മുംബൈ: ജനപ്രിയ മെസേജിംഗ് ആപ്പായ വാട്സ് ആപ്പിൽ ഉപയോക്താക്കൾക്കായി ആദ്യമായി പെയ്ഡ് സബ്സ്ക്രിപ്ഷൻ പ്ലാൻ അവതരിപ്പിച്ച് മെറ്റ. ‘വാട്സ്ആപ്പ് പ്ലസ്’ എന്ന് പേരിട്ടിരിക്കുന്ന ഈ ഓപ്ഷണൽ പ്രീമിയം പ്ലാൻ ഇന്ത്യയിൽ പ്രതിമാസം 79 രൂപ നിരക്കിലാണ് ലഭ്യമാകുക. ആപ്പിന്റെ അടിസ്ഥാന മെസേജിംഗ്, കോളിംഗ് സേവനങ്ങൾ പൂർണമായും സൗജന്യമായി തുടരുമെന്നും, കൂടുതൽ പേഴ്സണലൈസേഷൻ ആഗ്രഹിക്കുന്നവർക്കു മാത്രമായുള്ളതാണ് ഈ പ്ലാനെന്നും കന്പനി വ്യക്തമാക്കി.
പ്രധാന പ്രീമിയം ഫീച്ചറുകൾ
18 എക്സ്ക്ലൂസീവ് തീമുകൾ: വൈബ്രന്റ് ബ്ലൂ, റോയൽ പർപ്പിൾ, ഫോറസ്റ്റ് ഗ്രീൻ, ഫ്യൂഷിയ പിങ്ക് ഉൾപ്പെടെയുള്ള 18 ആകർഷകമായ നിറങ്ങളിൽ വാട്സ് ആപ്പിന്റെ പശ്ചാത്തലവും ചാറ്റ് ബബിളുകളും മാറ്റാം.
14 ആപ്പ് ഐക്കണുകൾ: വാട്സാപ്പിന്റെ പരന്പരാഗത പച്ച ലോഗോയ്ക്കു പകരം ഹോം സ്ക്രീനിൽ ഉപയോഗിക്കാൻ വൈവിധ്യമാർന്ന 14 ഡിസൈനുകളിലുള്ള പുതിയ ഐക്കണുകൾ.
20 ചാറ്റുകൾ വരെ പിൻ ചെയ്യാം: സാധാരണ വാട്സ്ആപ്പിൽ പരമാവധി മൂന്നു ചാറ്റുകൾ മാത്രമേ മുകളിൽ പിൻ ചെയ്തു വയ്ക്കാൻ സാധിക്കൂ. എന്നാൽ വാട്സ് ആപ്പ് പ്ലസ് ഉപയോക്താക്കൾക്ക് പ്രധാനപ്പെട്ട 20 ചാറ്റുകൾ വരെ ഇങ്ങനെ സൂക്ഷിക്കാം.
പുതിയ റിംഗ്ടോണുകളും സ്റ്റിക്കറുകളും: ഫ്ലട്ടർ, റിപ്പിൾ, മെഡോ തുടങ്ങിയ പേരുകളിലുള്ള 10 പ്രീമിയം നോട്ടിഫിക്കേഷൻ സൗണ്ടുകളും റിംഗ്ടോണുകളും കൂടാതെ പ്രത്യേക സ്റ്റിക്കർ പാക്കുകളും ലഭിക്കും.
അഡ്വാൻസ്ഡ് ചാറ്റ് ലിസ്റ്റ്: ചാറ്റ് ലിസ്റ്റുകൾ സ്വന്തം താത്പര്യപ്രകാരം കൂടുതൽ എളുപ്പത്തിൽ ക്രമീകരിക്കാനുള്ള സൗകര്യം. സൗജന്യമായി തുടരുന്ന സേവനങ്ങൾ ഈ പെയ്ഡ് സബ്സ്ക്രിപ്ഷൻ വാട്സ്ആപ്പിന്റെ പ്രധാന പ്രവർത്തനങ്ങളെ ഒരു തരത്തിലും ബാധിക്കില്ലെന്ന് മെറ്റ ഉറപ്പു നൽകുന്നു.
എൻഡ്-ടു-എൻഡ് എൻക്രിപ്റ്റഡ് മെസേജിംഗ്, വോയ്സ് - വീഡിയോ കോളുകൾ, ചാനൽസ്, സ്റ്റാറ്റസ് അപ്ഡേറ്റ്സ്, ഫയൽ ഷെയറിംഗ് തുടങ്ങിയ എല്ലാ സുരക്ഷാ സ്വകാര്യതാ ഫീച്ചറുകളും സാധാരണ ഉപയോക്താക്കൾക്ക് എപ്പോഴും സൗജന്യമായിത്തന്നെ തുടരും. നിലവിൽ പുതിയ ഉപയോക്താക്കൾക്ക് ഒരു മാസത്തെ സൗജന്യ ട്രയലും കന്പനി വാഗ്ദാനം ചെയ്യുന്നുണ്ട്.
സബ്സ്ക്രൈബ് ചെയ്യേണ്ടത് എങ്ങനെ?
ഫിക്സഡ് ഫീച്ചറുകളുള്ള ഈ പ്ലാൻ താഴെ പറയുന്ന രീതിയിൽ ആക്ടിവേറ്റ് ചെയ്യാം.-നിങ്ങളുടെ ആൻഡ്രോയിഡ് അല്ലെങ്കിൽ ഐഫോണിൽ വാട്സ്ആപ്പ് തുറന്ന് സെറ്റിംഗ്സിലേക്കു പോവുക.
-സെറ്റിംഗ്സിൽ കാണുന്ന സബ്സ്ക്രിപ്ഷൻ എന്ന ഓപ്ഷൻ ക്ലിക്ക് ചെയ്ത് വാട്സ്ആപ്പ് പ്ലസ് സെലക്ട് ചെയ്യുക.
-പേമെന്റ് പൂർത്തിയാക്കുക (പ്രതിമാസം 79 രൂപ).
Tags :