ADVERTISEMENT

ADVERTISEMENT

കാഞ്ഞൂർ‌ സെന്‍റ് സെബാസ്റ്റ്യൻസ് എച്ച്എസിൽ "ദീപിക നമ്മുടെ ഭാഷ പദ്ധതി

കാഞ്ഞൂർ‌: കാഞ്ഞൂർ‌ സെന്‍റ് സെബാസ്റ്റ്യൻസ് ഹൈസ്കൂളിൽ "ദീപിക നമ്മുടെ ഭാഷ പദ്ധതി'ക്കു തുടക്കമായി. സ്കൂൾ അസി. മാനേജർ ഫാ. ജോസ് വലിയകടവിൽ വിദ്യാർഥി പ്രതിനിധികൾക്ക് ദീപിക ദിനപത്രം കൈമാറി ഉദ്ഘാടനം നിർവഹിച്ചു. പ്രധാനാധ്യാപിക ശാലി തൊമ്മി അധ്യക്ഷത വഹിച്ചു. ദീപിക സർക്കുലേഷൻ‌ മാനേജർ ബിനോ വർഗീസ്, ഏരിയാ മാനേജർ നിബിൻ അലോഷ്യസ് എന്നിവർ പ്രസംഗിച്ചു.

ADVERTISEMENT

ട്രാക്കിൽ മൃതദേഹം; മുക്കാൽ മണിക്കൂറോളം നിർത്തിയിട്ട് മെമു

ആലുവ: കളമശേരിക്കും ആലുവയ്ക്കും ഇടയിലുള്ള റെയിൽപ്പാളത്തിൽ മൃതദേഹം കണ്ടതിനെ തുടർന്ന് എറണാകുളം - ഷൊർണൂർ മെമു ട്രെയിൻ മുക്കാൽ മണിക്കൂറോളം നിർത്തിയിട്ടു. മൃതദേഹം മാറ്റാൻ വൈകിയതിനാൽ വൈകുന്നേരം 6.19ന് ആലുവ സ്റ്റേഷനിൽ എത്തേണ്ടിയിരുന്ന ട്രെയിൻ 07.04നാണ് എത്തിയത്. ഇന്നലെ വൈകുന്നേരം 6.10ഓടെ കമ്പനിപ്പടി മേഖലയിലെ റെയിൽവേ പാളത്തിലാണ് മൃതദേഹം കണ്ടത്. മരിച്ചയാളെ തിരിച്ചറിഞ്ഞിട്ടില്ല. ഫോൺ ചെയ്ത് പാളം കടന്നപ്പോൾ ട്രെയിൻ തട്ടിയതാകാമെന്നാണ് പ്രാഥമിക നിഗമനം. പിന്നാലെ വന്ന മെമു ട്രെയിൻ ലോക്കോ പൈലറ്റ് മൃതദേഹം കാണുകയും ട്രെയിൻ നിർത്തുകയുമായിരുന്നു.ഇതരസംസ്ഥാന തൊഴിലാളിയാണ് മരിച്ചതെന്നാണ് കരുതുന്നത്. ഇവിടം വളവായതിനാൽ മുമ്പും റെയിൽ പാളം കുറുകെ കടക്കുന്നതിനിടെ നിരവധി പേർ അപകടത്തിൽപ്പെട്ടിട്ടുണ്ട്.

ഇൻകം ടാക്സ് ഉദ്യോഗസ്ഥൻ ചമഞ്ഞ് 89,75,000 തട്ടിയയാൾ പിടിയിൽ

ചോറ്റാനിക്കര: ഇൻകം ടാക്സ് ഉദ്യോഗസ്ഥൻ ചമഞ്ഞ് ലക്ഷങ്ങൾ തട്ടിയെടുത്തയാളെ പോലീസ് പിടികൂടി. കടുങ്ങല്ലൂർ പാനായിക്കുളം പുതിയറോഡ് ഭാഗത്ത് മുക്കത്ത് വീട്ടിൽ ബിജു (തോമസ് സെബാസ്റ്റ്യൻ-55)വിനെയാണ് ചോറ്റാനിക്കര പോലീസ് അറസ്റ്റ് ചെയ്തത്. ചോറ്റാനിക്കര സ്വദേശിയായ സ്ത്രീയുടെ പക്കൽനിന്നാണ് പ്രതി പണം തട്ടിയെടുത്തത്. ഇൻകം ടാക്സ് ഉദ്യോഗസ്ഥനാണെന്ന് പരിചയപ്പെടുത്തി ചോറ്റാനിക്കര സ്വദേശിനി യുമായി ഇയാൾ സൗഹൃദം സ്ഥാപിക്കുകയായിരുന്നു. തുടർന്ന് ഇവരെ ഭീഷണിപ്പെടുത്തി പല തവണയായി 89,75,000 രൂപ തട്ടിയെടുത്തെന്നാണ് പരാതി. ചോറ്റാനിക്കര എസ്എച്ച്ഒ കെ.എൻ. മനോജ്, എസ്ഐമാരായ സതീഷ് കുമാർ, അനിൽ കുമാർ, എഎസ്ഐ രാജലക്ഷ്മി എന്നിവരുടെ നേതൃത്വത്തിലുള്ള സംഘമാണ് പ്രതിയെ അറസ്റ്റ് ചെയ്തത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. ഇയാൾ നേരത്തെയും സമാന കേസുകളിലും ചെക്ക് കേസുകളിലും ഉൾപ്പെട്ടിട്ടുള്ളയാളാണെന്ന് പോലീസ് പറഞ്ഞു.

കടൽക്ഷോഭം നായരമ്പലത്ത് തകർന്നത് മൂന്നു കിലോമീറ്റർ കടൽ ഭിത്തി

വൈപ്പിൻ: കാലവർഷം പാതിവഴിയിൽ എത്തിയപ്പോഴേക്കും നായരമ്പലം പുത്തൻ കടപ്പുറത്ത് മൂന്നു കിലോമീറ്റർ നീളത്തിൽ കടൽ ഭിത്തി തകർന്നു. ഇത് തീരത്തിന് വൻ ഭീഷണി ഉയർത്തിയിരിക്കുകയാണെന്നാണ് നാട്ടുകാർ പറഞ്ഞു. ഈ സാഹചര്യത്തിൽ ഇവിടെ അടിയന്തരമായി ജിയോ ബാഗുകൾ നിരത്താൻ ജില്ലാ ഭരണകൂടം നടപടി സ്വീകരിക്കണമെന്നും ടെട്രാ പോഡുകൾ ഉപയോഗിച്ചുള്ള കടൽഭിത്തി നിർമാണത്തിന് പദ്ധതി ആവിഷ്കരിക്കുകയും വേണമെന്ന് പഞ്ചായത്തംഗം സി.സി. സിജി ആവശ്യപ്പെട്ടു. ഇതിനിടെ ഹാച്ചറിക്ക് വടക്ക് വശം കടലേറ്റത്തിൽ തകർന്ന മണൽവാട നായരമ്പലം പഞ്ചായത്ത്‌ പുനർനിർമിച്ചതായും പഞ്ചായത്തംഗം അറിയിച്ചു.

കളമശേരി പോളിടെക്‌നിക്് ലഹരിക്കേസ് : മുഖ്യപ്രതി ഒഡീഷയില്‍ അറസ്റ്റില്‍

കൊച്ചി: കളമശേരി ഗവ. പോളിടെക്‌നിക്കിലെ ആണ്‍കുട്ടികളുടെ ഹോസ്റ്റലില്‍ (പെരിയാര്‍) നിന്ന് വന്‍ കഞ്ചാവ് ശേഖരം കണ്ടെത്തിയ കേസിലെ മുഖ്യപ്രതി ഒഡീഷയില്‍ നിന്ന് അറസ്റ്റിലായി. ഒഡീഷ ദരിഗ്ബാദ് സ്വദേശി അജയ് പ്രഥാനെ(33)യാണ് ഡിസിപി ജുവനപ്പടി മഹേഷിന്‍റെ മേല്‍നോട്ടത്തില്‍ കളമശേരി പോലീസ് സ്റ്റേഷനിലെ എസ്‌ഐ സെബാസ്റ്റ്യന്‍ പി. ചാക്കോയുടെ നേതൃത്വത്തിലുള്ള പോലീസ് സംഘം ഒഡീഷയില്‍ നിന്ന് സാഹസികമായി പിടികൂടിയത്. ഇതോടെ ഈ കേസില്‍ അറസ്റ്റിലായവരുടെ എണ്ണം എട്ടായി. ഇയാളാണ് ഹോസ്റ്റലിലേക്ക് എത്തിക്കാന്‍ ഇതരസംസ്ഥാനക്കാരുടെ സംഘത്തിന് കഞ്ചാവ് കൈമാറിയത്. ഒഡീഷയിലെ ഉള്‍പ്രദേശമായ ദരിഗ്ബാദിലാണ് ഇയാള്‍ താമസിച്ചിരുന്നത്. സുലഭമായി കഞ്ചാവ് കൃഷിയുള്ള ഇവിടെനിന്നാണ് കളമശേരി പോളിടെക്‌നിക് വിദ്യാര്‍ഥികള്‍ക്ക് ഉള്‍പ്പെടെ ഇയാള്‍ കഞ്ചാവ് എത്തിച്ചിരുന്നത്. പുറത്തുനിന്ന് പെട്ടെന്ന് ഈ ഗ്രാമത്തിലേക്ക് എത്തുക ദുഷ്‌കരമായിരുന്നു. അവിടെ ചെന്ന് പ്രതിയെ കസ്റ്റഡിയില്‍ എടുക്കുന്നതിനായി ഡിസിപി ജുവനപ്പടി മഹേഷ് ഒഡീഷ പോലീസിന്‍റെ സഹായം തേടിയിരുന്നു. ഒഡീഷ പോലീസിന്‍റെ സഹായത്തോടെ സാഹസികമായിട്ടാണ് അജയ് പ്രഥാനെ അറസ്റ്റ് ചെയ്തത്. ഇയാള്‍ മുമ്പ് ഏഴുമാസം കൊച്ചിയിലും കോട്ടയത്തുമായി താമസിച്ചിരുന്നുവെന്നാണ് പോലീസിന് മൊഴി നല്‍കിയത്. കഴിഞ്ഞ മാര്‍ച്ച് 15ന് നടത്തിയ പോലീസ് പരിശോധനയിലാണ് പെരിയാര്‍ ഹോസ്റ്റലില്‍ നിന്നു രണ്ടു കിലോ കഞ്ചാവും മദ്യവും പിടികൂടിയത്. കഞ്ചാവ് അളന്ന് ചെറിയ പായ്ക്കറ്റുകളിലേക്കു മാറ്റുന്നതിനിടെയായിരുന്നു റെയ്ഡ്. സംഭവവുമായി ബന്ധപ്പെട്ട് മൂന്നാം വര്‍ഷ വിദ്യാര്‍ഥികളായ കൊല്ലം കുളത്തുപ്പുഴ സ്വദേശി ആകാശ്, ആലപ്പുഴ സ്വദേശി ആദിത്യന്‍, കൊല്ലം സ്വദേശിയും കോളജിലെ യൂണിയന്‍ ജനറല്‍ സെക്രട്ടറിയും എസ്എഫ്‌ഐ നേതാവുമായ അഭിരാജ് എന്നിവരെയാണ് പോലീസ് ആദ്യം അറസ്റ്റ് ചെയ്തത്. രണ്ട് എഫ്‌ഐആറുകളാണ് രജിസ്റ്റര്‍ ചെയ്തത്. തുടര്‍ന്നുള്ള അന്വേഷണത്തില്‍ പോളിടെക്നിക്കിലെ പൂര്‍വവിദ്യാര്‍ഥികളായ മുഹമ്മദ് ആഷിഖും കെ.എസ്. ഷാലിഖും പിടിയിലായി. മുഹമ്മദ് ആഷിഖാണ് പ്രധാന ലഹരി ഇടപാടുകാരനെന്ന് പോലീസ് കണ്ടെത്തിയിരുന്നു. ഇവരെ ചോദ്യം ചെയ്തതില്‍ നിന്നാണ് പോളിടെക്‌നിക് ഹോസ്റ്റലിലേക്ക് കഞ്ചാവ് എത്തിച്ച പശ്ചിമബംഗാള്‍ മൂര്‍ഷിദാബാദ് ജില്ലക്കാരായ സുഹൈല്‍ ഷേഖ്, എഹിന്തോ മണ്ഡല്‍, ദീപു മണ്ഡല്‍ എന്നിവര്‍ അറസ്റ്റിലായത്. സുഹൈല്‍ ആയിരുന്നു കഞ്ചാവ് നല്‍കിയതെന്ന് വിദ്യാര്‍ഥികള്‍ പോലീസിന് മൊഴി നല്‍കിയിരുന്നു.

ജില്ലയിൽ പെയ്ത മഴയ്ക്ക് കണക്കില്ല

കൊച്ചി: മഴയുടെ ശക്തിയും തോതും അളന്ന് തിട്ടപ്പെടുത്തി കാലാവസ്ഥാ മുന്നറിയിപ്പ് നല്‍കാന്‍ സഹായിക്കുന്ന സംസ്ഥാന കാലാവസ്ഥ വകുപ്പിന്‍റെ മഴമാപിനി സ്റ്റേഷനുകള്‍ പ്രവര്‍ത്തന രഹിതം. ജില്ലയിലെ ഒന്പത് വെതര്‍ സ്റ്റേഷനുകളില്‍ കളമശേരി, നേര്യമംഗലം, പള്ളുരുത്തി സ്റ്റേഷനുകളാണ് കാലങ്ങളായി പ്രവര്‍ത്തനരഹിതമായിരിക്കുന്നത്. കാലവര്‍ഷം ആരംഭിക്കുന്നതിനു മുന്പേ കേടുപാടുകള്‍ പരിഹരിച്ച് ഇവ പ്രവര്‍ത്തന ക്ഷമമാക്കണമെന്ന് ആവശ്യം ശക്തമായിരുന്നെങ്കിലും ബന്ധപ്പെട്ടവര്‍ ഇതുവരെയും യാതൊരു നടപടിയും സ്വീകരിച്ചിട്ടില്ല. ആലുവ, ചൂണ്ടി, ഇടമലയാര്‍, കൂത്താട്ടുകുളം, മട്ടാഞ്ചേരി, ഓടക്കാലി എന്നിവിടങ്ങളിലാണ് കാലാവസ്ഥാ വകുപ്പിന്‍റെ കീഴില്‍ ജില്ലയിലെ മറ്റ് മഴമാപിനി സ്റ്റേഷനുകള്‍. ഇവ പ്രവര്‍ത്തിക്കുന്നുണ്ടെങ്കിലും പലപ്പോഴും തെറ്റായ വിവരങ്ങള്‍ നല്‍കുന്നുവെന്ന ആക്ഷേപവുമുണ്ട്. ഇവയ്ക്കു പുറമേ നഗരത്തില്‍ ദര്‍ബാര്‍ ഹാള്‍, കടവന്ത്ര, ബോട്ട്‌ജെട്ടി ഭാഗങ്ങളില്‍ ജില്ലാ ദുരന്തനിവാരണ അഥോറിറ്റിയുടെയും നേര്യമംഗലം, ഭൂതത്താന്‍കെട്ട്, കീരമ്പാറ എന്നിവിടങ്ങളില്‍ ഇറിഗേഷന്‍ വകുപ്പിന്‍റെയും മഴമാപിനി സ്റ്റേഷനുകളുമുണ്ട്. ഇത്രയും സ്റ്റേഷനുകളില്‍ നിന്നുള്ള വിവരങ്ങളുടെ അടിസ്ഥാനത്തിലാണ് പെയ്ത മഴയുടെ അളവും ശക്തിയും തിട്ടപ്പെടുത്തി കലാവസ്ഥാ മുന്നറിയിപ്പ് നല്‍കുന്നത്. പൊതുജനം വിവരങ്ങള്‍ അറിയേണ്ട മഴമാപിനിയില്‍ നിന്നുള്ള വിവരങ്ങള്‍ കാലാവസ്ഥാ വകുപ്പിന്‍റെ വെബ്‌സൈറ്റുവഴി പൊതുജനത്തിനും ലഭ്യമാക്കിയിരുന്നു. എന്നാല്‍ കഴിഞ്ഞ മേയ് മുതല്‍ ഈ അവസരം ലഭ്യമല്ല. ഓപ്പറേഷന്‍ സിന്ദൂറിന്‍റെ ഭാഗമായി സുരക്ഷ കണക്കിലെടുത്ത് വെബ്‌സൈറ്റിന് ചില നിയന്ത്രണങ്ങള്‍ വരുത്തിയതാണ് കാരണം. എന്നാല്‍ തങ്ങളുടെ പ്രദേശത്തെ മഴയുടെ വിവരങ്ങള്‍ അറിയാനുള്ള അവസരം തിരികെ ലഭ്യമാക്കണമെന്ന് ജനങ്ങളുടെ ആവശ്യത്തോട് വകുപ്പ് മുഖം തിരിക്കുകയാണ്. വകുപ്പിലെ ഉദ്യോഗസ്ഥര്‍ക്കും വെബ്‌സൈറ്റിലേക്കുള്ള പ്രവേശനം നിയന്ത്രിച്ചിട്ടുണ്ട്. മഴ മാറി... വെയില്‍ വന്നു മൂന്നു ദിവസമായി ജില്ലയില്‍ വ്യാപകമായി പെയ്ത ശക്തമായ മഴയ്ക്ക് ശമനം വന്നതായാണ് കാലാവസ്ഥാ വകുപ്പില്‍ നിന്നുള്ള വിവരം. അറബിക്കടലില്‍ രൂപപ്പെട്ട ന്യൂനമര്‍ദം മാറിപ്പോയതാണ് മഴയ്ക്ക് ശമനമുണ്ടാകാന്‍ കാരണം. എങ്കിലും രണ്ടു ദിവസത്തേക്ക് ഇടവിട്ട മഴയും കാറ്റും ഉണ്ടായേക്കാമെന്നും കാലാവസ്ഥാ വകുപ്പ് മുന്നറിയിപ്പ് നല്‍കുന്നു. ഒരാഴ്ചയ്ക്കു ശേഷം മഴ മടങ്ങി വന്നേക്കാമെന്നും അറിയിച്ചു.

ലാപ്‌ടോപ്പിന് പകരം ടീഷര്‍ട്ട്: പേടിഎം 49,000 രൂപ നഷ്ടപരിഹാരം നല്‍കണം

കൊച്ചി: ലാപ്‌ടോപ്പ് വാങ്ങുന്നതിനായി നല്‍കിയ ഓണ്‍ലൈന്‍ ഓര്‍ഡറില്‍ വിലകുറഞ്ഞ ടീഷര്‍ട്ട് ലഭ്യമാക്കിയ ഇ-കൊമേഴ്‌സ് സ്ഥാപനമായ പേടിഎം മാള്‍ 49,000 രൂപ ഉപഭോക്താവിന് നഷ്ടപരിഹാരം നല്‍കണമെന്ന് എറണാകുളം ജില്ലാ ഉപഭോക്തൃ തര്‍ക്കപരിഹാര കോടതി. എറണാകുളം പെരുമ്പാവൂര്‍ സ്വദേശിയും കേന്ദ്ര വനം പരിസ്ഥിതി മന്ത്രാലയത്തിന് കീഴിലെ സയന്‍റിസ്റ്റുമായ ഡോ. ജിജോ അന്ന ഗീവര്‍ഗീസ് പേടിഎം ഇ-കൊമേഴ്സിനെതിരെ സമര്‍പ്പിച്ച പരാതിയിലാണ് ഉത്തരവ്. 2021 ജൂണിലാണ് പരാതിക്കാരന്‍ ലെനോവോ കമ്പനിയുടെ ലാപ്‌ടോപ്പ് വാങ്ങാന്‍ ഓര്‍ഡര്‍ നല്‍കിയത്. എന്നാല്‍ എതിര്‍കക്ഷി സ്ഥാപനം ലാപ്‌ടോപ്പിന് പകരമായി ഗുണനിലവാരം കുറഞ്ഞ ടീഷര്‍ട്ടാണ് നല്‍കിയത്. ഫോട്ടോഗ്രാഫ് ഉള്‍പ്പെടെയുള്ള തെളിവുകള്‍ സഹിതം എതിര്‍ക്കക്ഷി കസ്റ്റമര്‍ കെയറിനെ സമീപിച്ചെങ്കിലും തിരിച്ചെടുക്കല്‍ അപേക്ഷ മതിയായ കാരണം കാണിക്കാതെ നിരസിക്കുകയാണ് ഉണ്ടായത്. ഇ-കൊമേഴ്‌സ് സ്ഥാപനത്തിനു നല്‍കുന്ന പരാതികള്‍ 48 മണിക്കൂറിനകം കൈപ്പറ്റ് അറിയിപ്പ് നല്‍കേണ്ടതും ഒരു മാസത്തിനകം പരാതിയില്‍ പരിഹാരം ഉണ്ടാക്കണമെന്ന ചട്ടം എതിര്‍കക്ഷികള്‍ ലംഘിച്ചുവെന്ന് കമ്മീഷന്‍ വിലയിരുത്തി. 2020ലെ ഉപഭോക്തൃ സംരക്ഷണ നിയമത്തിലെ ഇ-കൊമേഴ്‌സ് ചട്ടപ്രകാരം, വാങ്ങുന്ന ഉത്പന്നത്തെക്കുറിച്ച് കൃത്യമായ വിവരവും സുതാര്യമായ നടപടിക്രമങ്ങളും പരാതി പരിഹാര സംവിധാനങ്ങളും ഉറപ്പുവരുത്താനുള്ള ബാധ്യത എതിര്‍കക്ഷികള്‍ക്കുണ്ടെന്ന് കമ്മീഷന്‍ ചൂണ്ടിക്കാട്ടി. തെറ്റായതും വില കുറഞ്ഞതുമായ ഉത്പന്നം നല്‍കിയെന്ന പരാതി സമയബന്ധിതമായി പരിഹരിക്കുന്നതില്‍ ഗുരുതരമായ വീഴ്ചയാണ് എതിര്‍കക്ഷി സ്ഥാപനം വരുത്തിയത് എന്ന് ഡി.ബി. ബിനു അധ്യക്ഷനും വി. രാമചന്ദ്രന്‍, ടി.എന്‍. ശ്രീവിദ്യ എന്നിവര്‍ അംഗങ്ങളുമായ ബെഞ്ച് വിലയിരുത്തി. ലാപ്‌ടോപ്പിന്‍റെ വിലയായി പരാതിക്കാരന്‍ നല്‍കിയ 28,990 രൂപ തിരിച്ചു നല്‍കണമെന്നും 15,000 രൂപ നഷ്ടപരിഹാരവും 5000 രൂപ കോടതി ചെലവും 45 ദിവസത്തിനകം പരാതിക്കാരന് നല്‍കണമെന്നും എതിര്‍ കക്ഷികള്‍ക്ക് കോടതി ഉത്തരവ് നല്‍കി. അഡ്വ. അശ്വിന്‍ കുമാര്‍ പരാതിക്കാരിക്കു വേണ്ടി കോടതിയില്‍ ഹാജരായി.

ബാങ്ക് ജീവനക്കാരൻ വാഹനാപകടത്തിൽ മരിച്ച കേസ്: 1.05 കോടി നഷ്ടപരിഹാരം വിധിച്ച് കോടതി

മൂവാറ്റുപുഴ: സഹകരണ ബാങ്കിലെ കളക്ഷൻ ജീവനക്കാരൻ വാഹനാപകടത്തിൽ മരിച്ച കേസിൽ 1.05 കോടി രൂപ നഷ്ടപരിഹാരം വിധിച്ച് മൂവാറ്റുപുഴ കോടതി. പേഴയ്ക്കാപ്പിള്ളി പള്ളിപ്പടി സ്വദേശി താണിച്ചുവട്ടിൽ ഷിയാസ് (40) മരിച്ച കേസിലാണ് മൂവാറ്റുപുഴ എംഎസിടി കോടതി ജഡ്ജ് കെ.എൻ. ഹരികുമാർ ഇൻഷ്വറൻസ് കന്പനിയോട് നഷ്ടപരിഹാരം നൽകാൻ വിധിച്ചത്. 2023 ഡിസംബർ 16നാണ് കേസിനാസ്പദമായ സംഭവം. പേഴയ്ക്കാപ്പിള്ളി പള്ളിപ്പടിക്ക് സമീപം താണിച്ചുവട് റോഡിൽ ബൈക്കിൽ ഇരിക്കുകയായിരുന്ന ഷിയാസിന്‍റെ മേൽ പിന്നോട്ടെടുത്ത ലോറി കയറുകയായിരുന്നു. തുടർന്ന് ചികിത്സയിലിരിക്കെയാണ് മരിച്ചത്.

കാപ്പ ചുമത്തി നാടു കടത്തി

വരാപ്പുഴ: നിരന്തര കുറ്റവാളികളായ രണ്ടു പേരെ കാപ്പ ചുമത്തി നാടു കടത്തി. വരാപ്പുഴ പോലീസ് സ്റ്റേഷൻ പരിധിയിൽ സ്ഥിരതാമസക്കാരായ കോട്ടുവള്ളി കാവിൽനട കട്ടത്തറ വീട്ടിൽ അഭിരാം (24), ആലങ്ങാട് കരിങ്ങാത്തുരുത്ത് മാലോത്ത് തറയിൽ അഭിജിത്ത് (24) എന്നിവരെയാണ് കാപ്പ ചുമത്തി ആറു മാസത്തേക്ക് നാടു കടത്തിയത്. റൂറൽ ജില്ലാ പോലീസ് മേധാവി എം. ഹേമലതയുടെ റിപ്പോർട്ടിന്‍റെ അടിസ്ഥാനത്തിൽ എറണാകുളം മേഖലാ ഡിഐജി ഡോ. സതീഷ് ബിനോ ആണ് ഉത്തരവിട്ടത്. കഴിഞ്ഞ നാലു വർഷമായി വരാപ്പുഴ, നോർത്ത് പറവൂർ പോലീസ് സ്റ്റേഷൻ പരിധികളിൽ കൊലപാതക ശ്രമം, കഠിന ദേഹോപദ്രവം, സ്ത്രീകൾക്കെതിരെയുള്ള കുറ്റകൃത്യം, ഭീഷണിപ്പെടുത്തൽ തുടങ്ങി നിരവധി കുറ്റകൃത്യങ്ങളിൽ ഉൾപ്പെട്ടവരാണിവർ. ഏപ്രിലിൽ തിരുമുപ്പത്ത് പ്രവർത്തിക്കുന്ന കടയിൽ എത്തി അവിടുത്തെ ജോലിക്കാരനുമായി വാക്കുതർക്കത്തിൽ ഏർപ്പെടുകയും തുടർന്ന് കോൺക്രീറ്റ് കഷണം കൊണ്ട് തലയ്ക്ക് ഇടിച്ച് കൊലപ്പെടുത്താൻ ശ്രമിക്കുകയും ചെയ്തതിന്‌ വരാപ്പുഴ പോലീസ് രജിസ്റ്റർ ചെയ്ത വധശ്രമ കേസിൽ പ്രതിയായതിനെ തുടർന്നാണ് നടപടി.

സിപിഐയില്‍ വിഭാഗീയത പരിഹരിച്ചെന്ന് എന്‍. അരുണ്‍

കൊച്ചി: ജില്ലയിലെ സിപിഐ കമ്മിറ്റികളില്‍ വിഭാഗീയത അവസാനിച്ചെന്നും അത്തരം കാര്യങ്ങള്‍ ഇനി ആവര്‍ത്തിക്കപ്പെടില്ലെന്നും സിപിഐ ജില്ലാ സെക്രട്ടറി എന്‍. അരുണ്‍. പാര്‍ട്ടി അച്ചടക്കത്തിനാണ് മുന്‍ഗണന. പാര്‍ട്ടി അന്വേഷണ കമ്മീഷനെ നിയോഗിക്കുന്നതും അച്ചടക്ക നടപടി സ്വീകരിക്കുന്നതുമെല്ലാം സ്വഭാവികമാണ്. അന്വേഷണം നടത്തുന്നത് പുറത്താക്കാനും നടപടിയെടുക്കാനുമല്ല. അച്ചടക്കം നിലനിര്‍ത്തുകയാണ് പ്രധാനമെന്നും അദ്ദേഹം പറഞ്ഞു. മുന്‍ ജില്ലാ സെക്രട്ടറി പി. രാജുവുമായി ബന്ധപ്പെട്ട വിവാദങ്ങള്‍ അടഞ്ഞ അധ്യായമാണ്. രാജുവിന്‍റെ കുടുംബവുമായി നല്ല ബന്ധമാണ്. തെറ്റിദ്ധരിക്കപ്പെട്ടതിനെ തുടര്‍ന്നുണ്ടായ പ്രശ്‌നങ്ങളായിരുന്നു അവിടെയുണ്ടായത്. കെ.ഇ. ഇസ്മയിലിനെതിരെയുള്ള നടപടിക്ക് രാജു വിഷയവുമായി ബന്ധമില്ല. സംഘപരിവാര്‍ നല്ലവാക്കും ചിരിയുമായി കടന്നുവരുന്നത് മതനന്യൂനപക്ഷങ്ങളെ അടിച്ചമര്‍ത്താനാണ്. ഈ ബോധ്യം ബന്ധപ്പെട്ടവര്‍ക്കുണ്ടാകണം. വിദ്യാഭ്യാസ മേഖലയില്‍ സംഘപരിവാര്‍ കടന്നുകയറ്റം അനുവദിക്കില്ല. യുവ എംഎല്‍എക്ക് എതിരെ സമൂഹമാധ്യമങ്ങളില്‍ പ്രചരിക്കുന്ന വിഷയത്തില്‍ വ്യക്തമായ വിവരം ലഭിച്ച ശേഷം പ്രതികരിക്കാമെന്നും അരുണ്‍ പറഞ്ഞു.

ഫാക്ട് ജീവനക്കാരൻ ക്ഷേത്രക്കുളത്തിൽ മുങ്ങി മരിച്ചു

ഏലൂർ: ഇടുക്കി കീരിത്തോട് സ്വദേശിയും ഫാക്ട് ക്വാട്ടേഴ്സിൽ താമസക്കാരനും ഫാക്ട് ആസിഡ് പ്ലാന്‍റ് ജീവനക്കാരനുമായ വിപിൻ (35) ഇലഞ്ഞിക്കൽ ക്ഷേത്രക്കുളത്തിൽ മുങ്ങി മരിച്ചു. ഇന്നലെ വൈകുന്നേരം ആറോടെയായിരുന്നു സംഭവം. ദിവസവും ഈ ക്ഷേത്രക്കുളത്തിലാണ് വിപിൻ കുളിച്ചിരുന്ന ത്. ഇന്നലെ ഭാര്യയും കുട്ടിയുമൊത്താണ് കുളിക്കാൻ ഇവിടെ എത്തിയത്. ഭാര്യയും കുട്ടിയും വീട്ടിലേക്ക് മടങ്ങിയെങ്കിലും വിപിൻ നീന്തുകയായിരുന്നു. അടുത്ത് നിന്നെത്തിയ യുവാക്കളാണ് വിപിൻ കുളത്തിൽ മുങ്ങിത്താഴുന്നത് കണ്ടത്. ഉടൻ അഗ്നിരക്ഷാ സേനയെ വിവരം അറിയിച്ചു. ഉടൻ അഗ്നിരക്ഷാ സംഘമെത്തി വിപിനെ സമീപത്തെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. അച്ഛൻ: ശിവാസ്. അമ്മ: രാധാമണി. ഭാര്യ: ആസ്പിൻ. മകൻ: അവ്യക്ത്.

സ്വയം നിയമപോരാട്ടത്തിലൂടെ വിജയം കണ്ട് മേയ്‌മോള്‍

കൊച്ചി: റീബില്‍ഡ് കേരള ഡെവലപ്‌മെന്‍റ് പദ്ധതി പ്രകാരമുള്ള അപേക്ഷ നിരസിച്ച വനം വകുപ്പ് നടപടിക്കെതിരെ സ്വയം നിയമ പോരാട്ടം നടത്തിയ യുവതിക്ക് വിജയം. കോതമംഗലം തൃക്കാരിയൂര്‍ കുര്‍ബാനപ്പാറ പൈനാടത്ത് മേയ്‌മോള്‍ പി. ഡേവിസാണ് ഭൂമി വിട്ടു നല്‍കാന്‍ തയാറായിട്ടും ഭൂമിയുടെ ആധാരമടക്കമുള്ള രേഖകള്‍ ഹാജരാക്കിയിട്ടും പട്ടയമില്ലെന്നതിന്‍റെ പേരില്‍ ഭൂമി ഏറ്റെടുക്കാന്‍ തയാറാകാതിരുന്നതിനെതിരെ ഹൈക്കോടതിയെ സമീപിച്ചത്. ഭൂമി ഏറ്റെടുത്ത് നഷ്ടപരിഹാരം നല്‍കാന്‍ 2024 ഡിസംബറില്‍ സിംഗിള്‍ ബെഞ്ച് ഉത്തരവിട്ടിട്ടും നടപ്പാക്കാത്തതിനെ തുടര്‍ന്ന് കോടതിയലക്ഷ്യ ഹര്‍ജിയും നല്‍കി. ഇതേത്തുടര്‍ന്ന് ഭൂമിയുടെ വിലയായി നിശ്ചയിച്ച 45 ലക്ഷം രൂപയില്‍ പകുതി തുക ആദ്യഗഡുവായി അനുവദിച്ചു. ഇതിനു ശേഷം ബാക്കി തുക കൈമാറാന്‍ ഭൂമിയുടെ ആധാരം വനം വകുപ്പിന്‍റെ പേരിലേക്ക് മാറ്റേണ്ടതുണ്ടെന്ന് കാണിച്ച് വനം വകുപ്പ് പുനഃപരിശോധനാ ഹര്‍ജി നല്‍കി. എന്നാല്‍ ഹര്‍ജി തീര്‍പ്പാക്കിയിട്ടും രണ്ടാം ഗഡു ലഭിക്കാതെ വന്നതോടെ മേയ്‌മോള്‍ ഹൈക്കോടതിയില്‍ അപ്പീല്‍ നല്‍കി. രണ്ടാം ഗഡു ഹൈക്കോടതി രജിസ്ട്രിയില്‍ കെട്ടിവയ്ക്കാന്‍ നിര്‍ദേശിച്ച കോടതി ആധാരം വനം വകുപ്പിന്‍റെ പേരില്‍ രജിസ്റ്റര്‍ ചെയ്ത ശേഷം തുക പിന്‍വലിക്കാന്‍ രജിസ്ട്രിക്ക് അപേക്ഷ നല്‍കാനും നിര്‍ദേശിച്ചു. പിതാവ് മരിച്ചതിനെ തുടര്‍ന്ന് മേയ് മോളും മാതാവ് മോളിയുമായിരുന്നു മേക്കപ്പാല ഫോറസ്റ്റ് സ്റ്റേഷന്‍ പരിധിയിലുള്ള ഭൂമിയില്‍ താമസിച്ചിരുന്നത്.

വൻ മരങ്ങൾ അപകട ഭീഷണി ശിഖരങ്ങള്‍ നീക്കണമെന്ന്

മട്ടാഞ്ചേരി: മട്ടാഞ്ചേരി-ഫോര്‍ട്ട്കൊച്ചി ഭാഗങ്ങളില്‍ അപകട ഭീഷണിയുയർത്തി നൂറ്റാണ്ടുകള്‍ പഴക്കമുള്ള വൻ മരങ്ങൾ. ഇവ കടപുഴകിയും ശിഖരങ്ങള്‍ ഒടിഞ്ഞുവീണുമെല്ലാം അപകടങ്ങള്‍ പതിവാകുകയാണ്. മഴക്കാലത്തിനു മുന്പേ അപകടാവസ്ഥയിലുള്ള മരങ്ങളുടെ ശിഖരങ്ങള്‍ വെട്ടിനീക്കുന്ന പതിവ് പേരിനു മാത്രമാക്കി അധികൃതർ അവസാനിപ്പിച്ചതായാണ് നാട്ടുകാരുടെ പരാതി. കഴിഞ്ഞ ദിവസം ഫോര്‍ട്ട്കൊച്ചി സാന്താക്രൂസ് മൈതാനിയിലെ കൂറ്റന്‍ മരം മറിഞ്ഞ് വീണു. പുലര്‍ച്ചെയായതിനാല്‍ ആളപായമുണ്ടായില്ല. കമാലക്കടവിലെ പെട്രോള്‍ പമ്പിനു സമീപവും, ഫോര്‍ട്ട്കൊച്ചി എസ്.എസ്. കൃഷ്ണന്‍ റോഡിലും വൻ മരങ്ങൾ വീണ് ഓട്ടോറിക്ഷയും ഇരുചക്ര വാഹനങ്ങളും വൈദ്യുത പോസ്റ്റുകളും തകർന്ന് ലക്ഷങ്ങളുടെ നഷ്ടമാണുണ്ടായത്. തോപ്പുംപടി കെ.വി. തോമസ് ജംഗ്ഷനിൽ നർത്തിയിട്ടിരുന്ന ബസിനു മുകളിലേക്ക് മരം വീണ് നാശ നഷ്ടമുണ്ടായി. ഇത്തരത്തില്‍ അപകടാവസ്ഥയിൽ മരങ്ങൾ കൊച്ചിയിൽ പലയിടത്തും നില്‍ക്കുന്നുണ്ട്. ഇവയുടെ ശിഖരങ്ങള്‍ വെട്ടി മാറ്റണമെന്നാണ് ആവശ്യം. ഫോര്‍ട്ട്കൊച്ചിയിലെ നൂറ്റാണ്ട് പഴക്കമുള്ളതും ആദ്യ ഇംഗ്ലീഷ് മീഡിയം സ്കൂൾ സെന്‍റ് ഫ്രാന്‍സിസ് സിഎസ്ഐ ചര്‍ച്ച് എല്‍പി സ്കൂളിനു മുകളിലേക്ക് ചാഞ്ഞുനില്‍ക്കുന്ന മരത്തിന്‍റെ ശിഖരങ്ങളും അപകടഭീതി ഉണർത്തുന്നതാണ്. മരത്തിന്‍റെ ശിഖരങ്ങള്‍ അടിയന്തരമായി വെട്ടിനീക്കണമെന്ന ആവശ്യപ്പെട്ട് കൗൺസിലർ ആന്‍റണി കുരീത്തറ പൊതുമരാമത്തു വകുപ്പിന് പരാതി നൽകി.

ഗോശ്രീ പാലങ്ങളിലെ ഗതാഗതക്കുരുക്ക് :നില്‍പ്പ് സമരവുമായി കെഎല്‍സിഎ

കൊച്ചി: ഗോശ്രീ പാലങ്ങളിലെ അതിരൂക്ഷമായ ഗതാഗതക്കുരുക്ക് പരിഹരിക്കണമെന്നാവശ്യപ്പെട്ട് കെഎല്‍സിഎ വരാപ്പുഴ അതിരൂപത ബോള്‍ഗാട്ടി ജംഗ്ഷനില്‍ നില്‍പ്പ്‌സമരം സംഘടിപ്പിച്ചു. കൊച്ചി കോര്‍പ്പറേഷന്‍ മുന്‍ മേയര്‍ ടോണി ചമ്മിണി ഉദ്ഘാടനം നിര്‍വഹിച്ചു. കെഎല്‍സിഎ വരാപ്പുഴ അതിരൂപത പ്രസിഡന്‍റ് സി.ജെ. പോള്‍ അധ്യക്ഷനായിരുന്നു. ഗോശ്രീ ഒന്നാം പാലത്തിന് സമാന്തര പാലം നിര്‍മ്മിക്കുവാനുള്ള അടിയന്തര നടപടികള്‍ ഉടന്‍ സ്വീകരിക്കുക, രാവിലെയും വൈകിട്ടും തിരക്കുള്ള സമയത്ത് കണ്ടെയ്‌നര്‍ ലോറികള്‍ക്ക് നിയന്ത്രണം ഏര്‍പ്പെടുത്തുക, അറ്റകുറ്റപ്പണിക്കായി അടച്ചിട്ടിരിക്കുന്ന രണ്ടാം പാലം തുറക്കുന്നതിനുള്ള അടിയന്തര നടപടികള്‍ ഉടന്‍ സ്വീകരിക്കുക, എന്നീ ആവശ്യങ്ങള്‍ ഉന്നയിച്ചായിരുന്നു സമരം നടത്തിയത്. കെഎല്‍സിഎ സംസ്ഥാന പ്രസിഡന്‍റ് അഡ്വ. ഷെറി ജെ.തോമസ്, അതിരൂപത ജനറല്‍ സെക്രട്ടറി റോയ് പാളയത്തില്‍, എറണാകുളം ജില്ലാ പഞ്ചായത്ത് വൈസ് പ്രസിഡന്‍റ് എല്‍സി ജോര്‍ജ്, മുളവുകാട് പഞ്ചായത്ത് വൈസ് പ്രസിഡന്‍റ് റോസ് മാര്‍ട്ടിന്‍, അതിരൂപത ട്രഷറര്‍ എന്‍.ജെ പൗലോസ്, വൈസ് പ്രസിഡന്‍റുമാരായ റോയ് ഡിക്കൂഞ്ഞ, ബാബു ആന്‍റണി, എം.എന്‍ ജോസഫ്, മേരി ജോര്‍ജ്, സെക്രട്ടറിമാരായ സിബി ജോയ്, വിന്‍സ് പെരിഞ്ചേരി, ഫില്ലി കാനപ്പിള്ളി എന്നിവര്‍ പ്രസംഗിച്ചു. നാളെ വനിതകളുടെ പിന്നോട്ടു നടന്നു പ്രതിഷേധം വൈപ്പിൻ: നാളേറെയായി തുടരുന്ന ഗോശ്രീ പാലത്തിലെ ഗതാഗതക്കുരുക്കിനു അടിയന്തര പരിഹാരം തേടി നാളെ വനിതകൾ പിന്നോട്ട് നടന്നും, പാലത്തിൽ ഫുട്ബോൾ കളിച്ചും പ്രതിഷേധിക്കും. വൈകുന്നേരം നാലിനാണ് സമരം. വൈപ്പിനിലെ റസിഡന്‍റ്സ് അസോസിയേഷനുകളുടെ പൊതുവേദിയായ ഫ്രാഗ് ആണ് സമരം സംഘടിപ്പിക്കുന്നത്. പണികൾ സമയബന്ധിതമായി തീർക്കാത്തതിനാൽ സ്ത്രീകളും കുട്ടികളുമടങ്ങുന്ന യാത്രക്കാർ മണിക്കൂറുകളോളം പാലത്തിൽ കുരുങ്ങുക പതിവാണ്. ഈ സാഹചര്യത്തിലാണ് ഫ്രാഗ് സമര നേതൃത്വം ഏറ്റെടുത്തിട്ടുള്ളത്.

കന്യാസ്ത്രീകളുടെ അറസ്റ്റ്: നാടെങ്ങും പ്രതിഷേധം

കത്തോലിക്ക കോണ്‍ഗ്രസ് കൊച്ചി: ഛത്തീസ്ഗഡില്‍ മലയാളികളായ കന്യാസ്ത്രീകളെ അന്യായമായി അറസ്റ്റ് ചെയ്തതില്‍ പ്രതിഷേധിച്ച് കത്തോലിക്ക കോണ്‍ഗ്രസ് എറണാകുളം-അങ്കമാലി അതിരൂപത സമിതിയുടെ നേതൃത്വത്തില്‍ സായാഹ്ന ധര്‍ണ സംഘടിപ്പിച്ചു. അതിരൂപത പ്രസിഡന്‍റ് എസ്.ഐ. തോമസ് ഉദ്ഘാടനം ചെയ്തു. ഗ്ലോബല്‍ വൈസ് പ്രസിഡന്‍റ് ബെന്നി ആന്‍റണി മുഖ്യപ്രഭാഷണം നടത്തി. അതിരൂപത ജനറല്‍ സെക്രട്ടറി ബേബി ജോണ്‍ പൊട്ടനാനി, ട്രഷന്‍ ജോണ്‍സണ്‍ പടയാട്ടി, ഗ്ലോബല്‍ സെക്രട്ടറി ഫ്രാന്‍സീസ് മൂലന്‍, കേന്ദ്ര വര്‍ക്കിംഗ് കമ്മറ്റിയംഗം സെബാസ്റ്റ്യന്‍ ചെന്നെക്കാടന്‍, അതിരൂപത വൈസ് പ്രസിഡന്‍റ് ജോസ് ആന്‍റണി, സെക്രട്ടറി സെജോ ജോണ്‍, ബിജു പോള്‍ നെറ്റിക്കാടന്‍, പ്രിന്‍സ് ജോസ്, ജേക്കബ് തറയില്‍, പി.ഡി. ജാന്‍റി എന്നിവര്‍ പ്രസംഗിച്ചു. കേരള കോണ്‍ഗ്രസ്-എം കൊച്ചി: ഛത്തീസ്ഗഡില്‍ കള്ളക്കേസില്‍ കുടുക്കി ജയിലില്‍ അടച്ച സിസ്റ്റര്‍ പ്രീതി മേരി സിസ്റ്റര്‍ വന്ദന ഫ്രാന്‍സിസ് എന്നിവരെ മോചിപ്പിക്കണമെന്നാവശ്യപ്പെട്ട് കേരള കോണ്‍ഗ്രസ്-എം എറണാകുളം ജില്ലാ കമ്മിറ്റിയുടെ ആഭിമുഖ്യത്തില്‍ അങ്കമാലി പോസ്റ്റ് ഓഫീസിന്‍റെ മുന്നില്‍ ധര്‍ണ നടത്തി. ജില്ലാ പ്രസിഡന്‍റ് ടോമി ജോസഫ് ഉദ്ഘാടനം ചെയ്തു. നിയോജക മണ്ഡലം പ്രസിഡന്‍റ് മാര്‍ട്ടിന്‍ ബി. മുണ്ടാടന്‍ അധ്യക്ഷത വഹിച്ചു. പാര്‍ട്ടി സംസ്ഥാന ജനറല്‍ സെക്രട്ടറി ബാബു ജോസഫ് മുഖ്യപ്രഭാഷണം നടത്തി. പാര്‍ട്ടി നേതാക്കളായ വര്‍ഗീസ് ജോര്‍ജ്, ജോസി പി. തോമസ്, ടി.ജെ. ബിജു, ജോജാസ് ജോസ്, ജസ്റ്റിന്‍ ജോര്‍ജ്, പോള്‍ കെ. ജോസഫ്, കെ.പി. പൈലി, ആന്‍റണി കിടങ്ങേന്‍ എന്നിവര്‍ പ്രസംഗിച്ചു. വിമെന്‍ വെല്‍ഫയര്‍ സര്‍വീസസ് കൊച്ചി: എറണാകുളം-അങ്കമാലി അതിരൂപത വിമെന്‍ വെല്‍ഫെയര്‍ സര്‍വീസസ് ശക്തമായ പ്രതിഷേധം രേഖപ്പെടുത്തി. ഈ നടപടി നമ്മുടെ രാജ്യത്തിന്‍റെ മതേതര സ്വഭാവത്തെയും ഭരണഘടനാപരമായ അവകാശങ്ങളെയും വെല്ലുവിളിക്കുന്നതും ന്യൂനപക്ഷങ്ങള്‍ക്ക് നേരെയുള്ള ഒരു ഗുരുതരമായ കടന്നുകയറ്റവുമാണെന്ന് അതിരൂപത പ്രസിഡന്‍റ് ജയിനി സാംരാജ്, സെക്രട്ടറി ഡോ. ഡിന്നി മാത്യു എന്നിവര്‍ പറഞ്ഞു. ശക്തമായ പ്രതിഷേധങ്ങളുമായി മുന്നോട്ടുപോകുമെന്നും ഭാരവാഹികള്‍ അറിയിച്ചു. യൂത്ത് കോണ്‍ഗ്രസ് ശ്രീമൂലനഗരം: ഛത്തീസ്ഗഡില്‍ മലയാളികളായ രണ്ട് കന്യാസ്ത്രീകളെ അറസ്റ്റ് ചെയ്ത് റിമാന്‍ഡിലാക്കിയ സംഭവത്തില്‍ യൂത്ത് കോണ്‍ഗ്രസ് പ്രതിഷേധിച്ചു. സംസ്ഥാന ജനറല്‍ സെക്രട്ടറി ലിന്‍റോ പി.ആന്‍റു പ്രതിഷേധം ഉദ്ഘാടനം ചെയ്തു. മണ്ഡലം പ്രസിഡന്‍റ് ജിനാസ് ജബ്ബാര്‍ അധ്യക്ഷത വഹിച്ചു. ഡിസിസി ജനറല്‍ സെക്രട്ടറി പി.എന്‍. ഉണ്ണികൃഷ്ണന്‍, നേതാക്കളായ പി.എച്ച്. അസ്ലം, പി.കെ. സിറാജ് എന്നിവര്‍ സംസാരിച്ചു. തോപ്പുംപടി: കോൺഗ്രസ് കൊച്ചി സൗത്ത് ബ്ലോക്ക് കമ്മിറ്റിയുടെ നേതൃത്വത്തിൽ സംഘടിപ്പിച്ച പ്രതിഷേധ ധർണ തോപ്പുംപടി ബിഒടി പാലത്തിനു സമീപം കെപിസിസി സെക്രട്ടറി തമ്പി സുബ്രഹ്മണ്യൻ ഉദ്ഘാടനം ചെയ്തു. പ്രസിഡന്‍റ് പി.പി.ജേക്കബ് അധ്യക്ഷത വഹിച്ചു. ഫോർട്ടുകൊച്ചി: കെഎൽസിഎ തോപ്പുംപടി സെന്‍റ് സെബാസ്റ്റ്യൻ യൂണിറ്റിന്‍റെ ആഭിമുഖ്യത്തിൽ സംഘടിപ്പിച്ച പ്രതിഷേധ സംഗമം വികാരി ഫാ. ടോമി ചമ്പക്കാട് ഉദ്ഘാടനം ചെയ്തു. കെഎൽസിഎ തോപ്പുംപടി യൂണിറ്റ് പ്രസിഡന്‍റ് സുമീത് ജോസഫ് അധ്യക്ഷത വഹിച്ചു. ആലുവ: ആലുവ സെന്‍റ് ഡൊമിനിക് ഇടവക ഇടവക ശക്തമായ പ്രതിഷേധം രേഖപ്പെടുത്തി. കന്യാസ്ത്രീകളെ എത്രയും വേഗം മോചിപ്പിക്കുന്നതിനു വേണ്ടി പ്രധാനമന്ത്രി നരേന്ദ്ര മോദി നേരിട്ട് ഇടപെടണമെന്ന് സെന്‍റ് ഡൊമിനിക് ഇടവക വികാരി ഫാ. ജോസഫ് കരുമത്തി ആവശ്യപ്പെട്ടു. തൃപ്പൂണിത്തുറ: എകെസിസി തൃപ്പൂണിത്തുറ ഫോറോന പ്രതിഷേധം രേഖപ്പെടുത്തി. എകെസിസി ഫോറോന പ്രസിഡന്‍റ് സെജോ ജോൺ അധ്യക്ഷത വഹിച്ച യോഗത്തിൽ ജോസഫ് അമ്പലത്തിങ്കൾ, എ.വി. ഫ്രാൻസിസ്, ജയ്മോൻ തോട്ടുപുറം, മേഴ്‌സി, ഷൈജു ജോസഫ് തുടങ്ങിയവർ പ്രസംഗിച്ചു.

അഗ്നിരക്ഷാസേന ലൈഫ് ബോയ സ്ഥാപിച്ചു

വൈപ്പിൻ: നിരവധി പേർ മുങ്ങിമരിച്ചിട്ടുള്ള എളങ്കുന്നപ്പുഴ ക്ഷേത്രക്കുളത്തിന്‍റെ സമീപത്ത് അഗ്നിരക്ഷാസേന ലൈഫ് ബോയ സ്ഥാപിച്ചു. വൈപ്പിൻ സ്റ്റേഷൻ ഓഫീസർ സുധീർ ലാലിൽനിന്ന് ദേവസ്വം ബോർഡ്‌ ഓഫീസർ രാജീവ്‌ ആണ് ബോയ ഏറ്റുവാങ്ങി സ്ഥാപിച്ചത്. ജലസുരക്ഷയുടെ ഭാഗമായി ഇവിടെ മോക്ഡ്രില്ലും സംഘടിപ്പിച്ചു. വൈപ്പിൻ അഗ്നിരക്ഷാ നിലയത്തിന്‍റെയും, സിവിൽ ഡിഫൻസ് വാളണ്ടിയർമാരുടെയും നേതൃത്വത്തിൽ നടന്ന മോക്ഡ്രില്ലിൽ പി.ആർ. വിശാഖ്, കെ.ജെ. രാജേഷ്, മിഥുൻരാജ്, ബാലഗോപാൽ, ഹരീഷ്, ഷാൻമോൻ എന്നിവർ പങ്കെടുത്തു.

എരൂർ സ്കൂൾ കെട്ടിടത്തിന്‍റെ മതിൽ ഇടിഞ്ഞുവീണു

തൃപ്പൂണിത്തുറ: എരൂർ ഗവ. കെഎംയുപി സ്കൂൾ കെട്ടിടത്തിന്‍റെ മതിൽ ഇടിഞ്ഞുവീണു. മുൻപ് അടുക്കളയായി ഉപയോഗിച്ചിരുന്ന പഴക്കം ചെന്ന കെട്ടിടത്തിന്‍റെ പിൻവശത്തെ മതിലാണ് ഞായറാഴ്ച ഇടിഞ്ഞുവീണത്. കെട്ടിടത്തിന് നൂറുവർഷം പഴക്കമുണ്ട്. സ്കൂൾ കോമ്പൗണ്ടിനകത്താണ് കെട്ടിടം. നിലവിൽ പുതിയ കെട്ടിടത്തിലാണ് സ്കൂളും അടുക്കളയുമുൾപ്പെടെ പ്രവർത്തിക്കുന്നത്. തുടർച്ചയായി അവധിയായിരുന്നതിനാലും സ്കൂൾ വളപ്പിൽ ആരുമില്ലാതിരുന്നതിനാലുമാണ് അപകടം ഒഴിവായതെന്ന് പറയുന്നു. കേടുപാടുകള്‍ സംഭവിച്ചതും നിലവില്‍ ഉപയോഗിക്കാത്തതുമായ പാചകപ്പുര അടിയന്തിരമായി പൊളിച്ചുമാറ്റുന്നതിന് നഗരസഭാ എഞ്ചിനീയറിംഗ് വിഭാഗം ഉദ്യോഗസ്ഥർക്ക് നിർദേശം നല്‍കിയതായി നഗരസഭാ അധ്യക്ഷ രമ സന്തോഷ് അറിയിച്ചു.

ചൊവ്വര ഗവ. എച്ച്എസ്എസിൽ ‘മിൽമ ഷോപ്പി’ തുടങ്ങി

കാലടി: ചൊവ്വര ഗവ. ഹയർ സെക്കൻഡറി സ്കൂളിൽ ‘മിൽമ ഷോപ്പി’ ആരംഭിച്ചു. മിൽമ @സ്കൂൾ പദ്ധതിയുടെ ഭാഗമായി ലഹരി ഉത്പന്നങ്ങളോട് വിട പറയുക എന്ന ലക്ഷ്യത്തോടെയാണ് ‘മിൽമ ഷോപ്പി’ സ്കൂളുകളിൽ ആരംഭിക്കുന്നത്. വിവിധയിനം പേടകൾ, കേക്കുകൾ, വിവിധയിനം ബിസ്ക്കറ്റുകൾ, ഐസ്ക്രീമുകൾ, കുൽഫി, സിപ്പപ്പ് എന്നിവ വിദ്യാർത്ഥികൾക്ക് ഇവിടെനിന്നും ലഭിക്കും. ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ ഉദ്ഘാടനം നിർവഹിക്കും. എറണാകുളം മിൽമ മേഖലാ യൂണിയൻ ചെയർമാൻ വത്സലൻ പിള്ള ആദ്യ വില്പന നടത്തി. പിടിഎ പ്രസിഡന്‍റ് വിപിൻദാസ് അധ്യക്ഷത വഹിച്ചു. ഗ്രാമപഞ്ചായത്ത് പ്രസിഡന്‍റ് വി.എം. ഷംസുദിൻ, ജില്ലാ പഞ്ചായത്ത് സ്ഥിരംസമിതി അധ്യക്ഷൻ എം.ജെ. ജോമി, ബ്ലോക്ക് സ്ഥിരംസമിതി അധ്യക്ഷൻ ഷബീറലി, മിൽമ എറണാകുളം മേഖലാ യൂണിയൻ ഡയറക്ടർ ബോർഡംഗം കെ.സി. മാർട്ടിൻ, മെമ്പർ. കെ.പി. സുകുമാരൻ, പ്രിൻസിപ്പൽ എം.എ. ശ്രീകുമാർ, പ്രധാനാധ്യാപിക എ.എസ്. ഷീല തുടങ്ങിയവർ പ്രസംഗിച്ചു.

ഉന്നത വിജയികളെ അനുമോദിച്ച് ‘അക്കാദമിയ 2025'

അങ്കമാലി: അങ്കമാലി നിയോജക മണ്ഡലത്തില്‍ വിവിധ പരീക്ഷകളിലും മീറ്റുകളിലും മികവ് പ്രകടിപ്പിച്ച പ്രതിഭകളെ അനുമോദിക്കുന്നതിനായി റോജി എം. ജോണ്‍ എംഎല്‍എ സംഘടിപ്പിച്ച ‘അക്കാദമിയ 2025' വിശ്വജ്യോതി പബ്ലിക് സ്കൂളില്‍ അരേങ്ങറി. നടനും സംവിധായകനുമായ രഞ്ജി പണിക്കര്‍ ഉദ്ഘാടനം ചെയ്തു. ബെന്നി ബഹനാന്‍ എംപി മുഖ്യപ്രഭാഷണം നടത്തി. വിവിധമേഖലകളില്‍ കഴിവ് തെളിയിച്ചവരെയും, റാങ്ക് ജേതാക്കളെയും എസ്എസ്എല്‍സി, പ്ലസ്ടു പരീക്ഷകളില്‍ ഉന്നത വിജയം കരസ്ഥമാക്കിയവരെയും, 10,12 ക്ലാസ്സുകളില്‍ നൂറു ശതമാനം വിജയം കരസ്ഥമാക്കിയ സ്കൂളുകളെയും ആദരിച്ചു. റോജി എം. ജോണ്‍ എംഎല്‍എ അധ്യക്ഷത വഹിച്ച ചടങ്ങില്‍ നഗരസഭാ അധ്യക്ഷന്‍ ഷിയോ പോള്‍, മുന്‍ എംഎല്‍എ പി.ജെ. ജോയി, ബ്ലോക്ക് പഞ്ചായത്ത് പ്രസിഡന്‍റ് കൊച്ചുത്രേസ്യ തങ്കച്ചന്‍, പഞ്ചായത്ത് പ്രസിഡന്‍റുമാരായ ഷൈജന്‍ തോട്ടപ്പിള്ളി, ജോയി അവോക്കാരന്‍, കെ.വി. ബിബീഷ്, എസ്.വി. ജയദേവന്‍, ലതിക ശശികുമാര്‍, ജെസി ജോയി തുടങ്ങിയവര്‍ പ്രസംഗിച്ചു.

ഗ്രാൻഡ് പേരന്‍റ്സ് ഡേ ആഘോഷിച്ചു

അങ്കമാലി: ചുള്ളി സെന്‍റ് ജോർജ് ഇടവകയിൽ കുടുംബ കൂട്ടായ്മയുടെയും വിശ്വാസ പരിശീലന വിഭാഗത്തിന്‍റെയും നേതൃത്വത്തിൽ ഗ്രാൻഡ്‌ പേരന്‍റ്സ് ഡേ ആഘോഷിച്ചു. കുർബാനയ്ക്കു ശേഷം നടന്ന പൊതുസമ്മേളനത്തിൽ വികാരി ഫാ. ഷനു മൂഞ്ഞേലിയും, ഗ്രാൻഡ് പേരന്‍റ്സ് പ്രതിനിധികളും ചേർന്ന് കേക്ക് മുറിച്ചു. വൈസ് ചെയർമാൻ രാജു ചിറമേൽ, അന്ന സിജോ, വത്സ ഉറുമീസ് എന്നിവർ പ്രസംഗിച്ചു. കൈക്കാരന്മാരായ രാജു മറ്റത്തി, മനോജ് കാഞ്ഞൂക്കാരൻ, വിശ്വാസ പരിശീലന വിഭാഗം പ്രധാന അധ്യാപകൻ നോബിൾ കിളിയേൽകുടി എന്നിവർ നേതൃത്വം നൽകി. എല്ലാ ഗ്രാൻഡ് പേരന്‍റ്സിനും സമ്മാനങ്ങൾ കൈമാറി. തുടർന്ന് സ്നേഹവിരുന്നും നടന്നു.

ദേശീയപാത 66: പ്രോജക്ട് ഡയറക്ടർ സന്ദർശിച്ചു

പറവൂർ: കുണ്ടും കുഴിയുമായതിനെ തുടർന്ന് ഗതാഗതം ദുഷ്കരമായ ദേശീയപാതയിലെ മുനമ്പം കവലയിൽ ദേശീയപാത പ്രോജക്ട് ഡയറക്ടർ പി. പ്രദീപിന്‍റെ നേതൃത്വത്തിലുള്ള സംഘം സന്ദർശിച്ചു. പറവൂർ പാലം മുതൽ മൂത്തകുന്നം വരെയുള്ള റോഡ് തകർന്നു തരിപ്പണമായിട്ട് നാളേറെയായി.പൊട്ടിപ്പൊളിഞ്ഞ റോഡിലൂടെ സർവീസ് നടത്താൻ കഴിയാതായതോടെ പറവൂർ-കൊടുങ്ങല്ലൂർ റൂട്ടിലെ സ്വകാര്യ ബസുകളും കുറച്ച് ദിവസം മുൻപ് മിന്നൽ പണിമുടക്ക് നടത്തിയിരുന്നു.

കേരള പോലീസ് അസോ. തെരഞ്ഞെടുപ്പ്: ഔദ്യോഗിക വിഭാഗത്തിന് വിജയം

കൊച്ചി: കേരള പോലീസ് അസോസിയേഷന്‍ (കെപിഎ) കൊച്ചി സിറ്റി ജില്ലാ കമ്മിറ്റി യൂണിറ്റ് തല തെരഞ്ഞെടുപ്പില്‍ നിലവിലെ ഭാരവാഹികള്‍ നേതൃത്വം നല്‍കുന്ന ഔദ്യോഗിക വിഭാഗത്തിന് വന്‍ വിജയം. ആകെയുള്ള 82ല്‍ 77 സീറ്റിലും നിലവിലെ ഭരണസമിതി നേതൃത്വം നല്‍കുന്ന ഔദ്യോഗികവിഭാഗം പ്രതിനിധികള്‍ വിജയിച്ചു. ഇന്നലെ നടന്ന തെരഞ്ഞെടുപ്പില്‍ മത്സരം നടന്ന 19ല്‍ 14 സീറ്റിലും ഔദ്യോഗിക വിഭാഗം പ്രതിനിധികള്‍ തെരഞ്ഞെടുക്കപ്പെട്ടു. ആകെയുള്ള 82 സീറ്റുകളില്‍ 63 എണ്ണത്തിലും ജില്ലാ ഭാരവാഹികള്‍ അടക്കമുള്ള ഔദ്യോഗിക വിഭാഗം പ്രതിനിധികള്‍ എതിരില്ലാതെ തെരഞ്ഞെടുക്കപ്പെട്ടിരുന്നു. നിലവിലെ എല്ലാ ജില്ലാ ഭാരവാഹികളും വീണ്ടും ജില്ലാ കമ്മിറ്റിയിലേക്ക് തെരഞ്ഞെടുക്കപ്പെട്ടിട്ടുണ്ട്. നിലവിലെ ജില്ലാ ഭാരവാഹികളായ കെ.ടി. ദീപു-പ്രസിഡന്‍റ്, വിനോദ് പി. വര്‍ഗീസ്-സെക്രട്ടറി, പി.പി.വിനീഷ് -വൈസ് പ്രസിഡന്‍റ്, പി.പി. നിഷാന്ത് -ജോയിന്‍റ് സെക്രട്ടറി, വരുണ്‍ കൃഷ്ണ-ട്രഷറര്‍ എന്നിവര്‍ വീണ്ടും തെരഞ്ഞെടുക്കപ്പെട്ടു.

പാഠ്യപദ്ധതി പരിഷ്കരണം ഹയർ സെക്കൻഡറിയിൽ നടപ്പാക്കുമെന്ന് മന്ത്രി വി. ശിവൻകുട്ടി

തിരുമാറാടി: പ്ലസ് ടു പഠനം കഴിഞ്ഞിറങ്ങുന്ന കുട്ടികളെ ഏതെങ്കിലും തൊഴിൽ മേഖലയിൽ പ്രാവീണ്യമുള്ളവരാക്കി മാറ്റുന്ന തരത്തിലുള്ള പാഠ്യപദ്ധതി പരിഷ്കരണം ഹയർ സെക്കൻഡറി മേഖലയിൽ നടപ്പാക്കുമെന്ന് മന്ത്രി വി. ശിവൻകുട്ടി. തിരുമാറാടി ഗവ. വൊക്കേഷണൽ ഹയർ സെക്കൻഡറി സ്കൂൾ മന്ദിര ശിലാസ്ഥാപനം നിർവഹിക്കുകയായിരുന്നു മന്ത്രി. തിരുമാറാടി വൊക്കേഷണൽ ഹയർ സെക്കൻഡറി സ്കൂൾ കെട്ടിട നിർമാണത്തിന് സഹായ തുക മൂന്ന് കോടിയാക്കി ഉയർത്തുമെന്ന് മന്ത്രി പറഞ്ഞു. അനൂപ് ജേക്കബ് എംഎൽഎ അധ്യക്ഷത വഹിച്ചു. പ്രകൃതിക്ഷോഭത്തിൽ കേടുപാടു സംഭവിച്ച ജില്ല പഞ്ചായത്ത് നിർമിച്ചിട്ടുള്ള ഓഡിറ്റോറിയം അടിയന്തരമായി അറ്റകുറ്റപ്പണികൾ ചെയ്യണമെന്ന് മന്ത്രി നിർദേശിച്ചു. അടിയന്തരമായി തയാറാക്കിയ എസ്റ്റിമേറ്റ് പ്രകാരം അറ്റകുറ്റപ്പണികൾക്ക് 20 ലക്ഷം അത്യാവശ്യമാണ്. 10 ലക്ഷമാണ് ജില്ലാ പഞ്ചായത്ത് അനുവദിച്ചിട്ടുള്ളത്. അറ്റകുറ്റപ്പണികൾക്ക് ആവശ്യമായ തുക അനുവദിക്കണമെന്ന് ആവശ്യപ്പെട്ട് പഞ്ചായത്തും പിടിഎയും മന്ത്രിക്കും എംഎൽഎക്കും ജില്ലാ പഞ്ചായത്തിലും നിവേദനങ്ങൾ നൽകി. ജില്ലാ പഞ്ചായത്ത് സ്ഥിരം സമിതി അധ്യക്ഷ ആശാ സനിൽ, ഉല്ലാസ് തോമസ്, ശാരദ മോഹൻ, സ്മിത എൽദോസ്, സി.ടി. ശശി, സിബി ജോർജ്, ലളിതാ വിജയൻ, കുഞ്ഞുമോൻ ഫിലിപ്പ്, സന്ധ്യമോൾ പ്രകാശ്, എം.എം. ജോർജ്, സാജു ജോണ്‍, അനിത ബേബി, രമ എം. കൈമൾ, സി.വി ജോയ്, ആലീസ് ബിനു, കെ.കെ. രാജ്കുമാർ, എം.സി. അജി, സുബിൻ പോൾ, സജീവ് പുരുഷോത്തമൻ, നൈജ സി. നായർ, സി.കെ. ഷക്കീർ, റോണി മാത്യു, ബബിത പ്രഭ, ടി.എ രാജൻ, ബിനോയി കള്ളാട്ടുകുഴി, വി.കെ. തങ്കമണി, അനുഗ്രഹ ബിനു തുടങ്ങിയവർ പ്രസംഗിച്ചു.

അപകടകരമായ ഷീറ്റുകൾ ഉടൻ പൊളിക്കണമെന്ന് മന്ത്രി

തിരുമാറാടി: തിരുമാറാടി ഗവ. വൊക്കേഷണൽ ഹയർ സെക്കൻഡറി സ്കൂളിൽ അപകടകരമായി സ്ഥിതി ചെയ്യുന്ന ഷീറ്റുകൾ അടിയന്തരമായി പൊളിച്ചു നീക്കണമെന്ന് മന്ത്രി വി. ശിവൻകുട്ടി. ഷീറ്റ് പൊളിച്ചു നീക്കാത്തതിനെ തുടർന്നുണ്ടാവുന്ന അപകടങ്ങൾക്ക് പ്രധാനാധ്യാപകൻ, വൊക്കേഷൻ ഹയർ സെക്കൻഡറി പ്രിൻസിപ്പൽ, എഇഒ, ഡിഇഒ തുടങ്ങിയവർ മറുപടി പറയേണ്ട വരുമെന്നും മന്ത്രി സൂചിപ്പിച്ചു. സ്കൂളുകളിൽ കാര്യക്ഷമമല്ലാത്ത പിടിഎ പിരിച്ചുവിടണമെന്നും അദ്ദേഹം പറഞ്ഞു. സ്കൂൾ കെട്ടിടത്തിന്‍റെ ഷീറ്റ് പുനസ്ഥാപിക്കുന്നതിനായി ജില്ലാ പഞ്ചായത്തിൽനിന്നു 10 ലക്ഷം അനുവദിച്ചതായി ജില്ലാ പഞ്ചായത്ത് സ്ഥിരംസമിതി അധ്യക്ഷ ആശാ സനിൽ അറിയിച്ചു. സ്കൂളിന്‍റെ മുൻവശത്ത് ഓപ്പണ്‍ സ്റ്റേജിനോട് അനുബന്ധമായി സജ്ജീകരിച്ചിരിക്കുന്ന മേൽക്കൂരയുടെ ഷീറ്റുകളാണ് അപകടാവസ്ഥയിൽ തുടരുന്നത്. കഴിഞ്ഞ മഴയിൽ മേൽക്കൂര തകർന്നു വീണിരുന്നു. തുടർന്ന് പുനർ നിർമിച്ച ഭാഗത്താണ് ഷീറ്റുകൾക്ക് കേടുപാടുകൾ ഉള്ളതായി കണ്ടെത്തിയത്.

പുത്തൻകുരിശ് പള്ളി സെമിത്തേരിയിൽ അതിക്രമിച്ചു കടന്നതിൽ പ്രതിഷേധം

കോലഞ്ചേരി: സെന്‍റ് പീറ്റേഴ്‌സ് ആൻഡ് സെന്‍റ് പോൾസ് ഓർത്തഡോക്സ് സുറിയാനി പള്ളിയിലും സെമിത്തേരിയിലും സാമൂഹ്യ വിരുദ്ധർ രാത്രിയുടെ മറവിൽ മാരകായുധങ്ങളുമായി അതിക്രമിച്ചു കടന്നു നാശനഷ്ടങ്ങൾ വരുത്താൻ ശ്രമിച്ചതിൽ പ്രതിഷേധം രേഖപ്പെടുത്തി. കർക്കടകം 15 പെരുന്നാളിനോട് അനുബന്ധിച്ചു പള്ളിയിൽ നിലനിൽക്കുന്ന സമാധാന അന്തരീക്ഷം തകർക്കുന്നതിനും മനപൂർവ്വം സംഘർഷം സൃഷ്ടിക്കുന്നതിനും മതസ്പർദ്ധ ഉണ്ടാക്കി നാട്ടിൽ കലാപം സൃഷ്ടിക്കുവാനുള്ള ഗൂഢശ്രമമാണിതെന്നും വികാരി ഫാ. ജിത്തു മാത്യു അറിയിച്ചു. കുറ്റക്കാർക്കെതിരെ നടപടികൾ സ്വീകരിക്കണമെന്ന് യോഗം പോലീസിനോട് ആവശ്യപ്പെട്ടു. പ്രതിഷേധ യോഗം ഫാ. ജോസ് തോമസ് പൂവത്തുങ്കൽ ഉദ്ഘാടനം ചെയ്തു. ഗ്ലാഡ്സൻ ചാക്കോ കുഴിവേലിൽ, മാർട്ടിൻ കണ്ണേത്ത്, ചെറിയാൻ വർഗീസ്, ജിമ്മി മൊതാൽ, ജെയ്സൺ പീറ്റർ, പേൾ കണ്ണേത്ത് എന്നിവർ പ്രസംഗിച്ചു.

ബൈക്കുകൾ കൂട്ടിയിടിച്ച് മൂന്നു പേർക്ക് പരിക്ക്

പിറവം: കക്കാട് റോഡിൽ ജെഎംപി മെഡിക്കൽ സെന്‍ററിന് മുന്നിൽ ബൈക്കുകൾ നേർക്കുനേർ കൂട്ടിയിടിച്ച് മൂന്നു പേർക്ക് പരിക്കേറ്റു. കക്കാട് വെട്ടുപാറയ്ക്കൽ സുബ്രഹ്മണ്യൻ ആചാരി (55), നെച്ചൂർ അല്ലൂർപറമ്പിൽ വിഷ്ണു വിജയൻ (23), നെച്ചൂർ പെരുമ്പള്ളിൽ ശ്രീക്കുട്ടൻ (24) എന്നിവർക്കാണ് പരിക്കേറ്റത്. രാത്രി 7.30ഓടെയാണ് അപകടമുണ്ടായത്. ഉടനെതന്നെ തൊട്ടുടുത്തുള്ള സ്വകാര്യ ആശുപത്രിയിലേക്ക് മാറ്റിയിരുന്നു. സുബ്രഹ്മണ്യൻ ആചാരിക്ക് തലയ്ക്ക് ഗുരുതരമായ പരിക്കേറ്റതിനാൽ കളമശേരി മെഡിക്കൽ കോളജിൽ പ്രവേശിപ്പിച്ചു. കണ്ണിന് പരിക്കേറ്റ ശ്രീക്കുട്ടനെ കൊച്ചിയിലെ സ്വകാര്യ ആശുപത്രിയിലേക്ക് മാറ്റി. ശ്രീക്കുട്ടനൊപ്പം ബൈക്കിലുണ്ടായിരുന്ന വിഷ്ണുവിന് കാര്യമായ പരിക്കൊന്നും പറ്റിയിട്ടില്ല. പിറവം മാർക്കറ്റിൽ കച്ചവടം നടത്തുന്ന സുബ്രഹ്മണ്യൻ വീട്ടിലേക്ക് പോകുംവഴി എതിരെ പിറവത്തിന് വരുകയായിരുന്ന യുവാക്കളുടെ ബൈക്കുമായി കൂട്ടിയിടിക്കുകയായിരുന്നു.

ഭൂരഹിതർക്ക് ഭൂമി: കാമ്പയിൻ ആരംഭിച്ചു

പിറവം: നഗരസഭയിൽ ഭൂരഹിതർക്ക് സ്വന്തമായി വീട് നിർമിച്ച് നൽകുന്നതിനായി മൂന്നു സെന്‍റ് ഭൂമി വീതം കണ്ടെത്തുന്നതിനുള്ള പദ്ധതിയായ "മനസോടിത്തിരി മണ്ണ്’ കാമ്പയിൻ ആരംഭിച്ചു. 153 ഉപയോക്താക്കൾക്ക് സ്വന്തമായി ഭവനം നിർമിക്കുന്നതിനായി കുറഞ്ഞത് മൂന്നു സെന്‍റ് ഭൂമി എങ്കിലും ദാനം ചെയ്യുന്നതിന് സന്മനസുള്ള വ്യക്തികളെയോ സ്ഥാപനങ്ങളെയോ കണ്ടെത്താനാണ് നഗരസഭാ തലത്തിൽ കാമ്പയിന് തുടക്കമായിരിക്കുന്നത്. നഗരസഭ ചെയർപേഴ്സൺ ജൂലി സാബു പദ്ധതിയുടെ ഉദ്ഘാടനം നിർവഹിച്ചു. ഡെപ്യൂട്ടി ചെയർമാൻ കെ.പി. സലിം അധ്യക്ഷത വഹിച്ചു. ചടങ്ങിൽ സണ്ണി ഓണശേരിൽ അദ്ദേഹത്തിന്‍റെ ആറ് സെന്‍റ് സ്ഥലം നഗരസഭയിൽ ഭൂഭവന രഹിതകർക്കായി സൗജന്യമായി നൽകുന്നതിന് ആവശ്യമായ രേഖകൾ കൈമാറി. കൂടാതെ നിരവധി പേർ ഭൂമി കൊടുക്കുന്നതിനായി സന്നദ്ധരായിട്ടുണ്ടെന്നും ഭൂമി കൈമാറാൻ താൽപ്പര്യമുള്ളവർ നഗരസഭയുമായി ബന്ധപ്പെടണമെന്നും ചെയർപേഴ്സൺ അറിയിച്ചു.

റോഡിലെ കുഴിയിൽ വാഴനട്ട് പ്രതിഷേധിച്ചു

മൂവാറ്റുപുഴ: എംസി റോഡിൽ വെള്ളൂർക്കുന്നം ഭാഗത്ത് രൂപപ്പെട്ടിരിക്കുന്ന അപകടകരമായ കുഴികൾ എത്രയും വേഗം അടച്ച് സഞ്ചാരയോഗ്യമാക്കണമെന്നാവശ്യപ്പെട്ട് ബിജെപി മൂവാറ്റുപുഴ മുനിസിപ്പൽ സമിതിയുടെ നേതൃത്വത്തിൽ റോഡിലെ കുഴിയിൽ വാഴനട്ട് പ്രതിഷേധിച്ചു. ബിജെപി മുനിസിപ്പൽ സമിതി പ്രസിഡന്‍റ് അജി കുന്നേലിന്‍റെ നേതൃത്വത്തിൽ നടന്ന പ്രതിഷേധ സമരത്തിൽ മണ്ഡലം വൈസ് പ്രസിഡന്‍റ് ബി. രമേശ്, ജനറൽ സെക്രട്ടറി രമേശ് നാരായണൻ, ജബാർ, അനൂപ് ശിവരാമൻ, നാരായണൻ, കൃഷ്ണൻകുട്ടി, ജി. ഹരീഷ്, രമണൻ, ചിയാൻ ശ്രീനാഥ് തുടങ്ങിയവർ പങ്കെടുത്തു.

അക്കാദമിക വർഷത്തിന് തുടക്കമായി

മൂവാറ്റുപുഴ: നിർമല സിവിൽ സർവീസ് അക്കാദമിയുടെ 2025-26 അക്കാദമിക വർഷത്തിന് തുടക്കമായി. നിർമല കോളജ് ഓഡിറ്റോറിയത്തിൽ നടന്ന പരിപാടി കോട്ടയം ജില്ലാ പോലീസ് മേധാവിയും കോളജ് പൂർവ വിദ്യാർഥിയുമായ ഷാഹുൽ ഹമീദ് ഉദ്ഘാടനം ചെയ്തു. സിവിൽ സർവീസ് സ്വപ്നം കാണുന്ന വിദ്യാർഥികൾ കഠിനാധ്വാനത്തിലൂടെ തിവ്രപരിശ്രമം നടത്തി ആഗ്രഹം നേടിയെടുക്കണമെന്ന് ഷാഹുൽ ഹമീദ് പറഞ്ഞു. സ്കൂൾ വിദ്യാർഥികൾക്കായുള്ള കിഡ്സ്, ഫണ്ടമെന്‍റൽസ്, കോളജ് വിദ്യാർഥികൾക്കായി ഫൗണ്ടേഷൻ, റെഗുലർ എന്നീ ബാച്ചുകളുടെ ക്ലാസുകൾക്കാണ് തുടക്കമിട്ടത്. കോതമംഗലം രൂപതാധ്യക്ഷൻ മാർ ജോർജ് മഠത്തിക്കണ്ടത്തിൽ ചടങ്ങിൽ അനുഗ്രഹ പ്രഭാഷണം നടത്തി. കോതമംഗലം രൂപത വികാരി ജനറാളും കോളജ് മാനേജറുമായ മോണ്‍. പയസ് മലേക്കണ്ടത്തിൽ അധ്യക്ഷത വഹിച്ചു. കോളജ് പ്രിൻസിപ്പൽ റവ.ഡോ. ജസ്റ്റിൻ കെ. കുര്യാക്കോസ്, കോളജ് ഓട്ടോണോമസ് ഡയറക്ടർ കെ.വി തോമസ്, സിവിൽ സർവീസ് അക്കാദമി അഡ്മിനിസ്ട്രേറ്ററും കോളജ് ബർസാറുമായ ഫാ. പോൾ കളത്തൂർ, റവ.ഡോ. സ്റ്റാൻലി പുൽപ്രയിൽ, ജി.ആർ. ശ്രീജ, ഹനാ ഫാത്തിമ, ജോർജിൻ ബോബൻ എന്നിവർ പ്രസംഗിച്ചു. തുടർന്ന് വിദ്യാർഥികളുടെ കലാപരിപാടികളും പഠനം പൂർത്തിയാക്കിയ വിദ്യാർഥികൾക്കുള്ള സർട്ടിഫിക്കറ്റ് വിതരണവും നടത്തി.

അരീക്കൽ ഫെസ്റ്റ്: യുഡിഎഫ് അംഗങ്ങൾ നേർക്കുനേർ

പിറവം: പാമ്പാക്കുടയിൽ കഴിഞ്ഞ വർഷം നടന്ന അരീക്കൽ ഫെസ്റ്റ് നടത്തിപ്പുമായി ബന്ധപ്പെട്ട് പഞ്ചായത്ത് കമ്മിറ്റിയിൽ അഴിമതി ആരോപങ്ങളുയർന്നു. ജില്ലയിലെ പ്രമുഖ ടൂറിസ്റ്റു കേന്ദ്രമായ അരീക്കൽ വെള്ളച്ചാട്ടവുമായി ബന്ധപ്പെട്ടാണ് ഫെസ്റ്റ് നടത്തിയത്. പാമ്പാക്കുട പഞ്ചായത്തിലെ യുഡിഎഫ് ഭരണ സമിതിയുടെ നേതൃത്വത്തിലാണ് ഫെസ്റ്റ് സംഘടിപ്പിച്ചത്. ഈ വർഷവും ഫെസ്റ്റ് സംഘടിപ്പിക്കുന്നതിനായി കമ്മിറ്റിയിൽ പ്രത്യേക അജണ്ടയായി വിളിച്ചു ചേർത്ത ആലോചന യോഗത്തിലാണ് യുഡിഎഫ് അംഗങ്ങൾ ചേരിതിരിഞ്ഞ് പണപ്പിരിവിന്‍റെ പേരിൽ ബഹളമുണ്ടാക്കിയത്. ഇതോടെ യുഡിഎഫ് ഭരണസമിതിയിൽ വീണ്ടും തമ്മിലടി രൂക്ഷമായിരിക്കുകയാണ്. ഇന്നലെ ചേർന്ന കമ്മിറ്റിയിൽ എൽഡിഎഫ് അംഗം ബേബി കെ. ജോസഫ് അരീക്കൽ ഫെസ്റ്റ് നടത്തിപ്പിലെ പണപ്പിരിവ് സുതാര്യമായിരിക്കണമെന്ന നിർദ്ദേശം വച്ചു. ആറ് ലക്ഷം രൂപ പഞ്ചായത്ത് ഫണ്ടും ഒരു ലക്ഷം രൂപ സ്വകാര്യ കോളജും ഫെസ്റ്റിനായി നൽകും. വേറെ തുക വേണമെങ്കിൽ കമ്മിറ്റി അറിഞ്ഞ് പിരിക്കണമെന്നാണ് എൽഡിഎഫ് നിർദ്ദേശം വച്ചത്. കഴിഞ്ഞവർഷം നടന്ന ഫെസ്റ്റിലെ അഴിമതിയും ഓഡിറ്റ് പ്രശ്നങ്ങളും ചൂണ്ടിക്കാട്ടി. ജേക്കബ് വിഭാഗത്തിലെ രണ്ടാം വാർഡ് അംഗം ഫിലിപ്പ് ഇരട്ടിയാനിക്കൽ ഈ നിർദ്ദേശം സ്വാഗതം ചെയ്തു. പഞ്ചായത്ത് പ്രസിഡന്‍റ് ശ്രീകാന്ത് നന്ദനും പണപ്പിരിവിനെ ന്യായീകരിച്ചതോടെ തർക്കം രൂക്ഷമായതായി പറയുന്നു. ഇതിനിടെ എൽഡിഎഫ് അംഗങ്ങൾ കമ്മിറ്റിയിൽനിന്ന് ഇറങ്ങിപ്പോയി. അൽപ്പനേരത്തിന് ശേഷം പിരിച്ചുവിടുകയും ചെയ്തു. ഓണത്തോടനുബന്ധിച്ച് അരീക്കൽ വെള്ളച്ചാട്ടം കേന്ദ്രീകരിച്ച് 10 ദിവസത്തെ ഫെസ്റ്റാണ് നടക്കുക. യുഡിഎഫിലെ ഏതാനും അംഗങ്ങൾ പിരിവിനുള്ള മാർഗമായാണ് ഫെസ്റ്റിനെ കാണുന്നതെന്ന് എൽഡിഎഫ് ആരോപിച്ചു.

കന്യാസ്ത്രീകളുടെ അറസ്റ്റിൽ പ്രതിഷേധം

‘ഛത്തീസ്ഗഡിൽ കന്യാസ്ത്രീകൾക്കു നേരെ നടന്നത് മതേതരത്വത്തിനേറ്റ മുറിവ്’ പുത്തൻകുരിശ്: ഛത്തീസ്ഗഡിൽ മതപരിവർത്തനവും മനുഷ്യക്കടത്തും ആരോപിച്ച് മലയാളികളായ കന്യാസ്ത്രീകൾക്കു നേരെ നടന്ന അതിക്രമം മതേതരത്വത്തിനേറ്റ മുറിവും മനുഷ്യാവകാശ നിഷേധവുമാണെന്ന് മീഡിയ സെൽ ചെയർമാൻ കുര്യാക്കോസ് മാർ തെയോഫിലോസ് മെത്രാപ്പോലീത്ത. മതേതരത്വത്തിനും മനുഷ്യാവകാശങ്ങള്‍ക്കും ജനാധിപത്യ മൂല്യങ്ങൾക്കും ലോകത്തിന് മാതൃകയായ ഭാരതത്തെ സംബന്ധിച്ചിടത്തോളം ഛത്തീസ്ഗഡിൽ നടന്ന മനുഷ്യത്വരഹിതമായ സംഭവം അങ്ങേയറ്റം ആശങ്കയുളവാക്കുന്നതും ഇന്ത്യൻ ഭരണഘടന നൽകുന്ന മത സ്വാതന്ത്ര്യത്തോടുള്ള വെല്ലുവിളിയുമാണെന്ന് അദ്ദേഹം പറഞ്ഞു. കേന്ദ്ര സർക്കാർ കർശന നടപടി സ്വീകരിക്കണം: കത്തോലിക്ക കോണ്‍ഗ്രസ് കോതമംഗലം: മതപരിവർത്തന നിരോധന നിയമത്തിന്‍റെ മറവിൽ ഛത്തീസ്ഗഡിൽ മലയാളി കന്യാസ്ത്രീകളെ അറസ്റ്റ് ചെയ്ത പോലീസ് നടപടി അത്യന്തം അപലപനീയമാണെന്ന് കത്തോലിക്കാ കോണ്‍ഗ്രസ് കോതമംഗലം രൂപത. കേരളം ഉൾപ്പെടെയുള്ള സംസ്ഥാനങ്ങളിൽ ക്രൈസ്തവ സ്നേഹം നടിക്കുകയും പ്രസംഗിക്കുകയും വടക്കേ ഇന്ത്യയിൽ ക്രൈസ്തവർക്ക് നേരെയുള്ള ആക്രമണങ്ങൾ വർദ്ധിക്കുകയും ചെയ്യുന്നത് അംഗീകരിക്കാനാവില്ല. ക്രൈസ്തവരെ അധിക്ഷേപിക്കുകയും ആക്രമിക്കുകയും ചെയ്യുന്ന സംഘടനകളെയും ഗ്രൂപ്പുകളെയും കടിഞ്ഞാണിട്ട് നിയന്ത്രിക്കുവാനുള്ള ആർജവം സർക്കാർ കാണിക്കണമെന്ന് കത്തോലിക്കാ കോണ്‍ഗ്രസ് ആവശ്യപ്പെട്ടു. ക്രൈസ്തവ മിഷനറിമാരെ ആക്രമിക്കുന്നതും അധിക്ഷേപിക്കുന്നതും അങ്ങേയറ്റം ദുഖകരമാണെന്നും ഇത്തരം നടപടികൾ ഉണ്ടാകാതിരിക്കുവാനുള്ള അടിയന്തര നടപടികൾ കേന്ദ്ര സർക്കാരിന്‍റെ ഭാഗത്തുനിന്നും ഉണ്ടാകണമെന്നും കത്തോലിക്ക കോണ്‍ഗ്രസ് കോതമംഗലം രൂപത പ്രസിഡന്‍റ് സണ്ണി കടൂത്താഴെ, രൂപതാ ഡയറക്ടർ ഫാ. മാനുവൽ പിച്ചളക്കാട്ട്, ജനറൽ സെക്രട്ടറി മത്തച്ചൻ കളപ്പുരയ്‌ക്കൽ എന്നിവർ ആവശ്യപ്പെട്ടു. ‘മതേതരത്വത്തെ തകർക്കുന്നതാണ് ഛത്തീസ്ഗഡിൽ നടന്നത്’ മൂവാറ്റുപുഴ: ഇന്ത്യൻ മതേതരത്വത്തെ തകർക്കുവാൻ നടത്തിയിട്ടുള്ള പ്രവർത്തികളിലൊന്നാണ് കഴിഞ്ഞ ദിവസം ഛത്തീസ്ഗഡ് റെയിൽവേ സ്റ്റേഷനിൽ നടന്നതെന്ന് കേരള കോണ്‍ഗ്രസ്-എം സംസ്ഥാന സെക്രട്ടറി ടോമി കെ. തോമസ്. കോടതികളെ പോലും നോക്കുകുത്തിയാക്കി ആൾക്കൂട്ട വിചാരണയാണ് നടന്നത്. റെയിൽവേ ഉദ്യോഗസ്ഥർ നടത്തിയത് നീതി നിഷേധമാണ്. കന്യാസ്ത്രീകളെപ്പറ്റി എന്തേലും ആക്ഷേപം തോന്നിയാൽ അക്കാര്യം അറിയിക്കേണ്ടത് തങ്ങളുടെ മേലാധികാരികളെയോ പോലീസ് അധികാരികളെയോ ആണെന്നിരിക്കെ വർഗീയ വാദികളെ വിളിച്ചറിയിച്ചു എന്നത് കേട്ടറിവല്ലാത്ത കാര്യമാണ്. ഇത് ജനാധിപത്യത്തിന്മേലുള്ള കടന്നു കയറ്റവും സഞ്ചാര സ്വാതന്ത്ര്യത്തെ തടയന്നതുമാണ്. വ്യക്തി സ്വാതന്ത്ര്യം ഹനിച്ച റെയിൽവേ ഉദ്യോഗസ്ഥർക്കെതിരെ ക്രിമിനൽ കേസെടുക്കണമെന്നും ടോമി കെ. തോമസ് ആവശ്യപ്പെട്ടു. മലങ്കര കാത്തലിക് അസോസിയേഷൻ മൂവാറ്റുപുഴ രൂപത സമിതി പ്രതിഷേധിച്ചു മൂവാറ്റുപുഴ: ഛത്തിസ്ഗഡിൽ മലയാളികളായ കന്യാസ്ത്രീകളെ അറസ്റ്റ് ചെയ്തതിൽ മലങ്കര കാത്തലിക് അസോസിയേഷൻ മൂവാറ്റുപുഴ രൂപത സമിതി പ്രതിഷേധിച്ചു. മതിയായ യാത്രരേഖകളും തിരിച്ചറിയൽ കാർഡുകളുമായി പ്രായപൂർത്തിയായ പെണ്‍കുട്ടികളുമായി ജോലി ആവശ്യത്തിന് യാത്ര ചെയ്യവെ അന്യായമായി അറസ്റ്റ് ചെയ്തത് മതേതര ഇന്ത്യക്ക് കളങ്കം ചാർത്തുന്നതും ന്യൂനപക്ഷ വിഭാഗത്തിന്‍റെ വ്യക്തി സ്വാതന്ത്ര്യത്തിനുമേലുള്ള കടന്നുകയറ്റവുമാണെന്ന് യോഗം വിലയിരുത്തി. കന്യാസ്ത്രീകളുടെ മോചനത്തിന് ഉടൻ നടപടികൾ കൈക്കൊണ്ടില്ലെങ്കിൽ ശക്തമായ പ്രതിഷേധ നടപടികളുമായി മുന്നോട്ട് പോകുമെന്ന് വൈദിക ഉപദേഷ്ടാവ് ഫാ. ജോർജ് മാങ്കുളം, പ്രസിഡന്‍റ് എൻ.ടി. ജേക്കബ്, ജനറൽ സെക്രട്ടറി സുഭാഷ് വെട്ടിക്കാട്ടിൽ, സി.ബി. ഷിബു, എബിഷ് കുരാപ്പിള്ളിൽ എന്നിവർ അറിയിച്ചു.

സിഡിഎസ് വാർഷികം

മൂവാറ്റുപുഴ: മാറാടി പഞ്ചായത്തിൽ കുടുംബശ്രീ സിഡിഎസ് വാർഷികം സംഘടിപ്പിച്ചു. വാർഷികാഘോഷത്തിന്‍റെ ഭാഗമായി ശിങ്കാരിമേളത്തിന്‍റെയും നിശ്ചല ദൃശ്യങ്ങളുടെയും കലാരൂപങ്ങളുടെയും അകന്പടിയോടെ ഈസ്റ്റ് മാറാടി പള്ളിക്കവലിൽനിന്ന് ആരംഭിച്ച വർണശബളമായ റാലി കെ. കരുണാകരൻ സ്മാരക മന്ദിരത്തിൽ സമാപിച്ചു. തുടർന്ന് നടന്ന പൊതുസമ്മേളനം മാത്യു കുഴൽനാടൻ എംഎൽഎ ഉദ്ഘാടനം ചെയ്തു. ടെലിവിഷൻ താരം വിദ്യാ ബാലചന്ദ്രൻ ചടങ്ങിൽ മുഖ്യാതിഥിയായിരുന്നു. മൂവാറ്റുപുഴ ബ്ലോക്ക് പഞ്ചായത്ത് പ്രസിഡന്‍റ് കെ.ജി. രാധാകൃഷ്ണൻ പ്രായം കൂടിയ അയൽക്കൂട്ടം, വയോജന അയൽക്കൂട്ടം അംഗങ്ങൾ, ജില്ലാ പഞ്ചായത്തംഗം ഷാന്‍റി ഏബ്രഹാം തുടങ്ങിയവരെ ആദരിച്ചു. മാറാടി പഞ്ചായത്ത് പ്രസിഡന്‍റ് ഒ.പി. ബേബി അധ്യക്ഷത വഹിച്ചു.

കാഷ് അവാർഡ് വിതരണം

ആരക്കുഴ: ആരക്കുഴ സഹകരണ ബാങ്കിന്‍റെ ആഭിമുഖ്യത്തിൽ എസ്എസ്എൽസി, പ്ലസ്ടു പരീക്ഷകളിൽ ഉന്നത വിജയം നേടിയ വിദ്യാർഥികൾക്ക് കാഷ് അവാർഡും പഠനോപകരണങ്ങളും വിതരണം ചെയ്തു. ആരക്കുഴ സെന്‍റ് മേരീസ് മേജർ ആർക്കി എപ്പിസ്കോപ്പൽ പള്ളി വികാരിയും സെന്‍റ് മേരീസ് സ്കൂൾ മാനേജരുമായ ഫാ. സെബാസ്റ്റ്യൻ കണിമറ്റത്തിൽ വിതരണോദ്ഘാടനം നിർവഹിച്ചു. ബാങ്ക് പ്രസിഡന്‍റ് ജോർജ് തോമസ് ചേറ്റൂർ അധ്യക്ഷത വഹിച്ചു. ഉന്നതവിജയം കരസ്ഥമാക്കിയ 32 കുട്ടികൾക്കാണ് പ്രശസ്തി പത്രവും കാഷ് അവാർഡും നൽകിയത്. ബാങ്കിന്‍റെ പ്രവർത്തന പരിധിയിലുള്ള 10 സ്കൂളുകളിലേക്കുള്ള പഠനോപകരണ വിതരണവും ചടങ്ങിൽ നടന്നു. ബാങ്ക് ഭരണ സമിതിയംഗങ്ങളായ ബെന്നി വർഗീസ്, റോയ് വള്ളമറ്റം, പി.കെ. ബാലകൃഷ്ണൻ, ചിന്നമ്മ ഷൈൻ, ഹരി ശ്രീക്കുട്ടൻ, ജിനിൽ മാത്യു, ജോസ് ഇമ്മാനുവൽ, അനൂപ് ശങ്കർ എന്നിവർ പ്രസംഗിച്ചു.

ഗ്രാന്‍റ് പേരന്‍റിനെ ആദരിച്ചു

കോതമംഗലം: ഗ്രാന്‍റ്പേരന്‍റിനെ ആദരിച്ച് ശോഭന ഇംഗ്ലീഷ് മീഡിയം സ്കൂൾ. പുതിയ തലമുറയ്ക്ക് മുതിർന്നവരോടുള്ള ആദരവും സ്നേഹവും വളർത്തേണ്ടതിന്‍റെ പ്രാധാന്യം വ്യക്തമാക്കുന്ന രീതിയിലാണ് പരിപാടികൾ സംഘടിപ്പിച്ചത്. സ്കൂൾ മാനേജർ സിസ്റ്റർ ലിൻസി അധ്യക്ഷത വഹിച്ചു. പ്രധാനാധ്യാപകൻ സിജി അഗസ്റ്റിൻ, മദർ സിസ്റ്റർ ജിസ്മിൻ, കിൻഡർ ഗാർട്ടൻ ഇൻ ചാർജ് സിസ്റ്റർ മെൽബി എന്നിവർ പ്രസംഗിച്ചു. ലക്കി പേരന്‍റ് നറുക്കെടുപ്പിൽ വിജയിയായ സാറാമ്മ വർഗീസിനെ സ്കൂൾ മാനേജർ സിസ്റ്റർ ലിൻസി പൊന്നാടയണിയിച്ച് ആദരിച്ചു.

വയോധികയെ മരിച്ചനിലയിൽ കണ്ടെത്തി

കാക്കനാട്: വാഴക്കാല മൂലേപ്പാടം റോഡിൽ വീടിനുള്ളിൽ വയോധികയെ മരിച്ചനിലയിൽ കണ്ടത്തി. വാഴക്കാല ആലിങ്ങപറന്പിൽ ഐഷാബീവി (82) ആണ് മരിച്ചത്. ഭർത്താവ്: പരേതനായ മുഹമ്മദ് ഷെരീഫ്. ഇവർക്ക് മക്കളില്ല. ഇവരുടെ കൂടെ താമസിച്ചിരുന്ന ഭർതൃസഹോദരി ഒരാഴ്ച്ചയായി അസുഖബാധിതയായി ആശുപത്രിയിലായതിനാൽ ഇവർ ഇവിടെ ഒറ്റയ്ക്കാണ് കഴിഞ്ഞിരുന്നത്. ഇന്നലെ രാവിലെ വാതിൽ തുറക്കാതായതിനെ തുടർന്ന് അയൽവാസികൾ വീടിന്‍റെ വാതിൽ തകർത്ത് അകത്ത് കയറി നടത്തിയ പരിശോധനയിലാണ് മൃതദേഹം കണ്ടത്. സന്ദർശകമുറിയിൽ നിസ്ക്കാരപായയിൽ കമിഴ്ന്നു കിടക്കുന്ന നിലയിലായിരുന്നു മൃതദേഹം. മുഖ പൊള്ളലിന്‍റെ പാടുകളും ശരീരത്തിൽ മുറിവുകളും കണ്ടതിനെ തുടർന്ന് ബന്ധുക്കൾ പോലീസിൽ വിവരം അറിയിച്ചു. അസ്വാഭാവിക മരണത്തിന് പോലീസ് കേസെടുത്തു. മൃതദേഹത്തിന് രണ്ട് ദിവസത്തെ പഴക്കമുണ്ടെന്ന് പോലീസ് പറഞ്ഞു. മൃതദേഹം കളമശേരി മെഡിക്കൽ കോളേജിലേക്ക് മാറ്റി. ഇന്നു പടമുഗൾ ജുമാ മസ്ജിദിൽ കബറടക്കും.

റേഡിയോ ശ്രീ : കുടുംബശ്രീ ഓണ്‍ലൈന്‍ റേഡിയോ പത്തുലക്ഷം ശ്രോതാക്കളിലേക്ക്

സീമ മോഹന്‍ലാല്‍ കൊച്ചി: കുടുംബശ്രീയുടെ ഏറെ പുതുമകളോടെയെത്തിയ ഓണ്‍ലൈന്‍ റേഡിയോ ‘റേഡിയോ ശ്രീ' ഇനി പത്തുലക്ഷം ശ്രോതാക്കളിലേക്കു കൂടി. ഇതിന്‍റെ പ്രാരംഭ നടപടികള്‍ ആരംഭിച്ചുകഴിഞ്ഞു. 2023ല്‍ പ്രവര്‍ത്തനം ആരംഭിച്ച റേഡിയോ ശ്രീ കഴിഞ്ഞ ജൂലൈ ഒന്നുമുതല്‍ സര്‍ക്കാര്‍ ഏജന്‍സിയായ മലയാളം മിഷന്‍റെ സാങ്കേതിക സഹകരണത്തോടെയാണ് പുന:പ്രക്ഷേപണം ആരംഭിച്ചത്. നിലവില്‍ റേഡിയോശ്രീക്ക് അഞ്ചു ലക്ഷം ശ്രോതാക്കളുണ്ട്. പത്തുലക്ഷം പേരിലേക്കു കൂടി എത്തിക്കുന്നതിന്‍റെ ഭാഗമായി ഏഴു ജില്ലകളിലെ സിഡിഎസ് ചെയര്‍പേഴ്‌സണ്‍മാരുടെ സംഗമം തിരുവല്ലയില്‍ കഴിഞ്ഞ ദിവസം നടന്നു. ഇവരുടെ നേതൃത്വത്തില്‍ പ്രദേശത്തെ കൂടുതല്‍ കുടുംബശ്രീ അംഗങ്ങളെക്കൊണ്ട് റേഡിയോ ശ്രീ ഓണ്‍ലൈന്‍ റേഡിയോ ഡൗണ്‍ലോഡ് ചെയ്യിപ്പിക്കും. വടക്കന്‍ മേഖലയിലെ ഏഴു ജില്ലകളിലെ ചെയര്‍പേഴ്‌സണ്‍മാരുടെ സംഗമം ഇന്ന് കോഴിക്കോടും നടക്കും. കുടുംബശ്രീയിലുള്ള 48 ലക്ഷം കുടുംബങ്ങളിലേക്കും ഭാവിയില്‍ റേഡിയോ ശ്രീ എത്തിക്കാനാണ് ലക്ഷ്യമിടുന്നത്. വിനോദവും വിജ്ഞാനവും സമന്വയിപ്പിച്ചുള്ള പരിപാടികളാണ് റേഡിയോ പ്രക്ഷേപണം ചെയ്യുന്നത്. രാവിലെ 7 മുതല്‍ ഒന്നു വരെ ഒരു മണിക്കൂര്‍ ദൈര്‍ഘ്യമുള്ള സിന്ദൂരച്ചെപ്പ്, കൂട്ടുകാരി, റേഡിയോ ശ്രീമതി, നാട്ടരങ്ങ്, റേഡിയോശ്രീ സാഹിത്യോത്സവം, ഓഡിയോ ബുക്ക് തുടങ്ങി ആറ് പ്രത്യേക പരിപാടികള്‍ തുടര്‍ച്ചയായി പ്രക്ഷേപണം ചെയ്യുന്നുണ്ട്. രണ്ട് മണിക്കൂര്‍ ഇടവിട്ട് അഞ്ച് മിനിറ്റ് വീതം കുടുംബശ്രീ വാര്‍ത്തകളുമുണ്ട്. ആറ് മണിക്കൂര്‍ വീതമുള്ള നാല് ഷെഡ്യൂളുകളിലായി 24 മണിക്കൂറും പ്രക്ഷേപണമുണ്ട്. സ്മാര്‍ട്ട് ഫോണ്‍ ഉപയോഗിക്കുന്ന ആര്‍ക്കും ആപ് സ്റ്റോര്‍, പ്ലേസ്റ്റോര്‍ വഴിയും ആന്‍ഡ്രോയ്ഡ് പ്ലേ സ്റ്റോര്‍, ഐഒഎസ് സ്റ്റോര്‍ അക്കൗണ്ട് വഴിയും റേഡിയോ കേള്‍ക്കാം. www.radioshree.co m എന്ന വെബ്‌സൈറ്റിലും റേഡിയോ ശ്രീ പ്രക്ഷേപണമുണ്ട്.

ബംഗാൾ സ്വദേശികളിൽനിന്ന് 13 കിലോ കഞ്ചാവ് പിടികൂടി

ആലുവ: ആലുവയിലും എടത്തലയിലുമായി 13 കിലോ കഞ്ചാവുമായി രണ്ടു ഇതര സംസ്ഥാന തൊഴിലാളികൾ പോലീസ് പിടിയിൽ. ആലുവ റെയിൽവേ സ്റ്റേഷനിൽ ഏഴു കിലോ കഞ്ചാവുമായി പശ്ചിമ ബംഗാൾ മുർഷിദാബാദ് സ്വദേശി സാഹിനുൽ ഇസ്ലാം (27), എടത്തലയിൽ ആറ് കിലോ കഞ്ചാവുമായി മുർഷിദാബാദ് സ്വദേശി അജ്റുൾ (22) എന്നിവരെയാണ് റൂറൽ ജില്ലാ ഡാൻസാഫും ആലുവ, എടത്തല പോലീസും ചേർന്ന് പിടികൂടിയത്. രണ്ടു പേരും ബംഗാളിൽ നിന്നാണ് കഞ്ചാവ് ട്രെയിൻ മാർഗം കടത്തിയത്. പ്രത്യേകം പായ്ക്ക് ചെയ്ത് ബാഗിൽ സൂക്ഷിച്ച നിലയിലായിരുന്നു. കഞ്ചാവ് ഇവിടെ കൊണ്ടുവന്ന് കൈമാറി തിരിച്ചു പോകാനായിരുന്നു പദ്ധതി. ഇവരിൽ നിന്ന് വാങ്ങുന്നവരെക്കുറിച്ചും അന്വേഷണമാരംഭിച്ചതായി പോലീസ് അറിയിച്ചു. ഡാൻസാഫ് ടീമിനെ കൂടാതെ നർക്കോട്ടിക്ക് സെൽ ഡിവൈഎസ്പി ജെ.ഉമേഷ് കുമാർ, ആലുവ ഡിവൈഎസ്പി ടി.ആർ. രാജേഷ്, ഇൻസ്പെക്ടർമാരായ വി.എം. കേഴ്സൻ, കെ. സെനോദ്, എസ്ഐമാരായ കെ.നന്ദകുമാർ, ബി.എം. ചിത്തുജി, എം.വി. അരുൺ ദേവ്, സിപിഒ മാരായ വി.എ. അഫ്സൽ, സിറാജുദീൻ, ഷിഹാബ്, വി.പി. ബൈജു, കെ.കെ. സജ്നാസ്, പി.കെ. ഹാരിസ്, ഇൻഷാദ പരീത് എന്നിവരാണ് കഞ്ചാവ് പിടികൂടിയ സംഘത്തിൽ സംഘത്തിലുണ്ടായിരുന്നത്.

ബേസ്ബോൾ: അസ്‌ലു ഫോർ എവർ ക്ലബ്‌ ചാന്പ്യൻമാർ

ഫോർട്ടുകൊച്ചി: ഫോർട്ടുകൊച്ചി പരേഡ് ഗ്രൗണ്ടിൽ നടന്ന പുരുഷ വിഭാഗം ജില്ലാ സീനിയർ ബേസ്ബോൾ ചാമ്പ്യൻഷിപ്പിൽ ആലുവ യുസി കോളജിനെ പരാജയപ്പെടുത്തി നിലവിലെ ചാമ്പ്യൻമാരായ ആലുവ അസ്‌ലു ഫോർ എവർ ക്ലബ്‌ കിരീടം നിലനിർത്തി. തിരുവാണിയൂർ സ്റ്റെല്ല മേരീസ്‌ കോൺവന്‍റ് ക്ലബിനാണ് മൂന്നാം സ്ഥാനം നേടി. സംസ്ഥാന ബേസ്ബോൾ അസോസിയേഷൻ വൈസ് പ്രസിഡന്‍റ് രഞ്ജിത്ത് രത്നാകരനാണ് ചാമ്പ്യൻഷിപ്പ് ഉദ്ഘാടനം ചെയ്തത്. ഫാത്തിമ സ്കൂൾ കായിക വിഭാഗം മേധാവി സിസ്റ്റർ മിനി വിജയികൾക്ക് സമ്മാനദാനം നിർവഹിച്ചു. സംസ്ഥാന പ്രസിഡന്‍റ് കെ.എം. ഷാഹുൽ ഹമീദ്, ജില്ലാ ബേസ്ബോൾ സെക്രട്ടറി അനീഷ് ജോസഫ് എന്നിവർ പ്രസംഗിച്ചു.

വിജിലൻസ് അന്വേഷണത്തിന് പുല്ലുവില : ആലുവ നഗരസഭയിൽ വീണ്ടും മുൻകൂർ അനുമതികൾ

ആലുവ: തദ്ദേശ സ്വയംഭരണ വകുപ്പ് വിജിലൻസ് അന്വേഷണം പ്രഖ്യാപിച്ചിട്ടും ആലുവ നഗരസഭയിൽ ധനവിനിയോഗത്തിന് മുൻകൂർ അനുമതി നൽകുന്നതായി പരാതി. ആറോളം മുൻ‌കൂർ അനുമതികൾ കഴിഞ്ഞ ദിവസം പ്രതിപക്ഷ എതിർപ്പിനെ മറികടന്ന് പാസാക്കിയതായാണ് ആരോപണം. ആലുവ നഗരസഭയിൽ 26 ലക്ഷം രൂപ വരെ നിയമം ലംഘിച്ച് അനുവദിക്കുന്നതായും പിന്നിട് കൗൺസിലിൽ പാസാക്കിയെടുക്കുന്നതുമായി ബിജെപിയാണ് പരാതിപ്പെട്ടത്. ഇതിനെ തുടർന്ന് തദ്ദേശ സ്വയംഭരണ വകുപ്പ് ജോയിന്‍റ് ഡയറക്ടറുടെ നിർദ്ദേശ പ്രകാരം വിജിലൻസ് ഓഫീസർ അന്വേഷണം നടത്തിതിയിരുന്നു. എന്നാൽ ജോയിന്‍റ് ഡയറക്ടറുടെ കർശന നിർദേശങ്ങൾക്ക് പുല്ലു വില നൽകി വീണ്ടും മുൻകൂർ അനുമതി നൽകുന്നതായാണ് പരാതി. നിയമ ലംഘനങ്ങൾ ചൂണ്ടികാണിക്കേണ്ട സെക്രട്ടറിയുടെ ഭാഗത്തുനിന്നും നിരുത്തരവാദപരമായ സമീപനമാണ് ഉണ്ടാവുന്നതെന്നും തുടർ പരാതികൾ നൽകുമെന്നും കൗൺസിലർ എൻ. ശ്രീകാന്ത് പറഞ്ഞു.

വനിതാ പോലീസ് 16 ലക്ഷം തട്ടിയ കേസ്: സംസ്ഥാന വ്യാപക പരിശോധനയ്ക്ക് സാധ്യത

കൊച്ചി: ട്രാഫിക് പെറ്റി കേസുകളില്‍ ഈടാക്കിയ പിഴത്തുകയില്‍ വനിത സീനിയര്‍ സിവില്‍ പോലീസ് ഓഫീസര്‍ 16 ലക്ഷത്തിലധികം രൂപയുടെ ക്രമക്കേട് നടത്തിയ സംഭവത്തില്‍ പോലീസ് സേനയ്ക്കുള്ളില്‍ സംസ്ഥാന വ്യാപക പരിശോധന വന്നേക്കും. സമാന രീതിയിലുള്ള തിരിമറികള്‍ മറ്റ് സ്ഥലങ്ങളിലും നടന്നിട്ടുണ്ടോയെന്ന സംശയത്തിന്‍റെ പശ്ചാത്തലത്തിലാണിത്. മറ്റ് സ്ഥലങ്ങളിലും തിരിമറി നടന്നിട്ടുണ്ടാകാമെന്ന വിലയിരുത്തലിലാണ് ആലുവ റൂറല്‍ പോലീസിലെ ഓഡിറ്റ് വിഭാഗം. വിവരം സംസ്ഥാന പോലീസ് മേധാവിയെ രേഖാമൂലം അറിയിക്കുന്നതോടെ സംസ്ഥാനതല പരിശോധനയ്ക്ക് സാധ്യതയേറും. 2022ലാണ് ഇ-ചെല്ലാനിലൂടെ പിഴയൊടുക്കാനുള്ള സൗകര്യം പോലീസ് സേനയില്‍ നിലവില്‍ വന്നത്. ഇതിന് മുമ്പ് ട്രാഫിക് കേസുകളില്‍ ഉദ്യോഗസ്ഥര്‍ പിഴയായി ഈടാക്കുന്ന തുക അതത് ദിവസം റൈറ്ററെ ഏല്‍പ്പിക്കുകയാണ് ചെയ്തിരുന്നത്. 2018 ജനുവരി ഒന്ന് മുതല്‍ 2022 ഡിസംബര്‍ 31 വരെ ട്രാഫിക് പോലീസ് പിഴയടപ്പിച്ച് പിരിച്ചെടുത്ത തുക മുഴുവന്‍ ബാങ്കിലടയ്ക്കാതെ രേഖകളില്‍ കൃത്രിമംകാട്ടി തട്ടിപ്പ് നടത്തിയ കേസിൽ മൂവാറ്റുപുഴ ട്രാഫിക് പോലീസ് സ്റ്റേഷനില്‍ റൈറ്ററായിരുന്ന ശാന്തി കൃഷ്ണയ്‌ക്കെതിരെയാണ് നടപടി സ്വീകരിച്ചത്. 16,76,650 രൂപയുടെ ക്രമക്കേടാണ് ഇവർ നടത്തിയത്. മൂവാറ്റുപുഴ ട്രാഫിക് സ്റ്റേഷനിലെ 2018 ജനുവരി ഒന്ന് മുതല്‍ 2022 ഡിസംബര്‍ 31 വരെയുള്ള ഇടപാടുകളാണ് ഓഡിറ്റ് വിഭാഗം പരിശോധിച്ചത്. രസീതിലെ പൊരുത്തക്കേടുകളാണ് ബാങ്ക് സ്റ്റേറ്റ്‌മെന്‍റ് എടുത്തുള്ള പരിശോധനയിലേക്ക് നയിച്ചത്. രസീതിലെ കൂട്ടിച്ചേര്‍ക്കലുകളിലെ തെളിവ് ഉറപ്പിക്കുന്നതിന്‍റെ ഭാഗമായി പ്രത്യേക അന്വേഷണ സംഘം ശാന്തി കൃഷ്ണയുടെ കൈയക്ഷരവും ഒപ്പും പരിശോധിക്കാന്‍ ഒരുങ്ങുകയാണ്. തിരിമറിയിലൂടെ കൈക്കലാക്കിയ പണം ഇവര്‍ പല ആവശ്യങ്ങള്‍ക്കായി വിനിയോഗിച്ചതായാണ് കണ്ടെത്തല്‍.

കിഴക്കമ്പലം പഞ്ചായത്ത് പ്രസിഡന്‍റിനും മെമ്പർക്കും മർദനം

കിഴക്കമ്പലം : ട്വന്‍റി 20 ഭരിക്കുന്ന കിഴക്കമ്പലം ഗ്രാമപഞ്ചായത്തിലെ മനുഷ്യച്ചങ്ങലയിൽ പങ്കെടുത്ത് മടങ്ങാനൊരുങ്ങവെ, പഞ്ചായത്ത് പ്രസിഡന്‍റിനും മെബർക്കും നേരേ ആക്രമണം. പ്രസിഡന്‍റ് മിനി രതീഷ്, 11 ാം വാർഡ് മെമ്പർ അമ്പിളി വിജിൽ, അന്പിളിയുടെ ഭർത്താവ് വിജിൽ എന്നിവരെ പഴങ്ങനാട് സമരിറ്റൻ ആശുപത്രിയിൽ പ്രവേശിപ്പിച്ചു. മനുഷ്യച്ചങ്ങലയിൽ പങ്കെടുത്തശേഷം കോളനിഭാഗത്തുവച്ച് ഒരു കൂട്ടം ആളുകൾ വലിയ കല്ലുകളുമായി റോഡിലെ കുഴികൾ മൂടുന്നത് ശ്രദ്ധയിൽപ്പെട്ടത് ചോദ്യം ചെയ്തപ്പോഴാണ് തങ്ങൾക്കു നേരെ അസഭ്യവർഷവും ആക്രമണവും ഉണ്ടായതെന്ന് ഇവർ മാധ്യമങ്ങളോട് പറഞ്ഞു. ചികിത്സയിൽ കഴിയുന്ന ഇവരുടെ മൊഴി പോലീസ് രാത്രി രേഖപ്പെടുത്തി. പട്ടിമറ്റം പോലീസ് പരിധിയിലാണ് സംഭവം. സംഘർഷാവസ്ഥ ഒഴിവാക്കാൻ തടിയിട്ടപറമ്പ് പോലീസ് ആശുപത്രിയിൽ ക്യാമ്പ് ചെയ്യുന്നുണ്ട്. പട്ടികജാതി, പട്ടിക വിഭാഗത്തിൽപ്പെട്ട പഞ്ചായത്ത് പ്രസിഡന്‍റായ തന്നെ ജാതി അധിക്ഷേപം നടത്തി മർദിക്കുകയായിരുന്നുവെന്ന് മിനി രതീഷ് മാധ്യമങ്ങളോട് പറഞ്ഞു. ആക്രമിച്ചവരെ കണ്ടാൽ തിരിച്ചറിയുമെന്നും അവർ പറഞ്ഞു.

പെട്രോൾ പമ്പിലേക്ക് കാർ ഇടിച്ചുകയറി

അരൂർ: അരൂർ പെട്രോൾ പമ്പിൽ നിയന്ത്രണം തെറ്റിയ കാർ ഇടിച്ചുകയറി രണ്ടു ജീവനക്കാർക്കും കാർ ഡ്രൈവർക്കും പരിക്ക്. പെട്രോൾ ബൂത്ത് പൂർണമായും തകർന്നു. ഇന്നലെ വൈകുന്നേരം നാലിനായിരുന്നു സംഭവം. ജീവനക്കാരായ തൈക്കാട്ടുശേരി സ്വദേശിനി നൈസി (40 ) നേപ്പാൾ സ്വദേശി ദുർഗഗിരി ( 42 )എന്നിവർക്കും കാർ ഡ്രൈവർക്കുമാണ് പരിക്കേറ്റത്. നൈസി‌യുടെ തലയ്ക്കും ദുർഗഗിരിയുടെ വാരിയെല്ലിനും പൊട്ടലുണ്ട്. ഇവരെ വിവിഎസ് ലേക്‌ഷോർ ആശുപത്രിയിലും നിസാര പരിക്കേറ്റ കാർ ഡ്രൈവറെ എറണാകുളം ലിസി ആശുപത്രിയിലും പ്രവേശിപ്പിച്ചു.

പെരുമഴ : മലയോരമേഖലയില്‍ പെയ്തത് 100 മില്ലിമീറ്റര്‍

കൊച്ചി: ഒരു പകല്‍ മുഴുവന്‍ മഴ കവര്‍ന്ന ശനിയാഴ്ച ജില്ലയില്‍ പെയ്തത് ശക്തമായ മഴ. 65 മില്ലിമീറ്റര്‍ മുതല്‍ 115 മില്ലിമീറ്റര്‍ വരെ ലഭിക്കുന്ന മഴയാണ് ശക്തമായ മഴയായി കണക്കാക്കുന്നത്. മലയോര മേഖലയിലും അതിര്‍ത്തി മേഖലകളിലും പെയ്തത് 100 മില്ലിമീറ്ററിനും മുകളിലാണ്. കൊച്ചി നഗരത്തില്‍ കടവന്ത്രയിലാണ് ഏറ്റവും കൂടുതല്‍ മഴ രേഖപ്പെടുത്തിയത്. മലയോര മേഖലയില്‍ ഭൂതത്താന്‍കെട്ട് പ്രദേശത്ത് 100 മില്ലിമീറ്ററാണ് ലഭിച്ച മഴ. നേര്യമംഗലത്ത് 94 മില്ലിമീറ്ററും കീരമ്പാറയില്‍ 84 മില്ലിമീറ്ററും മഴ ലഭിച്ചു. ഇടമലയാര്‍ മേഖലയില്‍ 80 മില്ലിമീറ്ററായിരുന്നു മഴ. ജില്ലയില്‍ ഏറ്റവും കൂടുതല്‍ മഴ പെയ്തത് അതിര്‍ത്തി മേഖലയായ മുനയ്ക്കലാണ്. 103 മില്ലിമീറ്റര്‍ മഴയാണ് ഇവിടെ പെയ്തത്. തൃശൂര്‍ ജില്ലയില്‍പ്പെടുന്ന മേഖലയാണെങ്കിലും ജില്ലയോടു ചേര്‍ന്നുള്ള അതിര്‍ത്തി പ്രദേശങ്ങളും ഇതിന്‍റെ പരിധിയില്‍ വരും. കൊച്ചി നഗരത്തില്‍ 50 മില്ലിമീറ്റർ മുതല്‍ 75 മില്ലിമീറ്റർ വരെയാണ് മഴ പെയ്തത്. കാലാവസ്ഥാ വകുപ്പില്‍ നിന്നുള്ള കണക്കുകള്‍ പ്രകാരം കടവന്ത്രയാണ് നഗരത്തിലെ കൂടുതല്‍ മഴപെയ്ത മേഖല. 75 മില്ലിമീറ്റര്‍ മഴയാണ് ശനിയാഴ്ച ഉച്ചയ്ക്ക് മാത്രം ഇവിടെ ലഭിച്ചത്. ആലുവ മേഖലയില്‍ 60 മില്ലിമീറ്ററും മഴയുണ്ടായി. എന്നാല്‍ കളമശേരിയില്‍ കൂടുതല്‍ മഴ ലഭിച്ചെങ്കിലും കാലാവസ്ഥാ വകുപ്പിന്‍റെ മഴമാപിനി പ്രവര്‍ത്തനക്ഷമമല്ലാത്തതിനാല്‍ ഇവിടെ മഴയുടെ അളവ് രേഖപ്പെടുത്താനായിട്ടില്ല.

കെഎസ്ആര്‍ടിസി കൊറിയര്‍ സര്‍വീസ് : വരുമാനത്തില്‍ വൈറ്റില മുന്നില്‍

പ്രതിദിനം 30,000 മുതല്‍ 40,000 രൂപ വരെ കൊച്ചി: സംസ്ഥാനത്ത് കൊറിയര്‍ സര്‍വീസിലൂടെ കെഎസ്ആര്‍ടിസി ഏറ്റവും അധികം വരുമാനം നേടുന്നത് എറണാകുളം വൈറ്റില ഡിപ്പോയില്‍ നിന്ന്. പ്രതിദിനം 30,000 മുതല്‍ 40,000 രൂപ വരെയാണ് കൊറിയര്‍ സര്‍വീസിലൂടെ വൈറ്റില ഡിപ്പോ സമ്പാദിക്കുന്നത്. സ്വകാര്യ കൊറിയര്‍ സര്‍വീസ് സ്ഥാപനങ്ങളേക്കാള്‍ നിരക്ക് കുറവാണെന്നതാണ് കെഎസ്ആര്‍ടിസിയുടെ കൊറിയര്‍ സര്‍വീസിന് പിന്തുണയേറാന്‍ കാരണം. രണ്ടു വര്‍ഷം മുമ്പ് തുടങ്ങിയ പദ്ധതിയുടെ സേവനം ഇപ്പോള്‍ 24 മണിക്കൂറും ലഭ്യമാണ്. പരമാവധി 30 കിലോ വരെയുള്ള സാധനങ്ങളാണ് നിലവില്‍ എടുക്കുക. 30 ആയാല്‍ 15 കിലോയുടെ രണ്ട് കൊറിയറാക്കണം. പൊട്ടിപ്പോകുന്നതുള്‍പ്പെടെ, കൈകാര്യം ചെയ്യാന്‍ ബുദ്ധിമുട്ടുള്ള വസ്തുക്കള്‍ സ്വീകരിക്കില്ല. നിലവില്‍ 200 കിലോമീറ്റര്‍ വരെയും 200 മുതല്‍ 400 കിലോ മീറ്റര്‍ വരെയും 400 കിലോ മീറ്ററിന് മുകളില്‍ എന്നിങ്ങനെ മൂന്ന് തരത്തില്‍ ദൂരം ക്രമീകരിച്ചാണ് പണം ഈടാക്കി വരുന്നത്. 16 മണിക്കൂറിനുള്ളില്‍ സാധനങ്ങള്‍ ഉത്തരവാദിത്വത്തോടെ എത്തിച്ചുകൊടുക്കുമെന്നതാണ് കൊറിയര്‍ ആന്‍ഡ് ലോജിസ്റ്റിക്‌സ് സര്‍വീസിന്‍റെ പ്രത്യേകത. കെഎസ്ആര്‍ടിസിയുടെ ഡിപ്പോകളിലേക്ക് മാത്രമാണ് കൊറിയര്‍ സര്‍വീസ്. നിലവില്‍ 53 ഡിപ്പോകളെ ബന്ധിപ്പിച്ച് സര്‍വീസുണ്ട്. അയയ്ക്കാനുള്ള സാധനങ്ങള്‍ പായ്ക്ക്‌ ചെയ്ത് എത്തിക്കണം. അയയ്ക്കുന്ന ആളിനും സ്വീകരിക്കുന്ന ആളിനും വിവരങ്ങള്‍ സന്ദേശമായി ലഭിക്കും. സ്വീകരിക്കുന്നയാള്‍ ഡിപ്പോയില്‍ നേരിട്ടെത്തണം. തിരിച്ചറിയല്‍ രേഖ പരിശോധിച്ച് കൈമാറും. മൂന്ന് ദിവസത്തിനുള്ളില്‍ കൊറിയര്‍ കൈപ്പറ്റാത്ത പക്ഷം പിഴ ഈടാക്കും.

മദ്യലഹരിയിൽ വെട്ടും കുത്തും; രണ്ടുപേർക്ക് പരിക്കേറ്റു

പിറവം: ഒരുമിച്ചു മദ്യപിച്ചവർ തമ്മിലുണ്ടായ സംഘട്ടനത്തിൽ രണ്ടുപേർക്ക് വെട്ടേറ്റു. ഇന്നലെ വൈകുന്നേരം പിറവം പഴയ പെട്രോൾ പമ്പിനു സമീപമുള്ള വീട്ടിലായിരുന്നു സംഭവം. വീട്ടുടമയുടെ സുഹൃത്തുക്കളായ പ്ലാക്കാട്ടുകുഴിയിൽ സുമീഷ് (28)നും, പ്ലാവിടയിൽ സജീവിനു (47)മാണ് വെട്ടേറ്റത്. മദ്യലഹരിയിലായിരുന്നു ഇവരുടെ വെട്ടും കുത്തും. സുമീഷിനാണ് ആദ്യം വെട്ടേറ്റത്. ഇയാളുടെ തലയിൽ 11 സ്റ്റിച്ചുണ്ട്. താലൂക്ക് ആശുപത്രിയിൽ ചികിത്സ തേടി മുറിവുകൾ തുന്നിക്കെട്ടിയ സുമീഷ് സുഹൃത്തുക്കളുമായെത്തി സജീവിനോട് പകരം വീട്ടുകയായിരുന്നുവെന്ന് പോലീസ് പറയുന്നു. പരിക്കേറ്റ രണ്ട് പേർക്കെതിരെയും പിറവം പോലീസ് കേസെടുത്തിട്ടുണ്ട്.

കടമക്കുടിയിലേക്ക് വാട്ടര്‍മെട്രോ : ബോട്ടൊഴികെ എല്ലാം സജ്ജം

കൊച്ചി: കൊച്ചിക്കാഴ്ചകളുടെ മനോഹാരിത സമ്മാനിക്കാൻ കടമക്കുടി ദ്വീപിലേക്ക് വാട്ടര്‍മെട്രോ സര്‍വീസ് ആരംഭിക്കുന്നതിനുള്ള ഒരുക്കങ്ങള്‍ പൂര്‍ത്തിയായി. പുതിയ ബോട്ട് എത്തിയില്ല എന്നതു മാത്രമാണ് ഉദ്ഘാടനത്തിന് തടസം. കടമക്കുടിയിലേക്കുള്ള പുതിയ ബോട്ടിന്‍റെ നിര്‍മാണം കൊച്ചിന്‍ ഷിപ്പ്‌യാര്‍ഡില്‍ നടന്നുവരികയാണ്. അടുത്ത മാസം അവസാനത്തോടെ ബോട്ട് ലഭിക്കുമെന്ന് പറയുന്നുണ്ടെങ്കിലും മുന്‍ അനുഭവങ്ങള്‍ അങ്ങനെയല്ല. നിലവില്‍ 19 ബോട്ടുകളാണ് വാട്ടര്‍മെട്രോയ്ക്കുള്ളത്. അഞ്ച് റൂട്ടുകളിലായി 15 ബോട്ടുകള്‍ സര്‍വീസ് നടത്തുന്നുണ്ട്. നാല് ബോട്ടുകള്‍ അടിയന്തിര സാഹചര്യങ്ങളില്‍ ഉപയോഗിക്കാനുള്ളതാണ്. അടുത്ത മാസം മട്ടാഞ്ചേരി ടെര്‍മിനല്‍ ഉദ്ഘാടനം ചെയ്യുമ്പോള്‍ മൂന്ന് ബോട്ടുകള്‍ ഇവിടേക്ക് സര്‍വീസിനായി ഉപയോഗിക്കേണ്ടിവരും. അങ്ങനെങ്കില്‍ പുതിയ ഒരു ബോട്ട് കൂടി വന്നാലേ കടമക്കുടി സര്‍വീസ് ആരംഭിക്കാനാകൂ. ഒരു ഘട്ടത്തില്‍പോലും നിശ്ചയിച്ച സമയത്ത് നിര്‍മാണം പൂര്‍ത്തീകരിച്ച് ബോട്ട് ലഭ്യമായിട്ടില്ല എന്നതാണ് വാട്ടര്‍മെട്രോയുടെ ഇതുവരെയുള്ള അനുഭവം. കടമക്കുടിയില്‍ ടെര്‍മിനലിന്‍റെ നിര്‍മാണം പൂര്‍ത്തിയായിട്ടുണ്ട്. ഫ്‌ളോട്ടിംഗ് ജെട്ടിയുടെ നിര്‍മാണ പ്രവര്‍ത്തികളാണ് ഇപ്പോള്‍ നടക്കുന്നത്. രണ്ടാഴ്ചയ്ക്കുള്ളില്‍ ഇതിന്‍റെ പണികള്‍ പൂര്‍ത്തിയാകും. പിന്നീട് ഉദ്ഘാടനം നടത്തി സര്‍വീസ് ആരംഭിക്കാം. എന്നാല്‍ പുതിയ ബോട്ട് വരാതെ സര്‍വീസ് നടത്താനാകില്ലെന്നതാണ് നിലവിലെ സാഹചര്യം. സര്‍വീസ് ആരംഭിച്ചാല്‍ തന്നെ രണ്ട് ബോട്ടുകള്‍ മാത്രമേ ഈ റൂട്ടിലേക്ക് സര്‍വീസിനുണ്ടാകൂ. അതിനാല്‍ സര്‍വീസുകള്‍ക്കിടെ സമയദൈര്‍ഘ്യം കൂടുതലായിരിക്കും. വാട്ടര്‍ മെട്രോ കൂടി എത്തുന്നതോടെ കടമക്കുടിയിലെ വിനോദ സഞ്ചാര സാധ്യതകള്‍ വര്‍ധിക്കും. മാത്രമല്ല, നിലവിലുള്ള യാത്രാക്ലേശങ്ങള്‍ക്കു കൂടി പരിഹാരമാകുമെന്നും വാട്ടര്‍മെട്രോ അധികൃതര്‍ അവകാശപ്പെടുന്നു. വൈപ്പിന്‍ നിയോജക മണ്ഡലത്തിലെ വാട്ടര്‍ മെട്രോ പദ്ധതിയില്‍ ഉള്‍പ്പെടുത്തിയിട്ടുള്ള 14 ടെര്‍മിനലുകളാണ് നിര്‍മിക്കുന്നത്. നിലവില്‍ വൈപ്പിന്‍, ബോള്‍ഗാട്ടി, മുളവുകാട് നോര്‍ത്ത് എന്നീ ടെര്‍മിനലുകളുടെ പ്രവര്‍ത്തനം ആരംഭിച്ചിട്ടുണ്ട്. അടുത്തതാണ് കടമക്കുടി. ശേഷം പാലിയംതുരുത്തിലേക്കും സര്‍വീസ് ആരംഭിക്കും. ഇവിടെ ടെര്‍മിനൽ നിര്‍മാണം അന്തിമഘട്ടത്തിലാണ്. മുളവുകാട് പഞ്ചായത്ത്, പൊന്നാരിമംഗലം, ചേന്നൂര്‍, കോതാട്, പിഴല, തുണ്ടത്തുംകടവ്, ചരിയംതുരുത്ത്, എളംകുന്നപ്പുഴ, മൂലമ്പിള്ളി എന്നീ ടെര്‍മിനലുകള്‍ക്കായുള്ള സ്ഥലമേറ്റെടുക്കല്‍ നടപടികള്‍ പൂര്‍ത്തിയാക്കി, ടെൻഡര്‍ നടപടികള്‍ സ്വീകരിച്ചുവരികയാണ്. നിലവില്‍ ഹൈക്കോര്‍ട്ട്, ഫോര്‍ട്ട് കൊച്ചി, വൈപ്പിന്‍, സൗത്ത് ചിറ്റൂര്‍, ചേരാനല്ലൂര്‍, ഏലൂര്‍, വൈറ്റില, കാക്കനാട് എന്നീ ടെര്‍മിനലുകളിലാണ് വാട്ടര്‍മെട്രോ സര്‍വീസ് നടത്തുന്നത്.

ജനസേവന പദ്ധതികളുടെ ഉദ്ഘാടനം

കൂത്താട്ടുകുളം: ചോരക്കുഴി സെന്‍റ് സ്റ്റീഫൻസ് ഓർത്തഡോക്‌സ്‌ പള്ളിയുടെ ജനസേവന പദ്ധതികളുടെ ഭാഗമായി നടത്തിയ ‘സാന്ത്വനം 2025’ പരിപാടിയുടെ ഉദ്ഘാടനം തോമസ് ‌മാർ അത്താനാസിയോസ് മെത്രാപ്പോലീത്ത നിർവഹിച്ചു. നിർധനരായ കിടപ്പുരോഗികളുടെ ആവശ്യത്തിനായി ഹോസ്‌പിറ്റൽ ബെഡ്, വീൽ ചെയർ, വാക്കർ, എയർ ബെഡ്, ഓക്‌സിജൻ കോൺസൻട്രേറ്റർ തുടങ്ങിയ മെഡിക്കൽ ഉപകരണങ്ങൾ വിതരണം ചെയ്യുകയും ആവശ്യം കഴിയുന്ന മുറയ്ക്ക് അവ തിരികെവാങ്ങി മറ്റു രോഗികൾക്ക് നൽകുകയും ചെയ്യുന്ന പദ്ധതിയാണ് ‘സാന്ത്വനം 2025’. ഉപകരണങ്ങളുടെ വിതരണോദ്ഘാടനം അനൂപ് ജേക്കബ് എംഎൽഎ നിർവഹിച്ചു. കൂത്താട്ടുകുളം നഗരസഭ ചെയർപേഴ്‌സൺ വിജയ ശിവൻ, നഗരസഭ വൈസ് ചെയർമാൻ സണ്ണി കുര്യാക്കോസ് തുടങ്ങിയവർ ഇടവകയിലെ വിദ്യാർഥികൾക്കുള്ള വിദ്യാഭ്യാസ പുരസ്കാരങ്ങൾ നൽകി. ഫാ. എഡ്വേർഡ് ജോർജ് പുറ്റാനിയിൽ, എം.പി.ജോസ്, കെ.ഐ. ജോർജ് തുടങ്ങിയവർ നേതൃത്വം നൽകി.

വിദ്യാര്‍ഥികളെ അവാര്‍ഡ് നല്‍കി ആദരിച്ചു

മൂവാറ്റുപുഴ: കേരള അഡ്വക്കേറ്റ് ക്ലാര്‍ക്ക്സ് അസോസിയേഷന്‍ എറണാകുളം ജില്ലാ കമ്മിറ്റിയുടെ ആഭിമുഖ്യത്തില്‍ അംഗങ്ങളുടെ മക്കളില്‍ എസ്എസ്എല്‍സി, പ്ലസ് ടു പരീക്ഷകളില്‍ ഉന്നത വിജയം കരസ്ഥമാക്കിയ വിദ്യാര്‍ഥികളെ അവാര്‍ഡ് നല്‍കി ആദരിച്ചു. മൂവാറ്റുപുഴ ബാര്‍ അസോസിയേഷന്‍ ഹാളില്‍ സംഘടിപ്പിച്ച ചടങ്ങില്‍ മൂവാറ്റുപുഴ എംഎസിടി ആന്‍ഡ് അഡീഷണല്‍ ജില്ലാ ജഡ്ജി കെ.എന്‍. ഹരികുമാര്‍ ഉദ്ഘാടനം ചെയ്തു. ജില്ലാ പ്രസിഡന്‍റ് പി.വി രാമകൃഷ്ണന്‍ അധ്യക്ഷത വഹിച്ചു. ചടങ്ങില്‍ മൂവാറ്റുപുഴ ബാര്‍ അസോസിയേഷന്‍ പ്രസിഡന്‍റ് ജോസ് വര്‍ഗീസ് മുഖ്യപ്രഭാഷണം നടത്തി. ജില്ലാ സെക്രട്ടറി ടി.കെ. വേണുഗോപാലന്‍, ജില്ലാ ജോയിന്‍റ് സെക്രട്ടറി എ.പി. ഗോപന്‍, മൂവാറ്റുപുഴ ബാര്‍ അസോസിയേഷന്‍ സെക്രട്ടറി എ.കെ. ശ്രീകാന്ത്, കെഎസിഎ സംസ്ഥാന വൈസ് പ്രസിഡന്‍റ് ടി.ഡി. രാജപ്പന്‍, വി.ജി. മൈക്കിള്‍, കെ.എം. ജോസഫ്, എ.പി. സുനില്‍, റെജി പ്ലാച്ചേരി തുടങ്ങിയവര്‍ പ്രസംഗിച്ചു.

സാന്ത്വനം പദ്ധതിക്ക് വാഹനം നൽകി പ്രവാസി മലയാളി

വാഴക്കുളം: വാഴക്കുളം ചാരിറ്റബിൾ ട്രസ്റ്റിന്‍റെ സാന്ത്വനം പദ്ധതിയിലേക്ക് മാരുതി ഇക്കോ വാഹനം നൽകി പ്രവാസി മലയാളി. ഖത്തറിൽ കോൺട്രാക്ടറായ ആവോലി കൊച്ചുമുട്ടം മർഫി സ്കറിയയാണ് ട്രസ്റ്റിന്‍റെ സാന്ത്വനം പദ്ധതിയുടെ ഉപയോഗത്തിനായി വാഹനം സൗജന്യമായി നൽകുന്നത്. വാഴക്കുളത്തും സമീപപ്രദേശങ്ങളിലും കാൻസർ, കിഡ്നി രോഗം ഉൾപ്പെടെ ഗുരുതര രോഗങ്ങൾ ബാധിച്ചവരുടെയും പ്രായധിക്യത്താൽ പ്രയാസമനുഭവിക്കുന്നവരുടെയും വീടുകളിൽ എത്തി അവർക്കു പിന്തുണയും ചികിത്സാ, പരിചരണവും കൗൺസിലിംഗും നൽകുവാൻ ഉദ്ദേശിച്ചുള്ളതാണ് സാന്ത്വനം പദ്ധതി. വാഴക്കുളം ചാരിറ്റബിൾ ട്രസ്റ്റിന് വേണ്ടി ചെയർമാൻ സിജു സെബാസ്റ്റ്യൻ വാഹനത്തിന്‍റെ തുക ഏറ്റുവാങ്ങി. ട്രസ്റ്റ് സെക്രട്ടറി ജോണി മെതിപ്പാറ, മാത്യൂസ് നമ്പേലി, സോണി ജെയിംസ്, സാജു ടി. ജോസ്, പ്രഫ. ജോസ് അഗസ്റ്റിൻ, തോമസ് വർഗീസ്, ജിജി മാത്യു തുടങ്ങിയവർ പങ്കെടുത്തു.

ജീവിതത്തിൽ പ്രകാശം പരത്താൻ സാധിക്കണം: ശ്രേഷ്ഠ ബാവ

കോലഞ്ചേരി: വിശുദ്ധരുടെ ജീവിത വഴികൾ സ്വാംശീകരിച്ചു ജീവിതത്തിൽ വിശുദ്ധിയും നന്മയും പ്രാപിക്കുവാനും മറ്റുള്ളവരുടെ ജീവിതത്തിൽ പ്രകാശം പരത്തുവാനും സാധിക്കണമെന്ന് ശ്രേഷ്ഠ കാതോലിക്ക മാർ ബസേലിയോസ് ജോസഫ് ബാവ പറഞ്ഞു. തിരുവാങ്കുളം ക്യംതാ സെമിനാരി സെന്‍റ് ജോർജ് കത്തീഡ്രലിൽ ശ്രാദ്ധപ്പെരുന്നാളിനോട് അനുബന്ധിച്ച് മുഖ്യ പ്രഭാഷണം നടത്തുകയായിരുന്നു ശ്രേഷ്ഠ ബാവ. കൊച്ചി ഭദ്രാസന മുൻ മെത്രാപ്പോലീത്ത പുണ്യശ്ലോകനായ തോമസ് മാർ ഒസ്‌താത്തിയോസ് തിരുമേനിയുടെ രജത ജൂബിലി ശ്രാദ്ധപ്പെരുന്നാളും വന്ദ്യ മൂക്കഞ്ചേരിൽ ഗീവർഗീസ് റമ്പാച്ചന്‍റെ 127-ാം ശ്രാദ്ധവും സംയുക്തമായി കൊച്ചി ഭദ്രാസനത്തിന്‍റെ നേതൃത്വത്തിൽ ആഘോഷിച്ചു. ശ്രാദ്ധപ്പെരുനാളിനോട് അനുബന്ധിച്ച് മൂന്നിന്മേൽ കുർബാനയ്ക്ക് ശ്രേഷ്ഠ ബാവ മുഖ്യ കാർമികത്വം വഹിച്ചു. മെത്രാപ്പോലീത്തമാരായ മാത്യൂസ് മാർ അഫ്രേം, ഐസക് മാർ ഒസ്താത്തിയാസ് എന്നിവർ സഹ കാർമികത്വം വഹിച്ചു.

കുട്ടമ്പുഴയില്‍ മണ്ണിടിച്ചില്‍; നാല് വീടുകള്‍ക്ക് ഭാഗികനാശം

കോതമംഗലം: കനത്ത മഴയെതുടര്‍ന്ന് കുട്ടമ്പുഴയില്‍ മണ്ണിടിച്ചിലില്‍ നാല് വീടുകള്‍ക്ക് ഭാഗികനാശം. കുട്ടമ്പുഴ സത്രപടി നാല് സെന്‍റ് നഗറിലും വായനശാലപ്പടി നഗറിലും താമസിക്കുന്ന പത്ത് കുടുംബങ്ങളെ ജില്ല കളക്ടറുടെ നിര്‍ദേശാനുസരണം മാറ്റിപ്പാര്‍പ്പിച്ചു. പഞ്ചായത്ത് റവന്യു, പോലീസ് അധികൃതര്‍ സ്ഥലത്തെത്തി. ശനിയാഴ്ച രാത്രിയോടെയാണ് സംഭവം. സത്രപ്പടി നഗറില്‍ പടിക്കമാലില്‍ രാജന്‍റെ വീടിന്‍റെ മുറ്റം ഇടിഞ്ഞ് തോട്ടാപ്പിള്ളില്‍ ജോളിയുടെ അടുക്കള ഭാഗത്തേക്ക് വീണു. വായനശാല നഗറില്‍ ഏഴുതൈക്കല്‍ കൊച്ചി ആന്‍റപ്പന്‍റെ മുറ്റവും സംരക്ഷണഭിത്തിയടക്കം ഇടിഞ്ഞ് കീഴാട്ടൂകൂടി മനോജിന്‍റെ വീടിന്‍റെ അടുക്കള ഭാഗത്തും വീണിരിക്കുകയാണ്. രാത്രിയും വീണ്ടും മണ്ണിടിയാൻ സാധ്യതയുണ്ട്. വീടുകള്‍ക്ക് മീതെ മണ്ണ് വീണിരിക്കുന്നത് എത്രമാത്രം ഉണ്ടെന്നത് വിലയിരുത്താനായിട്ടില്ല. പത്ത് കുടുംബങ്ങള്‍ക്കായി സത്രപടി സര്‍ക്കാര്‍ സ്‌കൂളില്‍ ദുരിതാശ്വാസ ക്യാമ്പ് തുറന്നു.

വരാപ്പുഴ അതിരൂപത യുവജനസംഗമം

കൊച്ചി: വരാപ്പുഴ അതിരൂപത യുവജന സംഗമം "ഇലുമിനിറ്റ്' എറണാകുളം സെന്‍റ് ആല്‍ബര്‍ട്ട്സ് കോളജ് ഓഡിറ്റോറിയത്തില്‍ നടന്നു. പ്രതിപക്ഷനേതാവ് വി.ഡി. സതീശന്‍ ഉദ്ഘാടനം ചെയ്തു. സഹായമെത്രാന്‍ ഡോ. ആന്‍റണി വാലുങ്കല്‍ അധ്യക്ഷത വഹിച്ചു. സിനിമാതാരം സിജോയ് വര്‍ഗീസ് മുഖ്യാതിഥിയായിരുന്നു. ടി.ജെ. വിനോദ് എംഎല്‍എ, ഫാ. അനൂപ് കളത്തിത്തറ, ഫാ. ജിജു ക്ലീറ്റസ് തിയ്യാടി, ഫാ.യേശുദാസ് പഴമ്പിള്ളി, രാജീവ് പാട്രിക്, അലന്‍ ടൈറ്റസ്, റോജന്‍ എന്നിവര്‍ പ്രസംഗിച്ചു. സിനിമാറ്റിക് ഡാന്‍സ് മത്സരത്തിന്‍റെ സമ്മാനദാനം അതിരൂപത വികാരി ജനറല്‍ മോണ്‍. മാത്യു കല്ലിങ്കല്‍ നിര്‍വഹിച്ചു.

ആലുവ ജലശുദ്ധീകരണശാലയ്ക്ക് സമീപം സംശയാസ്പദമായ യുവാവ് പിടിയിൽ

ആലുവ: ജലശുദ്ധീകരണശാലയുടെ പമ്പിംഗ് സ്റ്റേഷൻ പരിസരത്ത് സംശയാസ്പദമായ സാഹചര്യത്തിൽ കണ്ടെത്തിയ അന്യസംസ്ഥാനക്കാരനെ പിടികൂടി വിട്ടയച്ചു. അസാം സ്വദേശി നിർമ്മൽ ബിശ്വാസ് ശർമ (28)നെയാണ് പിടികൂടിയത്. ഇന്നലെ രാവിലെ 11 ഓടെയാണ് ജലശുദ്ധീകരണശാലയിലേക്ക് വെള്ളം പമ്പ് ചെയ്യുന്ന ഭാഗത്ത് പെരിയാറിൽ ഇയാളെ ജീവനക്കാർ കണ്ടെത്തിയത്. തുടർന്ന് ആലുവ ടൗൺ പോലീസിനെയും ഫയർഫോഴ്സിനെയും വിവരമറിച്ചു. ഫയർഫോഴ്സ് സ്കൂബാ ടീം പുഴയിലിറങ്ങിയാണ് ഇയാളെ പിടികൂടിയത്. എന്നാൽ പിന്നീടു നടന്ന അന്വേഷണത്തിൽ ഇയാൾ നിരപരാധിയാണെന്നു കണ്ട് വിട്ടയയ്ക്കുകയായിരുന്നു.

കൊച്ചി രൂപത അൾത്താര ബാലസംഗമം

ഫോർട്ടുകൊച്ചി : ചെറുപുഷ്പ മിഷൻ ലീഗിന്‍റെ ആഭിമുഖ്യത്തിൽ കൊച്ചി രൂപതയിലെ 250 ലധികം അൾത്താര ബാലകരുടെ സംഗമം സംഘടിപ്പിച്ചു. കുമ്പളങ്ങി പഴങ്ങാട് സെന്‍റ് ജോർജ് പള്ളിയിൽ നടന്ന സംഗമം രൂപത മൈനർ സെമിനാരി റെക്ടർ ഫാ. സന്തോഷ് വെളുത്തേടത്ത് ഉദ്ഘാടനം ചെയ്തു. രൂപത പ്രസിഡന്‍റ് കെ.വി. ജിതിൻ അധ്യക്ഷത വഹിച്ചു. ഡയറക്ടർ ഫാ. ഷിനോജ് പുന്നക്കൽ, കെആർഎൽസിസി ചിൽഡ്രൻസ് കമ്മീഷൻ സംസ്ഥാന സെക്രട്ടറി ഫാ. അരുൺ തൈപ്പറമ്പിലും ടീമും ക്ലാസുകൾ നയിച്ചു. റോഡ് ബാൻഡ് സംഗീതപരിപാടികൾ അരങ്ങേറി. കുമ്പളങ്ങി ഫൊറോന വികാരി ഫാ. സെബാസ്റ്റ്യൻ പുത്തൻപുരക്കൽ ദിവ്യബലിക്ക് മുഖ്യ കാർമികത്വം വഹിച്ചു. ഗായകൻ കൂടിയായ ഫാ. ബിബിൻ ജോർജ്, സോനു നാനാട്ട്, ഡിക്സൺ ജേക്കബ് , കെ.കെ. സൂസൻ, ടി.ജി. ഷിബി, സിസ്റ്റർ ജാസ്മിൻ ജോസഫ് എന്നിവർ പ്രസംഗിച്ചു.

എസ്എൻഐഎംഎസിൽ വിവിധ പദ്ധതികളുടെ ഉദ്ഘാടനം

നെടുമ്പാശേരി : ചാലാക്ക ശ്രീനാരായണ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസ് (എസ്എൻഐഎംഎസ്) നവീകരിച്ച ഓഫ്താൽമോളജി ഔട്ട്പേഷ്യന്‍റ് യൂണിറ്റ്, റെറ്റിന ക്ലിനിക്, പുതിയതായി സ്ഥാപിച്ച 1.5 ടെസ്‌ല എം‌ആർ‌ഐ യൂണിറ്റ് എന്നിവയുടെ ഉദ്ഘാടനം ഗുരുദേവ ചാരിറ്റബിൾ ട്രസ്റ്റ് പ്രസിഡന്‍റ് പ്രദീപ് കുമാർ തങ്കപ്പൻ, സെക്രട്ടറി കെ.ഡി. വേണുഗോപാൽ എന്നിവർ ചേർന്ന് നിർവഹിച്ചു. ചടങ്ങിൽ ഇൻസ്റ്റിറ്റ്യൂഷൻ മാനേജർ ഡോ. പി.എ. സേതു , വൈസ് പ്രസിഡന്‍റ് സി.ആർ. പ്രസന്നൻ , ജോയിന്‍റ് സെക്രട്ടറിമാരായ ആർ. രാജേന്ദ്രൻ, എ.എസ്. രാധാകൃഷ്ണൻ, മെഡിക്കൽ സൂപ്രണ്ട് ഡോ. അനൂപ് വിൻസെന്‍റ്, ഡെപ്യൂട്ടി മെഡിക്കൽ സൂപ്രണ്ട് ഡോ. മഞ്ജുഷ തുടങ്ങിയവർ സംസാരിച്ചു.

സഹോദരിമാർക്ക് റാങ്ക് തിളക്കം

കാലടി: ബിരുദാനന്തര ബിരുദ പരീക്ഷയിൽ സഹോദരിമാർക്ക് റാങ്ക് തിളക്കം. എംജി യൂണിവേഴ്സിറ്റി പരീക്ഷയിലാണ് സൗത്ത് വെള്ളാരപ്പിള്ളി തൃക്കണിക്കാവ് പടായത്തുക്കുടിയിൽ ജലാലിന്‍റെയും(കുവൈറ്റ്), ഷഹർബാന്‍റെയും മക്കളായ അഹ്സന ഫാത്തിമയും (എംഎസ്‌സി സുവോളജി), ഹുസ്ന ഹവ്വയും (എംഎസ്‌സി സൈക്കോളജി) ഒന്നാം റാങ്കുകൾ നേടിയത്. മൂത്ത മകൾ അഹ്സന മുവാറ്റുപുഴ നിർമല കോളജ് വിദ്യാർഥിനിയും, ഇളയവൾ ഹുസ്ന ആലുവ യുസി കോളജ് വിദ്യാർഥിനിയുമാണ്. ബിരുദതലത്തിൽ ഇരുവർക്ക് രണ്ടുപേർക്കും രണ്ടാം റാങ്ക് ലഭിച്ചിരുന്നു.

എടവനക്കാട്ടെ കടൽ ഭിത്തി നിർമാണ പദ്ധതി: നടപടികൾ വേഗത്തിലെന്ന് എംഎൽഎ

വൈപ്പിൻ: കടലാക്രമണം രൂക്ഷമാകുന്ന എടവനക്കാട് ജിഡ ഫണ്ടിൽ നിന്ന് അനുവദിച്ച 35 കോടി രൂപയുടെ കടൽഭിത്തി നിർമാണത്തിനായുള്ള നടപടിക്രമങ്ങൾ പുരോഗമിക്കുകയാണെന്ന് കെ.എൻ. ഉണ്ണിക്കൃഷ്ണൻ എംഎൽഎ ജില്ല വികസന സമിതി യോഗത്തിൽ അറിയിച്ചു. 56 കോടിയുടെ എസ്റ്റിമേറ്റ് ഇറിഗേഷൻ വകുപ്പ് ജിഡയ്ക്ക് സമർപ്പിച്ചിരുന്നു. എന്നാൽ 35 കോടി രൂപയാണ് ജിഡ ഫണ്ടിൽ കണക്കാക്കിയിരുന്നത്. എങ്കിലും 56 കോടിക്ക് അംഗീകാരം ജിഡ തേടി. ജിഡ വിഹിതമായ 35 കോടിക്ക് എസ്റ്റിമേറ്റ് സമർപ്പിക്കാൻ സർക്കാർ ആവശ്യപ്പെട്ടതിനാൽ നടപടി പുരോഗമിക്കുകയാണെന്നു ജിഡ സെക്രട്ടറി അറിയിച്ചതായും എംഎൽഎ പറഞ്ഞു. ഒപ്പം ഡിസാസ്റ്റർ ഫണ്ടിൽ നിന്ന് 20 കോടി രൂപ എടവനക്കാടിനു അനുവദിക്കുന്നതിനുള്ള നടപടികളും പുരോഗമിക്കുകയാണെന്ന് മേജർ ഇറിഗേഷൻ എക്സിക്യൂട്ടീവ് എൻജിനീയർ അറിയിച്ചുവത്രേ. നായരമ്പലം, ഞാറക്കൽ, എടവനക്കാട്, പള്ളിപ്പുറം പഞ്ചായത്തുകളിൽ കടലാക്രമണത്തെ തുടർന്ന് ജിയോ ബാഗുകൾ തകരാറിലായ സാഹചര്യത്തിൽ അടിയന്തിരമായി ജിയോ ബാഗുകൾ സ്ഥാപിക്കുന്നതിനുള്ള നടപടികൾ ജില്ലാ വികസന സമിതി യോഗം അവലോകനം ചെയ്തു. ഇത് സംബന്ധിച്ച് പ്രവർത്തനങ്ങൾ വേഗത്തിൽ ആക്കുന്നതിനായി ജില്ലാ കളക്ടർക്ക് ചുമതല നൽകിയിട്ടുണ്ട്.

വിസ്ത കപ്പ് നേടി എസ്എച്ച് പബ്ലിക് സ്‌കൂൾ

കളമശേരി: രാജഗിരി പബ്ലിക്ക് സ്‌കൂൾ നടത്തിയ ഇന്‍റർ -സ്‌കൂൾ കലോത്സവമായ വിസ്ത 2025ൽ തേവര സേക്രഡ് ഹാർട്ട് സിഎം ഐ പബ്ലിക് സ്‌കൂൾ ഒന്നാം സ്ഥാനം കരസ്ഥമാക്കി. കാക്കനാട് രാജഗിരി ക്രിസ്തു ജയന്തി പബ്ലിക് സ്‌കൂൾ രണ്ടാം സ്ഥാനം നേടി. 1,500ൽ അധികം വിദ്യാർഥികൾ പങ്കെടുത്ത 21 മത്സര ഇനങ്ങളിൽ സാഹിത്യം, ഫൈൻ ആർട്സ്, സംഗീതം, നൃത്തം, ഛായാഗ്രഹണം തുടങ്ങിയവയിൽ വിദ്യാർഥികൾക്ക് മികവ് തെളിയിക്കാൻ വേദിയായി വിസ്ത 2025. സമ്മാന വിതരണം ചലച്ചിത്ര താരം ഡോ. മുത്തുമണി സോമസുന്ദരം, സംവിധായകനും എഴുത്തുകാരനുമായ പ്രജേഷ് സെൻ എന്നിവർ നിർവഹിച്ചു. വിസ്തയുടെ ഉദ്ഘാടനം എസ്എച്ച് പ്രൊവിൻഷ്യൽ മാനേജർ ഫാ. ബെന്നി നൽക്കര നിർവഹിച്ചു. സമാപന ചടങ്ങിൽ എസ്എച്ച് പ്രൊവിൻസ് വികാർ പ്രൊവിൻഷ്യൽ ഫാ. മാത്യു കോയിക്കര അധ്യക്ഷത വഹിച്ചു. രാജഗിരി പബ്ലിക് സ്‌കൂൾ ഡയറക്ടർ ഫാ. പൗലോസ് കിടങ്ങൻ, ഫിനാൻസ് മാനേജർ ആന്‍റണി കേളാപറമ്പിൽ, പ്രിൻസിപ്പൽ റൂബി ആന്‍റണി, വൈസ് പ്രിൻസിപ്പൽ ജെസ്‌ന ഡോൺ, ഹെഡ് മിസ്ട്രസ് പ്രീതി എൽഡി, പിടിഎ പ്രസിഡന്‍റ് ഡോ. ജഗത് ലാൽ ഗംഗാധരൻ, വിസ്ത കൺവീനർ ജോബി ജേക്കബ് തുടങ്ങിയവർ സന്നിഹിതരായിരുന്നു.

ഐസാറ്റ് എൻജിനീയറിംഗ് കോളജിൽ ബിരുദദാനം

കളമശേരി: ഐസാറ്റ് എൻജിനീയറിംഗ് കോളജിലെ ഒമ്പതാം ബാച്ച് വിദ്യാർഥികളുടെ ബിരുദദാന ചടങ്ങ് കോളേജ് കാമ്പസിൽ നടത്തി. "സ്പോൺസി യോൺ' എന്ന ബിരുദദാന ചടങ്ങിൽ ഓരോ എൻജിനീയറിംഗ് വിഭാഗത്തിലെയും മികച്ച വിജയം നേടിയ വിദ്യാർഥികളെ ആദരിച്ചു. ഐസാറ്റ് എൻജിനീയറിംഗ് കോളജ് മാനേജർ ഫാ. ആന്‍റണി വാക്കോ അറക്കൽ ചടങ്ങിന് അധ്യക്ഷത വഹിച്ചു. കണ്ണൂർ യൂണിവേഴ്സിറ്റി വൈസ് ചാൻസലർ പ്രഫ. ഡോ. കെ.കെ. സാജു ചടങ്ങിൽ മുഖ്യാതിഥിയായിരുന്നു. അസിസ്റ്റന്‍റ് മാനേജർ ഫാ. മനോജ് ഫ്രാൻസിസ് മരോട്ടിക്കൽ, കോളജ് പ്രിൻസിപ്പൽ ഡോ. വി. വീണ, വൈസ് പ്രിൻസിപ്പൽമാരായ പ്രഫ. വി. പോൾ അൻസൽ , പ്രഫ. കനക സേവ്യർ, വിവിധ വകുപ്പ് മേധാവികൾ എന്നിവർ ചടങ്ങിൽ പങ്കെടുത്തു.

കന്യാസ്ത്രീകളുടെ അറസ്റ്റിൽ പ്രതിഷേധം ശക്തം

നെടുമ്പാശേരി: ചത്തീസ്ഗഡിൽ എളവൂർ സെന്‍റ് ആന്‍റണീസ് ഇടവകാംഗമായ മാളിയേക്കൽ സിസ്റ്റർ പ്രീതി മേരി, തലശേരി ഉദയഗിരി ഇടവകാംഗം സിസ്റ്റർ വന്ദന ഫ്രാൻസീസ് എന്നിവരെ മനുഷ്യക്കടത്ത് ആരോപിച്ച് അറസ്റ്റ് ചെയ്ത് ജയിലിൽ അടച്ചതിൽ അൽമായ മുന്നേറ്റം മൂഴിക്കുളം ഫൊറോന കമ്മിറ്റി ശക്തമായ പ്രതിഷേധം രേഖപ്പെടുത്തി. ഫൊറോന കൺവീനരേ് എസ്.ഡി. ജോസ്‌ അധ്യക്ഷത വഹിച്ചു. ജോണി ഭരണികുളങ്ങര,ജോയ് കുരിശിങ്കൽ, ഫ്രാൻസീസ് വടക്കൻ, സി.എം.ജോൺസൺ, മെൽവിൻ വിൽസൺ, പി.ഡി. ജോസ് , എം.ഒ. സൈമൺ, സാന്‍റോ പാനികുളം, എം.ജോസ് എന്നിവർ പ്രസംഗിച്ചു.

മാതൃ-ശിശു സംരക്ഷണം: സെമിനാര്‍ നടത്തി

കൊച്ചി: മാതൃ-ശിശു സംരക്ഷണ മാസാചരണത്തിന്‍റെ ഭാഗമായി റോട്ടറി കൊച്ചിന്‍ മിഡ് ടൗണിന്‍റെ നേതൃത്വത്തില്‍ മാതൃത്വവും കുട്ടികളുടെ ആരോഗ്യവും എന്ന വിഷയത്തില്‍ ബോധവത്കരണ സെമിനാര്‍ സംഘടിപ്പിച്ചു. ഗാന്ധിനഗര്‍ ഉദയഭവന്‍ കോണ്‍വന്‍റ് ഹാളില്‍ നടന്ന സെമിനാര്‍ പൊന്നുരുന്നി സഹൃദയ വെല്‍ഫെയര്‍ സൊസൈറ്റി ഡയറക്ടര്‍ ഫാ. ജോസ് കൊളുത്തുവയലില്‍ ഉദ്ഘാടനം ചെയ്തു. റോട്ടറി കൊച്ചിന്‍ മിഡ് ടൗണ്‍ പ്രസിഡന്‍റ് അഡ്വ. പി. ഗോപകുമാര്‍ അധ്യക്ഷത വഹിച്ചു. റോട്ടറി കൊച്ചിന്‍ മിഡ് ടൗണിന്റെ നേതൃത്വത്തില്‍ നല്‍കുന്ന ഭവന നിര്‍മാണത്തിനുള്ള ധനസഹായം ചടങ്ങില്‍ വിതരണം ചെയ്തു. ദേശീയ പവര്‍ലിഫ്റ്റിംഗ് ചാമ്പ്യന്‍ഷിപ്പില്‍ ജേതാവായ കെ. രേവതിക്ക് ഒരു ലക്ഷം രൂപയുടെ കാഷ് ചെക്ക് സമ്മാനിച്ചു. ഉദയഭവന്‍ കോണ്‍വന്‍റിന്‍റെ നേതൃത്വത്തില്‍ രൂപീകരിച്ച ഉദയ ബാൻഡിന്‍റെ അരങ്ങേറ്റവും ചടങ്ങില്‍ നടന്നു. റോട്ടറി ഡിസ്ട്രിക്ട് അസിസ്റ്റന്‍റ് ഗവര്‍ണര്‍ രാകേഷ് രാജന്‍, ഉദയഭവന്‍ കോണ്‍വന്‍റ് മദര്‍ മൃദുല ചക്യത്ത് തുടങ്ങിയവര്‍ പങ്കെടുത്തു.

മാവേലിപുരത്ത് പകൽവീട് ഒരുങ്ങുന്നു

കാക്കനാട് : തൃക്കാക്കര നഗരസഭയിലെ മാവേലിപുരം ഡിവിഷനിൽ പ്രായമേറിയവരുടെ മാനസികോല്ലാസം ലക്ഷ്യമിട്ട് പകൽവീട് ഒരുങ്ങുന്നു. മാവേലിപുരം വാർഡിലെ പഴയ മുനിസിപ്പൽ ലൈബ്രറിയോട് ചേർന്നാണ് മന്ദിരം നിർമിക്കുന്നത്. ഉമാതോമസ് എംഎൽഎ ശിലാസ്ഥാപനം നിർവഹിച്ചു. നഗരസഭാ ചെയർപേഴ്സൺ രാധാമണിപിള്ള അധ്യക്ഷത വഹിച്ചു. ചടങ്ങിൽ വാർഡ്കൗൺസിലർ ഉണ്ണികാക്കനാട്, ക്ഷേമ കാര്യസ്ഥിരംസമിതി അധ്യക്ഷ സുനീറ ഫിറോസ്, കൗൺസിലർമാരായ റാഷിദ് ഉള്ളംപിള്ളി, സി.സി. വിജു, വി.ഡി. സുരേഷ്, ഷാന അബ്ദു, ഹസീന ഉമ്മർ, ഷിമി മുരളി തുടങ്ങിയവർ സംബന്ധിച്ചു.

ഹേമപ്രഭാ പുരസ്കാരം ലക്ഷ്മിക്ക്

ചെറായി: മൂന്നാമത് ഹേമപ്രഭാ കായിക പുരസ്‌കാരത്തിന് എടവനക്കാട് എസ്ഡിപിവൈ കെപിഎം ഹൈസ്‌കൂളിലെ ഒമ്പതാം ക്ലാസുകാരിയായ എം.ബി. ലക്ഷ്മി അര്‍ഹയായി. 25,000 രൂപയും മെഡലും ആണ് പുരസ്കാരം. ചെറായി എസ്എംഎച്ച് എസിലെ റിട്ട. കായികാധ്യാപികയായ ഹേമപ്രഭ രവീന്ദ്രന്‍റെ സ്മരണാർഥം രൂപീകരിച്ച ട്രസ്റ്റ് ആണ് അവാർഡ് നൽകുന്നത്. നാളെ ഉച്ചയ്ക്ക് സ്‌കൂളിൽ നടക്കുന്ന ചടങ്ങില്‍ പുരസ്‌കാരം സമ്മാനിക്കും.

ഡോ. വര്‍ഗീസ് മൂലന് സ്വീകരണം

അങ്കമാലി: ആന്‍റി കറപ്ഷന്‍ ഫൗണ്ടേഷന്‍ ഓഫ് ഇന്ത്യയുടെ ദേശീയ ചെയര്‍മാനായി തെരഞ്ഞെടുത്ത ഡോ. വര്‍ഗീസ് മൂലന് കല്ലുപാലം റസിഡന്‍റ്സ് കൗണ്‍സിലിന്‍റെ നേതൃത്വത്തില്‍ അങ്കമാലിയിലെ പൗരാവലി സ്വീകരണം നല്‍കി.ഇന്ത്യാ-കോമണ്‍വെല്‍ത്ത് ട്രേഡ് കമ്മീഷണറാണ് ഡോ. വര്‍ഗീസ് മുലന്‍. റോജി എം .ജോണ്‍ എംഎല്‍എ സമ്മേളനം ഉദ്ഘാടനം ചെയ്തു. റസിഡന്‍റ്സ് കൗണ്‍സില്‍ പ്രസിഡന്‍റ് ജോസ് കല്ലൂക്കാരന്‍ അധ്യക്ഷത വഹിച്ചു. റസിഡന്‍റ്സ് അസോ. അപ്പക്‌സ് കൗണ്‍സില്‍ പ്രസിഡന്‍റ് കെ.എ. പൗലോസ്, ബെന്നി പള്ളിപാട്ട്, റീത്ത പോള്‍, ബെന്നി മൂഞ്ഞേലി തുടങ്ങിയവര്‍ പ്രസംഗിച്ചു.

മഞ്ഞുമ്മലിൽ നിർധനർക്കുള്ള ഭവന നിര്‍മാണത്തിന് തുടക്കം

കൊച്ചി: മഞ്ഞുമ്മല്‍ ഇടവകയിൽ പരിശുദ്ധ അമലോത്ഭവ മാതാവിന്‍റെ 160 ാം ദര്‍ശന തിരുനാളിനോട് അനുബന്ധിച്ച് നടത്തുന്ന സാമൂഹ്യ സേവനപ്രവര്‍ത്തനങ്ങളുടെ ഭാഗമായി, നിര്‍ധനരായ കുടുംബങ്ങള്‍ക്കായി നിര്‍മിച്ചു നല്‍കുന്ന ഭവനങ്ങളില്‍ ആദ്യത്തേതിന്‍റെ കല്ലിടല്‍ വികാരി ഫാ. അഗസ്റ്റിന്‍ സ്റ്റീജന്‍ കണക്കശേരി നിര്‍വഹിച്ചു. ചടങ്ങില്‍ സഹവികാരി ഫാ. ആല്‍ബിന്‍ തോമസ്, തിരുനാള്‍ സമിതി കണ്‍വീനര്‍ സാന്‍ററിന്‍ ആന്‍റണി, സെക്രട്ടറി വിക്ടര്‍ ജോണ്‍, ട്രഷറര്‍ ടി.എ. ഫ്രാന്‍സിസ് തുടങ്ങിയവർ പങ്കെടുത്തു. ഷെല്ലാര്‍ക്ക് കണ്‍സ്ട്രക്ഷന്‍ കമ്പനി ഉടമയും ഇടവകാംഗവുമായ ബിജു ആന്‍റണിയാണ് നിര്‍മാണം ഏറ്റെടുത്ത് നടത്തുന്നത്.

കിഴക്കന്പലം-പോഞ്ഞാശേരി റോഡ് നന്നാക്കാൻ ട്വന്‍റി 20യുടെ നേതൃത്വത്തിൽ മനുഷ്യച്ചങ്ങല

കിഴക്കമ്പലം: കിഴക്കന്പലം-പോഞ്ഞാശേരി റോഡ് നന്നാക്കണമെന്ന് ആവശ്യപ്പെട്ട് ട്വന്‍റി 20 യുടെ നേതൃത്വത്തിൽ മനുഷ്യച്ചങ്ങല സംഘടിപ്പിച്ചു. കിഴക്കമ്പലം മുതൽ തൈക്കാവ് വരെ മൂന്നര കിലോമീറ്ററിൽ പലയിടത്തും മനുഷ്യച്ചങ്ങല ജനബാഹുല്യം മൂലം മനുഷ്യമതിലായി മാറി. കിഴക്കമ്പലം-പോഞ്ഞാശേരി റോഡ് കുണ്ടും കുഴിയുമായി സഞ്ചാരയോഗ്യമല്ലാതായിട്ട് നാലു വർഷം പൂർത്തിയായിട്ടും പിഡബ്ല്യുഡി അധീനതയിലുള്ള റോഡ് നന്നാക്കാൻ സർക്കാർ നടപടിയെടുക്കുന്നില്ലെന്ന് ആരോപിച്ചാണ് പാർട്ടി പ്രതിഷേധം സംഘടിപ്പിച്ചത്. കിഴക്കമ്പലത്ത് പൂക്കാട്ടുപടി-ചെമ്പറക്കി പിഡബ്ല്യുഡി റോഡിന്‍റെ കാര്യത്തിലും ഇതാണ് അവസ്ഥയെന്നും കരാറുകാരനെക്കൊണ്ട് റോഡ് വർക്ക് ചെയ്യാൻ അനുവദിക്കാതെ സിപിഎമ്മുകാർ തടസം നിൽക്കുകയായിരുന്നുവെന്നും അവസാനം കോടതി നേരിട്ട് കമ്മീഷനെ നിയോഗിച്ച് വർക്ക് പൂർത്തിയാക്കാൻ വേണ്ടിയുള്ള കർശന നിർദേശം നൽകിയാണ് റോഡ് പണി പൂർത്തിയാക്കാൻ കരാറുകാരന് സാധിച്ചതെന്നും പാർട്ടി ചെയർമാൻ ബോബി എം. ജേക്കബ് പറഞ്ഞു. പഞ്ചായത്തിന്‍റെ കീഴിലുള്ള 540 റോഡുകൾ എല്ലാം തന്നെ ബിഎംബിസി നിലവാരത്തിൽ ടാറിംഗ് പൂർത്തീകരിച്ചെന്നും അദ്ദേഹം അറിയിച്ചു. പാർട്ടി സംസ്ഥാന ചെയർമാൻ ബോബി എം. ജേക്കബ്, വൈസ് പ്രസിഡന്‍റ് വി. ഗോപകുമാർ, സംസ്ഥാന എക്സിക്യൂട്ടീവ് ബോർഡ് അംഗം അഡ്വ. ചാർളി പോൾ, ബോർഡ്‌ മെമ്പർ ആഗസ്റ്റിൻ ആന്‍റണി,ബിജോയ്‌ ഫിലിപ്പോസ്,നിയോജക മണ്ഡലം പ്രസിഡന്‍റ് ജിബി എബ്രഹാം, വൈസ് പ്രസിഡന്‍റ് ദീപക് രാജൻ തുടങ്ങിയവർ പ്രതിഷേധ മനുഷ്യച്ചങ്ങലയ്ക്ക് നേതൃത്വം നൽകി.

കുട്ടമശേരി ഗവ. ഹയർ സെക്കൻഡറി സ്കൂളിലെ ഇടിഞ്ഞുവീഴാറായ കെട്ടിടം അപകടഭീഷണി

ആലുവ: നൂറു കണക്കിന് വിദ്യാർഥികൾ പഠിക്കുന്ന കുട്ടമശേരി ഗവ. ഹയർ സെക്കൻഡറി സ്കൂളിലെ കാലപ്പഴക്കം മൂലം അപകടാവസ്ഥയിലായ രണ്ട് കെട്ടിടങ്ങളുടെ പൊളിച്ചുമാറ്റൽ നടപടി നീളുന്നു. തുക നിർണയത്തിൽതട്ടി ആദ്യത്തെ ലേലം പരാജയപ്പെട്ടു. പുനർലേലത്തിന് നോട്ടീസ് നൽകിയെങ്കിലും നടപടികൾ നീണ്ടു പോകുകയാണ്. നൂറുകണക്കിനു കുട്ടികൾ പഠിക്കുന്ന സ്കൂളിൽ കാലപ്പഴക്കം ചെന്ന കെട്ടിടം നിലകൊള്ളുന്നത് വൻ സുരക്ഷാ ഭീഷണിയാണ് ഉയർത്തുന്നത്. ഓടിട്ട പഴയ കെട്ടിടം പൊളിച്ചുനീക്കുന്നതിന് ടെൻഡർ മൂല്യം നിർണയിച്ചിട്ടുണ്ട്. അതിന് താഴെയ.ുള്ള തുകയ്ക്ക് ലേലം വിളിക്കാൻ ജില്ലാ പഞ്ചായത്ത് അനുവദിക്കാത്തതാണ് ആദ്യ ടെൻഡർ നടപടി കാലഹരണപ്പെടാൻ കാരണം. കെട്ടിടത്തിന് നിർണയിച്ച അടിസ്ഥാന മൂല്യം കുറയ്ക്കാതെ പുനർലേലം നടക്കുമോയെന്ന ആശങ്കയിലാണ് വിദ്യാഭ്യാസ വകുപ്പ് ഉദ്യോഗസ്ഥരും. നിലവിൽ പഴയ കെട്ടിടത്തിൽ പുസ്തങ്ങൾ, പഴയ ഫയലുകൾ, ഫർണീച്ചറുകൾ, ലാബ് സാമഗ്രികൾ തുടങ്ങിയവയാണ് സൂക്ഷിച്ചിരിക്കുന്നത്. ആസിഡ് ചോർന്ന് ഒരു മാസം മുമ്പ് കെട്ടിടത്തിനുള്ളിൽ തീയും പുകയും വന്നിരുന്നു. അഗ്നിരക്ഷാസേന എത്തിയാണ് ആസിഡ് നിർവീര്യമാക്കിയത്. കുട്ടമശേരി ഗവ. ഹയർ സെക്കൻഡറി സ്കൂളിലെ ഹൈസ്കൂൾ ക്ലാസ് മുറികളായി പ്രവർത്തിച്ചിരുന്ന രണ്ടു പഴയ കെട്ടിടങ്ങളാണ് പൊളിച്ചു നീക്കേണ്ടത്. രണ്ടാമത്തേതിൽ ക്ലാസുകൾ നടത്തുന്നില്ലെങ്കിലും പരീക്ഷകൾ നടത്താറുണ്ട്. കുട്ടികൾ ഭക്ഷണം കഴിക്കാനും ക്ലാസ് മുറികൾ ഉപയോഗിക്കാറുമുണ്ട്. അതിനിടയിൽ ജില്ലയിലെ വിദ്യാലയങ്ങളുടെ സുരക്ഷാ സംവിധാനങ്ങളെക്കുറിച്ച് ജില്ലാ തല സമിതി വിവരങ്ങൾ ശേഖരിച്ച് തുടങ്ങി. ആലുവ ഉപ വിദ്യാഭ്യാസ ജില്ലയിൽ 40 ഓളം വിദ്യാലയങ്ങളിലാണ് സുരക്ഷാവീഴ്ചകൾ കണ്ടെത്തിയിരിക്കുന്നത്. ഓരോ വിദ്യാലയങ്ങളുടേയും സുരക്ഷാ സംവിധാനങ്ങൾ വിലയിരുത്താനും ഏകോപിപ്പിക്കാനും നോഡൽ ഓഫീസറേയും നിയമിച്ചു തുടങ്ങിയിട്ടുണ്ട്.

മൂവാറ്റുപുഴയിൽ ദേശീയ, സംസ്ഥാനപാതകളിലെ കുഴികൾ നികത്താൻ എംഎൽഎയുടെ നിർദേശം

മൂവാറ്റുപുഴ: നഗരവികസന പ്രവർത്തികൾക്ക് പുറമേ കാലവർഷം ശക്തമായതോടെ മൂവാറ്റുപുഴയിലെ വിവിധ റോഡുകളിൽ കുഴികളും വെള്ളക്കെട്ടുകളും രൂപപ്പെട്ട് സഞ്ചാരയോഗ്യമല്ലാതായിരിക്കുന്നെന്നും ഇവ പരിഹരിക്കുന്നതിന് അടിയന്തര നടപടികൾ സ്വീകരിക്കണമെന്നും അധികൃതരോട് മാത്യു കുഴൽനാടൻ എംഎൽഎ ആവശ്യപ്പെട്ടു. മൂവാറ്റുപുഴ വെള്ളൂർകുന്നത്ത് ദേശീയപാതയിൽ ഐഒസി, എച്ച്പി പന്പിന്‍റെ സമീപത്തും വെള്ളൂർകുന്നം സിഗ്നലിന് സമീപത്തുമുള്ള കുഴികൾ അടയ്ക്കുന്നതിന് നാഷണൽ ഹൈവേ അഥോറിറ്റിയോട് ആവശ്യപ്പെട്ടു. മൂവാറ്റുപുഴ, കച്ചേരിത്താഴം പാലങ്ങളിലും സമീപത്തും വാഹനങ്ങൾ തിരിച്ചുവിടുന്ന റോഡുകളിലും രൂപപ്പെട്ടിരിക്കുന്ന കുഴികൾ അടയ്ക്കുന്നതിന് കെആർഎസ്ബി ഉദ്യോഗസ്ഥർക്കും നിർദേശം നൽകി. അന്പലംപടി വീട്ടൂർ റോഡിലെ കബറിങ്കൽ മസ്ജിദിന് സമീപത്ത് രൂപപ്പെട്ടിരിക്കുന്ന കുഴികളും ഈ ഭാഗത്തെ വെള്ളക്കെട്ടുകൾ ഒഴിവാക്കാനും നിർദേശം നൽകിയിട്ടുണ്ട്. ഈ റോഡിൽ തന്നെ മറ്റു വിവിധ ഇടങ്ങളിലായി രൂപപ്പെട്ടിരിക്കുന്ന കുഴികളും നികത്തി സഞ്ചാരയോഗ്യമാക്കുന്നതിന് വേണ്ടിയുള്ള നടപടികൾ സ്വീകരിക്കാൻ പിഡബ്ല്യുഡി റോഡ് അറ്റകുറ്റപ്പണി വിഭാഗത്തോടും എംഎൽഎ ആവശ്യപ്പെട്ടു.

പലചരക്ക് കടയിൽ മോഷണം

മൂവാറ്റുപുഴ: പി.ഒ ജംഗ്ഷനിലെ വ്യാപാര സ്ഥാപനത്തിൽ മോഷണം. പി.ഒ ജംഗ്ഷനിൽ ആരക്കുഴ റോഡിൽ പലചരക്ക് കട നടത്തുന്ന പേട്ട ഉസയിൽ മൻസിൽ മുഹമ്മദ് ഗുലാം എന്നയാളുടെ സ്ഥാപനത്തിലാണ് ശനിയാഴ്ച രാവിലെ ഏഴോടെ മോഷണം നടന്നത്. കടയുടെ ഷട്ടർ പകുതി താഴ്ത്തി മുഹമ്മദ് ഗുലാം പുറത്തേക്ക് ഇറങ്ങിയതിനുശേഷം മോഷ്ടാവ് അഞ്ച് ലക്ഷം രൂപ അടങ്ങിയ ബാഗും ക്യൂആർകോഡ് സ്കാനർ, ഒരുകുപ്പി വെള്ളം എന്നിവ കവരുകയായിരുന്നു. ക്യൂആർകോഡ് സ്കാനറും കുപ്പിവെള്ളവും മോഷ്ടാവ് സ്ഥപനത്തിന് സമീപത്തുതന്നെ ഉപേക്ഷിച്ച നിലയിൽ കണ്ടെത്തി. മൂവാറ്റുപുഴ പോലീസിൽ പരാതി നൽകിയതിനെതുടർന്ന് പോലീസ് സ്ഥലത്തെത്തി അന്വേഷണം ആരംഭിച്ചു. 27 വർഷമായി പി.ഒ ജംഗ്ഷനിൽ പലചരക്ക് കട നടത്തിവരുകയാണ് മുഹമ്മദ് ഗുലാം.

മരം വീണ് വീട് തകർന്നു

മൂവാറ്റുപുഴ: ശക്തമായ മഴയിലും കാറ്റിലും മരം വീണ് വീട് തകർന്നു. വെള്ളിയാഴ്ച ഉച്ചകഴിഞ്ഞ് രണ്ടോടെയുണ്ടായ ശക്തമായ കാറ്റിലും മഴയിലുമാണ് ആനിക്കാട് കന്പനിപ്പടിയിൽ കോരപ്പിള്ളിൽ ഉമ്മർ വാടകയ്ക്ക് നൽകിയിരിക്കുന്ന വീടിന്‍റെ മുകളിലേക്ക് രണ്ട് തേക്കും ഒരു തെങ്ങും കടപുഴകിവീണത്. മരം വീണതിനെതുടർന്ന് വീടിന്‍റെ രണ്ട് മുറിയും അടുക്കളയും തകർന്നു. അപകടസമയം വാടകക്കാരായ സുനിലിന്‍റെ രണ്ട് മക്കൾ മാത്രമാണ് വീട്ടിലുണ്ടായിരുന്നത്. മരം വീഴുന്നത് കണ്ട് ഇവർ ഓടിമാറിയതിനാൽ വൻ ദുരന്തം ഒഴിവായി. സുനിലും കുടുംബവും തകർന്ന വീടിന്‍റെ ഒരുമുറിയിലാണ് ഇപ്പോൾ താമസിക്കുന്നത്.

കാറ്റിൽ മരം വീണ് ഗതാഗതം തടസപ്പെട്ടു

കോലഞ്ചേരി: ശക്തമായ കാറ്റിലും മഴയിലും മരം വൈദ്യുതി ലൈനിലേക്ക് കടപുഴകി വീണ് ഗതാഗതം തടസപ്പെട്ടു. മഴുവന്നൂർ - മേക്കടമ്പ് റോഡിൽ മഴുവന്നൂർ ഇലഞ്ഞിമലയ്‌ക്ക് സമീപമാണ് മരം വീണത്. ഇന്നലെ ഉച്ചകഴിഞ്ഞ് മൂന്നോടെയായിരുന്നു സംഭവം. പട്ടിമറ്റം അഗ്നിരക്ഷാ നിലയം സ്റ്റേഷൻ ഓഫീസർ എൻ.എച്ച്. അസൈനാരുടെ നേതൃതത്തിൽ സേനാംഗങ്ങളായ കെ.കെ. ശ്യാംജി, എ.എം. സനൂപ്, വി.ജി. വിജിത്ത്കുമാർ, വി.പി. ഗഫൂർ, വി.പി. മിഥുൻ, അഖിൽ ദേവ് എന്നിവർ ചേർന്ന് മരം മുറിച്ച് നീക്കി.

കോതമംഗലം താലൂക്കില്‍ അഞ്ച് വീടുകള്‍ ഭാഗികമായി തകർന്നു, ലക്ഷങ്ങളുടെ കൃഷിനശിച്ചു

കോതമംഗലം: കനത്തമഴയോടൊപ്പം ഉണ്ടായ കാറ്റില്‍ താലൂക്കില്‍ അഞ്ച് വീടുകള്‍ക്ക് ഭാഗികനാശം. ലക്ഷങ്ങളുടെ കൃഷിനാശവും ഉണ്ടായി. തൃക്കാരിയൂര്‍ ഹൈക്കോര്‍ട്ട് കവല ഭാഗത്ത് ചീനിവീട്ടില്‍ രാധയുടെ വീടിന്‍റെ ഒരുഭാഗം കനത്തമഴയില്‍ തകര്‍ന്നുവീണു. നെല്ലിക്കുഴി ചിറപ്പടി പുതിയതൊട്ടിയില്‍ മുത്തുകുഞ്ഞിന്‍റെ വീടിന് മുകളിലേക്ക് മരം കടപുഴകി വീണ് ഓടും ഷീറ്റും മേഞ്ഞ മേല്‍ക്കൂരയും തകര്‍ന്നു. സാധനസാമഗ്രികള്‍ക്കും കേടുപാടുണ്ടായി. വീടിനകം മഴവെള്ളത്തില്‍ നിറഞ്ഞതോടെ വീട്ടുകാര്‍ ബന്ധുവീട്ടിലേക്ക് താമസം മാറി. നെല്ലിക്കുഴി തട്ടുപറമ്പില്‍ ടി.പി. നവാസ് ലൈഫ് പദ്ധതിയില്‍ പണിത വീടിനോട് ചേര്‍ന്ന് നിര്‍മിച്ച് വര്‍ക്ക് ഏരിയ ഭാഗവും മതിലും നിലംപൊത്തി. താഴെയുള്ള മൈലുങ്കല്‍ ജെസി സാബുവിന്‍റെ ശൗചാലയത്തിന് മുകളിലേക്ക് കരിങ്കല്‍ക്കെട്ട് പതിച്ച് ശൗചാലയത്തിനും നാശനഷ്ടം സംഭവിച്ചു. ചെറുവട്ടൂര്‍ മൂലംകുഴിയില്‍ ഷാജിയുടെ വീടിന് മുകളിലേക്ക് റബര്‍ മരം മറിഞ്ഞ് ആസ്ബസ്‌റ്റോസ് ഷീറ്റുകള്‍ക്ക് തകര്‍ന്നു. കോട്ടപ്പടി പാറച്ചാലിപ്പാറ പുത്തന്‍പുരയില്‍ കുട്ടപ്പന്‍റെ വീടീന്‍റെ ഷീറ്റ് മേഞ്ഞ മേല്‍ക്കൂര ഇടിഞ്ഞുവീണു. ചേലാടിന് സമീപം കള്ളാട് പമ്പ്ഹൗസിന് സമീപം ഓട്ടോറിക്ഷയ്‌ക്ക് മീതെ മരം മറിഞ്ഞ വീണു. photo: കനത്തമഴയിൽ നെല്ലിക്കുഴി തട്ടുപറമ്പില്‍ ടി.പി. നവാസ് ലൈഫ് പദ്ധതിയില്‍ പണിത വീടിനോട് ചേര്‍ന്ന് നിര്‍മിച്ച വര്‍ക്ക് ഏരിയ ഭാഗവും മതിലും നിലംപൊത്തിയ നിലയിൽ.

മൂവാറ്റുപുഴയാർ നിറയുന്നു : വെള്ളപ്പൊക്ക ഭീഷണിയിൽ താഴ്ന്ന പ്രദേശങ്ങൾ

മൂവാറ്റുപുഴ: ജില്ലയുടെ കിഴക്കൻ മേഖലയിൽ മഴ കനത്തതോടെ മൂവാറ്റുപുഴയാറ്റിൽ ജലനിരപ്പ് ഉയർന്നു.ഇതോടെ താഴ്ന്ന പ്രദേശങ്ങളിൽ വെള്ളപ്പൊക്ക ഭീഷണിയും. ശനിയാഴ്ച പുലർച്ചെ മുതൽ മഴ ശക്തിയായതോടെ മൂവാറ്റുപുഴയാറിന്‍റെ കൈവഴികളായ കാളിയാർ, തോടുപുഴ, കോതമംഗലം ആറുകളിൽ ജലനിരപ്പ് ഉയർന്നിരുന്നു. മഴ തുടർന്നാൽ മൂവാറ്റുപുഴ നഗരത്തിലെ താഴ്ന്ന പ്രദേശങ്ങൾ അടക്കം വെള്ളത്തി നടിയിലാകും. പുഴക്കര കാവ് കടവു മുതൽ ലതാ പാലം വരെയുള്ള പുഴയോര നടപ്പാതകളും കുളികടവുകളും വെള്ളത്തിൽ മുങ്ങി. മലങ്കര ഡാമിന്‍റെ ആറ് ഷ‌ട്ടറുകൾ ഉയർത്തിയതോടെ തൊടുപുഴയാറിൽ ജലനിരപ്പ് ക്രമാതീതമായി ഉയർന്നു. മേഖലയിലെ ചെറുതോടുകളും പുഴകളും പാടശേഖരങ്ങളും താഴ്ന്ന പ്രദേശങ്ങളിലും വെള്ളം ഉയരുകയാണ്. ഉയർന്ന പ്രദേശങ്ങളിൽ മണ്ണിടിച്ചിൽ ഭീഷണിയും നിലനിൽക്കുന്നുണ്ട്. 2018ലും 19ലും 20ലും ഉണ്ടായ പ്രളയത്തിൽ മൂവാറ്റുപുഴയിൽ വ്യാപക നാശനഷ്ടം സംഭവിച്ചിരുന്നു. വാണിജ്യ മേഖലയിൽ കോടികളുടെ നഷ്ടമാണ് ഉണ്ടായത്. നൂറുകണക്കിന് കുടുംബങ്ങളെ മാറ്റി പാർപ്പിക്കേണ്ടിവന്നു. മഴ കനക്കുമെന്ന് മുന്നറിയിപ്പ് വന്നതോടെ റവന്യൂ വകുപ്പും തദ്ദേശ സ്വംയംഭരണ സ്ഥാപനങ്ങളും കനത്ത ജാഗ്രതയിലാണ്. താലൂക്ക് ഓഫീസിൽ 24 മണിക്കൂറും പ്രവർത്തിക്കുന്ന കൺട്രോൾ റൂം തുറന്നിട്ടുണ്ട്. അഗ്നിശമനസേനയും പോലീസും സന്നദ്ധസംഘടനകളും ഏതു സാഹചര്യവും നേരിടുന്നതിനുള്ള ഒരുക്കങ്ങൾ പൂർത്തിയാക്കിയിട്ടുണ്ട്.

ശക്തമായ മഴ: കോലഞ്ചേരി ടൗണിൽ വെള്ളക്കെട്ട് രൂക്ഷം

കോലഞ്ചേരി: ഇന്നലെ പെയ്ത ശക്തമായ മഴയിൽ കോലഞ്ചേരി ടൗണിൽ വെള്ളക്കെട്ട് രൂപപ്പെട്ടു. കൊച്ചി-ധനുഷ്കോടി ദേശീയപാതയിലെ കോലഞ്ചേരി മെഡിക്കൽ കോളജ് ജംഗ്ഷനിലാണ് വ്യാപാര സ്ഥാപനങ്ങളോട് ചേർന്ന് റോഡിൽ വെള്ളക്കെട്ട് രൂപപ്പെട്ടത്. ദേശീയ പാതയിൽ കോലഞ്ചേരിക്കടുത്തുള്ള കടാതിയിലും കാൽനട, ടൂവീലർ, കാർ യാത്രികർക്ക് ബുദ്ധിമുട്ടുണ്ടാക്കി വെള്ളം റോഡിൽ ഉയർന്നിരുന്നു.

പൂയംകുട്ടി പുഴയിൽ ജലനിരപ്പ് ഉയർന്നു; മണികണ്ഠൻചാൽ ചപ്പാത്ത് മുങ്ങി

കോതമംഗലം: ശക്തമായ മഴയെതുടർന്ന് പൂയംകുട്ടി പുഴയിൽ ജലനിരപ്പ് ഉയർന്ന് മണികണ്ഠൻചാൽ ചപ്പാത്ത് വെള്ളത്തിനടിയിലായി. കുടമുണ്ട പാലവും വെള്ളം മുക്കി. മഴ നാടെങ്ങും ആശങ്ക വിതയ്‌ക്കുകയാണ്. വെള്ളപ്പൊക്കഭീതിയും ഉയരുന്നുണ്ട്. പുഴകളും തോടുകളും കരകവിയാവുന്ന അവസ്ഥയിലാണ്. പുഴകൾക്ക് ചേർന്നുള്ള താഴ്ന്ന പ്രദേശങ്ങളിൽ വെളളം കയറിയി. കുട്ടന്പുഴ പഞ്ചായത്തിലെ മണികണ്ഠൻചാലിലും അട്ടിക്കളത്തും വീടുകൾക്ക് സമീപംവരെ വെള്ളമെത്തി. മഴ ശക്തമായി തുടർന്നാൽ വീടുകളിൽ വെള്ളം കയറും. തങ്കളം ജവഹർ നഗർ ഉൾപ്പടെ വെള്ളം കയറാനുള്ള സാധ്യതയുള്ള പ്രദേശങ്ങൾ അധികൃതർ നിരീഷിക്കുന്നുണ്ട്. ആവശ്യമെങ്കിൽ ദുരിതാശ്വാസ ക്യാന്പുകൾ തുറക്കുമെന്നും തഹസിൽദാർ അറിയിച്ചു. പൂയംകുട്ടി പുഴയിൽ ജലനിരപ്പ് ഉയർന്നതിനാൽ മണികണ്ഠൻചാൽ ചപ്പാത്ത് വെള്ളത്തിനടിയിലായി. ഇതുവഴിയുള്ള യാത്ര മുടങ്ങിയതോടെ ആദിവാസി ഉന്നതികളും മണികണ്ഠൻചാലും ഒറ്റപ്പെട്ടു. ബ്ലാവന കടവിലെ ജങ്കാറും നിർത്തിവച്ചിരിക്കുകയാണ്. കോതമംഗലം പുഴയിലും കുരൂർ തോട്ടിലും ജലനിരപ്പ് ഉയർന്നു. കൃഷിയിടങ്ങളിൽ വെള്ളം കയറിയിട്ടുണ്ട്. കുടമുണ്ട പാലത്തിൽ വെള്ളം കയറിയത് യാത്ര ദുരിതത്തിലാക്കി. കീരന്പാറ പഞ്ചായത്തിലെ പാലമറ്റത്ത് റോഡിലേക്ക് മരം വീണ് ഗതാഗതം തടസപ്പെട്ടു. അഗ്നിരക്ഷാസേനയെത്തിയാണ് മരം നീക്കിയത്. നേര്യമംഗലം വില്ലാഞ്ചിറയിൽ മരം റോഡിലേക്ക് വീണതുമൂലം ഗതാഗത തടസമുണ്ടായി. ഇവിടെ നേരിയ മണ്ണിടിച്ചിലും ഉണ്ടായിട്ടുണ്ട്. നേര്യമംഗലം - അടിമാലി റോഡിലും മരം വീഴ്ചയും മണ്ണിടിച്ചിലും ഉണ്ടായി. ഈ ദിവസങ്ങളിലെ മഴക്കെടുതിയിൽ താലൂക്കിലെ മൂന്ന് വീടുകൾക്ക് ഭാഗമായി നാശനഷ്ടമുണ്ടായെന്ന് തഹസിൽദാർ അറിയിച്ചു. തൃക്കാരിയൂർ, കോട്ടപ്പടി, ഇരമല്ലൂർ വില്ലേജുകളിലാണ് വീടുകൾക്ക് നാശം നേരിട്ടത്.

കെപിഒഎ തെരഞ്ഞെടുപ്പ്; വെല്‍ഫെയര്‍ അസോസിയേഷനു വിജയം

കൊച്ചി: കേരളാ പോലീസ് ഓഫീസേഴ്‌സ് കൊച്ചി സിറ്റി ജില്ലാ കമ്മറ്റിയുടെ 2025 - 2027 വര്‍ഷത്തേക്കുള്ള തെരഞ്ഞെടുപ്പില്‍ ഔദ്യോഗിക പാനലിനെതിരെ മല്‍സരിച്ച കെപിഎ മുന്‍ സംസ്ഥാന നിര്‍വാഹക സമിതിയംഗം സാം തോമസ്, കെപിഎ മുന്‍ ജില്ലാ ട്രഷര്‍ ജോസ് ആന്‍റണി, മുന്‍ ജില്ലാ കമ്മറ്റി അംഗം ആര്‍. വിനോദ് , റെജി മോന്‍ എന്നിവര്‍ക്ക് ജയം. ഡിഎച്ച്ക്യുവില്‍ നാല്, ഹില്‍പാലസ്, ഇന്‍ഫോപാര്‍ക്ക്, കളമശേരി, ക്രൈംബ്രാഞ്ച് എന്നിവിടങ്ങളില്‍ ഓരോ സീറ്റു വീതവും വെല്‍ഫെയര്‍ അസോസിയേഷന്‍ പ്രതിനിധികള്‍ നേടി. എറണാകുളം റൂറല്‍ ജില്ലയില്‍ 23 സീറ്റില്‍ മത്സരമുണ്ടായി. അതില്‍ 14 സീറ്റിലും ഔദ്യോഗിക അസോസിയേഷന്‍ പരാജയപ്പെട്ടു. എഎസ്‌ഐ സതീശന്‍ കെപിഒഎ ജില്ലാ സെക്രട്ടറി ഷാജിമോനെ പരാജയപ്പെടുത്തി. ആലുവ സബ് ഡിവിഷനില്‍ ഔദ്യോഗിക പക്ഷത്തെ പരാജയപ്പെടുത്തി ഭൂരിപക്ഷം സീറ്റിലും വെല്‍ഫയര്‍ അസോസിയേഷന്‍ വിജയിച്ചുവെന്ന് ഭാരവാഹികള്‍ അറിയിച്ചു.

ശ്രീഹരി സുകേഷിന് അന്ത്യാഞ്ജലി

തൃപ്പൂണിത്തുറ: പരിശീലന പറക്കലിനിടെ കാനഡയിൽ വിമാനം തകർന്ന് വീണ് മരിച്ച ശ്രീഹരി സുകേഷിന് അന്ത്യാഞ്ജലി. രാവിലെ നെടുമ്പാശേരി വിമാനത്താവളത്തിലെത്തിച്ച മൃതദേഹം, ഉച്ചയോടെ തൃപ്പൂണിത്തുറ സ്റ്റാച്ച്യു ജംഗ്ഷനടുത്തുള്ള കൃഷ്ണാ എൻക്ലേവിലെ ഫ്ലാറ്റിൽ പൊതുദർശനത്തിന് വച്ചു. പ്രഫ. കെ.വി. തോമസ്, ഹൈബി ഈഡൻ എംപി, നഗരസഭാധ്യക്ഷ രമ സന്തോഷ് തുടങ്ങിയവർ അന്ത്യാഞ്ജലിയർപ്പിച്ചു. വൈകിട്ട് 4.30 ഓടെ മൃതദേഹം വീട്ടിൽ നിന്നും തൃപ്പൂണിത്തുറ പൊതുശ്മശാനത്തിലെത്തിച്ചു. അഞ്ചോടെ സംസ്കാരം നടത്തി. കഴിഞ്ഞ എട്ടിനാണ് കാനഡയിലെ മാനിടോബയിൽ സ്റ്റെൻബാക് സൗത്ത് എയർപോർട്ടിനടുത്ത് വച്ച് സഹപാഠിയുടെ വിമാനവും ശ്രീഹരിയുടെ വിമാനവും കൂട്ടിയിടിച്ചത്.

ടിപ്പർലോറി തോട്ടിലേക്ക് മറിഞ്ഞു

അരൂർ: എരമല്ലൂരിൽ കോൺക്രീറ്റ് കട്ടയുമായി വന്ന ടിപ്പർ ലോറി തോട്ടിലേക്ക് മറിഞ്ഞു. ഇന്നലെ വൈകുന്നേരം മൂന്നോടെ എരമല്ലൂർ പുതുശേരി കോളനി റോഡിൽ കുറുക്കച്ചം പറമ്പ് തോടിന് കുറകെ പൈപ്പ് സ്ഥാപിച്ചു നിർമിച്ച കലുങ്ക് തകർന്നാണ് ലോറി മറിഞ്ഞത്. റോഡിനടിയിലൂടെ മണ്ണൊലിപ്പ് ഉണ്ടായിരുന്നതാണ് അപകടത്തിന് കാരണം. ലോഡുമായെത്തിയ ലോറി മറിഞ്ഞെങ്കിലും ഡ്രൈവർക്ക് പരിക്കേറ്റില്ല.

വൈപ്പിനിൽ കടൽക്ഷോഭം ശക്തമായി

വൈപ്പിൻ : കാറ്റും മഴയും ശക്തമായതിനെ തുടർന്ന് വൈപ്പിൻ തീരത്ത് കടൽക്ഷോഭവും ശക്തമായി. എടവനക്കാട് പഴങ്ങാട് കടപ്പുറത്ത് നിരവധി വീടുകളിൽ വെള്ളം കയറി. പഞ്ചായത്ത് റവന്യൂ അധികൃതരെയും ജില്ലാ കളക്ടറെയും വിവരമറിയിച്ചു. ഉദ്യോഗസ്ഥരും അഗ്നിശമന സേനയും സ്ഥലത്തെത്തി. താത്കാലിക ക്യാമ്പിനായി രണ്ട് സ്കൂളുകൾ സജ്ജമാക്കിയെങ്കിലും ദുരിതബാധിതർ ക്യാമ്പിലേക്ക് വരാൻ സന്നദ്ധരായില്ല. ഇന്നലത്തെ മഴയിലും കാറ്റിലും നായരമ്പലം , എടവനക്കാട്, കുഴുപ്പിള്ളി, പള്ളിപ്പുറം, മേഖലകളിലും കടൽ കയറി. ചെറായി കാറ്റാടി ബീച്ച് ഭാഗത്തും വീടുകളിലും ഹോം സ്റ്റേകളിലും കടൽ കയറി. ഇവിടെ തീരദേശ റോഡ് മണൽ മൂടി ഗതാഗതം തടസപ്പെട്ടു കിടക്കുകയാണ്. തകർന്നു കിടക്കുന്ന കടൽ ഭിത്തിക്ക് ഇടയിലൂടെയാണ് കടൽവെള്ളം അടിച്ചു കയറുന്നത്. തിരകളെ തടുക്കാൻ എടവനക്കാട് നായരമ്പലം ഭാഗങ്ങളിൽ ഈയടുത്ത് ലക്ഷങ്ങൾ ചെലവഴിച്ച് സ്ഥാപിച്ച താത്കാലിക സംവിധാനമായ ജിയോ ബാഗുകൾ പലയിടത്തും ഒലിച്ചുപോയി. ലക്ഷങ്ങൾ മുടക്കി നിർമിച്ച തീരദേശ റോഡിനും പലയിടത്തും കേടുപാടുകൾ സംഭവിച്ചിട്ടുണ്ട്.

ട്വന്‍റി 20യുടെ പ്രതിഷേധ മനുഷ്യച്ചങ്ങല ഇന്ന്

കിഴക്കമ്പലം: കിഴക്കമ്പലം -പോഞ്ഞാശേരി പിബ്ല്യുഡി റോഡ് സഞ്ചാരയോഗ്യമാക്കണമെന്നാവശ്യപ്പെട്ട് ട്വന്‍റി 20 യുടെ നേതൃത്വത്തിൽ ഇന്നു വൈകുന്നേരം നാലിന് തൈക്കാവ് മുതൽ കിഴക്കമ്പലം വരെ പ്രതിഷേധ മനുഷ്യ ചങ്ങല തീർക്കും. പോഞ്ഞാശേരി റോഡ് കുണ്ടും കുഴിയുമായി സഞ്ചാരയോഗ്യമല്ലാതായിട്ട് നാലുവർഷമായതായി പാർട്ടി ആരോപിച്ചു. പിബ്ല്യുഡി യുടെ ഉടമസ്ഥതയിൽ പെട്ട ഈ റോഡിൽ കിഴക്കമ്പലം പഞ്ചായത്തിന് യാതൊരു അധികാരവുമില്ലന്ന വസ്തുത മറച്ചുവെച്ചുകൊണ്ട് ട്വന്‍റി 20 ഭരണം മോശമാണെന്ന് വരുത്തി തീർക്കാനാണ് സ്ഥലം എംഎൽഎയുടെയും സിപിഎമ്മിന്‍റെയും ശ്രമമെന്ന് ട്വന്‍റി 20 ആരോപിച്ചു. കിഴക്കമ്പലം മുതൽ തൈക്കാവ് വരെ മൂന്ന് കിലോമീറ്ററോളമാണ് മനുഷ്യച്ചങ്ങല തീർക്കുന്നത്. സഞ്ചാരയോഗ്യമായ റോഡ് ജനങ്ങളുടെ അവകാശമാണെന്നും ആരുടെയും ഔദാര്യമല്ലെന്നും പാർട്ടി പ്രസിഡന്‍റ് സാബു എം. ജേക്കബ് പ്രസ്താവനയിൽ അറിയിച്ചു. മനുഷ്യച്ചങ്ങലയ്ക്ക് പാർട്ടി സംസ്ഥാന ചെയർമാൻ ബോബി എം. ജേക്കബ്, വൈസ് പ്രസിഡന്‍റ് വി. ഗോപകുമാർ, നേതാക്കളായ അഡ്വ. ചാർളി പോൾ ,ജിബി എബ്രഹാം, ജിന്‍റോ ജോർജ്, ദീപക് രാജൻ, അഗസ്റ്റിൻ ആന്‍റണി തുടങ്ങിയവർ നേതൃത്വം നല്കും. ശോച്യാവസ്ഥയ്ക്കു കാരണം പഞ്ചായത്തെന്ന് എംഎൽഎ കിഴക്കമ്പലം : കഴിഞ്ഞ നാലു വർഷമായി കുണ്ടും കുഴിയുമായി കിടക്കുന്ന കിഴക്കമ്പലം പോഞ്ഞാശേ രി പിഡബ്ല്യു റോഡിന്‍റെ ശോച്യാവസ്‌ഥ തുടരുന്നതിന് കാരണം കിഴക്കമ്പലം ഗ്രാമപഞ്ചായത്ത് ഭരണസമിതിയുടെ ഇടപെടലാണെന്ന് പി.വി. ശ്രീനിജൻ എംഎൽഎ വാർത്താ സമ്മേളനത്തിൽ ആരോപിച്ചു. റോഡുമായി ബന്ധപ്പെട്ട നിർമാണവും ടെൻഡർ നടപടികളും കോടതിയും കേസും റോഡ് നന്നാക്കാനുള്ള അനിശ്ചിതത്വത്തിന് കാരണമായതായും എംഎൽഎ ആരോപിച്ചു.

മണ്ണ് ഇടിഞ്ഞു: തേവക്കലിൽ വീടു തകർന്നു

ആലുവ: മണ്ണ് ഇടിഞ്ഞു വീണ് വീടിന്‍റെ കിടപ്പ് മുറിയും അടുക്കളയും ഭാഗികമായി തകർന്നു. എടത്തല പഞ്ചായത്ത് കൈലാസ നഗറിൽ തിരുവല്ലം റോഡിൽ തേവക്കൽ കാത്താംമ്പുറം വീട്ടിൽ ലൈജുവിന്‍റെ വീട്ടിലേക്കാണ് ഉയരത്തിൽ നിന്ന് മണ്ണ് ഇടിഞ്ഞ് വീണത്. ഇന്നലെ ഉച്ചകഴിഞ്ഞ് 3.30നാണ് സംഭവം. കിടപ്പ് മുറിയിൽ ഉറങ്ങി കിടന്ന ലൈജു ഭാഗ്യം കൊണ്ടാണ് രക്ഷപ്പെട്ടത്. വീടിന്‍റെ ഭിത്തി തകർത്താണ് അകത്തേക്ക് മണ്ണ് ഇടിച്ചു കയറിയത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact editor@deepika.com