പ്രതീകാത്മക ചിത്രം
ബൈക്ക് പ്രേമികളുടെ പ്രിയപ്പെട്ട ട്രയംഫ് സ്ട്രീറ്റ് ട്രിപ്പിൾ പുതിയ രൂപത്തിൽ എത്തിയിരിക്കുകയാണ്. 2027 മോഡൽ സ്ട്രീറ്റ് ട്രിപ്പിൾ 798 RS നെ കമ്പനി ഇന്ത്യയിൽ അവതരിപ്പിച്ചു. 14.39 ലക്ഷം രൂപയാണ് എക്സ് ഷോറൂം വില. ട്രയംഫ് ഇന്ത്യയുടെ ഔദ്യോഗിക വെബ്സൈറ്റിൽ ഈ മോഡൽ ഇതിനകം ലിസ്റ്റ് ചെയ്തിട്ടുണ്ട്.
ബൈക്കിന്റെ ഏറ്റവും വലിയ പ്രത്യേകത പുതിയ എൻജിനാണ്. പഴയ 765 സിസി എൻജിന് പകരം ഇനി 798 സിസി ത്രീ സിലിണ്ടർ എൻജിനാണ് വരുന്നത്. ഇത് 133 ബിഎച്ച്പി പവറും 86 എൻഎം ടോർക്കും ഉത്പാദിപ്പിക്കും.
എൻജിൻ ശേഷി കൂടിയെങ്കിലും ബൈക്കിന്റെ ഭാരം അഞ്ച്കിലോ കുറഞ്ഞു എന്നാണ് കമ്പനി അവകാശപ്പെടുന്നത്. 183 കിലോയാണ് ഇതിന്റെ വെറ്റ് വെയ്റ്റ്.പുതിയ അലുമിനിയം ഫ്രെയിം, സബ് ഫ്രെയിം, സ്വിംഗ് ആം എന്നിവയും അപ്ഗ്രേഡ് ചെയ്ത സസ്പെൻഷനും ബ്രെംബോ ബ്രേക്കുകളും ബൈക്കിന്റെ ഹാൻഡ്ലിങ്ങും സേഫ്റ്റിയും വർധിപ്പിക്കുന്നു.
സാങ്കേതികവിദ്യയിലും വലിയ മുന്നേറ്റമുണ്ട്. ആപ്പിൾ കാർപ്ലേയും ആൻഡ്രോയ്ഡ് ഓട്ടോയും സപ്പോർട്ട് ചെയ്യുന്ന പുതിയ 7 ഇഞ്ച് ടച്ച്സ്ക്രീൻ ഇൻസ്ട്രുമെന്റ് കൺസോളാണ് മറ്റൊരു ഹൈലൈറ്റ്.കരുത്തും സ്റ്റൈലും ടെക്നോളജിയും ഒത്തുചേർന്ന പുതിയ സ്ട്രീറ്റ് ട്രിപ്പിൾ 798 RS മിഡിൽവെയ്റ്റ് നേക്കഡ് ബൈക്ക് ശ്രേണിയിൽ പുതിയ തരംഗം സൃഷ്ടിക്കുമെന്നാണ് പ്രതീക്ഷ.