ഉദയംപേരൂർ: ഉദയംപേരൂരിൽ കണ്ടനാട് പാടശേഖരത്തിന് തീപിടിച്ചത് അഗ്നിരക്ഷാസേനയെത്തി അണച്ചു. പഞ്ചായത്തിലെ കണ്ടനാട് ഭാഗത്ത് വാർഡ് നാലിൽപ്പെട്ട 38 ഏക്കറോളം വരുന്ന കരിമാത്ത് പാടശേഖരത്തിലുള്ള ചതുപ്പ് നിലത്തിലെ പുല്ലിനും കാടിനുമാണ് ഇന്നലെ ഉച്ചയ്ക്ക് 1.30 ഓടെ തീപിടിച്ചത്.
വിവരമറിഞ്ഞ് സ്ഥലത്തെത്തിയ തൃപ്പൂണിത്തുറ അഗ്നിരക്ഷാ നിലയത്തിലെ വാഹനത്തിന്, തീപിടിച്ച സ്ഥലത്തേയ്ക്ക് കടന്ന് ചെല്ലാൻ കഴിയാതിരുന്നതോടെ അഗ്നിരക്ഷാസേനാ ഉദ്യോഗസ്ഥർ ചതുപ്പിലിറങ്ങി ഫയർ ബ്രേക്ക് ഉണ്ടാക്കിയും ഫയർ ബീറ്റ് ഉപയോഗിച്ചും തീയണച്ച് അപകട സാധ്യത പൂർണമായി ഒഴിവാക്കുകയായിരുന്നു.
ഫയർ ആൻഡ് റെസ്ക്യൂ ഓഫീസർമാരായ വി.വൈ. ഷമീർ, പോൾ മാത്യു, വിഷ്ണു, കണ്ണൻ, ഹോം ഗാർഡുമാരായ വസന്ത്, ബിജു വർഗീസ് എന്നിവരടങ്ങിയ സംഘവും, ബ്ലോക്ക് അംഗം മെർലിൻ ജോസഫും നാട്ടുകാരും രക്ഷാപ്രവർത്തനത്തിൽ പങ്കുചേർന്നു.
Tags : nattu vishesham Firefighters paddy field Udayamperoor