അറസ്റ്റിലായ സെൽവി, ആനന്ദ്.
കോയമ്പത്തൂർ: ഓൺലൈൻ സാമ്പത്തിക തട്ടിപ്പുകൾക്കായി വ്യാജ ബാങ്ക് അക്കൗണ്ടുകൾ സംഘടിപ്പിച്ച രണ്ടുപേരെ കോയമ്പത്തൂർ സൈബർ ക്രൈം പൊലിസ് അറസ്റ്റ് ചെയ്തു.
രാമനാഥപുരം സ്വദേശിനിയായ സെൽവി, ശിവഗംഗ സ്വദേശിയായ ആനന്ദ് എന്നിവരാണ് അറസ്റ്റിലായത്. ഓൺലൈൻ തട്ടിപ്പിലൂടെ ലഭിക്കുന്ന പണം കൈമാറുന്നതിനായി ബാങ്ക് അക്കൗണ്ടുകൾ തുറക്കാൻ ആളുകളെ ഇവർ ഏർപ്പെടുത്തിയിരുന്നതായി പൊലിസ് കണ്ടെത്തി.
പ്രതികളിൽനിന്ന് 70 ബാങ്ക് പാസ്ബുക്കുകൾ, 25 ഡെബിറ്റ് കാർഡുകൾ, രണ്ട് മൊബൈൽ ഫോണുകൾ, എട്ട് സിം കാർഡുകൾ എന്നിവ പിടിച്ചെടുത്തു. ആധാർ വിവരങ്ങളും സിം കാർഡുകളും നൽകി ബാങ്ക് അക്കൗണ്ടുകൾ തുറക്കാൻ ആളുകൾക്ക് 8,000 മുതൽ 10,000 രൂപ വരെ പ്രതിഫലം നൽകിയിരുന്നു.
പിന്നീട് ഈ അക്കൗണ്ടുകൾ തട്ടിപ്പുകാർ നിയന്ത്രിച്ച് ഓൺലൈൻ തട്ടിപ്പിലൂടെ ലഭിക്കുന്ന പണം സ്വീകരിക്കാൻ ഉപയോഗിക്കുകയായിരുന്നു.പ്രതികൾക്ക് സാമ്പത്തിക സഹായം നൽകിയവരെ കണ്ടെത്തുന്നതിനായി പൊലിസ് അന്വേഷണം തുടരുകയാണ്.
Tags : people arrested Deepika DeepikaNewspaper BreakingNews Two people arrested for operating a network fake bank