കെ. രാജന് എംഎല്എ
കോഴിക്കോട്: സംഘപരിവാര് വിധേയത്വത്തിന്റെ എല്ലാ വിധത്തിലുള്ള ഇടപെടലുകളും സംസ്ഥാന സര്ക്കാര് നിരന്തരം പ്രദര്ശിപ്പിച്ചുകൊണ്ടിരിക്കുകയാണെന്ന് സിപിഐ സംസ്ഥാന സെക്രട്ടേറിയറ്റ് അംഗം കെ. രാജന് എംഎല്എ.
ആര്എസ്എസ് വിധേയത്വമുള്ള ഒരു സംഘടന തീരുമാനിക്കുന്ന ചോദ്യങ്ങള്ക്ക് കുട്ടികളെക്കൊണ്ട് മറുപടി പറയിപ്പിക്കാന് പറ്റുന്ന വിധത്തിലാണ് ബാലഗോകുലത്തിന്റെ മയില്പ്പീലി മാസിക യംഗ് സ്കോളര്ഷിപ്പ് പരീക്ഷ നടത്തിയത്. അതിന്റെ രണ്ടുതലം കഴിഞ്ഞിട്ടാണ്, മാധ്യമങ്ങള് ശ്രദ്ധയില് പെടുത്തിയപ്പോള് മാത്രം പൊതുവിദ്യാഭ്യാസ മന്ത്രി വിഷയം അറിഞ്ഞതെന്നത് അപമാനകരമാണ്.
മന്ത്രിയുടെ തലയ്ക്കുമീതെ ആരാണ് സംഘപരിവാരത്തിന്റെ ഏജന്റായി ഇങ്ങനെ ചോദ്യം ചോദിക്കുന്നതെന്ന പ്രശ്നം ഗൗരവമായി എടുക്കേണ്ടതുണ്ടെന്നും കെ. രാജന് കോഴിക്കോട്ട് വാര്ത്താസമ്മേളനത്തില് പറഞ്ഞു.
യാത്രയാകുന്ന ഗവര്ണറെ കെട്ടിപ്പിടിച്ച് മുഖ്യമന്ത്രി കാണിച്ച വിധേയത്വം കേരളം സമീപകാലത്ത് കണ്ട ഏറ്റവും വലിയ അശ്ലീല രാഷ്ട്രീയമാണ്. യഥാര്ഥത്തില് പവര് കട്ട് ഉണ്ടോ ഇല്ലയോ, വൈദ്യുതി ക്ഷാമം ഉണ്ടോ ഇല്ലയോ എന്നതിലല്ല തര്ക്കം. കേരളത്തില് ഇപ്പോള് യഥാര്ത്ഥ പവര്കട്ട് ക്യാബിനറ്റിലാണ് ഉള്ളത്. ആകെ പവര് ഉള്ളത് മുഖ്യമന്ത്രിക്ക് മാത്രമാണ്. മന്ത്രിസഭയ്ക്ക് കൂട്ടുത്തരവാദിത്വം ഇല്ലാത്ത അവസ്ഥയാണുള്ളതെന്നും കെ. രാജന് പറഞ്ഞു.
Tags : K. Rajan Deepika DeepikaNewspaper BreakingNews NewsUpdate 'Peacock Feather Test