യുവകർഷക അവാർഡ് ജേതാവ് കൊളത്തൂരിലെ ശ്രീവിദ്യയുടെ നെൽപാടം വെള്ളക്കെട്ടിലമർന്നപ്പോൾ.
പൊയിനാച്ചി: പറിച്ചുനട്ട സമയത്തും കതിരണിയുമ്പോഴും മഴകിട്ടാതെ പൈപ്പുവെള്ളം കൊണ്ട് നനയ്ക്കേണ്ടിവന്ന നെൽച്ചെടികൾ വിളവെടുക്കാൻ കാലമായപ്പോൾ പെട്ടെന്നു പെയ്ത മഴയിൽ നിലംപൊത്തി. ആഴ്ചകളായി വിട്ടുനിന്ന മഴ കഴിഞ്ഞദിവസം ശക്തിയോടെ തിരിച്ചുവന്നപ്പോൾ ജില്ലയുടെ മിക്ക ഭാഗങ്ങളിലും നെൽവയലുകളിൽ വെള്ളംകയറിയ നിലയിലാണ്. കതിരുകൾ വെള്ളത്തിൽ കുതിർന്നു കിളിർക്കാതിരിക്കാൻ പെട്ടെന്നു കൊയ്തുതീർക്കേണ്ട അവസ്ഥയാണ്.
വെള്ളം കെട്ടിക്കിടക്കുന്ന നെൽപാടങ്ങളിൽ രാത്രികാലങ്ങളിൽ കാട്ടുപന്നികൾ പുളയ്ക്കാനെത്തുമെന്നതും കർഷകർക്ക് ഭീഷണിയാണ്. കാടെന്നോ നാടെന്നോ ഭേദമില്ലാതെ ജില്ലയുടെ മിക്ക ഭാഗങ്ങളിലും ഇവ പതിവുസാന്നിധ്യമായിക്കഴിഞ്ഞു.
കൊളത്തൂരിലെ സംസ്ഥാന യുവകർഷക അവാർഡ് ജേതാവ് ശ്രീവിദ്യ, രഘു, കുമാരൻ, ബാലൻ, തമ്പാൻ, രവി എന്നിവരുടെയെല്ലാം പാടങ്ങൾ വെള്ളക്കെട്ടിലമർന്ന നിലയാണ്. രണ്ടുദിവസം കൂടി മഴ തുടർന്നാൽ നെന്മണികൾ മുളച്ചുപൊങ്ങും. അതിനുമുമ്പ് എങ്ങനെ കൊയ്തുതീർക്കുമെന്നറിയാതെ ആശങ്കയിലാണ് എല്ലാവരും. പൂർണമായും മൂപ്പെത്തുന്നതിനുമുമ്പ് കൊയ്യേണ്ടിവരുന്നതുമൂലമുള്ള നഷ്ടവും സഹിക്കേണ്ടിവരും.
Tags : NattuVishesham DistrictNews