12

ന്യൂഡൽഹി: ഇന്ത്യയും യുഎഇയും തമ്മിലുള്ള തന്ത്രപ്രധാനമായ പങ്കാളിത്തം കൂടുതൽ ശക്തമാക്കുന്നതിന്‍റെ ഭാഗമായി അബുദാബി കിരീടാവകാശി ഷേഖ് ഖാലിദ് ബിൻ മുഹമ്മദ് ബിൻ സായിദ് അൽ നഹ്യാൻ പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തി.

ഇരുരാജ്യങ്ങളും തമ്മിലുള്ള ദീർഘകാല സുഹൃദ്ബന്ധം കൂടുതൽ ഉയരങ്ങളിലേക്ക് എത്തിക്കുന്നതിനെക്കുറിച്ചും സാമ്പത്തിക, ഊർജ രംഗങ്ങളിലെ സഹകരണം വ്യാപിപ്പിക്കുന്നതിനെക്കുറിച്ചും നേതാക്കൾ ചർച്ച ചെയ്തു.

കൂടിക്കാഴ്ചയ്ക്കിടെ യുഎഇ പ്രസിഡന്‍റ് ഷേഖ് മുഹമ്മദ് ബിൻ സായിദ് അൽ നഹ്യാന്‍റെ ആശംസകൾ കിരീടാവകാശി പ്രധാനമന്ത്രിക്ക് കൈമാറി. ഇന്ത്യയുടെയും ഇവിടുത്തെ ജനങ്ങളുടെയും സർവതോമുഖമായ പുരോഗതിക്കും ഐശ്വര്യത്തിനും വേണ്ടിയുള്ള യുഎഇ ഭരണാധികാരിയുടെ സന്ദേശവും അദ്ദേഹം അറിയിച്ചു.

പതിനെട്ടാമത് ബ്രിക്സ് ഉച്ചകോടിയുടെ ഭാഗമായാണ് നിർണായകമായ ഈ കൂടിക്കാഴ്ച സംഘടിപ്പിച്ചത്. അന്താരാഷ്ട്ര തലത്തിലുള്ള പരസ്പര സഹകരണവും പ്രാദേശിക വിഷയങ്ങളും ചർച്ചയിൽ ഇടംപിടിച്ചു. സാമ്പത്തിക നിക്ഷേപങ്ങൾ, സാങ്കേതികവിദ്യ, സുരക്ഷാ സഹകരണം തുടങ്ങിയ നിർണായക മേഖലകളിൽ പുതിയ പങ്കാളിത്ത അവസരങ്ങൾ തുറക്കുന്നതിനെക്കുറിച്ചും ഇരുനേതാക്കളും ആശയവിനിമയം നടത്തി.

Tags : AbuDhabi Prince NarendraModi Deepika DeepikaNewspaper BreakingNews NewsUpdate