പ്ലാസിഡച്ചന്‍ സഭയുടെ കത്തിജ്വലിക്കുന്ന വിളക്ക്: മാര്‍ വാണിയപ്പുരയ്ക്കല്‍ : Deepika.com Nattu Visesham

KOTTAYAM

പ്ലാസിഡച്ചന്‍ സഭയുടെ കത്തിജ്വലിക്കുന്ന വിളക്ക്: മാര്‍ വാണിയപ്പുരയ്ക്കല്‍

Monday, April 29, 2024 7:28 AM IST

ചങ്ങനാശേരി: സഭയുടെ കത്തിജ്വലിക്കുന്ന വിളക്കും സഭയുടെ വളര്‍ച്ചയില്‍ കഠിനാധ്വാനം ചെയ്ത മഹാത്മാവുമായിരുന്നു പ്ലാസിഡച്ചനെന്ന് സീറോ മലബാര്‍ കൂരിയ ബിഷപ് മാര്‍ സെബാസ്റ്റ്യന്‍ വാണിയപ്പുരയ്ക്കല്‍.

പുണ്യശ്ലോകനായ റവ. ഡോ. പ്ലാസിഡ് ജെ. പൊടിപ്പാറ സിഎംഐയുടെ 39-ാം ചരമവാര്‍ഷിക ദിനാചരണത്തില്‍ സന്ദേശം നല്‍കുകയായിരുന്നു ബിഷപ്. പ്ലാസിഡച്ചന്‍റെ പുസ്തകങ്ങള്‍ വായിച്ച് ഇന്ന് അനേകര്‍ക്ക് സഭയെ സ്നേഹിക്കാന്‍ കഴിയുന്നുണ്ടെന്നും അദ്ദേഹം പറഞ്ഞു.

പ്ലാസിഡച്ചന്‍റെ ഭൗതികശരീരം അന്ത്യവിശ്രമം കൊള്ളുന്ന ചെത്തിപ്പുഴ തിരുഹൃദയ ആശ്രമ ദേവാലയത്തില്‍ നടന്ന ആഘോഷമായ പരിശുദ്ധ കുര്‍ബാനയില്‍ കാര്‍മികത്വം വഹിച്ചു പ്രസംഗിക്കുകയായിരുന്നു കൂരിയ ബിഷപ്.

സിഎംഐ തിരുവനന്തപുരം സെന്‍റ് ജോസഫ് പ്രൊവിന്‍ഷ്യല്‍ ഫാ. ആന്‍റണി ഇളന്തോട്ടം, ചെത്തിപ്പുഴ ആശ്രമ ദേവാലയ സുപ്പീരിയര്‍ ഫാ. തോമസ് കല്ലുകളം എന്നിവര്‍ സഹകാര്‍മികരായിരുന്നു. തുടര്‍ന്ന് കബറിടത്തിങ്കല്‍ പ്രാര്‍ഥന ശുശ്രൂഷയും നടത്തി. ഫാ. ജോമോന്‍ പുത്തന്‍പുര, ഫാ. ജോജോ പതിനേഴില്‍ചിറ, പ്ലാസിഡ് ഫോറം സെക്രട്ടറി ജോണിക്കുട്ടി സ്‌കറിയ തുടങ്ങിയവര്‍ നേതൃത്വം നല്‍കി.