സംസ്കാരത്തിനുമേലുള്ള ജനങ്ങളുടെ അവകാശത്തെ കവർന്നെടുക്കാൻ ശ്രമം: എം.എ. ബേബി
കണ്ണൂർ: സംസ്കാരത്തിനു മേലുള്ള ജനങ്ങളുടെ അവകാശത്തെ കവർന്നെടുക്കാനാണ് ഇന്ത്യൻ ഭരണാധികാരികൾ ശ്രമിക്കുന്നതെന്നു സിപിഎം പോളിറ്റ് ബ്യൂറോ അംഗം എം.എ. ബേബി. ലൈബ്രറി കൗൺസിൽ വിവിധ സംഘടനകളുടെ സഹകരണത്തോടെ സംഘടിപ്പിച്ച ഫിദൽ കാസ്ട്രോ അനുസ്മരണവും ഫാസിസ്റ്റ് വിരുദ്ധ കൂട്ടായ്മയും ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. അതുകൊണ്ടുതന്നെ അർഥവത്തായ പരിപാടിയാണു ഫിദലിനെ അനുസ്മരിക്കുമ്പോൾ എംടിക്കും കമലിനും ഐക്യദാർഡ്യം പ്രഖ്യാപിക്കുന്നത്. നോട്ടുനിരോധനത്തിന്റെ ദുരിതം പറഞ്ഞതിനാണ് എംടിയെ പോലുള്ള ലോക ശ്രദ്ധേയമായ എഴുത്തുകാർക്കെതിരേ വർഗീയശക്‌തികൾ ഉറഞ്ഞുതുള്ളുന്നത്.

യഥാർഥത്തിൽ വർഗീയ ശക്‌തികളുടെ പ്രതികരണം എംടിക്കും കമലിനും അഭിമാനിക്കാം. കാരണം അവർ നടത്തിയ പ്രവർത്തനം വഴി വർഗീയശക്‌തികൾക്കെതിരെ ജനമനസുണരാൻ കാരണമായി. സ്വാതന്ത്ര്യത്തിനു നേരെയുള്ള ഫാസിസ്റ്റ് ശക്‌തികൾക്കെതിരെയുള്ള കടന്നുകയറ്റത്തെ കടിഞ്ഞാണിടാൻ വ്യാപകമായ പ്രതിരോധം ഉയർന്നുവരണമെന്നും ബേബി പറഞ്ഞു.