പ്രതീകാത്മക ചിത്രം
ഗാന്ധിനഗർ : മെഡിക്കൽ കോളജ് ആശുപത്രിയിലെ സിസിടിവികളിൽ ഭൂരിഭാഗവും തകരാറിലെന്ന് പരാതി. കഴിഞ്ഞ ദിവസം കാർഡിയോളജി ഒപി വിഭാഗത്തിന് സമീപത്തെ മാവിൻ ചുവട്ടിൽനിന്നു ഹെൽമെറ്റുകൾ മോഷണം പോയിരുന്നു. ഇതേത്തുടർന്ന് സിസിടിവികൾ പ്രവർത്തനക്ഷമമാക്കണമെന്ന ആവശ്യം ശക്തമായിരിക്കുകയാണ്.
വാഹന പാർക്കിംഗിലേതടക്കം പല കാമറകളും പ്രവർത്തന രഹിതമാണ്. പ്രവർത്തിക്കുന്നവയ്ക്ക് ആവശ്യമായ സ്റ്റോറേജ് കപ്പാസിറ്റിയും ഇല്ലെന്നു പറയപ്പെടുന്നു. മുൻ കാലങ്ങളിൽ ആശുപത്രി വളപ്പിൽനിന്നും ബൈക്കും ഹെൽമെറ്റുകളും നിരവധി തവണ മോഷണം പോയ സംഭവമുണ്ടായിട്ടുണ്ട്. തുടർന്ന് ആശുപത്രി വളപ്പിൽ സിസിടിവി കാമറകൾ സ്ഥാപിച്ചതോടെയാണ് മോഷണങ്ങൾ കുറഞ്ഞത്. നിലവിൽ
പലസ്ഥലങ്ങളിലെയും സിസിടിവി കാമറകൾ പ്രവർത്തിക്കാത്തത് മോഷണം സംബന്ധിച്ചുള്ള പരാതികളിൽ പരിശോധന നടത്താൻ പൊലിസിനെയും വലയ്ക്കുന്നുണ്ട്.
Tags : Nattuvishesham DistrictNews DeepikaNews