താമരശേരി ചുരത്തില് വാഹനാപകടം; കണ്ടൈനര് ലോറി കൊക്കയില് വീഴാതെ തലനാരിഴയ്ക്ക് രക്ഷപെട്ടു
Sunday, August 31, 2025 1:56 PM IST
കോഴിക്കോട്: താമരശേരി ചുരത്തില് വാഹനാപകടം. നിയന്ത്രണം വിട്ട് സംരക്ഷണ ഭിത്തി തകര്ത്ത കണ്ടൈനര് ലോറി കൊക്കയില് വീഴാതെ തലനാരിഴയ്ക്ക് രക്ഷപെട്ടു.
ലോറിയില് രണ്ടു പേര് ഉണ്ടായിരുന്നു, രണ്ടുപേരെയും സുരക്ഷിതമായി പോലീസും യാത്രക്കാരും ചേര്ന്ന് പുറത്തിറക്കി. കോഴിക്കോട് ഭാഗത്തേക്ക് വരികയായിരുന്നു ലോറി .
ഞായറാഴ്ച ഉച്ചയോടെയാണ് സംഭവം. ചുരമിറങ്ങുന്നതിനിടെയാണ് കണ്ടെയ്നർ ഒന്പതാം വളവിന് സമീപം അപകടത്തില്പ്പെട്ടത്.
സംരക്ഷണ ഭിത്തി തകര്ത്ത വാഹനത്തിന്റെ മുന്ഭാഗത്തെ ചക്രങ്ങള് രണ്ടും വലിയ താഴ്ചയുള്ള കൊക്കയുടെ ഭാഗത്ത് പുറത്താണ് ഉള്ളത്. അപകടത്തെ തുടര്ന്ന് ഇതുവഴിയുള്ള ഗതാഗതം തടസപ്പെട്ടു.