നഷ്‌ടമായതു കോണ്‍ഗ്രസിലെ തറവാട്ട് കാരണവരെ: വി.ഡി. സതീശന്‍
Saturday, June 7, 2025 1:48 AM IST
കൊച്ചി: തെന്നല ബാലകൃഷ്ണ പിള്ളയുടെ വേര്‍പാടിലൂടെ കോണ്‍ഗ്രസിനു തറവാട്ട് കാരണവരെയാണു നഷ്‌ടമായതെന്ന് പ്രതിപക്ഷനേതാവ് വി.ഡി. സതീശന്‍.
പാര്‍ട്ടിക്കു പ്രതിസന്ധിയുണ്ടായ ഘട്ടങ്ങളിലെല്ലാം അതു പരിഹരിക്കാന്‍ അദ്ദേഹത്തെയാണു നിയോഗിച്ചിരുന്നത്. ഏതു പ്രതിസന്ധിയെയും പരിഹരിക്കാന്‍ കഴിയുന്ന പക്വവും സ്‌നേഹപൂര്‍ണവുമായ സമീപനം അദ്ദേഹത്തിനുണ്ടായിരുന്നു.
അദ്ദേഹം പറഞ്ഞാല്‍ കോണ്‍ഗ്രസിലെ കെ. കരുണാകരനും എ.കെ. ആന്‍റണിയും ഉള്‍പ്പെടെയുള്ള ഏതു നേതാക്കളും പൂര്‍ണമായും അംഗീകരിക്കുമായിരുന്നു. അദ്ദേഹത്തിന്‍റെ ഉപദേശങ്ങള്‍ തങ്ങളുടെയെല്ലാം രാഷ്‌ട്രീയജീവിത വളർച്ചയില്‍ വലിയ പങ്കു വഹിച്ചിട്ടുണ്ട്. ഏതു വിഷമവും പങ്കുവയ്ക്കാന്‍ കഴിയുന്ന കുടുംബത്തിലെ കാരണവരെ പോലെയായിരുന്നുവെന്നും സതീശന്‍ പറഞ്ഞു.