറ, കള്ളിക്കാട് വാർഡുകളിലും നിലവിലുണ്ട്.

കോൺഗ്രസ് പ്രതിഭാ സംഗമം

നേമം: കോൺഗ്രസ് മേലാംങ്കോട് വാർഡ് കമ്മിറ്റിയുടെ ആഭിമുഖ്യത്തിൽ 2024 - 25 അധ്യായന വർഷത്തിൽ എസ്എസ്എൽസി പ്ലസ് ടു പരീക്ഷകളിൽ ഉന്നത വിജയം നേടിയ വിദ്യാർഥികളെ പുരസ്കാരം നൽകി അനുമോദിച്ചു. മേലാംങ്കോട് വാർഡ് പ്രസിഡന്‍റ് വി.എസ്. വിഷ്ണുവിന്‍റെ അധ്യക്ഷതയിൽ കൂടിയ പ്രതിഭാസംഗമ സമ്മേളനം മുൻ എംഎൽഎ കെ.എസ്. ശബരിനാഥൻ ഉദ്ഘാടനം ചെയ്തു. ജവഹർ ബാൽ മഞ്ച് സംസ്ഥാന കോ-ഓർഡിനേറ്റർ രാജാജി നഗർ മഹേഷ് ഡിസിസി ജനറൽസെക്രട്ടറി പ്രേംജി, നേമം ബ്ലോക്ക് പ്രസിഡന്‍റ് കെ.പി. അജിത് ലാൽ, പാപ്പനംകോട് മണ്ഡലം പ്രസിഡന്‍റ് ജെയ് മോൻ, കേരളാ കോൺഗ്രസ് ജേക്കബ് ജില്ലാ പ്രസിഡന്‍റ് കരുമം സുന്ദരേശൻ, പദ്മകുമാർ, സുനിൽ, സുജി സുരേഷ് എന്നിവർ പങ്കെടുത്തു

ധനസഹായം കൈമാറി

നെടുമങ്ങാട് : പനയമുട്ടത്ത് റോഡിൽ ഒടിഞ്ഞു വീണ ഇലക്ട്രിക് പോസ്റ്റിൽനിന്ന് ഷോക്കേറ്റു മരിച്ച ബൈക്ക് യാത്രികൻ പനയമുട്ടം വെള്ളായണി മൺപുറം അജയവിലാസത്തിൽ അക്ഷയ് സുരേഷിന്‍റെ (കിച്ചു-19) കുടുംബത്തിന് കെഎസ്ഇബി പ്രഖ്യാപിച്ച സമാശ്വാസ തുകയായ പത്ത് ലക്ഷം രൂപയിൽ മൂന്നുലക്ഷത്തിന്‍റെ ചെക്ക് മന്ത്രി ജി.ആർ. അനിൽ വീട്ടിലെത്തി മാതാപിതാക്കൾക്ക് കൈമാറി. ഡി.കെ. മുരളി എംഎൽഎ യും ഒപ്പമുണ്ടായിരുന്നു. ബാക്കി തുക നടപടിക്രമങ്ങൾക്കു ശേഷം കൈമാറുമെന്നും കെഎസ് ഇബി അധികൃതർ വിശദീകരിച്ചു.

തോടിനു നടുവിലായി വെള്ളത്തിൽ ഇലക്ട്രിക് പോസ്റ്റ്

പാലോട്: കെഎസ്ഇബിയുടെ ഇലക്ട്രിക് പോസ്റ്റ് നിൽക്കുന്നതു തോടിനു നടുവിൽ. നന്ദിയോട് പഞ്ചായത്തിലെ ആദിവാസി മേഖലയായ ചൂടൻ മൺപുറത്താണ് വൈദ്യുതി പോസ്റ്റ് തോടിനു നടുവിലായി വെള്ളത്തിൽ സ്ഥിതിചെയ്യുന്നത്. സ്റ്റേ കമ്പികൾ പൊട്ടി വെള്ളത്തിൽ കിടക്കുന്നത് അപകടസാധ്യത വർധിപ്പിക്കുന്നുണ്ട്. സർവീസ് കമ്പിയുടെ ബലത്തിലാണ് പോസ്റ്റ് നിൽക്കുന്നത്. ഈ വൈദ്യുതി പോസ്റ്റിനു സമീപത്ത് കുളിക്കടവുമുണ്ട്. നാട്ടുകാർ കുളിക്കുന്നതും തുണികൾ അലക്കുന്നതും ഇവിടെ നിന്നാണ്. കുട്ടികൾ പലപ്പോഴും തോട്ടിൽ കളിക്കാനും മീൻ പിടിക്കാനും ഇറങ്ങാറുണ്ട്. മറുകരയിലേക്കു നടപ്പാലം ഇല്ലാത്തതിനാൽ തോട്ടിൽ ഇറങ്ങിയാണ് പലരും സഞ്ചരിക്കുന്നത്. കെഎസ്ഇബി പാലോട് സെക്‌ഷനിൽപെട്ട മേഖലയാണിത്. അപകടങ്ങൾ സംഭവിക്കുന്നതിനുമുമ്പ് പോസ്റ്റ് മാറ്റി സ്ഥാപിക്കാനുള്ള നടപടികൾ സ്വീകരിക്കണമെന്നും നാട്ടുകാർ ആവശ്യപ്പെട്ടു.

പാങ്ങോട് എൽപി സ്കൂളിൽ വർണകൂടാരം

കല്ലറ: പാങ്ങോട് ഗവ. എൽപി സ്കൂളിൽ നിർമാണം പൂർത്തിയായ പ്രീ പ്രൈമറി വർണ കൂടാരത്തിന്‍റെ ഉദ്ഘാടനം ഡി.കെ. മുരളി എംഎൽഎ നിർവഹിച്ചു. പാങ്ങോട് പഞ്ചായത്ത് പ്രസിഡന്‍റ് എം.എം. ഷാഫി അധ്യക്ഷത വഹിച്ചു. സർവശിക്ഷാ കേരളയുടെ ആഭിമുഖ്യത്തിൽ 10 ലക്ഷം രൂപ വിനിയോഗിച്ചാണ് 13 ഇടങ്ങളിലായി വൈവിധ്യപൂർണമായ വർണക്കൂടാരം നിർമിച്ചത്. ബ്ലോക്ക് പഞ്ചായത്ത് പ്രസിഡന്‍റ് ജി.കോമളം, ബ്ലോക്ക് മെമ്പർ പി.ജെ. ശ്രീകല, ഗ്രാമപഞ്ചായത്ത് ആരോഗ്യ-വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ അൻവർ പഴവിള, ഡിപിസി ഡോ. നജീബ്, എഇഒ ഷീജ വി, ബൈജു കുമാർ, ആർ. ഷിബു, അൻസർ മണക്കോട്, ആർ. സുഭാഷ്, അബു പാങ്ങോട് പ്രധാനാധ്യാപിക എം.എ. മിനി തുടങ്ങിയവർ പങ്കെടുത്തു.

നന്മ ജില്ലാ സമ്മേളനം ഇന്നും നാളെയും

നെയ്യാറ്റിൻകര: മലയാള കലാകാരന്മാരുടെ ദേശീയ സംഘടനയായ നന്മയുടെ തിരുവനന്തപുരം ജില്ലാ സമ്മേളനം ഇന്നും നാളെയും ബാലരാമപുരത്ത് നടത്തും. ഇന്നുച്ചയ്ക്ക് 2.30നു വിളംബര കലാജാഥ നടത്തും. അയിലം ഉണ്ണികൃഷ്ണന്‍റെ സ്മൃതികുടീരത്തില്‍നിന്നും ആരംഭിക്കുന്ന ജാഥ വൈകുന്നേരം ആറോടെ ബാലരാമപുരത്തു സമാപിക്കും. നന്മ ജില്ലാ സെക്രട്ടറി സുരേഷ് ഒഡേസയാണ് ജാഥാ ക്യാപ്റ്റന്‍. നാളെ രാവിലെ 10.30നു വ്യാപാര ഭവനില്‍ ചേരുന്ന പ്രതിനിധി സമ്മേളനം സംസ്ഥാന പ്രസിഡന്‍റ് സേവ്യര്‍ പുല്‍പ്പാട്ട് ഉദ്ഘാടനം ചെയ്യും. സംഘാടക സമിതി വൈസ് ചെയര്‍മാന്‍ കാര്യവട്ടം ശ്രീകണ്ഠന്‍നായര്‍ അധ്യക്ഷനായിരിക്കും. വൈകുന്നേരം നാലിനു നടക്കുന്ന സാംസ്കാരിക സമ്മേളനം കലാമണ്ഡലം വിമലാ മേനോന്‍ ഉദ്ഘാടനം ചെയ്യും. എം. വിന്‍സെന്‍റ് എംഎല്‍എ, കെ. ആന്‍സലന്‍ എംഎല്‍എ, തിരുവനന്തപുരം ജില്ലാ പ‍ഞ്ചായത്ത് പ്രസിഡന്‍റ് അഡ്വ. ഡി. സുരേഷ് കുമാര്‍ എന്നിവര്‍ സംബന്ധിക്കും. ബാലരാമപുരം പഞ്ചായത്ത് പ്രസിഡന്‍റ് വി. മോഹനന്‍ അധ്യക്ഷനാകും.

മീൻ പിടിക്കുന്നതിനിടെ കടലിൽ വീണ് മരിച്ചു

വിഴിഞ്ഞം : മീൻ പിടിക്കുന്നതിനിടയിൽ കടലിൽ വീണ മത്സ്യത്തൊഴിലാളി മരിച്ചു. പൂന്തുറ പള്ളിവിളാകം പുരയിടത്തിൽ സെൽവൻ(52) ആണ് മരിച്ചത്. ഇന്നലെ ഉച്ചയ്ക്കായിരുന്നു അപകടം. രണ്ട് വള്ളങ്ങൾ ചേർത്ത് തട്ടുമടിവല വിരിക്കുന്നതിനിടയിൽ തിരയടിയിൽ കുലുങ്ങിയ വളളത്തിൽ നിന്ന് തെറിച്ച് വെള്ളത്തിൽ വീണ സെൽവനെ കൂടെ ഉണ്ടായിരുന്നവർ കരക്കെത്തിച്ച് വിഴിഞ്ഞം സർക്കാർ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. തീരദേശ പോലീസ് മേൽനടപടി സ്വീകരിച്ചു. മൃതദേഹം പോസ്റ്റ്മോർട്ടത്തിനായി മെഡിക്കൽ കോളേജ് മോർച്ചറിയിലേക്ക് മാറ്റി.

ആദിവാസി ഉന്നതിയിൽ വീടിനുമുകളിൽ മരം വീണു വീട്ടമ്മക്ക് പരിക്ക്

കുറ്റിച്ചൽ: അഗസ്ത്യവനം ആദിവാസി ഉന്നതിയിൽ വീടിനുമുകളിൽ മരംവീണ് വീട്ടമ്മയ്ക്കു പരിക്ക്. കുറ്റിച്ചൽ പഞ്ചായത്തിലെ പേപ്പാറ റേഞ്ചിനുള്ളിലെ ഏറുമ്പിയാട് ഉന്നതിയിൽ താമസിക്കുന്ന അയ്യപ്പൻകാണി എന്നയാളുടെ വീടിനു മുകളിലേക്കു വലിയ മരം വീണ് അയ്യപ്പന്‍റെ ഭാര്യയ്ക്കാണു പരിക്കേറ്റത്. ഇവരെ മെഡിക്കൽ കോളജ് ഹോസ്പിറ്റലിലേക്ക് കൊണ്ടുപോയി. വനത്തിൽ കഴിഞ്ഞ ദിവസം വൻ മഴയാണ് പെയ്തത്. അതിനോടൊപ്പം ശക്തമായ കാറ്റുംവീശി. ഇവിടെ വൻ കൃഷി നാശമാണ് സംഭവിച്ചത്.

നേരറിവിനായി ജനമൈത്രി സ്റ്റേഷൻ സന്ദർശിച്ചു കരമന സ്‌കൂളിലെ വിദ്യാര്‍ഥികള്‍

പേരൂര്‍ക്കട: പോലീസുകാരുടെ റൈഫിളുകളും ലാത്തിയും കണ്ടപ്പോള്‍ അഞ്ചാംക്ലാസില്‍ പഠിക്കുന്ന ശ്രീഹരിയുടെയും നിളയുടെയും കണ്ണുകളില്‍ അദ്ഭുതമായിരുന്നു. ഇതെന്തിനാണ് ഇവര്‍ ഉപയോഗിക്കുന്നതെന്നുള്ള അതിശയം. ഉപകരണങ്ങളെക്കുറിച്ച് പോലീസുകാര്‍തന്നെ വിശദീകരിച്ചുനല്‍കിയപ്പോള്‍ ഇവര്‍ക്ക് കൂടുതല്‍ അറിയാന്‍ ജിജ്ഞാസയായി. ആദ്യത്തെ ഒരു പതര്‍ച്ച നീക്കിയപ്പോള്‍ പോലീസ് ഉദ്യോഗസ്ഥര്‍ ഇവര്‍ക്ക് അങ്കിളുമാരും ആന്‍റിമാരുമായി. പത്താംക്ലാസില്‍ പഠിക്കുന്ന അഖിലിനും ജസീനയ് ക്കും മറ്റൊരു സംശയമായിരുന്നു - പോലീസില്‍ ചേരുന്നതിന് എന്താണ് ചെയ്യേണ്ടതെന്നുള്ള സംശയം..! പോലീസ് സ്റ്റേഷന്‍റെ പ്രവര്‍ത്തനങ്ങള്‍ മനസിലാക്കുന്നതിനാണു നേരറിവുമായി കരമന ഗവ. ബോയ്‌സ് ഹയര്‍സെക്കന്‍ഡറി സ്‌കൂളിലെ വിദ്യാര്‍ഥികള്‍ കരമന ജനമൈത്രി സ്റ്റേഷനില്‍ എത്തിയത്. സ്റ്റേഷന്‍ പ്രവര്‍ത്തനത്തിനൊപ്പം ആയുധങ്ങള്‍, അന്വേഷണ രീതി, പരാതികള്‍ നല്‍കുന്ന വിധം എന്നിവയെല്ലാം കുട്ടികള്‍ നേരിട്ടു മനസ്സിലാക്കുകയായിരുന്നു. മധുരം നല്‍കിയാണ് കുട്ടികളെ പോലീസ് ഉദ്യോഗസ്ഥര്‍ യാത്രയാക്കിയത്. സ്‌കൂള്‍ ഹെഡ്മിസ്ട്രസ് വൈ. മിനി, കരമന സിഐ എസ്. അനൂപ് എന്നിവര്‍ വിദ്യാര്‍ഥികള്‍ക്കൊപ്പം ഉണ്ടായിരുന്നു.

വിഗ്രഹം ഉപേക്ഷിച്ച നിലയില്‍ കണ്ടെത്തിയ സംഭവം: പോലീസ് അന്വേഷണം ഊര്‍ജിതം

തിരുവല്ലം: പാച്ചല്ലൂരിലെ ക്ഷേത്രമണ്ഡപത്തിനു സമീപത്തായി ദുര്‍ഗാദേവിയുടെ വിഗ്രഹം ഉപേക്ഷിച്ച നിലയില്‍ കണ്ടെത്തിയ സംഭവത്തില്‍ തിരുവല്ലം പോലീസിന്‍റെ നേതൃത്വത്തില്‍ അന്വേഷണം ഊര്‍ജിതമാക്കി. ക്ഷേത്രത്തിന്‍റെ വടക്കേ മണ്ഡപത്തിനു സമീപത്തുളള തെക്കേ വലിയവിള യോഗീശ്വരാലയം തമ്പുരാന്‍ ക്ഷേത്രത്തിനു മുന്‍പിലുളള മതിലിനോടു ചേര്‍ത്തുവച്ച നിലയിലായിരുന്നു വിഗ്രഹം കണ്ടെത്തിയത്. സിംഹത്തിന്‍റെ പുറത്തിരിക്കുന്ന ദുര്‍ഗാദേവിയുടെ വിഗ്രഹമാണ് കണ്ടെത്തിയത്. പാച്ചല്ലൂര്‍ ഭദ്രകാളിദേവീ ക്ഷേത്രത്തിലെത്തിയ ജീവനക്കാരാണ് വിഗ്രഹം കണ്ടെത്തിയത്. തുടര്‍ന്നു സെക്രട്ടറിയെ വിവരമറിയിക്കുകയായിരുന്നു. അദ്ദേഹം ക്ഷേത്ര ഭാരവാഹികളെയും പോലീസിനെയും വിവരമറിയിച്ചു. തുടർന്നു സ്ഥലത്തെത്തിയ പോലീസ് ഫൊറന്‍സിക് വിഭാഗത്തിലെ ഫിംഗര്‍ പ്രിന്‍റ് വിദഗ്ധരെ വിവരമറിയിച്ചു. ചെമ്പുചേര്‍ന്ന ലോഹം കൊണ്ടുനിര്‍മിച്ച വിഗ്രഹത്തിന് 10 കിലോയോളം തൂക്കം വരുമെന്നു പോലീസ് പറഞ്ഞു. പാച്ചല്ലൂര്‍ ക്ഷേത്രത്തില്‍നിന്നും 31 വര്‍ഷം മുന്പു മോഷണം പോയിരുന്ന സ്വര്‍ണം ദിവസങ്ങള്‍ക്കു മുമ്പ് കോടതി നടപടികള്‍ക്കു ശേഷം തിരികെ ലഭിച്ചിരുന്നു. സംഭവത്തില്‍ കേസെടുത്ത പോലീസ് അന്വേഷണം ഊര്‍ജിതമാക്കിയതായി അറിയിച്ചു. ഉപേക്ഷിച്ച നിലയില്‍ കണ്ടെത്തിയ വിഗ്രഹത്തെ തിരുവല്ലം പോലീസ് നെയ്യാറ്റിന്‍കര കോടതിയില്‍ എത്തിച്ചു.

അറ്റകുറ്റപ്പണി ഇല്ല: ഇരപ്പുകുഴി- വിവേകാനന്ദ റോഡ് തകര്‍ന്നു

പേരൂര്‍ക്കട: കഴിഞ്ഞ അഞ്ചു വര്‍ഷമായി അറ്റകുറ്റപ്പണിയും ടാറിംഗും ഇല്ലാതായതോടെ പാതിരിപ്പള്ളി വാര്‍ഡില്‍ ഉള്‍പ്പെടുന്ന ഇരപ്പുകുഴി-വിവേകാനന്ദ റോഡ് തകര്‍ന്നു തരിപ്പണമായി. രണ്ടുകിലോമീറ്റര്‍ വരുന്ന റോഡ് ഇരപ്പുകുഴി പ്രധാന റോഡിനെയും പാതിരിപ്പള്ളിയെയും ബന്ധിപ്പിക്കുന്നതാണ്. റോഡിന്‍റെ ഇരുവശവും തിങ്ങി ഞെരുങ്ങിയ നിലയിലാണ് വീടുകള്‍ സ്ഥിതിചെയ്യുന്നത്. ഇതുവഴി റോഡിനു സമാന്തരമായി ഓട കടന്നുപോകുന്നില്ല. ഓട നിർമിച്ചാല്‍ പ്രധാന റോഡിനെ മുറിച്ചുകൊണ്ട് മറുവശത്തെ ഓടയില്‍ ചേര്‍ക്കേണ്ടിവരുമെന്നതിനാലാണ് അധികൃതര്‍ ഇതില്‍നിന്നു പിന്തിരിഞ്ഞതെന്നാണ് ആക്ഷേപം. ഓടയില്ലാത്തതുമൂലം വെള്ളം കെട്ടിനിന്നു റോഡിന്‍റെ തകര്‍ച്ച തുടങ്ങുകയായിരുന്നു. മിക്ക സ്ഥലത്തും ടാര്‍ ഇളകി മെറ്റലുകള്‍ നഷ്ടപ്പെട്ടു കുണ്ടുകുഴിയുമായി വെള്ളം കെട്ടിനില്‍ക്കുന്ന കാഴ്ച കാണാനാകും. തിരക്കേറുന്ന അവസരങ്ങളില്‍ ഉള്‍പ്പെടെ പാതിരിപ്പള്ളി, മുക്കോലയ്ക്കല്‍, എംസി റോഡ് ഉള്‍പ്പെടെയുള്ള സ്ഥലങ്ങളിലേക്ക് ജനങ്ങള്‍ പോകാന്‍ ആശ്രയിക്കുന്ന റോഡാണ് വിവേകാനന്ദ റോഡ്. കാറുകള്‍ ഉള്‍പ്പെടെ ഇതുവഴി കടന്നുപോകുമ്പോള്‍ ഏറെ ബുദ്ധിമുട്ടുന്നതായി യാത്രക്കാര്‍ പറയുന്നു. പുതിയ നഗരസഭാ ഭരണം വന്നതിനുശേഷം വിവേകാനന്ദ റോഡ് ടാര്‍ ചെയ്തിട്ടില്ല. കുടപ്പനക്കുന്ന് വാര്‍ഡുമായി അതിര്‍ത്തി പങ്കിടുന്നതിനാല്‍ ആ വിധത്തിലുള്ള തര്‍ക്കവും ഇവിടെ നിലനില്‍ക്കുന്നുണ്ട്. ‌ നഗരസഭയുടെ കാലാവധി കഴിയുന്നതിനു മുമ്പ് റോഡ് ടാര്‍ ചെയ്യുമെന്ന പ്രതീക്ഷയിലായിരുന്നു നാട്ടുകാര്‍. എന്നാല്‍ അതുണ്ടായില്ല. ഇതി റോഡിന്റെ ദുസ്ഥിതി എന്നുമാറുമെന്ന ചിന്തയിലാണ് പ്രദേശവാസികള്‍.

യുവാക്കള്‍ ആഭരണങ്ങള്‍ ചോദിച്ചു; പെണ്‍കുട്ടി മോഷ്ടിച്ചു നല്‍കി : രണ്ടു യുവാക്കൾ‍ അറസ്റ്റില്‍

പേരൂര്‍ക്കട: യുവാക്കള്‍ ആഭരണങ്ങള്‍ ചോദിച്ചപ്പോള്‍ പെണ്‍കുട്ടി വീട്ടില്‍നിന്നു അമ്മയുടെ ആഭരണങ്ങള്‍ മോഷ്ടിച്ചുകൊണ്ടുവന്നു നല്‍കി. ഒടുവില്‍ പെണ്‍കുട്ടിയുമായി എറണാകുളം വണ്ടര്‍ലാ സന്ദര്‍ശിക്കാനെത്തിയ യുവാക്കളെ രക്ഷിതാക്കളുടെ പരാതിയില്‍ പൂജപ്പുര പോലീസ് അറസ്റ്റുചെയ്തു. തമലം സ്വദേശി സന്ദീപ് (20), ബാലരാമപുരം ആറാലുംമൂട് സ്വദേശി നിരഞ്ജന്‍ (20) എന്നിവരാണ് അറസ്റ്റിലായത്. പൂജപ്പുര സ്വദേശിനിയായ എട്ടാംക്ലാസുകാരിയെ പ്രലോഭിപ്പിച്ചാണ് യുവാക്കള്‍ ഈവര്‍ഷം വിവിധ കാലങ്ങളിലായി 12 പവന്‍ സ്വര്‍ണാഭരണങ്ങള്‍ കൈക്കലാക്കിയത്. ഇന്‍സ്റ്റാഗ്രാം വഴിയാണു പെണ്‍കുട്ടിയുമായി യുവാക്കള്‍ ബന്ധം സ്ഥാപിച്ചത്. സുഹൃത്താക്കാമെന്നും വിവിധ സ്ഥലങ്ങളില്‍ ടൂര്‍ കൊണ്ടുപോകാമെന്നും പറഞ്ഞായിരുന്നു പ്രലോഭനം. തന്‍റെ അമ്മയുടെ ആഭരണങ്ങള്‍ മോഷ്ടിച്ചു നല്‍കിയ പെണ്‍കുട്ടി ദിവസങ്ങള്‍ക്കുമുമ്പ് ഒരു രാത്രി യുവാക്കള്‍ക്കൊപ്പം വീടിനു സമീപത്തുനിന്ന് ബൈക്കില്‍ രഹസ്യമായി മുങ്ങി. തമ്പാനൂരിലെത്തിയശേഷം അവിടെനിന്നു ട്രെയിനില്‍ യുവാക്കള്‍ക്കൊപ്പം വണ്ടര്‍ലായിലേക്ക് പോകുകയായിരുന്നു. ഇവിടെവച്ചാണു യുവാക്കള്‍ പോലീസിന്‍റെ പിടിയിലായത്. മകളെ കാണാനില്ലെന്നു രക്ഷിതാക്കള്‍ നല്‍കിയ പരാതിയിലാണ് അന്വേഷണം ഉണ്ടായത്. സ്വര്‍ണാഭരണങ്ങള്‍ കൈക്കലാക്കിയതിനാണ് യുവാക്കളെ പോലീസ് അറസ്റ്റുചെയ്തത്. ആഭരണങ്ങള്‍ വിറ്റുകിട്ടിയ പണം ഉപയോഗിച്ച് ഇരുവരും ബൈക്കുകളും ഒരു ഓട്ടോറിക്ഷയും വാങ്ങി. പുതിയ ഒരു കാര്‍ ഷോറൂമില്‍ നിന്ന് ഇറങ്ങാനിരിക്കെയാണ് ഇവര്‍ പിടിയിലായത്. പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു.

ഹൈമാസ്റ്റ് ലൈറ്റുകൾ നാടിന് സമർപ്പിച്ചു

വെഞ്ഞാറമൂട്: ഹൈമാസ് ലൈറ്റുകൾ നാടിന് സമർപ്പിച്ചു. എംപിയുടെ 2024 - 25 വർഷത്തെ പ്രാദേശിക വികസന ഫണ്ടുപയോഗിച്ചു തേവലക്കര ശ്രീ ഗണപതി ക്ഷേത്രം, ദീപാനഗർ ജംഗഷൻ, മംഗലത്ത് കോണത്ത് ശ്രീ മാടൻനട, കണ്ണൻകോട് ജംഗ്ഷൻ, വെഞ്ഞാറമൂട് കെഎസ്ആർ ടിസി ബസ് സ്റ്റാൻഡ്, കീഴായിക്കോണം ശ്രീ അമ്മൻ കോവിൽ, കീഴായിക്കോണം പെട്രോൾ പമ്പ്, അങ്കണവാടി, ഭൂതമടക്കി ജംഗ്ഷൻ, മേലെ കുറ്റിമൂട് തുടങ്ങി നെല്ലനാട് പഞ്ചായത്തിന്‍റെ വിവിധ സ്ഥലങ്ങളിൽ സ്ഥാപിച്ച മിനി മാസ്റ്റ് ലൈറ്റുകളുടെ ഉദ്ഘാടനം അടൂർ പ്രകാശ് എംപി നിർവഹിച്ചു. വിവിധ ഇടങ്ങളിൽ നടന്ന ഉദ്ഘാടന ചടങ്ങുകളിൽ പഞ്ചായത്ത് പ്രസിഡന്‍റ് ബീനാ രാജേന്ദ്രൻ, പഞ്ചായത്ത് അംഗങ്ങളായ മാണിക്കമംഗലം ബാബു, നെല്ലനാട് ഹരി, സജീന, പ്രസാദ്, ശാന്തകുമാരി, പൊതുപ്രവർത്തകരായ ചിറവിള രവി, തുളസി പി. നായർ, ജയരാജ്, ചന്ദ്രശേഖരൻ നായർ, ആർ. അപ്പുകുട്ടൻ പിള്ള, ഡി. സനൽ തുടങ്ങിയവർ പങ്കെടുത്തു.

ആകെയുള്ളത് ഒരു ജെസിബി മാത്രം : നാഥനില്ലാക്കളരിയായി അമരവിള- കാരക്കോണം റോഡ് പുനരുദ്ധാരണം

പാറശാല: നാഥനില്ലാക്കളരിയായി അമരവിള കാരക്കോണം റോഡ് പുനരുദ്ധാരണ പ്രവൃത്തികൾ. എങ്ങും കുണ്ടും കുഴിയും വെള്ളക്കെട്ടും രുപപ്പെട്ടതോടെ യാത്രികരും പ്രദേശവാസികളും ദുരിതത്തിലായി. 38 കോടിയോളം രൂപ വകയിരുത്തി നിർമിക്കുന്ന റോഡുപണിക്കായി ഉപയോഗിക്കുന്നത് ഒരേയൊരു ജെസിബി മാത്രം. ഒരോ സ്ഥലത്തും മിന്നായം പോലെയെത്തി കുഞ്ഞു കുഞ്ഞു പണികള്‍ ചെയ്തു നാട്ടുകാരുടെ കണ്ണിൽ പൊടിയിട്ടു നടക്കുന്ന റോഡുപണിക്കിടെ നെടിയാംകോട് പാലം വീതി കൂട്ടുന്ന സ്ഥലത്തും ഇതേ ജെസിബി തന്നെ ഓടിയെത്തും. കുന്നത്തുകാല്‍ മുതല്‍ കാരക്കോണം ജംഗ്ഷന്‍വരെയുള്ള റോഡിലാണ് ഏറ്റവും കൂടുതല്‍ ദുരിതക്കാഴ്ച്ച. കുന്നത്തുകാല്‍ ജംഗ്ഷനിലെ മഞ്ചവിളാകം റോഡ് തിരിയുന്നിടത്തു കോടതി ഉത്തരവ് ലംഘിച്ചു സ്വകാര്യ വ്യക്തികളുടെ കടമുറികള്‍ ജെസിബി ഉപയോഗിച്ച് ഇടിച്ചു നശിപ്പിച്ചിട്ടു മാസം മൂന്നുകഴിഞ്ഞു. ഏതു സമായവും നിലം പൊത്താവുന്ന അവസ്ഥയില്‍ നില്‍ക്കുന്ന ചുവരുകളുടെ ചുവട്ടിലാണ് യാത്രികര്‍ ബസ് കാത്തുനില്‍ക്കുന്നത്. വിഷയം ഒത്തുതീര്‍പ്പാക്കാന്‍ കട ഉടമയെ പഞ്ചായത്ത് ഓഫീസിലും പിഡബ്ല്യൂഡി ഓഫീസിലും വിളിച്ചുവരുത്തിയെങ്കിലും തീരുമാനമെടുക്കേണ്ട അധികാരികളാരും പങ്കെടുത്തിരുന്നില്ല. കുന്നത്തുകാല്‍ കൂത്തക്കോട് റോഡരികത്തുവീട്ടില്‍ പരേതനായ പ്രകാശത്തിന്‍റെയും മാരായമുട്ടം കാളിവിളാകം രാജ് നിവാസില്‍ സിന്ധുവിന്‍റെയും ഉടമസ്ഥതയിലുള്ള കട മുറികളാണ് വൈദ്യുതി ബന്ധം പോലും വിച്ഛേദിക്കാതെ റോഡ് പണിയുടെ പേരില്‍ ഇടിച്ചുനിരത്താന്‍ ശ്രമിച്ചത്. കുന്നത്തുകാല്‍ ജംഗ്ഷനില്‍ നിന്നും പെരുങ്കടവിളയിലേക്ക് തിരിയുന്ന ഭാഗത്തു പൈപ്പ് സ്ഥാപിക്കാന്‍ രണ്ടുമാസം മുന്‍പ് ഒരുമീറ്ററോളം താഴ്ച്ചയില്‍ എടുത്ത കുഴിയില്‍ യാത്രികര്‍ വീഴുന്നത് പതിവു കാഴ്ച്ചയാണ്. മൂന്നു ദിവസം മുന്‍പ് കുന്നത്തുകാല്‍ ജംഗ്ഷനില്‍ റോഡ് നിരപ്പാക്കാന്‍ ജെസിബി ഉപയോഗിച്ചു മണ്ണ് മാറ്റിയതും തുടര്‍മഴയും കാരണം ജംഗ്ഷനിലാകെ ചെളിമയമായി കാല്‍നടയാത്ര പോലും ദുര്‍ഘടമായിരിക്കുകയാണ്. ഇവിടത്തെ ജനജീവിതം സ്തംഭനാവസ്ഥയിലായിട്ടും തിരിഞ്ഞുനോക്കാന്‍ ആരുമെത്തിയില്ല. റോഡ് വികസനത്തിന്‍റെ പേരിലുള്ള വീതികൂട്ടലിനായി സ്ഥലഉടമകളുമായുള്ള തര്‍ക്കം തുടങ്ങിയിട്ടും ഒരുവര്‍ഷമാകാറായി. പൊതുമരാമത്ത് വകുപ്പു മാര്‍ക്കുചെയ്ത പുറമ്പോക്കു ഭൂമി പോലും ഏറ്റെടുക്കാന്‍ ഇതുവരെയും അധികൃതര്‍ക്കായില്ല. കുന്നത്തുകാല്‍ ജംഗ്ഷന്‍ മുതല്‍ ഓടകള്‍ സ്ഥാപിച്ച് സ്ലാബ് ഇട്ടിടത്ത് എന്നും ഓരോമണിക്കൂര്‍ വീതം ഇടിക്കലും പൊളിക്കലും തുടരുന്നതിനാല്‍ വീടുകളിലേക്കും കടകളിലേക്കുമുള്ള പാതകളിലൂടെ പ്രവേശിക്കാന്‍ കഴിയാത്ത അവസ്ഥയിലാണ്. കാരക്കോണത്തിനും കുന്നത്തുകാലിനും ഇടയില്‍ ഒന്നര കിലോമീറ്റര്‍ ദൂരമുള്ളതില്‍ ഒന്നാം ലയര്‍ ടാറിംഗ് നടത്തിയത് രണ്ടിടത്തായി 150 മീറ്റര്‍ മാത്രം. മറ്റുഭാഗങ്ങളെല്ലാം കുണ്ടും കുഴിയും ചെളിയുമായി തുടരുകയാണ്. തുടര്‍മഴയില്‍ വെള്ളക്കെട്ടുകള്‍ രൂപപ്പെട്ടതോടെ ഇരുചക്രവാഹന യാത്രികര്‍ അപകടത്തില്‍ പെടുന്നതു പതിവാണ്. കൂനന്‍പന ജംഗ്ഷനില്‍നിന്നും കന്നുമാമൂട്ടിലേക്കു തിരിയുന്നിടത്ത് ഓടയിലെ സ്ലാബിട്ടപ്പോള്‍ ഉണ്ടായ ഉയരം കാരണം വാഹനങ്ങള്‍ക്ക് സബ്‌റോഡിലേക്ക് കയറാന്‍ കഴിയാത്ത സ്ഥിതിയിലാണ്. കൂനന്‍പന ജംഗ്ഷന്‍ മുതല്‍ കാരക്കോണം ജംഗ്ഷന്‍ വരെയുള്ള റോഡ് തകര്‍ന്നടിഞ്ഞ നിയിലാണ്. ഇരുചക്രവാഹന യാത്രികരുടെ നടുവൊടിക്കുന്ന യാത്ര തുടങ്ങിയിട്ട് ഒരുവര്‍ഷത്തിലധികമായി. കാരക്കോണം ജംഗ്ഷനുസമീപം സ്വകാര്യ വ്യക്തി കൾവർട്ട് അടച്ചും പുറമ്പോക്കു ഭൂമി കൈയേറിയും അനധികൃതമായി നിർമിച്ച മതില്‍ക്കെട്ടുകാരണം മഴയത്തു വെള്ളം കെട്ടുന്നതിനാല്‍ നിരവധി അപകടങ്ങളാണ് ഉണ്ടായിക്കൊണ്ടിരിക്കുന്നത്. റോഡിനാവശ്യമായ വീതി ലഭിക്കാതായിട്ടും ഉന്നത സ്വാധീനം കാരണം അവിടത്തെ പുറമ്പോക്ക് സ്ഥലം എടുക്കാനും ഓട നിര്‍മിക്കാനും പിഡബ്ല്യൂഡി അധികൃതര്‍ക്ക് ഭയമാണത്രേ. വിഷയങ്ങളില്‍ ഇടപെടേണ്ടുന്ന സ്ഥലം എംഎല്‍എയ്ക്ക് ഇക്കാര്യം അറിയാത്ത ഭാവമാണെന്നും ആരോപണമുണ്ട്. കുന്നത്തുകാല്‍ ജംഗ്ഷനിലെ വീതികൂട്ടലില്‍ ഇടപെട്ടിരുന്ന രാഷ്ട്രീയ പ്രവര്‍ത്തകരും അയഞ്ഞ മട്ടിലാണ്.

ഹാപ്പിനസ് പാർക്കിന്‍റെ നിർമാണ പ്രവൃത്തികൾ അന്തിമഘട്ടത്തിലേക്ക്

നെയ്യാറ്റിൻകര: നെയ്യാറ്റിൻകര നഗരസഭ വയോജനങ്ങൾക്കായി നഗരസഭ ഒരുക്കുന്ന ഹാപ്പിനസ് പാർക്കിന്‍റെ നിർമാണ പ്രവൃത്തികൾ അന്തിമഘട്ടത്തിലേക്ക്. 2023-24 വാർഷിക പദ്ധതിയിൽ ഉൾപ്പെടുത്തി കലാ -കായിക വിനോദങ്ങൾക്കായി ഗ്രാമങ്ങളിൽ അരങ്ങ് ഒരുക്കുക എന്ന ലക്ഷ്യത്തോടെ നിലമേൽ, മണലൂർ വാർഡുകളെ ബന്ധിപ്പിക്കുന്ന കാവുവിള പാലത്തിനു സമീപമാണ് ഹാപ്പിനെസ് പാര്‍ക്ക് യാഥാര്‍ഥ്യമാകുന്നത്. ആദ്യഘട്ട നിർമാണത്തിനും വൈദ്യുതീകരണത്തിനുമായി 22 ലക്ഷം രൂപ ചെലവഴിച്ചു. വൈദ്യുതി കണക്ഷൻ കിട്ടുന്നതിനനുസരിച്ച് ഓഗസ്റ്റ് ആദ്യവാരം ഹാപ്പിനെസ് തുറന്നു നൽകാൻ കഴിയുമെന്നു നഗരസഭ ചെയർമാൻ പി. കെ. രാജമോഹനൻ അറിയിച്ചു. കഴിഞ്ഞ വർഷം ജൂലൈയിലാണു നിർമാണ പ്രവർത്തനങ്ങൾ തുടങ്ങിയത്.18 ലക്ഷം രൂപ ആദ്യഘട്ട നിർമാണത്തിനായി ഉപയോഗപ്പെടുത്തി. കാവുവിള പാലം മുതൽ നെയ്യാറ്റിൻകര ബസ് സ്റ്റാന്‍ഡിലേയ്ക്കുള്ള പാതയുടെ ഇരുവശങ്ങളിൽ മനോഹരമായ പാർക്ക്, പ്രഭാത സവാരിക്കുള്ള സൗകര്യം, ഓപ്പൺ ജിം, കുട്ടികളുടെ പാർക്ക്, വിശ്രമ ഇരിപ്പിടങ്ങൾ, പൂന്തോട്ടം, തുറസ്സായ സംവാദകേന്ദ്രം എന്നിവയുള്‍പ്പെടുന്നതാണ് ഹാപ്പിനെസ് പാര്‍ക്ക് പ്രോജക്ട്. രാത്രികളില്‍ സാംസ്കാരിക പ്രവർത്തനങ്ങൾക്ക് ഉപയോഗപ്രദമാകും വിധത്തിലുള്ള സംവിധാനങ്ങളും ക്രമീകരിച്ചിട്ടുണ്ട്. റോഡിന് ഇരുവശത്തും നടപ്പാത ഇന്‍റർലോക്ക് ചെയ്‌തു. ഒരു വശത്ത് ഇരിപ്പിടങ്ങളും മറുവശത്ത് യോഗം ചേരാനും ഒത്തുകൂടാനുമുള്ള സൗകര്യത്തിനായി പ്ലാറ്റ് ഫോമും നിര്‍മിച്ചു. പ്രഭാത സവാരിക്ക് നടപ്പാത നീട്ടി. പാർക്കിനോട് ചേർന്ന കഫറ്റേരിയയുടെ നിർമാണം ആരംഭിക്കേണ്ടതുണ്ട്. റോഡിന് ഇരുവശത്തുമായി തണൽ മരങ്ങൾ വെച്ചുപിടിപ്പിച്ചും കൂടുതൽ അടിസ്ഥാന സൗകര്യങ്ങൾ ഒരുക്കിയും പാർക്കിനെ കൂടുതൽ മോടി പിടിപ്പിക്കാനും ഉദ്ദേശിക്കുന്നു. വയോജനങ്ങൾക്കു മാനസികവും കായികവുമായ വികാസത്തിന് ഹാപ്പിനസ് പാർക്ക് അനുഗ്രഹമായിരിക്കുമെന്നും ചെയർമാൻ പി.കെ. രാജമോഹനൻ കൂട്ടിച്ചേര്‍ത്തു.

വീട്ടമ്മയെ മര്‍ദിച്ച കേസിലെ മൂന്നംഗ സംഘം അറസ്റ്റില്‍

പൂന്തുറ: വീട്ടില്‍ അതിക്രമിച്ചു കയറി വീട്ടമ്മയെ മര്‍ദിച്ച കേസിലെ മൂന്നംഗ സംഘത്തെ പൂന്തുറ പോലീസ് അറസ്റ്റ് ചെയ്തു. വള്ളക്കടവ് മുട്ടത്തറ സ്വദേശി ജിനുമോന്‍ (40), മുട്ടത്തറ പെരുനെല്ലി സ്വദേശി കണ്ണന്‍ എന്നു വിളിക്കുന്ന വിനോദ് (33), പൂന്തുറ ചെറിയതുറ സ്വദേശി പ്രസാദ് എന്ന് വിളിക്കുന്ന ഷെറഫുദീന്‍ (35) എന്നിവരെയാണ് പോലീസ് അറസ്റ്റ് ചെയ്തത്. ശനിയാഴ്ച വൈകുന്നേരം 3.30 ഓടുകൂടി പ്രതികള്‍ മൂന്നുപേരും ചേർന്നു മുട്ടത്തറ പെരുനെല്ലി മാര്‍ക്കറ്റിനു സമീപം പുതുവല്‍ പുത്തന്‍വീട്ടില്‍ റീന (38) യുടെ വീട്ടില്‍ അതിക്രമിച്ചു കയറി റീനയെ മര്‍ദിക്കുകയായിരുന്നു. മാസങ്ങള്‍ക്കുമുമ്പ് റീനയുടെ ഭാര്‍ത്താവിനെ കേസിലെ ഒന്നാം പ്രതി മര്‍ദിച്ചിരുന്നതായും ഇതില്‍ കേസ് നിലനില്‍ക്കുന്നതായും പോലീസ് പറഞ്ഞു. ഈ കേസ് ഒത്തുതീര്‍ക്കുന്നതിനായി പ്രതികള്‍ റീനയുടെ വീട്ടുകാരെ പലപ്പോഴായി സമീപിച്ചിരുന്നുയെങ്കിലും വീട്ടുകാര്‍ തായാറായിരുന്നില്ല. ഇതിലുളള വിരോധത്തിലാണ് കഴിഞ്ഞ ദിവസം പ്രതികള്‍ മൂന്നുപേരും ചേര്‍ന്ന് റീനയെ മര്‍ദിച്ചത്. റീന നല്‍കിയ പരാതിയില്‍ കേസെടുത്ത പോലീസ് നടത്തിയ അന്വേഷണത്തിലാണു പ്രതികള്‍ മൂന്നു പേരും പോലീസിന്‍റെ പിടിയിലായത്. പൂന്തുറ എസ്എച്ച്ഒ സജീവിന്‍റെ നേതൃത്വത്തില്‍ എസ്ഐ സുനില്‍, ജൂണിയര്‍ എസ്ഐ നവീന്‍ ജോര്‍ജ് , എഎസ്ഐ ഷാജി, എസ്സിപിഒ ജയചന്ദ്രന്‍, സിപിഒ മാരായ രാജേഷ്, പ്രതീഷ്, സജി, സനല്‍, പത്മകുമാര്‍ എന്നിവരുള്‍പ്പെട്ട പോലീസ് സംഘം അറസ്റ്റ് ചെയ്ത പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു.

എം.ജി. രാധാകൃഷ്ണന് സ്മാരകം ഒരുങ്ങുന്നു

തിരുവനന്തപുരം: അനശ്വര സംഗീതജ്ഞൻ എം.ജി. രാധാകൃഷ്ണനു സ്മാരകം വരുന്നു. സർക്കാർ അനുവദിച്ച തൈക്കാട് മോഡൽ സ്കൂളിനു സമീപമുള്ള സ്ഥലത്ത് ഉദ്യാനവും പ്രതിമയും സ്ഥാപിക്കും. എം.ജി. രാധാകൃഷ്ണന്‍റെ 85-ാം ജന്മദിനമായ നാളെ രാവിലെ ഒൻപതിന് അദ്ദേഹത്തിന്‍റെ സഹോദരിയും പത്മശ്രീ പുരസ്കാര ജേതാവുമായ ഡോ. കെ. ഓമനക്കുട്ടിയും രാധാകൃഷ് ണന്‍റെ മക്കളായ എ.ആർ. രാജകൃഷ്ണനും കാർത്തിക രാധാകൃഷ്ണനും ചേർന്നു ശിലാസ്ഥാപനം നിർവഹിക്കും. നാളെ വൈകുന്നേരം ആറിനു "ഘനശ്യാമസന്ധ്യ' എന്ന പേരിൽ സംഗീത പരിപാടിയും നടക്കും. തൈക്കാട് ഭാരത് ഭവനിൽ നടക്കുന്ന സംഗീത പരിപാടിയിൽ സംവിധായകൻ ജി.എസ്. വിജയനും നടൻ നന്ദുലാലും മുഖ്യാതിഥികളാകും.

ഇന്‍റഗ്രേറ്റഡ് ആയുഷ് മെഡിക്കൽ യൂണിറ്റിന്‍റെ മൂന്നാം വാർഷികം

നെടുമങ്ങാട്: നാഷണൽ ആയുഷ് മിഷൻ കേരളത്തിനു കീഴിൽ നെടുമങ്ങാട് നഗരസഭയിൽ കരിപ്പൂർ- ഉഴപ്പാക്കോണത്ത് പ്രവർത്തിക്കുന്ന ഇന്‍റഗ്രേറ്റഡ് ആയുഷ് മെഡിക്കൽ യൂണിറ്റിന്‍റെ മൂന്നാം വാർഷികം നഗരസഭ ചെയർപേഴ്സൺ സി.എസ്. ശ്രീജ ഉദ്ഘാടനം ചെയ്തു. ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സൺ അജിത അധ്യക്ഷയായി. സ്റ്റാൻഡിംഗ് കമ്മിറ്റി അധ്യക്ഷരായ ഹരികേശൻ നായർ, വസന്തകുമാരി, ജനപ്രതിനിധികൾ, നാഷണൽ ആയുഷ് മിഷൻ സംസ്ഥാന പ്രോഗ്രാം മാനേജർ ഡോ. ജയനാരായണൻ എച്ച്എം സി മെമ്പർ ഫ്രാൻസിസ്, ജയചന്ദ്രൻ, ഇന്‍റഗ്രേറ്റഡ് ആയുഷ് മെഡിക്കൽ യൂണിറ്റിലെ മെഡിക്കൽ ഓഫീസർമാരായ ഡോ. രെസ്നി- ആയുർവേദം, ഡോ. ഹരീഷ്കൃഷ്ണൻ - ഹോമിയോപ്പതി, ഡോ. ജയകുമാർ -സിദ്ധ, ഡോ. ആര്യ -യോഗ നാച്ചുറോപ്പതി, സ്റ്റാഫ് നിഷാന്ത് കുമാർ, അരുൺ, ബിൻസി ജോസഫ്, സ്മൃതി ബിന്ദു,ആരതി തുടങ്ങിയവർ പങ്കെടുത്തു. മൂന്നു ദിവസം നീണ്ടു നിൽക്കുന്ന വാർഷികത്തിൽ രാജീവ്‌ ഗാന്ധി സെന്‍റർ ഫോർ ബയോടെക്‌നോളജി മെഡിക്കൽ സർവീസിനു കീഴിൽ സൗജന്യ രക്ത പരിശോധന, ആരോഗ്യ പാചക മത്സരം എന്നിവയും ഉണ്ടായിരിക്കും.

ശന്പള പരിഷ്കരണ നടപടി ഉടൻ ആരംഭിക്കണമെന്ന് സെക്രട്ടേറിയറ്റ് ആക്ഷൻ കൗണ്‍സിൽ

തിരുവനന്തപുരം: സർക്കാർ ജീവനക്കാരുടെയും അധ്യാപകരുടെയും ശന്പള പരിഷ്കരണ നടപടികൾ ഉടൻ ആരംഭിക്കണമെന്നും ഇടക്കാലാശ്വാസം നൽകണമെന്നും സെക്രട്ടേറിയറ്റ് ആക്ഷൻ കൗണ്‍സിൽ ആവശ്യപ്പെട്ടു. ശന്പള പരിഷ്കരണ കമ്മീഷനെ നിയമിക്കുന്ന കാര്യത്തിൽ കടുത്ത അനാസ്ഥയാണ് സർക്കാർ വച്ചുപുലർത്തുന്നത്. കാലാവധി എത്തുന്നതിന് എട്ടു മാസം മുന്പേ, പത്താം ശന്പള കമ്മീഷനെ നിയമിച്ചെങ്കിൽ 11-ാം കമ്മീഷൻ നിയമനം നാലുമാസം വൈകി. ഇപ്പോഴാകട്ടെ ഒരു വർഷം കഴിഞ്ഞിട്ടും ശന്പള കമ്മീഷനുമില്ല, പരിഷ്കരണവുമില്ല. ശന്പള പരിഷ്കരണം വൈകുന്നതിനാൽ അടിസ്ഥാന ശന്പളത്തിന്‍റെ 10 ശതമാനമോ 5,000 രൂപയോ ഇടക്കാലാശ്വാസമായി അനുവദിക്കണമെന്നും സെക്രട്ടേറിയറ്റ് ആക്ഷൻ കൗണ്‍സിൽ കണ്‍വീനർ എം.എസ് ഇർഷാദ്, സെക്രട്ടേറിയറ്റ് അസോസിയേഷൻ ജനറൽ സെക്രട്ടറി കെ.പി. പുരുഷോത്തമൻ, ഫൈനാൻസ് സെക്രട്ടേറിയറ്റ് അസോസിയേഷൻ പ്രസിഡന്‍റ് എസ്. പ്രദീപ് കുമാർ, ലോ സെക്രട്ടേറിയറ്റ് അസോസിയേഷൻ പ്രസിഡന്‍റ് എം.എസ്. മോഹനചന്ദ്രൻ എന്നിവർ ആവശ്യപ്പെട്ടു.

വിശുദ്ധ അല്‍ഫോന്‍സ ത്യാഗത്തിന്‍റെയും സഹനത്തിന്‍റെയും പ്രതീകം: ബിഷപ് മാര്‍ ജേക്കബ് മുരിക്കന്‍

തിരുവനന്തപുരം: വിശുദ്ധ അല്‍ഫോന്‍സാമ്മ ത്യാഗത്തിന്‍റെയും സഹനത്തിന്‍റെയും പ്രതീകമാ ണെന്നു പാലാ രൂപത മുന്‍ സഹായമെത്രാന്‍ മാര്‍ ജേക്കബ് മുരിക്കന്‍. പോങ്ങുമ്മൂട് വിശുദ്ധ അല്‍ഫോന്‍സാ തീര്‍ഥാടന കേന്ദ്രത്തിലെ വിശുദ്ധ അല്‍ഫോന്‍സാമ്മയുടെ തിരുനാളിനോടനുബന്ധിച്ചുള്ള വിശുദ്ധ കുര്‍ബാനയില്‍ സന്ദേശം നല്‍കുകയായിരുന്നു അദ്ദേഹം. നമുക്കെല്ലാം മാതൃകയായി നമുക്കു മുന്നില്‍ പ്രതിഷ്ഠിക്കപ്പെടുന്ന വലിയൊരു രഹസ്യമണ് വിശുദ്ധ അല്‍ഫോന്‍സാമ്മ. എന്താണു സഹനം എന്നു മനസിലാക്കാന്‍ വിശുദ്ധ അല്‍ഫോന്‍സാമ്മയുടെ ജീവിതം നമുക്ക് ഉപകരിക്കും. ഏറ്റവും മൂല്യമുള്ള ഒന്നാണ് സഹനം. സഹനമില്ലാതെ ആര്‍ക്കും ലോകത്ത് ജീവിക്കാനാകില്ല. സഹനത്തിന്‍റെ ഏതെങ്കലും ഒരു വഴിയിലൂടെയാകും നാം എന്നും സഞ്ചരിക്കുക. സ്വന്തം സ്വാര്‍ഥതയ്ക്കു വേണ്ടിയുള്ളതല്ല, മറിച്ച് ത്യാഗോജ്വലമായ ജീവിതമാണ് മനുഷ്യനെ മനുഷ്യനാക്കുന്നത്. ഇന്ന് സ്വാര്‍ഥത മനുഷ്യനെ പിടികൂടുന്നുണ്ട്. എന്‍റെ ഇഷ്ടങ്ങള്‍, എന്‍റെ താല്‍പര്യങ്ങള്‍, എന്‍റെ സ്ഥാനങ്ങള്‍.. എല്ലാത്തിനും വേണ്ടി ഓടുകയാണ് നാം. മറ്റുള്ളവരുടെ അവകാശങ്ങള്‍ ചവിട്ടിമെതിച്ച് സ്വന്തം കാര്യങ്ങള്‍ നേടാന്‍ ഓടുന്നവരുടെ മുന്നില്‍ വിശുദ്ധ അല്‍ഫോന്‍സാമ്മയും നമ്മുടെ ഇടയില്‍ ജീവിക്കുന്ന അനേകം മനുഷ്യരും പകര്‍ന്നു നല്‍കുന്ന അര്‍ഥം നല്‍കുന്ന ജീവിതം നാം മറന്നു പോകരുത്. ദൃശ്യമായതല്ല, അദൃശ്യമായതാണ് നമ്മുടെ ലക്ഷ്യമെന്നു ബൈബിള്‍ നമ്മെ പഠിപ്പിക്കുന്നു. ത്യാഗോജ്വലമായ ജീവിതം വഴി മനഷ്യര്‍ സ്വയം ഒരു മെഴുതിരിയായി ലോകത്തിനു മുന്നില്‍ പ്രകാശിക്കുമ്പോള്‍ ജീവിതം അര്‍ഥമുള്ളതാകും. ദൈവത്തോടൊപ്പം ജീവിക്കാന്‍ നാം നമ്മുടെ ഇഷ്ടങ്ങളെ മാറ്റിവയ്ക്കണം. നമ്മുടെ കൂടെ ജീവിക്കുന്ന മനുഷ്യരുടെ ഇഷ്ടങ്ങള്‍ക്കു വേണ്ടിയാകണം നമ്മുടെ ജീവിതം. വിശുദ്ധ അല്‍ഫോന്‍സാമ്മ തന്‍റെ പ്രാര്‍ഥന കൊണ്ടും സഹനം കൊണ്ടും അതിലുപരി ദൈവത്തിലുള്ള അശ്രയത്വം കൊണ്ടും മുന്നോട്ടു പോയി, എന്നും വിശുദ്ധ കുര്‍ബാനയില്‍ ഈശോയെ കണ്ടു. അല്‍ഫോന്‍സാമ്മയെ ജീവിച്ചിരുന്നപ്പോള്‍ ആരും വിശുദ്ധയായി കണ്ടില്ല. കുഞ്ഞുങ്ങള്‍ മാത്രമാണ് അതു തിരിച്ചറിഞ്ഞത്. കുട്ടികളുടെ പ്രാര്‍ഥനാവശ്യങ്ങള്‍ എന്നും അല്‍ഫോന്‍സാമ്മ നിറവേറ്റിയിരുന്നു. പിന്നീട് ദൈവത്തിന്‍റെ പക്കല്‍നിന്നുമുള്ള അനുഗ്രഹം ലോകത്തിനു മുഴുവന്‍ നല്‍കാന്‍ തക്കവധം ദൈവം ആ വിശുദ്ധയെ വളര്‍ത്തി. നമുക്ക് ഈ ലോകത്തെ വിജയിക്കാന്‍ കഴിയണം. കുഞ്ഞുങ്ങളെ ഈ ലോകത്തെ ജയിക്കാന്‍ കഴിയത്തക്കവിധം വളര്‍ത്തണം. അതാണ് മാതാപിതാക്കന്മാര്‍ക്കു ചെയ്യാന്‍ കഴിയുന്ന ഏറ്റവും വലിയ കാര്യം- അദ്ദേഹം പറഞ്ഞു. തിരുനാള്‍ കൊടിയേറ്റിനു മുന്നോടിയായി ഈ വര്‍ഷത്തെ തെക്കന്‍ മേഖല വിശുദ്ധ അല്‍ഫോന്‍സാ തീര്‍ഥാടനം ലൂര്‍ദ് പള്ളി അങ്കണത്തില്‍നിന്നും ആരംഭിച്ചു. ചങ്ങനാശേരി അതിരൂപത തെക്കന്‍ മേഖല വികാരി ജനറാള്‍ മോണ്‍.ഡോ. ജോണ്‍ തെക്കേക്കര ആമുഖ സന്ദേശം നല്‍കി. പാറശാല രൂപതാധ്യക്ഷന്‍ ബിഷപ്പ് ഡോ.തോമസ് മാര്‍ യൗസോബിയൂസ് തീര്‍ഥാടനം ഫഌഗ് ഓഫ് ചെയ്തു. പട്ടം സെന്‍റ് മേരീസ് കത്തീഡ്രലിനു മുന്നില്‍ തീര്‍ഥാടകര്‍ക്കു ആശീര്‍വാദം നല്‍കി. പോങ്ങുംമൂട് ജംഗ്ഷനില്‍ എത്തിച്ചേര്‍ന്ന തീര്‍ഥാടകര്‍ക്ക് പോങ്ങുംമൂട് ഇടവകയുടെ ആദരവും സ്വീകരണവും നല്‍കി. ഇന്നലെ രാവിലെ 10.45ന് ആരംഭിച്ച മധ്യസ്ഥ പ്രാര്‍ഥന, വിശുദ്ധ കുര്‍ബാന എന്നീ ശുശ്രൂഷകള്‍ക്ക് ബിഷപ്പ് മാര്‍ ജേക്കബ് മുരിക്കന്‍ മുഖ്യകാര്‍മികനായി.ഇടവക വികാരി ഫാ.തോമസ് വാഴപ്പറമ്പിൽ തിരുനാളിന് കൊടിയേറ്റി. ഇന്നു രാവിലെ മധ്യസ്ഥ പ്രാര്‍ഥന, വിശുദ്ധ കുര്‍ബാന, സന്ദേശം. മുഖ്യ കാര്‍മികന്‍ ലൂര്‍ദ് ഫൊറോന പള്ളി സഹവികാരി ഫാ.മാത്യു മരങ്ങാട്ട്, വൈ കുന്നേരം ജപമാല, വിശുദ്ധ കുര്‍ബാന, സന്ദേശം, മധ്യസ്ഥ പ്രാര്‍ഥന. മുഖ്യ കാര്‍മികന്‍ കണ്ണമ്മൂല മദര്‍ തെരേസ പള്ളി വികാരി ഫാ.ഗീവര്‍ഗീസ് അരഞ്ഞാണിയില്‍.

സോളാര്‍ ബാറ്ററി മോഷണം; മൂന്നുമാസം കഴിഞ്ഞിട്ടും അന്വേഷണം എങ്ങുമെത്തിയില്ല

ഇളക്കിക്കൊണ്ടുപോയത് 200 ബാറ്ററികള്‍ പേരൂര്‍ക്കട: പൂജപ്പുര ജയിലില്‍ 2021-ല്‍ നടന്നുവെന്നു കരുതുന്ന മോഷണത്തിന് ഇനിയും തുമ്പായില്ല. അഞ്ചരലക്ഷം രൂപയുടെ സാധനസാമഗ്രികള്‍ കവര്‍ച്ചചെയ്തതായി ജയില്‍ സൂപ്രണ്ടാണ് 2024-ല്‍ പൂജപ്പുര സ്റ്റേഷനില്‍ പരാതി നല്‍കിയത്. ജയിലില്‍ സ്ഥാപിച്ചിരുന്ന സോളാര്‍ പ്ലാന്‍റിന്‍റെ കാലാവധി കഴിഞ്ഞ ബാറ്ററികളാണ് മോഷണം പോയത്. ഇതു സ്ഥാപിക്കുന്നതില്‍ മേല്‍നോട്ടം വഹിച്ച സി-ഡാക് 2024-ല്‍ ഓഡിറ്റിംഗിന് എത്തിയപ്പോഴാണ് ഏകദേശം 200 ബാറ്ററികള്‍ നഷ്ടപ്പെട്ടതായി കണ്ടെത്തുന്നത്. തുടര്‍ന്നാണ് സൂപ്രണ്ട് സ്റ്റേഷനില്‍ പരാതി നല്‍കുന്നത്. സോളാര്‍ ബാറ്ററികള്‍ വളരെ വിദഗ്ധമായാണ് സ്ഥാപിച്ചിരിക്കുന്നതെന്നും ഇതിനെക്കുറിച്ച് കൃത്യമായി അറിയാന്‍ സാധിക്കാത്ത ഒരാള്‍ക്ക് ജയില്‍വളപ്പില്‍ കടന്നു മോഷണം നടത്തുക സാധ്യമല്ലെന്നും പൂജപ്പുര സിഐ പറയുന്നു. അതേസമയം ഒരുദിവസം ഏകദേശം 20 ബാറ്ററികള്‍ മാത്രമേ വളപ്പില്‍ നിന്നു കൊണ്ടുപോകാന്‍ സാധിക്കുകയുള്ളൂ. അതുകൊണ്ടുതന്നെ നിരവധി ദിവസങ്ങള്‍ ശ്രമിച്ചാല്‍ മാത്രമേ മുഴുവന്‍ ബാറ്ററികള്‍ കൊണ്ടുപോകാന്‍ കഴിയൂ. മാത്രമല്ല, ബാറ്ററികളെല്ലാം ഇളക്കിയെടുക്കുമ്പോള്‍ ഇതിനുള്ളിലെ ആസിഡും മറ്റും ടൈലിലേക്കു വീഴും. എന്നാല്‍ അതൊന്നും ഉണ്ടാകാത്ത വിധത്തില്‍ വളരെ വിദഗ്ധമായാണ് ബാറ്ററികള്‍ കൊണ്ടുപോയിരിക്കുന്നത്. ബാറ്ററികളെല്ലാം എടുത്തശേഷം അതുറപ്പിക്കുന്ന ചട്ടക്കൂടുകള്‍ കൃത്യമായി കൂട്ടിച്ചേര്‍ത്തു വച്ചതായി അന്വേഷണത്തില്‍ കണ്ടെത്തിയെന്നും സിഐ പറയുന്നു. ജയില്‍വളപ്പിലെ പവര്‍ ലോണ്‍ട്രി യൂണിറ്റ് കെട്ടിടത്തിലാണ് മോഷണമുണ്ടായിരിക്കുന്നത്. രാജീവ്ഗാന്ധി സെന്‍റര്‍ ഫോര്‍ ബയോടെക്‌നോളജിയുടെ പിറകുവശത്തായി വരുന്ന ജയിലിന്‍റെ ഭാഗമാണ് ഇത്. ഇത്രയും വലിയൊരു മോഷണം ജയില്‍വളപ്പില്‍ നടത്താന്‍ ആസൂത്രിതമായും അതേസമയം ഉപയോഗശൂന്യമായ സോളാര്‍ ബാറ്ററികളെക്കുറിച്ചു വിവരമുള്ളതും വൈദഗ്ധ്യമുള്ളതുമായ ആള്‍ക്കുമാത്രമേ സാധിക്കുകയുള്ളൂ. പുറത്തുനിന്ന് ഒരാള്‍ ജയില്‍വളപ്പില്‍ കടന്നാല്‍ത്തന്നെ ഒരുദിവസം മാത്രമേ അതിനു സാധിക്കുകയുള്ളൂ. ദിവസങ്ങളെടുത്തു മുഴുവന്‍ ബാറ്ററികളും കൊണ്ടുപോകണമെങ്കില്‍ ജയിലില്‍നിന്ന് ആരുടെയെങ്കിലും സഹായം ലഭിച്ചിട്ടുണ്ടോയെന്ന അന്വേഷണത്തിലേക്കുപോകേണ്ടതായി വരും. പോലീസിന്‍റെ പ്രാഥമിക പരിശോധന പൂര്‍ത്തീകരിച്ചുവെങ്കിലും മോഷണത്തെക്കുറിച്ു് യാതൊരു തുമ്പും ഇതുവരെ ലഭിച്ചിട്ടില്ല. മോഷണം നടന്നഭാഗത്ത് സിസിടിവി ക്യാമറള്‍ ഇല്ല എന്നത് അന്വേഷണസംഘത്തെ കുഴക്കുന്നുണ്ട്. അന്വേഷണം തുടരുന്നതായി പൂജപ്പുര പോലീസ് അറിയിച്ചു.

വീടിനുമുന്നിൽ വയോധിക ഷോക്കേറ്റ് മരിച്ചു

ആറ്റിങ്ങൽ: വീടിനുമുന്നിൽ വൃദ്ധയെ ഷോക്കേറ്റ് മരിച്ച നിലയിൽ കണ്ടെത്തി. പൂവൻപാറ കൂരവ് വിള വീട്ടിൽ ലീലാമണി (87) ആണ് മരിച്ചത്. ഇലക്ട്രിക് പോസ്റ്റിൽ നിന്നും വീട്ടിലേക്ക് കണക്‌ഷൻ കൊടുത്തിരുന്ന ലൈനിൽ നിന്നാണ് ഷോക്കേറ്റത്. ലീലാമണിയും ഭിന്നശേഷിക്കാരിയായ മകൾ അശ്വതിയും മാത്രമാണ് വീട്ടിലുണ്ടായിരുന്നത്. ഇന്നലെ വൈകുന്നേരത്തോടെ ലീലാമണി സമീപത്തെ ഇലക്ട്രിഷ്യന്‍റെ വീട്ടിൽ ചെന്ന് വീട്ടിൽ കറണ്ടില്ല എന്ന് പറഞ്ഞിരുന്നു. രാവിലെ ഇലക്ട്രിഷൻ ലീലാമണിയുടെ വീട്ടിലെത്തിയപ്പോഴാണ് വീടിന് മുന്നിൽ മരിച്ച നിലയിൽ കണ്ടെത്തിയത്. ഇലക്ട്രിക്ക് ലൈൻ കയ്യിൽ കുരുങ്ങിയ അവസ്ഥയിലാണ്. മകളെ വീട്ടിനുള്ളിൽ പൂട്ടിയിട്ട ശേഷമാണ് ലീലാമണി പുറത്തിറങ്ങിയത്. ആറ്റിങ്ങൽ പോലീസ് സ്ഥലത്തെത്തി.

മരം വീണ് പരിക്കേറ്റ തൊഴിലാളി മരിച്ചു

വിഴിഞ്ഞം : ബൊട്ടാണിക്കൽ ഗാർഡനിൽ നിന്ന ലക്ഷ്മി തരൂർ മരം കടപുഴകി വീണ് പരിക്കേറ്റ് ചികിത്സയിലായിരുന്ന തൊഴിലാളി മരിച്ചു. കാഞ്ഞിരംകുളം കഴിവൂർ നാല് തട്ട് പ്ലാവിള പുത്തൻവീട്ടിൽ കുമാരി (59) ആണ് മരിച്ചത്. കഴഞ്ഞ ദിവസം കോട്ടുകാൽ കുഴിപ്പള്ളം ബൊട്ടാണിക്കൽ ഗാർഡനിലായിരുന്നു അപകടം. ഉച്ചക്ക് മൂന്നിന് ചെടികൾ നിരത്തുകയായിരുന്ന കുമാരിയുടെ ദേഹത്തേക്ക് മരം വീഴുകയായിരുന്നു. തലക്ക് ഗുരുതരമായി പരിക്കേറ്റ കുമാരിയെ മെഡിക്കൽ കോളജിൽ പ്രവേശിപ്പിച്ചെങ്കിലും ഇന്നലെ രാവിലെ മരണമടഞ്ഞു. മൃതദേഹം പോസ്റ്റ്മോർട്ടത്തിന് ശേഷം ബന്ധുക്കൾക്ക് വിട്ടു നൽകി. കാഞ്ഞിരംകുളം പോലീസ് മേൽനടപടി സ്വീകരിച്ചു. അപകടത്തിൽപ്പെട്ട് പരിക്കേറ്റ ജാർഖണ്ഡ് സ്വദേശി ബബ്‌ലു(45) ചികിത്സയിലാണ്.

അഭിഭാഷകൻ വീട്ടിനുള്ളിൽ മരിച്ച നിലയിൽ

ചവറ : അഭിഭാഷകനെ വീട്ടിൽ മരിച്ച നിലയിൽ കണ്ടെത്തി. സീനിയർ അഭിഭാഷകനും റിട്ട. ജില്ലാ ജഡ്ജിയുമായ എൻ. രവിയുടെ മകൻ ചവറ കുളങ്ങരഭാഗം ഇലംമ്പേഴത്ത് വീട്ടിൽ എൽ. ആർ. വിഷ്ണുനാരായൺ (39) നെയാണ് മരിച്ച നിലയിൽ കണ്ടെത്തിയത്. ചവറ പോലിസ് മേൽനടപടി സ്വീകരിച്ചു. നീണ്ടകര ഫൗണ്ടേഷൻ ആശുപത്രിയിൽ കൊണ്ടുവന്ന മൃതദേഹം പിന്നീട് പാരിപ്പള്ളി മെഡിക്കൽ കോളജിലേക്ക് മാറ്റി. ഇന്ന് പോസ്റ്റ്മോർട്ടം നടത്തിയ ശേഷം ഉച്ചയ്ക്ക് രണ്ടിന് വീട്ടുവളപ്പിൽ സംസ്കരിക്കും. മരണകാരണം പോസ്റ്റുമോർട്ടത്തിനു ശേഷമേ വ്യക്തമാകുയെന്ന് ചവറ പോലീസ് പറഞ്ഞു. ഭാര്യ: രഞ്ജിനി. മകൻ: മാധവ് .

പൂജപ്പുര ജയിലിലെ അന്തേവാസി മരിച്ചു

മെഡിക്കല്‍കോളജ്: തിരുവനന്തപുരം മെഡിക്കല്‍കോളജ് ആശുപത്രിയില്‍ ചികിത്സയിലായിരുന്ന പൂജപ്പുര ജയിലിലെ അന്തേവാസി മരിച്ചു. ചാക്ക ദേവിനഗര്‍ സ്വദേശി നാസര്‍ (55) ആണ് മരിച്ചത്. 2024 ഒക്ടോബറിലാണ് ജുഡീഷ്യല്‍ ഫസ്റ്റ്ക്ലാസ് മജിസ്ട്രേറ്റ് ക്രിമിനല്‍ക്കേസില്‍ ശിക്ഷ വിധിച്ചതിനെത്തുടര്‍ന്ന് നാസറിനെ പൂജപ്പുര സെന്‍ട്രല്‍ ജയിലില്‍ പാര്‍പ്പിക്കുന്നത്. കഴിഞ്ഞദിവസം ദേഹാസ്വാസ്ഥ്യം അനുഭവപ്പെട്ടതോടെ തിരുവനന്തപുരം മെഡിക്കല്‍കോളജില്‍ പ്രവേശിപ്പിക്കുകയായിരുന്നു. ശനിയാഴ്ച പുലര്‍ച്ചെയായിരുന്നു മരണം. മൃതദേഹം പോസ്റ്റുമോര്‍ട്ടത്തിനുശേഷം ബന്ധുക്കള്‍ക്കു വിട്ടുനല്‍കി.

യുവാവിനെ വീട്ടിനുള്ളിൽ തൂങ്ങി മരിച്ചനിലയിൽ

മെഡിക്കൽ കോളജ്: യുവാവിനെ വീടിനുള്ളിൽ തൂങ്ങിമരിച്ച നിലയിൽ കണ്ടെത്തി. മണക്കാട് ആറ്റുകാൽ തേരകം ഹൗസ് നമ്പർ 22ൽ വൈദ്യനാഥന്‍റെ മകൻ മുരുകൻ (42) ആണ് മരിച്ചത്. ഇന്നലെ ഉച്ചയ്ക്ക് രണ്ടിനാണ് വീടിനുള്ളിൽ മരിച്ച നിലയിൽ കണ്ടെത്തിയത്. ഫോർട്ട് പോലീസ് മേൽനടപടികൾ സ്വീകരിച്ചു. മൃതദേഹം മെഡിക്കൽ കോളജ് ആശുപത്രി മോർച്ചറിയിൽ.

സോപാനത്തിന്‍റെ ജാളിയിൽ കുരുന്നിന്‍റെ കാൽ കുടുങ്ങി

പാലോട് : വീട്ടിലെ സിമന്‍റ് സോപാനത്തിന്‍റെ ജാളിയിൽ കാൽ കുടുങ്ങിയ കുരുന്നിനു ഫയർഫോഴ്സ് രക്ഷകരായി. കളിക്കുന്നതിനിടെ പാലോട് സത്രക്കുഴി ലേഖ ഭവനിൽ ഹരികുമാറിന്‍റെ മകൻ ഹർഷിദിന്‍റെ കാലാണ് സോപാനത്തിനിടയിൽ കുടുങ്ങിയത്. വീട്ടുകാർ പുറത്തെടുക്കാൻ നടത്തിയ ശ്രമം വിജയിക്കാത്തതിനെ തുടർന്ന് ഫയർഫോഴ്സിനെ അറിയിച്ചു. വിതുരയിൽനിന്നും ഫയർഫോഴ്സ് യൂണിറ്റെത്തി സോപനത്തിന്‍റെ ഒരു ഭാഗം അറുത്തുമാറ്റി കുട്ടിയുടെ കാൽ പുറത്തെടുത്തു.

ഉമ്മൻചാണ്ടി അനുസ്മരണം സംഘടിപ്പിച്ചു

നെടുമങ്ങാട്: തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിൽ യുഡിഎഫ് മികച്ച വിജയം നേടുമെന്നും അത് വരാനിരിക്കുന്ന നിയമസഭാ തെരഞ്ഞെടുപ്പിൽ യുഡിഎഫ് പ്രവർത്തകർക്ക് ആവേശം നൽകുന്ന ഒന്നായിരിക്കും എന്നും കോൺഗ്രസ് വർക്കിംഗ് കമ്മിറ്റി അംഗം രമേശ് ചെന്നിത്തല പറഞ്ഞു. നെടുമങ്ങാട് മണ്ഡലം കോൺഗ്രസ് കമ്മിറ്റി സംഘടിപ്പിച്ച ഉമ്മൻചാണ്ടി അനുസ്മരണം ഉദ്ഘാടനം ചെയ്യുകയായിരുന്നു അദ്ദേഹം. കോൺഗ്രസ് നെടുമങ്ങാട് മണ്ഡലം പ്രസിഡൻറ് അഡ്വ: മഹേഷ് ചന്ദ്രൻ അധ്യക്ഷത വഹിച്ച യോഗത്തിൽ മികച്ച സഹകരിക്കുള്ള എം.എൻ. ബാലകൃഷ്ണൻ നായർ പുരസ്കാരം നേടിയ അഡ്വ. കരകുളം കൃഷ്ണപിള്ളയെ രമേശ് ചെന്നിത്തല അനുമോദിക്കുകയുണ്ടായി. സമ്മേളനത്തിൽ അഡ്വ. കരകുളം കൃഷ്ണപിള്ള ചികിത്സാസഹായ വിതരണവും മറിയാമ്മ ഉമ്മൻ ഭക്ഷ്യധാന്യ കിറ്റ് വിതരണവും നടത്തി. അഡ്വ. എം. മുനീർ, നെട്ടച്ചിറ ജയൻ, കല്ലയം സുകു, ടി. അർജുനൻ, അഡ്വ. എസ്. അരുൺകുമാർ, എൻ.എസ്. നുസൂർ, മണ്ണൂർക്കോണം സജാദ്, ശരത് ശൈലേശ്വരൻ, നെട്ടയിൽ ഷിനു, അഫ്സൽ വാളിക്കോട്, ഷമീർ വാളിക്കോട് തുടങ്ങിയവർ സംസാരിച്ചു.

ചെരിഞ്ഞ പോസ്റ്റ് വീഴാതെ കെട്ടിവച്ചിരിക്കുന്നത് തെങ്ങില്‍

വെള്ളറട: ചെരിഞ്ഞ പോസ്റ്റ് വീഴാതെ കെട്ടിവച്ചിരിക്കുന്നത് തെങ്ങിനു മുകളില്‍. വെള്ളറട വൈദ്യുതി സെക്‌ഷന്‍ ഓഫീസിന്‍റെ പരിധിയിലുള ചിറത്തലയ്ക്കല്‍ ഭാഗത്ത്, ആറാട്ടുകുഴിയിലേക്ക്‌വരുന്ന റോഡ് സൈഡിലുള്ള ഒരു ഇലക്ട്രിക് പോസ്റ്റിനാണ് ഈ ദുര്‍ഗതി. റോഡുപണിക്കിടയില്‍ എങ്ങനെയോ പൊട്ടിവീണതാണ് പോസ്റ്റ്. ഉടന്‍ വൈദ്യുതി വകുപ്പിനെ വിവരമറിയിച്ചു. അവരെത്തിയാണു പോസ്റ്റിനെ സമീപത്തെ വീടിനോടു ചേര്‍ന്നുള തെങ്ങിലും വീടിന്‍റെ മതിലിലുമായി പ്ലാസ്റ്റിക് കയര്‍ ഉപയോഗിച്ച് കെട്ടിവച്ചിരിക്കുന്നത്. പിന്നീട് വീട്ടുടമ നിരവധി തവണ ഇതു മാറ്റി സ്ഥാപിക്കണമെന്നു വൈദ്യുതി വകുപ്പ് അധികൃതരോട് ആവശ്യപ്പെട്ടെങ്കിലും നടപടിയുണ്ടായില്ല. കെവി ലൈന്‍ കടന്നുപോകുന്ന പോസ്റ്റാണിത്. ഏകദേശം ഒരു മാസത്തോളമായി വീണിട്ട്. വൈദ്യുതി വകുപ്പുമായി ബന്ധപ്പെട്ടപ്പോള്‍ മറ്റ് ജോലികള്‍ക്ക് ജെസിബി കൊണ്ടുവരുമ്പോള്‍ മാറ്റാമെന്ന നിലപാടിലാണ്. ഈ ലൈനിലൂടെ കറണ്ട് കടത്തിവിടുന്നില്ലെന്നും ഇതുനേരത്തേ ഒഴിവാക്കിയതാണെന്നുമാണ് വെളറട വൈദ്യുതി സെക്‌ഷന്‍ ഓഫീസിലെ എക്‌സിക്യൂട്ടീവ് എന്‍ജിനീയര്‍ പറയുന്നത്. എന്നാലും ഭയത്തിലാണ് വീട്ടുടമ്മ. അടിയന്തരമായി ഇത് മാറ്റണമെന്നാണ് ഇവരുടെ ആവശ്യം. രണ്ടു ദിവസത്തിനുളില്‍ നടപടിയുണ്ടാകുമെന്നാണ് ഇപ്പോള്‍ എഇ പറയുന്നത്.

മതില്‍ ഇടത്തുവീണ് രണ്ടു കുഞ്ഞുങ്ങള്‍ക്ക് പരിക്ക്

വെള്ളറട: കുന്നത്തുകാല്‍ ചാവടിയില്‍ മതില്‍ ഇടത്തുവീണ് രണ്ടു കുഞ്ഞുങ്ങള്‍ക്ക് പരിക്കുപറ്റി. ചാവടി സ്വദേശികളായ ഭഗത് (എട്ട്), ഋതിക് (മൂന്ന്) എന്നിവര്‍ക്കാണു പരിക്കേറ്റത്. ഭഗത്തിന്‍റെ കാലിനും തലയ്ക്കും ഗുരുതരപരിക്കുണ്ട്. രണ്ടു പേരെയും കാരക്കോണം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ഋതിക്കിനു തുടയെല്ലിനാണ് പരിക്കേറ്റത്. വീടിനു സമീപത്തു പ്രവര്‍ത്തിക്കുകയായിരുന്ന ഇന്റര്‍ലോക്ക് നിര്‍മാണ കമ്പനിയുടെ മതിലാണ് മഴയില്‍ കുതിര്‍ന്ന് കുട്ടികളുടെ ദേഹത്തേക്ക് പതിച്ചത്.

ഡാലുംമുഖം സബ് സെന്‍ററിനു പുറത്തുകൂടെ ഇലക്ട്രിക് പോസ്റ്റ് ചാഞ്ഞ് അപകടാവസ്ഥയില്‍

വെള്ളറട: വെള്ളറട ഇലക്ട്രിക് പരിധിയില്‍ ഡാലുംമുഖം വാര്‍ഡില്‍ ഡാലുമുഖം സബ് സെന്‍ററിനു സമീപത്തു നില്‍ക്കുന്ന ഇലക്ട്രിക് പോസ്റ്റ് ചാഞ്ഞു വൈദ്യുതി കമ്പി കൈയെത്തും ദൂരത്തുനില്‍ക്കുന്നു. ഒരാഴ്ചയായി വാര്‍ഡ് മെമ്പര്‍ കെഎസ്ഇബിയെ അറിയിച്ചിട്ടും അവര്‍ക്കു കണ്ട ഭാവവും കേട്ട ഭാവവും ഇല്ല. അപകടാവസ്ഥയില്‍ നില്‍ക്കുന്ന ഇലക്ട്രിക് പോസ്റ്റിനെ നിവര്‍ത്തി ബലപ്പെടുത്തി അപകടരഹിതമാക്കുന്നതിനു മുന്‍കൈ എടുക്കാത്തത് പ്രതിഷേധാര്‍ഹമാണ്. വാര്‍ഡ് മെമ്പര്‍ കെഎസ്ഇബിയെ അറിയിച്ചിട്ട് ഒരാഴ്ചയായി. സബ് സെന്‍ററില്‍ രോഗികളും പല ആവശ്യങ്ങള്‍ക്കുമായി നിരവധി പേരാണ് ദിനംപ്രതി എത്തുന്നത്. ഗ്രാമീണ മേഖലയില്‍ മഴ ശക്തമായി തുടരുകയുമാണ്. എന്തെങ്കിലും ഒരു ഇലക്ട്രിക് ഷോക്ക് ഉണ്ടായി അത്യഹിതം ഉണ്ടാകുന്നതിനു മുന്‍പേ അടിയന്തിരമായി കെഎസ്ഇബി ജീവനക്കാരെത്തി ഇലക്ട്രിക് പോസ്റ്റിനെ നിവര്‍ത്തി അപകടം ഒഴിവാക്കാന്‍ വേണ്ട നടപടി സ്വീകരിക്കണമെന്നുള്ള ആവശ്യം ശക്തമാണ്. എത്രയും വേഗം കെഎസ്ഇബി ഇലക്ട്രിക് പോസ്റ്റിനെ നിവര്‍ത്തി ഡാലുംമുഖം സബ് സെന്‍ററിനെ അപകടരഹിതമായി മാറ്റണമെന്ന് പ്രദേശവാസികള്‍ ആവശ്യപ്പെട്ടു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact editor@deepika.com