Deepika
ADVERTISEMENT
ജോഷി മാത്യു
കോട്ടയം: കോട്ടയത്തിന്‍റെ സാംസ്‌കാരിക, സിനിമാ മേഖലയിലെ അഭിമാന സ്തംഭമായ കെ.ആര്‍. നാരായണന്‍ ഫിലിം ഇന്‍സ്റ്റിറ്റ്യൂട്ടിന്‍റെ പുതിയ ചെയര്‍മാനായി കോട്ടയംകാരുടെ സ്വന്തം ജോഷി മാത്യു തെരഞ്ഞെടുക്കപ്പെട്ടിരിക്കുന്നു. ദേശീയ-സംസ്ഥാന ചലച്ചിത്ര പുരസ്‌കാരങ്ങളും വിവിധ നിരൂപക അവാര്‍ഡുകളും സ്വന്തമാക്കിയിട്ടുള്ള ജോഷി മാത്യുവിന്‍റെ സിനിമാ രംഗത്തെ സമഗ്ര സംഭാവനകള്‍ മുന്‍നിര്‍ത്തിയാണ് നിയമനം. മുന്‍മുഖ്യമന്ത്രി ഉമ്മന്‍ ചാണ്ടിക്കുശേഷം അടൂര്‍ ഗോപാലകൃഷ്ണന്‍, സയീദ് അഖ്തര്‍ മിര്‍സ തുടങ്ങിയ മഹാപ്രതിഭകള്‍ക്കു പിൻഗാമിയായാണ് ചുമതലയേല്‍ക്കുന്നത്. പുതിയ ദൗത്യത്തെക്കുറിച്ച് ജോഷി മാത്യു ദീപിക ഗസ്റ്റ് റൂമിൽ മനസ് തുറന്നപ്പോള്‍.
പുതിയ പദവിയെ എങ്ങനെ കാണുന്നു ?
ഏറെ പ്രതീക്ഷയോടെയാണ് പുതിയ പദവിയെ കാണുന്നത്. വിദ്യാര്‍ഥികളും അക്കാഡമിസ്റ്റുകളും പ്രതീക്ഷയിലാണ്. വിവാദങ്ങള്‍ ഏറെ തളര്‍ത്തിയ കെ.ആര്‍. നാരായണന്‍ നാഷണല്‍ ഇന്‍സ്റ്റിറ്റ്യൂട്ട് ഓഫ് വിഷ്വല്‍ സയന്‍സ് ആന്‍ഡ് ആര്‍ട്‌സിനെ രാജ്യത്തെ ഒന്നാമത്തെ ഫിലിം ഇന്‍സ്റ്റിറ്റ്യൂട്ടാക്കുകയാണ് ലക്ഷ്യം.
ഇന്‍സ്റ്റിറ്റ്യൂട്ടിന്‍റെ ആരംഭകാലം ?
ആരംഭകാലം മുതല്‍ ഇന്‍സ്റ്റിറ്റ്യൂട്ടിന്‍റെ നിര്‍മാണത്തില്‍ പങ്കാളിയാണ്. മുന്‍മുഖ്യമന്ത്രി ഉമ്മന്‍ ചാണ്ടിയാണ് ആദ്യത്തെ ചെയര്‍മാന്‍. അന്ന് വൈസ്‌ചെയര്‍മാനായി പ്രവര്‍ത്തിക്കാനായി. കെട്ടിട നിര്‍മാണം ആരംഭിച്ചപ്പോള്‍ മുതല്‍ ഉദ്ഘാടനം നടക്കുന്നതുവരെയുള്ള എല്ലാ പ്രവര്‍ത്തനങ്ങളിലും പങ്കാളിയായിരുന്നു. യാതൊരു പാരിതോഷികവും കൈപ്പറ്റാതെ തന്‍റെ കഴിവുകള്‍ അവിടെ വിനിയോഗിച്ചു. ആര്‍കിടെക്ട് ശങ്കറിനൊപ്പം സമര്‍ഥരായ ടെക്‌നിഷ്യന്മാരെ ഉള്‍പ്പെടുത്തിയാണു കെട്ടിടനിര്‍മാണം പൂര്‍ത്തിയാക്കിയത്.
ഇന്‍സ്റ്റിറ്റ്യൂട്ടില്‍ ചെയ്യാന്‍ ഉദ്ദേശിക്കുന്നത് ?
രാജ്യത്തെ മികച്ച ഒന്നാമത്തെ ഇന്‍സ്റ്റിറ്റ്യൂട്ട് ആക്കണമെന്നാണ് ആഗ്രഹം. സിനിമ എല്ലാ കലകളും ചേര്‍ന്നതായതിനാല്‍ കള്‍ച്ചറല്‍ ഹബ് ആക്കണം. മികവുറ്റ കുട്ടികളെ വാര്‍ത്തെടുക്കാന്‍ നമുക്ക് കഴിയണം. പൂനെ, കൊല്‍ക്കത്ത, ചെന്നൈ ഫിലിം ഇന്‍സ്റ്റിറ്റ്യൂട്ടുകള്‍ പോലെ കോട്ടയം ഫിലിം ഇന്‍സ്റ്റിറ്റ്യൂട്ടിനെ ലോകപ്രസിദ്ധമാക്കണം. തെക്കുംതലയിലെ മനോഹരമായ ഗ്രാമാന്തരീക്ഷത്തിലുള്ള ഇന്‍സ്റ്റിറ്റ്യൂട്ടിന് ഒരുപാട് സാധ്യതകളുണ്ട്.
അക്കാദമിക് രംഗത്തെ മാറ്റങ്ങള്‍ ?
പ്രകൃതിയുമായി ചേര്‍ന്ന് പഠനം നടത്തുന്നതിന് ക്ലാസ് മുറികളില്‍നിന്നിറങ്ങി മരച്ചുവടുകളില്‍ ഇരുന്ന് പഠിക്കാനുള്ള സ്ഥലങ്ങള്‍ രൂപപ്പെടുത്തണം. 15 ഏക്കര്‍ വരുന്ന ഭൂപ്രദേശം ഇതിനായി വിനിയോഗിക്കും. കല്‍മണ്ഡപം, അരങ്ങേറ്റം നടത്താനുള്ള വേദികള്‍ എന്നിവ നിര്‍മിക്കണം.
നല്ല ഫാക്കൽറ്റികള്‍ നിലവിലുണ്ട്. അധികമായി വേണ്ടിവരുന്ന ഫാക്കല്‍റ്റികളെയും അക്കാഡമീഷ്യന്‍സിനെയും കുട്ടികളുമായി സംവാദം നടത്തുന്നതിനു ലഭ്യമാക്കാൻ പരിശ്രമിക്കും. ഫിലിം ഇന്‍ഡസ്ട്രിയില്‍നിന്നുള്ള പ്രമുഖരെ അവിടെ എത്തിക്കും. എല്ലാ സുകുമാരകലകളും നടത്താനുള്ള സൗകര്യമുണ്ട്. മറ്റ് അക്കാദമികളുമായി ചേര്‍ന്ന് സഹകരിച്ച് എല്ലാ കലകളും പരിശീലിപ്പിക്കും. ജനങ്ങള്‍ക്കുകൂടി മികച്ച സിനിമകള്‍ കാണാനുള്ള സൗകര്യം സജ്ജമാക്കും. ഇന്‍സ്റ്റിറ്റ്യൂട്ട് വിദ്യാര്‍ഥികള്‍ക്കുവേണ്ടിയുള്ളതാണ്. വിദ്യാര്‍ഥികള്‍ക്കായി കൂടുതല്‍ ആക്ടിവിറ്റികള്‍ സംഘടിപ്പിക്കും. ഉപകരണങ്ങള്‍ ആധുനികമാക്കുന്നതിനും പോരായ്മയുള്ളതു പരിഹരിക്കുന്നതിനും നടപടിയുണ്ടാകും. ഇതിനായി പ്രോജക്ട് തയാറാക്കും.
ഇന്‍സ്റ്റിറ്റ്യൂട്ടിന്‍റെ ഘടനമാറ്റത്തെക്കുറിച്ച് ?
സര്‍ക്കാരുമായി ആലോചിച്ച് ഇന്‍സ്റ്റിറ്റ്യൂട്ടിന്‍റെ ഘടന മാറ്റണം. കള്‍ച്ചറല്‍ ഹബ് ആക്കണം. മുഖ്യമന്ത്രി വി.ഡി. സതീശനും വകുപ്പ് മന്ത്രി റോജി എം. ജോണും പൂർണപിന്തുണ പ്രഖ്യാപിച്ചിട്ടുണ്ട്. ആവശ്യമായ ഫണ്ട് അനുവദിക്കുമെന്ന് പറഞ്ഞിട്ടുണ്ട്. എന്തൊക്കെ സഹായം ആവശ്യമുണ്ടോ അതെല്ലാം ചെയ്തുതരാമെന്ന് സര്‍ക്കാര്‍ വ്യക്തമാക്കിയിട്ടുണ്ട്. ഇന്‍സ്റ്റിറ്റ്യൂട്ടിലെ പ്രശ്‌നങ്ങളെപ്പറ്റി പഠിക്കും. പഠിച്ചതിനുശേഷം എല്ലാവരെയും ഒരുമിച്ചു കൊണ്ടുപോകാന്‍ ശ്രമിക്കും. കുറവുകള്‍ കണ്ടെത്തി പരിഹരിക്കുകയെന്നതാണ് ലക്ഷ്യം.
തയാറാക്കിയത്: ജോമി കുര്യാക്കോസ്
Tags : NattuVishesham DistrictNews
ADVERTISEMENT
ADVERTISEMENT
ADVERTISEMENT
ADVERTISEMENT
Contact Numbers :
+91 481 2566706, 2566707, 2566708
About Us Feedback Privacy Policy Terms and Conditions for Online Payment
E-paper LOGIN
LOGIN
Email
Facebook
Whatsapp
Linked In
Telegram