വടക്കഞ്ചേരി: ജനങ്ങളുടെ പരാതികൾ സ്വീകരിക്കാനും പരിഹാര നടപടികൾക്കുമായി ഡിവിഷന്റെ സെന്ററിൽ സ്വന്തം ചെലവിൽ ഓഫീസ് തുറന്ന് അഞ്ചുമൂർത്തിമംഗലത്തെ ബ്ലോക്ക് മെന്പർ ശ്രീനാഥ് വെട്ടത്ത്.
നായരങ്ങാടിയിലാണ് ഓഫീസ് തുറന്നിട്ടുളളത്. ഓഫീസ് ഉദ്ഘാടനം വടക്കഞ്ചേരി പഞ്ചായത്ത് പ്രസിഡന്റ് സി.പ്രസാദ് നിർവഹിച്ചു. വൈസ് പ്രസിഡന്റ് ശശികല, ജനപ്രതിനിധികൾ, നേതാക്കൾ, നാട്ടുകാർ പങ്കെടുത്തു. രാവിലെ പത്തുമുതൽ വൈകുന്നേരം നാലു വരെ ഓഫീസ് പ്രവർത്തിക്കുമെന്ന് മെംബർ ശ്രീനാഥ് പറഞ്ഞു.
ബ്ലോക്ക് പഞ്ചായത്തിൽനിന്നും ജനങ്ങൾക്ക് ലഭിക്കേണ്ട എല്ലാ ആനുകൂല്യങ്ങൾക്കുമുള്ള അപേക്ഷ സമർപ്പിക്കാനും മറ്റു പരാതി പരിഹാരങ്ങൾക്കും ഓഫീസ് പ്രയോജനപ്പെടുത്താനാണ് മെന്പറുടെ തീരുമാനം. എല്ലാ സേവനങ്ങളും സൗജന്യമാണെന്ന് എഴുതിവച്ചിട്ടുണ്ട്. പത്തുകിലോമീറ്റർ ദൂരമുള്ള ബ്ലോക്ക് ഓഫീസിലേക്ക് പോകാനുള്ള ധനനഷ്ടവും സമയനഷ്ടവും ഇതുവഴി ജനങ്ങൾക്ക് ഇല്ലാതാക്കാനാകും.
Tags : nattu visheshsam Block Panchayat