പോളിംഗ് ബൂത്തില്‍ സ്വാഗതമോതി കോട്ടയം ഡൂഡിലുകള്‍ : Deepika.com Nattu Visesham

KOTTAYAM

പോളിംഗ് ബൂത്തില്‍ സ്വാഗതമോതി കോട്ടയം ഡൂഡിലുകള്‍

Thursday, April 25, 2024 6:42 AM IST

കോട്ടയം: ജില്ലയെക്കുറിച്ചുള്ള സചിത്ര വര്‍ണനകളുമായി പോളിംഗ് ബൂത്തുകളിലേക്കു സ്വാഗതമോതാന്‍ കോട്ടയം ഡൂഡിലുകള്‍. നാളെ ജില്ലയിലെ വിവിധ പോളിംഗ് ബൂത്തുകളിലാണ് സ്വാഗതവും നെയിം ബോര്‍ഡുകളുമായി ചിത്രരചനാ വൈഭവം തുളുമ്പുന്ന കോട്ടയം ഡൂഡിലുകള്‍ നിറഞ്ഞുനില്‍ക്കുന്നത്.

ജില്ലാ തെരഞ്ഞെടുപ്പ് ഓഫീസറും ജില്ലാ കളക്ടറുമായ വി. വിഗ്‌നേശ്വരിയുടെ താത്പര്യപ്രകാരം പത്തനാപുരം സ്വദേശിനിയായ ചിത്രകാരി ശില്പ അതുലാണ് പോളിംഗ് ബൂത്തുകളില്‍ സ്ഥാപിക്കാനുള്ള പോസ്റ്ററുകള്‍ വരച്ചു നല്‍കിയിട്ടുള്ളത്. ഫേസ്ബുക്കിൽ ശില്പയുടെ ഇത്തരത്തിലുള്ള ഡൂഡിലുകള്‍ കണ്ടാണ് തെരഞ്ഞെടുപ്പിനുവേണ്ടി ജില്ലയെക്കുറിച്ചുള്ള ചിത്രങ്ങള്‍ വരയ്ക്കാമോയെന്ന് ജില്ലാ കളക്‌ടര്‍ ആവശ്യപ്പെട്ടത്.

പോളിംഗ് ബൂത്തുകളിലേക്ക് സ്വാഗതം ചെയ്തുകൊണ്ടുള്ള ഡൂഡില്‍ പോസ്റ്ററിനൊപ്പം പ്രവേശനം, സമ്മതിദായകകേന്ദ്രം, ക്രഷ്, സഹായകേന്ദ്രം, കാത്തിരിപ്പ് കേന്ദ്രം, ശൗചാലയം, കുടിവെള്ളം, പുറത്തേക്ക് എന്നിങ്ങനെയുള്ള ദിശാസൂചകങ്ങളുടെയും ഡൂഡില്‍ പോസ്റ്റര്‍ കോട്ടയത്തിന്‍റെ സവിശേഷതകള്‍ അടയാളപ്പെടുത്തി വരച്ചുചേര്‍ത്തിട്ടുണ്ട്.

കോട്ടയത്തെ പ്രധാന സ്ഥലങ്ങളും വിനോദസഞ്ചാരകേന്ദ്രങ്ങളും ദേവാലയങ്ങളും പൈതൃകകേന്ദ്രങ്ങളും ജില്ലയുടെ സവിശേഷതകളായ കായലും കരിമീനും കള്ളും കളക്‌ടറേറ്റും മീനച്ചിലാറും തെരഞ്ഞെടുപ്പില്‍ വോട്ടിംഗ് പങ്കാളിത്തം ഉറപ്പിക്കുന്നതിനായി തെരഞ്ഞെടുത്ത കഥാപാത്രം കോട്ടയം വോട്ടർ കുഞ്ഞച്ചനുമെല്ലാം നിറഞ്ഞുനില്‍ക്കുന്നുണ്ട് ഈ ഡൂഡിലില്‍. ഈ പോസ്റ്ററുകളും ജില്ലയിലെ വിവിധ നിയമസഭാ നിയോജകമണ്ഡലങ്ങളിലെ സ്വീകരണ/വിതരണ കേന്ദ്രങ്ങളില്‍ പോളിംഗ് സാമഗ്രിക്കൊപ്പം പോളിംഗ് ഉദ്യോഗസ്ഥര്‍ക്കു കൈമാറും.