28

രാജസ്ഥാനിലെ നാഗൗർ ജില്ലയിലുള്ള ഒരു സർക്കാർ വിദ്യാലയത്തിൽ നിന്നും പുറത്തുവന്ന ദൃശ്യങ്ങൾ വിദ്യാഭ്യാസ മേഖലയെ ഒന്നടങ്കം ഞെട്ടിച്ചിരിക്കുകയാണ്.

റിയാംബി സബ് ഡിവിഷനിലെ ദാസവാസ് ഗവൺമെന്‍റ് ഹയർ പ്രൈമറി സ്കൂളിൽ ഉച്ചഭക്ഷണത്തിന് ശേഷം വിദ്യാർഥികളെക്കൊണ്ട് ഭാരമേറിയ പാത്രങ്ങൾ ചുമപ്പിച്ചതാണ് വിവാദത്തിന് കാരണമായത്.

കുട്ടികൾക്ക് പോഷകാഹാരവും വിശ്രമവും ഉറപ്പാക്കേണ്ട സമയത്ത് അവരെക്കൊണ്ട് നിർബന്ധിതമായി ജോലി ചെയ്യിപ്പിക്കുകയായിരുന്നു. ഈ സംഭവത്തിന്‍റെ വീഡിയോ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചതോടെയാണ് അധികൃതർ വിവരം അറിയുന്നത്.

സ്കൂളിലെ അധ്യാപകരുടെ ഭാഗത്തുനിന്നുണ്ടായ ഗുരുതരമായ അനാസ്ഥയാണ് ഈ ദൃശ്യങ്ങളിൽ പ്രകടമാകുന്നത്. സ്കൂളിൽ ഏഴ് അധ്യാപകർ ഹാജരുണ്ടായിരുന്ന സമയത്താണ് ഈ സംഭവം നടന്നതെന്നത് പ്രതിഷേധാർഹമാണ്.

ഇതിൽ നാല് അധ്യാപകർ മുറിക്കുള്ളിൽ വിശ്രമിക്കുകയായിരുന്നുവെന്നും, പ്രധാനാധ്യാപകൻ സോഹൻലാൽ ഫദോദ കുട്ടികൾ ജോലി ചെയ്യുന്നത് കണ്ടിട്ടും ഇടപെടാതെ നോക്കി ഇരിക്കുകയായിരുന്നുവെന്നും ദൃശ്യങ്ങൾ വ്യക്തമാക്കുന്നു.

മാത്രമല്ല, ഇത് ഒരു ദിവസത്തെ മാത്രം കാര്യമല്ലെന്നും വിദ്യാലയത്തിലെ പതിവ് രീതിയാണെന്നും വിദ്യാർഥികൾ തന്നെ സാക്ഷ്യപ്പെടുത്തുന്നു. സംഭവം വിവാദമായതോടെ പ്രാദേശിക ഭരണകൂടം കർശന നടപടികളിലേക്ക് നീങ്ങിയിട്ടുണ്ട്.

എസ്.ഡി.എം സൂര്യകാന്ത് ശർമ്മയുടെ നേതൃത്വത്തിൽ പരാതിയിന്മേൽ വിശദമായ അന്വേഷണം ആരംഭിച്ചു. മാധ്യമ വാർത്തകളുടെ അടിസ്ഥാനത്തിൽ അന്വേഷണ സമിതി രൂപീകരിച്ചതായും കുറ്റക്കാരായ അധ്യാപകർക്കെതിരെ വിട്ടുവീഴ്ചയില്ലാത്ത നടപടി സ്വീകരിക്കുമെന്നും ചീഫ് ഡെവലപ്‌മെന്‍റ് ഓഫീസർ രാംലാൽ കരാടി അറിയിച്ചു.

ഭാവിയിൽ ഇത്തരം മനുഷ്യാവകാശ ലംഘനങ്ങൾ ആവർത്തിക്കാതിരിക്കാൻ കൃത്യമായ നിരീക്ഷണ സംവിധാനങ്ങൾ ഏർപ്പെടുത്തുമെന്നും അദ്ദേഹം ഉറപ്പുനൽകി.

Tags : RajasthanNews Nagaur BreakingNews EducationAlert GovernmentSchool