കുറ്റിച്ചൽ: മലയോര ഹൈവേയിൽ ഉൾപ്പെടുന്ന കുറ്റിച്ചൽ-ആര്യനാട് റോഡിൽ കാരിയോട് ധർമ ശാസ്താക്ഷേത്രത്തിനു മുന്നിൽ പൈപ്പിടാനായി റോഡിനു കുറുകേ ജല അതോറിറ്റി എടുത്ത കുഴി അപകടങ്ങൾക്കിടയാക്കുന്നു.
പണി നടത്തിയശേഷം മെറ്റലും മണ്ണും മാത്രമിട്ടു നികത്തിയ നീളത്തിലുള്ള കുഴി തുടർച്ചയായ മഴയിൽ വീണ്ടും ആഴത്തിലുള്ളതായിരിക്കുകയാണ്. റോഡിന് കുറുകെയുള്ള ചാലിനു സമാനമായ കുഴിയിലൂടെ വെള്ളം കുത്തിയൊലിക്കുന്നുണ്ട്. സ്ഥിരം യാത്രചെയ്യുന്നവർക്ക് ഇവിടെ കുഴിയുണ്ടെന്ന് അറിയാമെങ്കിലും മറ്റുള്ള വാഹനയാത്രക്കാർ ഇക്കാര്യം അറിയാതെ ഇവിടെയെത്തി അപകടത്തിൽപ്പെടുന്നത് പതിവായിരിക്കുകയാണ്.
ഇരുചക്ര വാഹന യാത്രക്കാരാണ് കൂടുതലും അപകടത്തിൽപ്പെടുന്നത്. പലതവണ ഇവിടെ മെറ്റൽ നിരത്തിയെങ്കിലും മഴയിൽ പഴയപടിയാകുന്നു. എത്രയും വേഗം ഇവിടം ടാർ ചെയ്തില്ലെങ്കിൽ വലിയ അപകടങ്ങൾക്കിടയാക്കുമെന്ന് ഓട്ടോറിക്ഷാ ഡ്രൈവർമാർ പറയുന്നു.